1 Tesalonicenses 3
3
1-2'Yina je atayeyiji ki itienkiujnieye ti awo ka ts'ajaneje paka yone pi jiwoyeyi ka insisie ni'ne ka jeye, it'iminape ti awoyeyi ka ijliu'wase ja sikiecha Timoteo ka ijno'wase. Sikiecha ti kia'iyo wuj ti jlosik po' ijwil niwa Sinia' jlamtis, ti iniuyeje pi Sinia' ti ijwil pa Sijwajieti. 'Yina jlam pet ti ya'am si'wanjle'e 'ne pet Aténasse. Jla'm ajlo'wase ka inoye'ase'm 'nakayi ti ja asjweye japoye ka je paja ka leyeyi ni siunie astankiujnieye ti 'es ti jiwoyeyi. 3'Nakayeyijna'a ja lajak'i pa ka intasit ilia'm siunie tiwonaja ti wuj ti inilayiti siu'neje ti ja ke inleyi pi Saka'niona. 'Yina 'najanayi pi jiwonayi ti sa'am ti Sinia' jilists'e'm, nak atayeje ni jiliaye ti janilayitieje. 4Siuti je atal aska kiowe'e, pajk'i ti ajwe'lase'm ti awo'ate je ijiat ka je ijnelts'e ni siunie siliaye janwo ti wuj ti jawo sijliak'aliye. Ijiatjliyi ka 'wena iwo wata'a siukia awopi ti ajwe'lase'm siunie a'wena. 5Tempi it'iminape ti ajlo'wase 'ni sikiecha Timoteo, naka ti awojonk'iye ka ts'ajane pa kayone ka je aleyets'i ni iyo ni astankiujnieye ti 'es. Kajeyepa ti kiojieti 'ni itienkiujnieye iyo ti itiej ene'ni 'ate ka kiak iwo ka siunie inkajejlasayewo in'yakana ka kia'iwo ti jaleyeyi ni siunie astankiujnieye ti 'es, kajeyepa ti ja ijnejlita. 'Yina siuti kiak jawoyeyi jlam jiwek ti ajo'wase'ni laj lajaye ki siukia isijmaye ti awoyi aska kiowe'e.
6'Nakayi Timoteo 'nes ti nak tajli, saka'niye po' ti lajk'ipa ka woyeyi ni jleye'yi pet, je liyeyi ni jiwoyeyi ti jitienkiunieyi pi Saka'niona, jla'yi ki iyo ni asemijnaye ti je t'ikijieta. Ijwilts'e ti asa'am wuj ti jitienkiuniets'i'ni, jla'yi ti jiwoyeyi ka kas'we'en pet, iyo'ate awoki ti awokink'iye ka i'wina pet. 7It'imina, i'lijwas, ti 'wanjliyi ijiate istieyeta ni siunie janiwonaja jla'yi ki iyo ni siunie ti anilayitieje ti je jwajla'a, je 'esiji ti ajieye'ase ti je jiliyeyi ti jiwoyeyi ni astankiujnieye ti 'es, ti jitienkiunieyi pa Sinia', nak kasts'et'ne pijia'm ti 'yiniyi ka iwo sijweyeja'. 8Kat'ajayi ti ijwilats'e'm ti wuj ti jini'netieyi pa Sinia', sekyi'i ti wuj ti kasts'akase'n.
9Ijiatjliyi, ¡je paj ka iliki ti awok sinikanitiejayi pi Sinia' astepe'e, kajeyepa ti wuj ti ts'ajka'ase'm, it'imina ki iyo ni inikanitiejeyi jitieyi'i ti jla'am pa Sinia'! 10Niwa jlomas niwa ajnajas ti wuj ti anip'elisini pa Sinia', ka iwo i'niayija' ka 'yakajli ka ijio'wase, ka 'nakayeyijna'a ti jayineje siunie netia'n, ka ijiatayiji ka ijnol wita'm, jla'yi ka ijiatayiji ka wakajla siunie ti ijiateje ti titienkiunieje pi Sinia'.
11'Esiji ka Sinia' jla'yi pi Saka'niona Jesús inoyits'e'm 'nakayeyijna'a ka 'yakajlaja ni si'niayi ka ijiok'iase. 12'Esiji pi Saka'niona ka inwunit'i aswa'm ni asemijnaye, 'nakayijna'a kaneki'n siunie jiwoyeyi ti jinikimayi, siu'neje ti jlena'yi napo as'lejwas, jawoyena'a 'ate iyo ni awo'nase ti wuj ti emina'. 13'Esiji ka ijiatayiji ka inoyeje ni astankiujnieye, 'nakayi ti ja asjweye japoye, 'nakayi ti ja insisie, jla'yi ti ja lajak'ipa ka k'iejliyeyi paka astes iwo jitieyi'i ti jlam pa Sinia', ka 'nesta pa Saka'niona Jesús, ti janapi ajnat'e ti ja jla'yisayisik'i papo jilis ti isis. Amén.
Currently Selected:
1 Tesalonicenses 3: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.
