Colosenses 1

Pablo itijwile papo Sinia' jilis

1-2Asampey i'lijwas ti jleyejyi jana Colósas, asa'am ti Sinia' jilists'ase'm ti je kak'emisiena. Ya'am Pablok'i'm, Sijwajieti Jesús jijliujwanikk'i'm jayo'ate, ti ajyi siunapo ti jlamt'iyijipe ti jikawos, 'yina tajle jla'am pa Sinia' ti kia'iyo. Ya'am jla'yi 'ni isiecha Timoteo ti ajlok'iase 'ni sip'esinik.

'Esiji ka Sinia' jikap'ijliuskiye siu'neje ni jikamankiye ine'yasap.

Pablo jinikanitieyi iwijnape k'iye pa Sinia' papo ijia

3Jak je iyoyiji ti awokietaja ni ts'ajlaye astepe'e, 'yina sinikanitieyi awenayi'ijyi pi Sinia', pi Jinia' pi Saka'niona Jesús ti Sijwajieti. 4Kajeyepa ti ajieye'ase'ni ti wuj ti astankiujnieye yiyi ti je kakiuye pi Sijwajieti Jesús, jla'yi ti ijiat ti i'namajayi wikie'eyi siunapo Sinia' jika kia'lis. 5Siunie astankiujnieye siu'neje ni asemijnaye tajle naka ni asnejejwiye ti jik'iuyeyeyijpe, niwaka Sinia' jlamtis ti je tak'emisie'n naka ni jika'niye ti 'es. Sek taj'leyi ti asnejejwiye po' ilia'm naka siunie pajk'i ti Sinia' itiejiete'n ask'ioye ts'iji poliyi.

6Naka ni siunie Sinia' jika'niye ti yi'ase. 'Nakayi ti'wena ti jlam yamjlijyi'n pet, ti iyo jlaye jayo, wikie'eyi ape'e 'ni ajnat, iyoye pet 'ate jiwoyeyi 'nakayi, tajlape ti k'iejli 'najanayi pi jiwonayi pi Sinia' ti takap'ijliuski, siu'neje ti ijiate ti imp'elisina'. 7'Yina siojo ti 'neyasanayijpe niwaka, jakape ja sikiecha ti kasts'amaja Epafras,#Col 4.12; Flm 23 'nakayi yamjliyi ti iniuyi'ase'm, jayo'ate iniuyits'em'ni ti akimajatajk'iji'n, Sijwajieti jikawo ti 'es. 8Jla'am ti iyo saka'niyeja', ti injwela siunie iyo ni asemijnaye ti jitiajlayiji siojopa Sinia' jikimet ti yi' aswa'am.

Pablo 'yejlane papo ijia pa Sinia'

9Ta'a ti awoki naka ti ajieye'ase'ni, je aleki ti 'ajlanaja'ni ti ajwelaja ni Sinia', 'nakayi ti jan'we'nase'm wikie'eyi siuniwa asosik iyo ka 'najane, siu'neje niwa iyo ka intant'ieje, sekjane'yi ka intant'iejayijijna'a siunie Sinia' iyo. 10Jak je iyoyiji siuti kiak jawoyeyi, sekjane'yi jawoyeyi siunie ji'niayi iyo napoka Saka'niona jilis, jla'yi ti janikanitie'ni ti kiak jawoyeyi ti jawoyeyi siunie 'es, ti jantajla'm siunie askijmaye. Sekjane'yi ka ijiatayijna'a ka intant'iejayi ti jla'am pi Sinia'. 11'Ajlajanayi'ni pi Sinia' ka impejlanit'i aswa'm pet ni jijweye ti je jlase', ja 'nakayeyi ti ja asjweye japoye pet. 'Yina ja ke injlak'alajyi'n, 'wenajliyi ti ja akamaja. 12Sekjane'yi ja inkasajyi'n, asnikanitieyi jawenayi pi Sinia', siuti jla'am ti inlesanats'i, ti itiejiete'n k'iye ka neye askiojyi siojona ti 'yotat k'iye siunapo jilis ti yiji nak kates jla'al. 13Sinia' jla'am ti kasjwajiete siunie jijweye nak ajnatiok,#Ef 6.12 sekyi'i ti kasjlasatayi pi jlas ti jleminik ni jika anechijiayas. 14Jla'am ti iniwen sitipe'e ti initiajnat sik'ioye niwa sakeyis.#Ef 1.17

Sijwajieti Jesús Sinia' 'neje pet

15Siupa Sinia' ti je ti'wena, pak jipe'el pi Sijwajieti, Sinia' jlas ti iniajnat ti lajlik'iji puwa wikie'eyi niwa wask'i'nelaja ti jilisajna' jla'am. 16Jla'am ti it'imina ti Sinia' ilisane wikie'eyi niwak wask'i'nelaja, siuniwa yi' poliyi siu'neje niwa yi' ape'e 'ni ajnat, siu'neje niwa wask'i'nelaja 'yaka siu'neje niwa ti je 'yaka. 'Wanjliyi ka niwakaye siuniwa injweyejes siuniwa yi' poliyi, siuniwa inwunitieyejes, siuniwa anechijiayajas, jla'am ti it'imina ti po' niwaka. Ilisane kajeyepa ti ja jikimita jla'am. 17Sijwajieti ti 'nelanjie'e ti lajlik'iji puwa niwaka wask'i'nelaja, ta'a jla'am ti po', 'yina jla'am 'neje ti isie'e niwaka wask'i'nelaja ka inlesank'i.#Jn 1.1-3; Heb 1.2-3

18Jla'am 'neje ti jletik siunapo Sinia' jilis.#Ef 1.22-23; 4.15 Paka pi jlas ti iniajnat, jla'am 'neje ti inia'an ti iniu kisie'e ti tajli ni a'no', ti iyo anechiyasa' siunie wuj. 19Sinia' yimi'n ti inipejlanitia'm ti iyo ji'weta pi Sijwajieti, 20'yina Sijwajieti naka 'neje ti it'imina ti jla'am ni ti iyo ka 'esieyi kiu'ujwe wita'm 'ni ajnat. Wikie'eyi siuniwa yi' poliyi siu'neje niwa yi' ape'e 'ni ajnat, jant'emina ti jankama, 'yina ti 'esi siupa Sijwajieti ji'woyis ti tisa'ni ti yi' ape'e japa cruz.

21Siukiwa jlomas ti pajk'i 'wena'aseme, 'yina yijits'i niwa asosikis ti jitieye'yi ilia'm pi Sinia', kajeyepa ti jit'iuye'yi siunie ti ijiate ti je 'esi. 22'Nakayi ka lajak'i ki jiliaye iyo pi Sijwajieti ti 'ya'al nak i'nesieyi, 'yina Sinia' inekiajla' jikiajwe. Sekyi'i ti inlesana', 'yina laj ast'ojliye, siu'neje ti laj astesa' jitieyi'i. 23Jak je iyoyiji je 'esiji ka leyeyi siunie astankiujnieye ti 'es; ká anitajlina', nit'onitie pijia'm, ká alanayi wita'm siojona asnejejwiye ti tajle pak Sinia' jika'niye ti pajk'i ti jipe'yaye. 'Yina siunie inka'niye itij'w ape'e 'ni ajnat ti tijwela, siuti ya'am ti Pablok'i'm, ya'am ti Sinia' jikawok'i'm.

Pablo tekiajlaja ka noyeje papo Sinia' jilis

24'Nakayi ts'ajkaj'ni ti iwit'ia poye astepe'e, kajeyepa siuti kiak iyo ti iwit'ia po' ape'e napo Sinia' jilis, ti 'nak Sijwajieti t'ajwes, 'yina yamjliyi ti jajnol wita'm siunie iyot'iyipi pa Sijwajieti ti kia'iyo ti inilayiti pi jiwet'ia. 25'Yina Sinia' siwojwa'n aswoye ka iniuye'ase'm jla'yi ti jitiej iyomk'i'm ka iyoyi ni siunie jikijmaye ka ijwi'lase'm ni jika'niye ka i'nesieyi, iyo siunie awone ti jajnol'ne wita'm. 26'Yina naka ni siunie ti Sinia' talk'i'ni ti ijwiki'n ti ijwikia'm napo i'nio', 'nakayi 'yakajanitia'm napo jilis. 27Lapakawo ti Sinia' iyotajank'iye ka 'najanisi siunie ti jla'am ti jitienkiujnieye siunie ti ijwikia'm, naka ni siunie ti ijiate ti 'es, 'nakayi siunapo i'nio' ti je Judíojos ja 'esieyi. 'Yina siunie ti ijwik ti yin kisie'e 'nakayi, naka ni siunie jayo'ate, Sijwajieti yi' aska kiowe'e, 'yina siunie Sinia' jiwunitieye ti 'es ti anejejwiyejenk'iye jane'ne asap.

28Ajwela ape'e wikie'eyi napo i'nio' pi Jesús, siu'neje ti akelaja'ni, je lajk'i siunie awoki ti kasts'ajajne'n ti tajle pi Sinia' ti 'eyasanaja'n, kajeyepa ti awotajank'iye ka ijnol wita'm siunie jitienkiujnieye ti 'es jitieyi'i pa Sinia'. 'Yina jak je iyoyiji Sinia' jan'we'en ti wakal ti yiyisiap pi Sijwajieti. 29Tempi it'imina siuti ya'am wuj ti akijme'n, 'yina je lajk'i ni siunie Sijwajieti jijweye ti iwink'i'm, it'iminayi pet ti ijwiye po'.

Currently Selected:

Colosenses 1: CRT97

Highlight

Copy