Juan 19

1Pilato ijliuye japo tokis ka inkimits'i ka ink'ajas'ni. 2Isimisie'ne jawa k'itienis ti ijwinisik'i ti iyonisi 'ate siujlie'e jika wonta ni anechiyas, ti 'yutieyisia'm jlaja jletik ja Jesús, i'yuyenisk'i'ne siojo lotakinie isiat. 3Yikiajlayisiap'ni ti iyoyis 'ate:

—¡Atejwila'a'm, Judíojos jika anechiyas!

Sekyi'i ti ipiejayis'ni jitiokio'we.

4Pilato yapilie'eje kisie'e, ijwijlam'ne japo Judíojos ti iyo'ate:

—'Yejne'n, aton kisie'e, 'nakayeyi ti ja'najanayi ti je a'we'en paka jitisa' siu'nie i'nio'.

5Sekyi'i tiniamaja'ne kisie'e ja Jesús, k'itienis takapajlatajak'i'ni jlaja jletik, ti'wujienaja'ni siojo lotakinie isiat. Pilato iyo'ne 'ate:

—¡'Yejne'n, ekiaj'lase siu'nie i'nio'!

6Siojopo pa'yijis jika anechiyasas, siu'neje japo i'yena jlaja 'najla'wet, ti i'winayits'i ilia'm, iyoyis'ne 'ate ti tanisi ape'e:

—¡K'iejwat'e japa cruz! ¡K'iejwat'e japa cruz!

Pilato iyo'ne 'ate:

—Kima'yi asa'am, k'iejwata'yi japa cruz, siuti ya'am je a'we'en paka jitisa'.

7Judíojos isiujlie ja Pilato ti iyoyis 'ate:

—Po' na saka'neyasajnaye, 'yu'we ka tiliana siu'nie i'nio', kajeyepa siunie saka'neyasajnaye iyo jitisa' ti ijwi'il ka Sinia' jlasa'.#Lev 24.16

8Pilato ipi'yayi ti kia'iyo, kat'aja ti jnots'ijni. 9Yapi'ne 'wuk kiajwe, i'yasen'ne ja Jesús ti iyo'ate:

—¿Tepi jitiajli?

Jesús je iyo ka inkiujlie. 10Pilato i'yase'n ti iyo'ate:

—¿Jop'an ka je akiulk'i'm? ¿Je 'najane ti it'iuni po' ka 'yakajliu'n ajap ka ink'iejwata'a japa cruz, ni'ne ka iyo ka iniujwa'n kisie'e?

11Sekyi'i ja Jesús isiujlie ti iyo'ate:

—Siunie at'oni ti yi'a, ka je intal Siniayi je 'najane paka wone ka siniujwa'n kisie'e. Jak je iyoyiji'ni siunie ti sekial ka ama ka si'ye'en, jitis 'yaka'm ape'e siunie iyo ni ates.

12Sekyi'i ja Pilato ti iyoyetajayi'n siupi ka inwone ka inojwa'n kisie'e ja Jesús. Siojopo Judíojos iyo'ne 'ate:

—¡Ka anojwantana'a kisie'e, ka akojwayena'a ni saka anechiyas Roma jlele! ¡Kajeyepa siunie iniwojwa'n anechiyasa' iyoye'ate ti jla'am ti teje'yi ilia'm ni saka anechiyas!

13Siuti Pilato ipi'yayeyi, takajlunieyi ja Jesús ka titiona kisie'e. Sekyi'i ti tanayi ti ti'yena siupa jitis iyo, yi'i siojo tenaja'a'ni napo ti kia'iyo, Hebréojos ji'lij iyo'ate Gabata, ti iyo'ate Sisajas ti T'otata Ape'e. 14Jakiak siojokia jloma ti je toj'we siujlie'e Pascua, siukia ti 'najlikisie. Pilato iyone'ne 'ate japo Judíojos:

—¡'Yenajyi'n ni aska anechiyas!

15Iyoyis'ne 'ate ti tanisi ape'e:

—¡La'an! ¡La'an! ¡K'iejwat'e japa cruz!

Pilato i'yasen'ne ti iyo'ate:

—Jlam'ne asa'am ti aska anechiyas, ¿jiwoyeyi'iji ka ts'iejwat'e japa cruz?

Siojopo pa'yijis jika anechiyasas isiujlie ti iyo'ate:

—¡Lajk'ipa ka jikiechaye ka saka anechiyasa', ijwienjli jla'am ni saka anechiyas ni Roma jlele!

16Sekyi'i'ne ja Pilato ti yikiajlayi japo i'nio' ja Jesús ka ink'iejwatits'i jlaja cruz, 'yina yamisi'ne.

Jesús ti tik'iejwata'a japa cruz

(Mt 27.32-44; Mc 15.21-32; Lc 23.26-43)

17Jesús titilkinaja'ne jlaja jika cruz, ti tikiniejayi. Paj ti yiyeyi siojo ajnat jle' iyo'ate Ijnetik Jleli 'Wet, siunapo Hebréojos iyonisi 'ate Gólgota. 18Sek tena'a ti tik'iejwata'a jlaja cruz, tijwanaja'a siojopo times, ijwienjli ja titiujmataja ji'lieme ijwienjli 'neje siojo titiujmataja jijweyeje. 19Pilato takajlunie'ne ka tilisanaja siukiwa inamtis ka tena'a jlaja jika cruz ka iwo'ate, “JESÚS TI NAZARET JLELE, JUDÍOJOS JIKA ANECHIYAS”. 20Siojowa inamtis tilisanaja tajla'm napo Hebréojos, Roma jlele, Griego ji'lij. Jak je iyoyiji japo Judíojos i'yen'ni 'ne; siojo tena'a ja Jesús ti tik'iejwata'a jlaja cruz je tojwape'n jlaja isi'. 21Siojopo pa'yijis jika anechiyasas ijliuye ja Pilato ti iyo'ate:

—Ká awonena'a 'ate, “Judíojos jika anechiyas”, wonena'a jla'am 'ate, “Inijwe'el jla'am ka Judíojos jika anechiyasa'”.

22'Yina Pilato isiujlie ti iyo'ate:

—¡Siunie 'ete'e, yi'i ni yi'i!

23Siojopo tokis, ti itimayisi ti its'iejwatits'i jlaja cruz, inijnojlietayisi kiwa ji'wuye ja Jesús ti inik'isajasi, ti ijniujli ki nojwa'm ti ijniujlits'i. Isimisie'ne siukia ji'wu' siukia isaja tatijla wek jikiusk'i, 24iyoyis'ne 'ate ti initajlatayisi:

—Je 'esiji ka iyok jijwala', jla'am ijiate jla'am ka iliakijnie ape'e, jajnewite pi jajnewite pak jikimitayijijna'a.

Sekyi'i ti yiye kisie'e siuniwa inamtis t'ipi ti iyo'ate:

“Inik'isajasi kiwa ji'wuye,

tiliakinits'i ape'e siukia ji'wu' tatijla wek jikiusk'i.”#Sal 22.18

Kiak siukia iniwonisi japo tokis.

25Siujlieja Jesús jlet sekyi'i, yi'i jlaja cruz, siu'neje jlaja jikitia jla'am jlaja jlet, siu'neje jlaja María Cleofas jik'iemjla, siu'neje jlaja María Magdala jleliki. 26Siuti Jesús i'winayi jlaja jlet ti yijap siojo t'eyasanik ti wuj ti yimi'n, i'yase'ni jlaja jlet ti iyo'ate:

—¡Asejnia, wone asa' naka!

27Sekyi'i i'yase'ni siojo t'eyasanik ti iyo'ate:

—¡Wone eta' janaka!

Jakayik'i'ne siojo Jesús t'eyasanik María ijioyi'ne ji'wete.

Jesús 'ya'al

(Mt 27.45-56; Mc 15.33-41; Lc 23.44-49)

28Yam'ne 'niji kiwaka, Jesús 'yijene pi iyone ti itime wikie'eyi siukia iyo. Iyo'ne 'ate:

—Siki'im.

Siuti kia'iyo, ti iyojonk'iye ka ijiatak'iyi siuniwa Sinia' jlamtis.#Sal 69.21

29'Yina po' siojo tetik wuj tipoyi ki at'es ti tosijyi. T'otiejam'ne japa inkats'ili jak at'es, ti tits'ijwana'a ki a'la' jle' iyo'ate hisopo, sekyi'i tena'ne jikiwiti. 30Jesús its'iujwam'ne, sekyi'i iyo'ne 'ate:

—'Esiji, atejwi.

Sekyi'i jletik iniajmana isia'm, ti 'yala.

Ijiawo 'yits'e jlawe'e pa Jesús

31Jakiak siojokia jloma ti tome'e jla'a i'nio 'wanjlijyi'n. Siojopo Judíojos ti anechiyasas je iyoyisink'iye papo i'nio mases ka 'wanjliyek'i pijia'm ape'e puwa jika crusis, jla'yi ka neyi puwa ka jlomas 'nak nojwaja'm. 'Yina siojokia jloma i'nio 'wanjlijyi'n, ijyiwitajam'ni jakia Pascua, jakiak jloma ti wuj ti tilisana. It'imina'ne ti ijioyisi ja Pilato, ti iyonisi 'ate:

—Kajlunie siunapo yi'ik'i pijia'm niwa jika crusis ka jlekijna akiajatajiamk'i, ja titimaja ka tenajana'a ajnat'e.

32'Yina Pilato ijliuye'ne japo tokis ka kiak inwonisi. Yiyi ti kiak iyonayisiji iniajnatis'ne siojo ti tiniajnata ti tena pijia'm. Itimisi ti jlekijna isiajatamk'i, yamayisi'iji ja jikiecha tome jlep'e ja Jesús. 33Ti ijliasayisi ja Jesús, i'winis'ne ti pajk'i ti 'ya'al. Jak je iyo'ni ka jlekijna inkiajatamk'i.

34Siojo tokis kiecha isiene jlaja jika k'ok ti 'yita'm ja Jesús, ts'e jlawe'e. 'Yina 'woyis siu'neje ki i'niat ki tajla'm ti itiya kisie'e. 35Siunie i'nio' i'winaja, nak ijwi'il ti yamtik'i, 'yina ijiatk'i siunie iyo niwa jlamtis. Kia'iyo 'yijene pi iyone ti ijiatk'i siunie yamtiyi, ti iyo ka je akakiuye. 36Lapakawo ka kiak je iwo ti yiyi ti iyo ka ine kisie'e siuniwa inamtis t'ipi ti iyo'ate, “Ja ke ine'yina'a paka jleliye ka tikiajataja'm.”#Ex 12.46; Núm 9.12; Sal 34.20; 1 Co 5.7 37Iyo 'neje 'ate niwa inamtis t'ipi, “Jla'am jan'yenisi'ni siukia 'yitisia'm.”#Zac 12.10; Apoc 1.7

Jesús ti titijikie k'iye

(Mt 27.57-61; Mc 15.42-47)

38Pope ja i'nio' jle' iyo'ate José, Arimatea jlele, yamk'ijin'ni ja Jesús, 'yina inijweki kajeyepa ti je ijwiye japo Judíojos siojopo anechiyasas. Ijioyi'ni ja Pilato ti iyo'ate:

—Ke enk'i'm ka yiki ki t'ajwes masa ki Jesús.

Pilato iyo'ne 'ate:

—Ijiatp'ane, mayi.

'Yina José yami'ni, sekyi'i ti yamayi. 39Nicodemo kia'iyo 'nes 'neje, siojo ijioyipi ja Jesús ti ajnaj.#Jn 3.1-2 Ti itiuni kiwa t'ajwes ki Jesús najapeji ti itijwa'm niwa sikioye pi jikiojieti t'ipi siojo jini inkajk'i, mirra ti tijlijnataja ki áloe.#19.39 Jini inkajk'i ti tajla jla'am janak a'la' ti kiak jle' ti isimisie siupapo sitise'l t'ipi ti isia'yi ape'e pa ti 'yalta ti je isiutieniti, ti tijlijnataja pi jikiecha a'la' t'e 'neje ti kia'iyo jini inkajk'i (19.39) 40Siojo José jla'yi ja Nicodemo isimisie'ne ja lotakiniewa ti yikiajlisi wita'm kiwa t'ajwes masa ki Jesús. Ijwienisi'i 'ne siojo jini inkajk'i, iyonisi 'ate napo Judíojos, ti itijis k'iye pi jikiecha masa ti 'yalata. 41'Yina po' siojo inwasok je tojwape'n siojo tena'a ja Jesús ti tik'iejwata'a jlaja cruz. Jaka siojo inwasok po' ja a'no' ti lajlijyi'ijyi kajeyepa ti ink'ie'. 42Sek tena'a'ne ki t'ajwes masa ja Jesús, kajeyepa ti je tojwa, jla'yi ti je toj'we siojokia jloma ti i'nio 'wanjlijyi'n.

Currently Selected:

Juan 19: CRT97

Highlight

Copy