Hechos 27
27
Pablo tijliuk Rómaja
1Jlampa wakajlayi ti ja kasjlok Rómaja, Pablo tekiajlajayi ja tokis jika anechiyas Capitán Julio. Tokis siupapo tiwonaja'ni 'ate ‘Anechiyas Roma Jlele Jika Tokis’ papok tijna'yi pet. Tijwanaja'a japo ijia inkipijnas. 2Akiniek'i 'ne siujlieja kasejkana, siujlieja tajle pet jlaja yajap'ejen'ni jle' iyo'ate Adramitio, ti awak'i ape'e ti iyo kanek ti yapilie'eje 'niji yi'i siojowa yajap'ek'ijin'ni yi' Ásiaja. Jakayi ti sa'yi ja Aristarco,#Hch 19.29; Col 4.10 ji'wet yi' Tesalónicaja, siujlieja yiji pet jlaja Macedonia. 3Jak je iyoyiji siojokia jloma kiecha awakieyi jlaja Sidón. Sek awak'i ti Julio ip'ilisina'ni ja Pablo, jikio' iliena'a kiu wata'a ka ijnoyi japo t'ajajnajwas, ka k'iejliyi pet paka iwoyisi ji'wajieta, ni'ne ka jlaka pa.
4Sek atajla'a ti akinieja'ni ti atajla Sidone, ti awak kasejkanaja'. 'Yina ti ataye ilia'm ki jlajwu, kas'manit 'ne jlaja Chipre, ajnat siujlieja i'niat itijwape'n, ti je 'yejents'e'm wata'a ki jlajwu. 5Sekyi'i ti alk'ataja'm ja i'niat lajlik'i, anewajla'a siojowa ajnatis jleyis iyo'ate Cilicia siu'neje jlaja Panfilia, awakieyi jlaja isi' jle' iyo'ate Mira, yiji jlaja ajnat Licia. 6'Yina ja tokis jika anechiyas i'wina siujlieja jawieki, kasejkana ti tal Alejandríaja ti tejep'ampe 'nijiye Itáliaja, jlajak awakieje'ijyi ti akinie.
7'Yina ti je ilijyi ki jlajwu ti yejwuti siukia ataye ilia'm, it'imina'ne ti je ta'a ka i'nisaj'ni, 'wes jiwekie'e ti anewajla'a jlaja isi' jle' iyo'ate Gnido. Mawat je netiank'i ti atayeje ilia'm ki jlajwu, anok jikiusk'i jlaja Salmón, ti anokiajap ts'iji jlaja Creta, siujlieja isi' i'niat iniujwape'n 'neje. 8Kastelak'i'nine ki si'niayi, kajeyepa ti tojwe, ti jiwekie'eja ti awaki ja ajnat jle' iyo'ate Buenos Puertos, je tojwape'n siujlieja isi' jle' iyo'ate Lasea.
9Paj ti kastasitayi ki si'niayi, kajeyepa ti itioyi'i. Paj ti yama'niji siojokia jloma ti Judíojos ilisa'n, ti iyoyisi jitienkiujnieyejayi ti ijwilis Sinia' initiajnat pa jitis iyo; ti je kastojwata'a na wi'yit, janak siojona jloma ti je 'esiji ka neki' niwa kasejkanayis. It'imina'ne ja Pablo ti iyone'ate japo kasejkanawos:
10—I'lijwas, 'yaka jet'i 'esiena'a paka yoki ti askiuniek'iji'n, ja kasno'we siuniwa yiji jla'a kasejkana kiak jawoyi, kasejkana 'neje jla'am ti janetia'n.
11Siupa tokis jika anechiyas jakata jla'am i'ye'en ja kasejkanawo, siu'neje ja jikimett'eyijpe jlaja kasejkana, siojo iyone ja jitienkiujnieye. 'Yina ja Pablo yaka je tipe'yak, siukia iyotaja pet ti takajwejlantajam'ni japo. 12Je 'esiji jla'am ti je 'ejts'i paka ne'yi jlaja kasejkana ka iyajapa siojokia jloma ti wi'yitip. Po' japo ijia siojopo jiwos jlaja kasejkana, iyo'ate:
—Naja'ni wekie'e, jajyijlitaja samk'emna'a ka iwieki jlaja Fenice, ka techajatajanna'a.
Fenice jlajak kasejkanayis jlajapa 'wet yiji jlaja isi' jle' iyo'ate Creta, siujlieja i'niat itijwape'n. Tejejia'm wata'a 'niji iniwuki, wikinaja wata'a 'neje.
Pejla yi'n papo Pablo ti jlajwu ijlinik'i
13I'winis ti po' ki jlajwu jlas ti tal 'niji iniwuki, sekyi'i itiliajask'i'ne, ti iyoyits'i 'ate:
—'Esieyiji'ni 'nak awokink'iye.
Sekyi'i ti 'ekiyejayi'iji ja si'niayi, akinieja'nijne ti ajnaye jayik'i jikiusk'i jlaja Creta. 14Jlampa majleyeyi ilia'm kiak jlajwu ti tal wikina ti wujwi. 15'Yumajayi'ni ilia'm jlaja kasejkana, 'yina ti je akajla ilia'm, ejlowekie'e ti yamts'e alekieyi wekie'e ti ajalasata ka naj. 16Kasjnol 'niji yi'i jlaja ajnat jle' iyo'ate Cauda, siujlieja i'niat itijwape'n, jlajak'ne siujlieja atomajap ji'wechaja ti anewajlak'i, jeye kat'aja ka 'najants'e'm ki jlajwu, sek anokie'e. Paj jiwekie'e ti i'yakanis siujlieja kasejkana jlase' japo siujlieja wuj awaki ti itio'on, jlampa je isisieyi japo ti ijialasista. 17Itime japo ti yinis pijia'm, sekyi'i isimayisi siu'niwa nejiatio' ti wusk'iji'n, ti tilie'nitieje'ni jlaja kasejkana, ka je int'ekijyits'i jawa jikie'l siojowa t'etajajamk'i. Sekyi'i ti itietayisiaja'm ja i'niat siujlieja tejeye jla'am ti kiak iyoyetaja, 'wanjliyi ka kia'iwo ka jlajwuye pa, ti po' siujlieja itietisiajam'ni, jeye wata'a ka pansajak'i ti jlajwu yame jla'a kasejkana. Kajeyepa ti je ijwiyisi ka 'wanjliyeje siojopa yiyisi siupa jolo' jle' iyo'ate Sirte.
18'Yina ti je iliyi ki jlajwu ti yejwuti ti yamts'e, sekyi'i siojopo jiwos jlaja kasejkana itietayisi i'niatk'i siukiwa yiji jlaja awaki. 19Siukia ti jlomaye'eje jawakaye'eje pet jawa jikie'el ti itietisi'ni i'niatk'i, ti iyo ka je kiojietaje jlaja kasejkana. 20Jlampa 'lojwa kiwa jlomas ti kilie' je 'nesi, katese'l kia'iyojliyi ti je 'yakaje. Já aninaye'e ka kas'wasajne'n, kajeyepa ti je iliyi wata'a ki jlajwutiok.
21Jlampa kaspaja'a ti je a'yakana ka'yekiunieje'n, sekyi'i Pablo takasit'ne kiowe'e japo i'nio' ti iyo'ate:
— I'lijwas, jlam'ne ka k'iuyek'i'm ti 'nelanjie'e siukia awonta'ase, jlam lajtak'i'ne paka iyoki ka siwet'ia poye, ti awotajapi ka sek kas'wanjle'e, kia'iyo lajtak'i 'neje paka anetiajnatajyi siukiwa jitietayi'ni. 22Je'e, jwajla'aja wata'a paka woyeyi. Ja lajak'ipa ka inetia'n ka inekta isia'm jlaja awaki. 23Siukia ajnaje injlojwanik poli jlele ini'wenkink'i'm tajle siunie Inia' pet ti ajonit, 24ti iyonk'i 'ate, “'Otale t'onit Pablo. A'm ja'nets'ia siunapo i'nio' a'yis ti ja lajak'i paka woyi, je ijiat ka je ayi ni anechiyas ti ijnokiji, ti janena jitieyi'i. Sinia' janjwajiete ni jota jiliayeja' napo i'nio'.” 25Jak je iyo 'napo i'lijwas, jwajla'aja wata'a paka woyeyi. Je akakiu pa Sinia' ti ja'wina, iyo jla'am ni jijliujwanik poli jlele ti ijwilk'i. 26Jane'yi japa ajnat i'niat jantejwape'n, pa ja kassoti 'ni jlajwu.
27Jlampa saka i'nio 'wanjlijyi'n timesie kiwa awaki, jla'yi ti je iliyi ki jlajwu ti yamts'e. Ti ajnaj kioweja t'ipi awakie kiowe'e siojo i'niat lajlik'i jle' iyo'ate Adriático, itijnisiet'iyijpe japo kasejkanawos ka iwieki pa ajnat. 28I'yenayis ki nojwaja'm ki metro siupa yiyi pa tojwi, 'yina treinta y seis jakia yiyi. Tojk'i'nine ki si'niayi ti yikiajlayisi'iji ti i'yenis, jakayi ti 'ne ti veintisiete jakia yiyi. 29Ti isiwitayisi ka int'owasits'i jlaja awaki jawa sisajas wus yi' i'niati, sekyi'i ti itietayisiaja'm siojowa ijniujlits'i wikijnies ti 'yitk'isia'm, ti itiujmatis jiweje jlaja kasejkana ti yajapajne'n. Yititieyis kia ajnaj, kawojliyi paka jlomaye ta'a.
30Paj ti yinayisi'n jlaja kasejkana jlase' siojopo jiwos, ti iyotaja ka intajlisie siujlieja awaki ti jota inek'ni, ti iyoyits'i 'ate:
—Janinena'a'ni jiwekie'e ka itietaja'm ni i'niat siuniwa yit'isia'm jana kasejkana.
31Pablo iyone'ne 'ate ja Capitán siu'neje japo jikawos ti ijwile:
—Ka inekta'nina'a siunapo jiwos jla'a kasejkana jla'a awaki, 'wanjliyi ja ke 'najanayi paka aniwonayi ka ani'manitie.
32Siojopo tokis ipi'yayis jiwekie'e ja Pablo ti kia'iyo, yamayisi ja t'ak jlaja kasejkana jlase' ti yisitisia'm, sekyi'i i'niat yame'ne jlajaka.
33Pablo jloma 'yakaja'n jiwekie'e, ti iyonayi 'ate wikie'eyi siojopo jla'yis ti ijliuye:
—Aska 'nio 'wanjlijyi timesie ti je jlejlitajia'm paka k'iejliyeyi, ti jik'iuyetajap ka jloma 'esie wata'a. 34'Yekiuniejyi jiwekie'e, ts'isie'n isitia'n pet ka iwo jijweyeja', 'yina ka woyetajanie'e ka ani'manitie. 'Wanjliyi ja lajak'ipa ka inetia'n, ka niwakaye ji'wole ka netia'n paka injwajlik'i.
35Iyojlitieje ti isimayi jlaja woye, sekyi'i iyoye jinikanitiejaye pi Sinia', ti yine jitieyi'i papo i'nio' jla'yis, sekyi'i its'isajam'ne, itiujwa. 36Sekyi'i siojopo jla'yis, ti i'winisieyiji, itiliajasi'i'ne pet, jiwekie'eja ti ti'yekiujni'n. 37Siukia kasnojwa'm ti awaki jlaja kasejkana doscientos setenta y seis ti kaspajlat. 38Ti itimayi ti ti'yekiujni'n siojopo iyo ka 'yekiujni'n, sekyi'i siojopo jiwos jlaja kasejkana, ti iyo ka je kiojietaje, yamayisi kiwa ipiatatio' t'ejes 'wanjle'e ti itietisi i'niatk'i.
Ti i'niat itiyajaja'm jlaja kasejkana
39Jlampa jloma 'yakajajan'ni, siojopo jiwos jlaja kasejkana i'winisietaja ja ajnat. 'Yina ti je ijiat ka 'esieyisijine ka jitiej iname, jakata jla'am ti i'winisi ja jolo' ti 'yakaja. Jaka'ne ti ijialasisi ka i'yakanisi. 40Yisitayisits'i siukiwa jikie'el, ti 'yit'isia'm ti iyoyetaja ka inajape'n jlaja kasejkana, ejlowekie'e ti sek iliyisi'i i'niat kiajwe. Ilienayits'i siukiwa t'aka pet siukiwa yajma'n, jikie'l jla'am. Sekyi'i ti yinayis pijia'm siojo lotakinie isaje tejeye pet ni jlajwu, ijiatjliyi jlajwu 'yumajak'i'ne, paj ti yiyeyi siukia jikiujts'i. 41Jlamp'an'ne yip'anipi ki jolo', jak je iyoyiji'ni 'niji jletiki jlaja kasejkana kiak inian'ne isia'm ti 'yujia'm ki jolo', sek na'ajan'ne. Siukiwa ji'wukijlimpejes ti je lis, ti itie'ni siukia tome pet 'niji jiweje jlaja kasejkana, kiak no'wi'ne ti isiajatk'i.
42Siojopo tokis ti i'wina ti kia'iyo, iyoyetaja ka inlajne'n siojopo inkipijnas, kajeyepa ti isiwitisie ka 'no'ni ka impan'ni. 43'Yina siojo jika anechiyas, jlam iyotaja ka jajataja ja Pablo ka lajak'i paka tiwonaja, istieyeyi'i'ni paka inwonisi, najata'ne jla'am ti ijliuye papo ti iyone 'ate:
—Siupa 'yijene ti ipia'an, inekiepe ka impa'an i'niat ji'wechaja. 44Siupa je 'yijene ka impa'an, ka iwoyejyinna'a pa jiwatiuye, ni'ne ka inkima niwa jijwa'al jakia kasejkana.
Kaspajlat jiwekie'e ti lajk'ipa siwet'iaye ti awakie i'niat ji'wechaja jakayi.
Currently Selected:
Hechos 27: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
