1 Timoteo 5

Siunie 'es kawoyi napo i'nio' Sinia' jilis

1A'lej ke etiapk'i ni isijli siuti jiwo jlosikie', wona 'ate ni ana' ti jawo jlosikie'. Jlampet siunapo jwemik wone pet 'ate jiwone napo a'yijnis ti a'nayi ijwienjliyi. 2Jlampet siunapo asejnia ti isijlijyi'n, kiak jawo wone pet 'ate jiwone jana et. Siunapo jlosie wone pet 'ate jiwone jana a'yijnia, 'nalkit siunie 'es atankiujnieye ti ja e'ne.

Siunie jla'm ijiate ti 'es ka tiwonaja napoka ask'ilieki

3'Esiji ka noyeje siunapo ask'ilieki, siunapo ti lajk'iyipa ka inoyeje. 4Siuti jilis po', ni'ne ka jikichasa' papo ka poye, janapokaye ti jani'neyasane ka inkimts'e ka'yenisie japa jletis wikie'eyi pi ji'wet. Nak 'esk'i'ne, 'yina ti naka ti Saka'niona yimink'i. Siuti kiak janwonisi, kajeyepa ti yiyeyi pit ti jan'yena japa jletis iyont'iyipi pet ti i'yena papo jilis.

5Siojona ti ijiateje ti ask'iliekiyi, janaka siojona ti lajk'i papo ka jilisa', ni'ne ka jikichasa' papo ka noyeje, jinijijwiye yi'ne ni Sinia'. Je paj ka leyi ti inip'elisini'ni pi Sinia', t'ajle pi Sinia' jlomas, niwa ajnajas. 6Jlampet siojona ti ask'ilieki ti ininekiajle siuniwa iyo kawo ti itiliaja, ijiate a'wena ti jijweye poyeta ape'e ni ajnat, 'yina paka jla'am pi jlosik ti netia'n.

7Naka 'neje ti jajwejla'm napo i'nio', 'nakayeyijna'a ti ja lajak'ina'a paka titiajlataja. 8Siunie i'nio' ti je i'yena napo ijia, ni'ne ka napokaye napo ji'wet jlele, jlam'ne kia'iyo ni si'niayi, wuj ti iyo sintiye ti ijwil ka intankiuni pi Saka'niona. Wuj ti je 'es ni iyoyi 'yaka'm ape'e ni jike' iyo napoka napo kakiujnietas.

9Ja ke akimajiam'ni jiwek siuti po' jana ask'ilieki ti iyo ka tenaje' jle' papo ijia, je 'esiji ka je inka'm ape'e puwa sesenta jika najkapis, jla'yi ti ijwienkit siupa jik'iemjla masa t'ipi; 10janakaye siojona i'nioki ti pajk'i ti titiant'ieki ti'wena ape'e pi jikijmaye ti 'es ti iyoyi; siojona wuj ti 'es ti i'yena papo jilis; t'oniye inka'a ti i'wi'n ilia'm papo i'nio' ti ijioyetaja; siojona ilij niwa jisietis papo Sinia' jilis;#Lc 7.44; Jn 13.5 jla'yi ti wuj ti iniuyeje napoka siunapo ti po' pa jijliak'ali; siojona 'yakatate ti iyoyi siuniwa isis.

11Jlampet siunapo jlosie 'wanjlijyits'i ti kia'iyo ask'ilieki napok ja ke ajwane, kajeyepa ti yiyetaja ni t'ajka ni iyo ti ijiuski'lan'ni, janak je paja wat ti iyoye'ijyi kanjwa'yi, 'yina iliyek'i siunie iyo ti ijia'an pi Sijwajieti. 12Sekyi'i ti init'emina'aja ti po' ni jitis, kajeyepa ti je iyo lajaye siunie iyo ti 'nelanjie'e ti initeme pi Sijwajieti, siupi iniwone. 13Ijwienjli yijnap'e niwa 'wukiu'ul ti yamk'i'ni, je iyo ka k'iejliyeyi paka inkima ji'wet'e. Je najata, jla'yi ti jitiej ijiutie papo ijia, ti k'iejliyita pa je lajts'e ini'notieyi pet, je paj ka 'esiek'i paka iwoyi. 14Tempi it'imina ti awo'ate: siojona ask'ilieki ti jlosie 'wanjliji, 'esiji ka injwa'yi. Jilis japoye, ja wujwa ka ilesa'n ni ji'wet, ja'nakayeyijna'a ti ja ke tiliakik ka lajayipe 'weta ni inkajejlasaye tajle ni sitiejiejwa. 15Awojlitieje ti po' napo ask'ilieki ti iliyi ni Saka'niona 'niayi, 'nakayi yame ki iyo pit ni sitiejiejwa imosik.

16Ti po' jana ti iyoyi ni Inamtik, po' napo ask'ilieki yi 'wet'e, 'esiji ka'yena pet, ja'nakayi ka jeye wat pet pi jikijmaye ka poye napo Sinia' jilis. 'Nakayi ti jijweye jajnoj'li ape'e ti jan'yenisie siunapo ijiate jla'am ti ask'ilieki, siunapo ti lajk'ipa ka inoyeje.

'Esiji ka ijiatayiji ka ti'yenaja siunapo isimk'iji'n ti iniuyeje pi Sinia'

17Siunapo ti paj, ti 'es ti isimk'iji'n ti iniuyeje napo ijia ti Sinia' jilis, jlama ijiatayi jla'am ka 'esie ka'yenayi siojona jikaja ja 'etsakajak'i'ni. 'Yina janak tejeye napoka, siunapo ti taka'neyasane niwa Sinia' jlamtis napok je tolsinieja'm. 18Jlam'ne iyo'ate niwa Sinia' jlamtis ti yi'i ni ji'wet, “Ká awo jikiwet t'akaye ni alajwa wakia inkijmayewo ti jikijmajne'n ti t'ask'i'ni ni ipiata tiok ti t'ejes iliejne.”#Deut 25.4 Siunie jikiecha iyo'ate, “Siunie i'nio' ti isijme'n jlam je 'yakajli wek japa jikaja, kajeyepa ti isijme'n.”#Mt 10.10; Lc 10.7

19Ká ak'iuye siuti japoye papo ka injwe'la paka injwel paka jitis iwoyi napoka Sinia' jilis ti paj, ja lajak'i papo ka najapeja ni'ne ka timesie papo ka'wenaja ti ijwil i'winaja ti iyoyi pi je 'es.#Deut 19.15 20Siunapo ti jla'm ijiateje ti je iliyi ti iyoyi ni jike', napok ja ene jitieyi'i napo Sinia' jilis napo paj ti jajloye ka ileyi ti iyo siupi jike' iyone, 'nakayi ti jan'we'en napo ijia, sekjane'yi ka je injweyek'ina'a naka.

21Ya'am ene jitieyi'i pa Sinia', jla'yi pi Sijwajieti Jesús, siu'neje napo injlojwajnas poli jlele ti'wenakitie, ti ja ajwejla'm ka woyi niwak siuniwa ajloye'a'm ka awoyi. Ká a'ye'en siupa ka inteliaja ka pakaye ka 'oyijk'i, 'wenajliyi ti ja jotk'i wita'm. 22Ke inesi'lie'yi paka akioye e'n ape'e, 'lojwinie'e ka alaye inoj wita'm siuka iwotajanie'e ni jike'. Ke anine'nate ka ijno'wa siunie je 'es.

23Siuti kiak jawo atowe ja a'tiejaja, siuti je i'nes'ni, ká a'nalkit ni i'niat ti ja'yaje; 'yaje ni at'es, ja jwamjla'aja wek paka a'yaje.

24Po' napo i'nio' iyoyi ni je 'es, 'yina 'yaka ta'a ape'e niwa jikeyis, jlam'ne je ti'yenajli'ijyi. Po'neje siunapo je 'yaka ape'e siunie iyoyi, tejeye pet siunie jloma ti ja ti'yena ts'iji. 25Iyoye'ate siuniwa iyo ni i'nio' ti isis, lajk'ipa ka imp'one pet. Jlampet siuniwa je 'yaka ape'e je ijiat ka je 'nakaja ape'e pet ts'iji, ja lajak'i paka imp'one pet.

Currently Selected:

1 Timoteo 5: CRT97

Highlight

Copy