Lukas 9

Sinugu ni Hisus kay Sampulu may Duwa ka Tuludluan

(Mat. 10:5-15; Mk. 6:7-13)

1Tinipun ni Hisus kay sampulu may duwa ka tuludluan, bag-u kay pinakan-an kapangyarihan ag karampatan magpalayas manga labang, hanggan magpaayad sa may manga sakit. 2Bag-u sinugu niya sida hampay kanda itudlu magkun, “Diyus ti maghari sa tanan bagay.” Ag hampay magpaayad sida sa may manga sakit. 3Binilinan niya sida magkun, “Danga magdara una hintay sa kanyu maglakaw, una sugkud, una bay-ung, una karan-unun, una kuwarta. Danga kamu magdara kanyu ililsan. 4Una naan pag balay kamu pag sumaka, siyun yi waydi kamu pag kidayun hanggan sa udwaya kamu umighit siti ginan pag banwa. 5Una naan pag banwa nu unman pagtanggapun kamu manga tawu, pag-ighit yi kamu siyun ginan, pagpaga niyu ti galbuk ginan sa kanyu manga lulud bilang puruyba sa kanda magdayu sa Diyus.”

6Pagka nakatapus yi kan Hisus bilin sa kay manga tuludluan, linmakaw yi sida. Nag-ati sida sa manga rugar, itinudlu nida ti Mayad pag Barita ag nagpaayad sida sa may manga sakit.

Si Hirudis Maglingut sa kan Hisus Buwat

(Mat. 14:1-12; Mk. 6:14-29)

7Ati katpung si Hirudis ti pangulu sa Galiliya. Pagka naalaman niya ti tanan buwat nida ni Hisus, siya tutuu naglingut. Dahil magsabi ti manga iba si Huwan nabuhi uman ginan sa kay pagkamatay. 8Ti iba magkun, si Ilyas linmuwang. Magkun ti iba, nabuhi uman ti usa sa manga un-an pag manga purupita. 9Sinabi ni Hirudis, “Ipinaplud niku kay liug ni Huwan, dapat si unu nguna inda? Dahil naalaman niku kay manga makamaskihan buwat.” Nakan magtagakakiti si Hirudis sa kan Hisus.

Pinakan-an Karan-unun ti Lima ka Libu Tawu

(Mat. 14:13-21; Mk. 6:30-44; Hu. 6:1-14)

10Pagka nuli maan kay manga apustul ni Hisus, itinultul nida sa kanya nu hintay kanda binwat. Bag-u sida iniba niya napablag tag sa usa ka banwa kay ngaran Bitsayda. 11Dapat pagka naalaman kayamuan tawu, nag-usig ngap sida sa kanya. Nagbaya siya sa kayamuan pagka sida rinmas-ug bag-u kay itinudlu sa kanda magkun, “Diyus ti maghari sa tanan bagay.” Pinaayad diman niya ti kailangan bulungun.

12Pagka mag-isangday yi ti init, nagpakarani sa kan Hisus kay sampulu may duwa ka tuludluan magkun, “Paataga duy nimu ti manga kayamuan tawu hampay sida umati sa manga baryu, sa manga tawu balay sitay sa palibut. Ati sida pag magdayun, manhagad karan-unun. Dahil kita sitay sa pangawakawaan.”

13Dapat sinabi ni Hisus sa kanda, “Kamu yi ti pagpakaun karan-unun sa kanda.” Magkun sida, “Unman kita may karan-unun duy, nu unman lima lang ka tinapay ag duwa ka isda. Kanmu aw gustu kami umati mamili karan-unun hampay ipakaun sa tanan pag manga tawu sitay?” 14Dahil sida manga lima ka libu lalaki tuhay gid sa manga babayi hanggan manga anak. Sinabi ni Hisus sa kay manga tuludluan, “Patukawun niyu sida puru-puruun tiglimampulu ka tawu.” 15Katida ngani kanda binuwat, pinatukaw sida tanan. 16Bin-ul ni Hisus ti lima ka tinapay ag ti duwa ka isda, nagtangda siya sa langit nagpasalamat sa Diyus sa inda pag karan-unun bag-u pinikapika niya. Bag-u ipinakaun yi niya sa kay manga tuludluan hampay ihayin nida sa kadamlan tawu. 17Nangaun sida tanan nagkarabsug. Kanda sawad nagkan-an pinikapika tinapay hanggan isda kanda maan pinunpun. Sampulu may duwa ka luwak waya kanda sawad.

Kay Ipinakilala ni Pidru si Hisus

(Mat. 16:13-19; Mk. 8:27-29)

18Pagka si Hisus napablag nagdarangin, nagdulud kay manga tuludluan. Bag-u pinaingana niya sida magkun, “Kabitay ti pagsabihun kayamuan tawu nu si unu aku?” 19Sinabi nida, “Si Huwan Manugtulbaw kunu, dapat magsabi ti iba kawu si Ilyas, magkumun ti iba usa sa manga un-an pag purupita nabuhi uman ginan sa kay pagkamatay.” 20Bag-u kay sinabi ni Hisus sa kanda magkun, “Dapat kamu duy, kabitay kanyu pag magkilala sa kangku nu si unu aku?” Kay sagut ni Pidru, “Kawu duy, ti Pinili Diyus Manugribri pag Hari.”#9:20 Pinili Diyus Manugribri pag Hari. sa Giriyigu, Kiristu.

Pinat-ama ni Hisus Kay Kamatayan Aban

(Mat. 16:20-28; Mk. 8:30; 9:1)

21Dapat ibinilin ni Hisus mahigpit magkun danga sabihun nida inda una sa kantapu pag tawu. 22Magkun waya siya sa kanda, “Dahil kailangan mag-agwanta ti Anak Tawu sa mayamu pag kakurian. Dayuun siya aban manga paggurangunun manga Hudiyu hanggan manga pangulu manughandug hanggan manga manugtudlu Kasuguan. Kailangan siya kanda pagmatyun bag-u mabuhi maan uman sa ikatlu pag sirang.”

23Sinabi waya ni Hisus sa kanda tanan magkun, “Una hintay pag tawu nu magkaibug kumuyug sa kangku pagdayu sa kay sadili kagustuhan, pas-ana kay kurus sirang-sirang,#9:23 pas-ana kay kurus sirang-sirang: Mahimu kay ibug sabihun, alistu mamatay dahil sa kay pagsunud sa kan Kiristu. pagkuyug sa kangku. 24Dahil una hintay pag tawu tigkaibug alagaan kay buhi, maduraan ngap siya buhi. Dapat una hintay pag tawu ti nabul-an kay buhi dahil sa kangku, balaw ngap maduraan buhi. 25Dahil hintay ti makinabangan tawu una maapu niya ti bilug kalibutan nu kay kinabuhi ti kabaydanan. 26Una hintay pag tawu tigpaulam kay nakakilala sa kangku hanggan sa kang manga bagaw, ipaulam waydi diman siya aban Anak Tawu sa kay pagbalik niya sitay aban may kadayawan hanggan kadayawan Ama, kaibahan niya ti manga anghil ginan langit. 27Dapat tutuu kang pagsabihun sa kanyu, ti iba sitay dayu mamatay hanggan sa udwaya makitan nida kay paghari Diyus.”

Si Hisus Nagtuhay Kay Histuda

(Mat. 17:1-8; Mk. 9:2-8)

28Pagka nakalawuy manga walu ka sirang ginan sa kay nagbagaw tunda, nagtukad si Hisus sa bantud hampay mandarangin. Tinaban niya sida ni Pidru ni Huwan ni Santiyagu. 29Pagka siya magdarangin di waya nagtuhay yi kay uyahun, kay rutay malagti sinminglaw. 30Bag-u kadaka may duwa ka lalaki nagluwang, sida ni Muysis ni Ilyas naghampang sa kanya. 31Masinglaw diman kanda histuda. Paghampangan nida ti tungkul sa kan Hisus pag-ighit ginan sa daga aban arani yi tupadun niya sa Hirusalim. 32Si Pidru hanggan kay manga kaibahan turug. Dapat pagka sida nimata yi mayad, nakitan nida kay kadayawan ni Hisus hanggan ti duwa ka lalaki nakatindug sa kay arani. 33Pagka magkaginan yi sida ni Muysis ni Ilyas magkun si Pidru sa kan Hisus, “Maisturu, mayad maaw kita nagsitay. Mamwat kami tulu ka payag, ayaw-ayaw kamu payag ni Muysis ni Ilyas.” (Kay tutuu, unman magkaalaman ni Pidru kay pagsabihun.) 34Magbagaw waya si Pidru, rinmas-ug ti usa ka rurum hinmamuy sa kanda. Nadala sida pagka nadulman rurum. 35May nagbagaw ginan sa rurum magkun, “Inda kang Anak, kang pinili, siya ti kanyu patingihi.” 36Pagka nadnugan nida tigbagaw, nakitan nida si Hisus usa-usa wadi. Unman yi sida nangingay. Unman waya itinultul nida una sa kantapu pag tawu kanda nakitan sa bantud.

Si Hisus Nagpalwas Labang ginan sa Anak

(Mat. 17:14-18; Mk. 9:14-27)

37Pagka surip naglus-ug sida ni Hisus ginan sa bantud, sinulang siya lalu mayamu pag tawu. 38May usa ka lalaki sa kayamuan nagtawag magkun, “Maisturu, aku mana may kailangan sa kanmu. Duawan nimu kang anak lalaki dahil usa-usa lang kang anak. 39Ag inapuan labang inda pag anak. Bigla siya magpakahuyaw, magkidkiriw, magbura kay bibig. Bihira yi pagtayakan labang ti anak. Tutuu siya pagsaktan. 40Gustu mana niku ipaluwas nimu manga tuludluan ti labang dapat unman nida nakaya.” 41Nagsagut si Hisus magkun, “Kamu katna pag manga tawu unman may sarig, manga supakil. Kabitay waya kadugay kaibahan niyu aku ag magtiis waya sa kanyu? Daran-a nimu sitay tag sa kangku kanmu anak.” 42Pagka magpakarani ti anak sa kan Hisus itinlang waya labang rargu nangidkiriw maan ti anak masyadu. Dapat binagawan ni Hisus ti labang, pinaayad niya ti anak bag-u inuli siya sa kay ama. 43Sida tanan naglingut sa daka pag kamaskihan Diyus.

Kas-a maan Pinat-ama ni Hisus Kay Kamatayan

(Mat. 17:22-23; Mk. 9:30-32)

Sida tanan naglingut waya sa tanan pagbuwatun niya bag-u sinabi ni Hisus sa kay manga tuludluan, 44“Pasuldan gid mayad sa kanyu tuli inda kang sabi sa kanyu, aku, ti Anak Tawu, arani yi ipahintulut aban sa manga tawu.” 45Dapat unman naintindihan niya manga tuludluan pag bagaw inda. Madalum pag hampang nakan unman magkaintindihan nida. Magkadala sida magpaingana sa kanya kay ibug sabihun.

Si Unu ti Lalu Mataas?

(Mat. 18:1-5; Mk. 9:33-37)

46Nagparadayawan kan Hisus tuludluan nu hintay sa kanda ti mataas. 47Dapat pagka naalaman ni Hisus kanda pag-isipun, nagbuul siya usa ka anak diit tag sa kay arani. 48Sinabi niya sa kanda, “Una si unu pag tawu ti magsunud sa kangku ag pakan-an niya halaga inda pag diit anak, aku di ngap kay pinakan-an halaga. Una si unu pag tawu nu pakan-an halaga niya aku, napakan-an waydi niya halaga ti nagsugu sa kangku. Dahil ti pinakaababa sa kanyu tanan imaw yi ngap ti mataas.”

Ti Unman Maglaban sa Kanyu, Kakampi diman Niyu

(Mk. 9:38-40)

49Sinabi ni Huwan, “Maisturu, kami may nakitan tawu magpalwas labang ginan sa usa ka tawu sa ngaran nimu. Kanmi inirangan siya dahil siya unman magkuyug sa kanta.” 50Dapat sinabi ni Hisus sa kanda, “Danga pag-irangi dahil ti unman maglaban sa kanyu, kakampi diman niyu.”

Unman Tinanggap si Hisus sa Baryu manga Taga Samarya

51Pagka arani yi kay kaudasan tanggapun si Hisus sa langit, udyi natalinduwa kay naisipan, linmakaw siya atag sa Hirusalim. 52Ipinauna ni Hisus ti iba hampay maghanap kanda dayunan. Nag-una sida ag nagras-ug sida sa usa ka baryu manga taga Samarya hampay maghanda dayunan. 53Dapat unman tinanggap si Hisus manga taga Samarya dahil naalaman nida rargu siya atag sa Hirusalim. 54Pagka naalaman inda niya manga tuludluan nida ni Santiyagu ni Huwan, magkun sida, “Panginuun, kanmu aw gustu lagpakan nita sida apuy ginan sa langit ag sida tudasun?” 55Dapat nagpasrangu si Hisus ag tinamyaw niya kay tuludluan. 56Bag-u nag-atag maan sida sa iba baryu.

Manga Magkuyug mana sa kan Hisus

(Mat. 8:19-22)

57Sa kanda maglakaw may nagsabi sa kan Hisus magkun, “Kumuyug aku duy sa kanmu una kawu naan tag.” 58Sinabi ni Hisus sa kanya, “Sa ukang kayu ti singgalung kay lukuban, ti manga manuk may pugad, dapat ti Anak Tawu unman may paraharyan.”

59Sinabi ni Hisus sa usa, “Pagkuyug kawu sa kangku.” Dapat sinabi niya magkun, “Panginuun, pahintuluti dap aku mag-uli manlubung waya aban sa kang ama nu mamatay.” 60Dapat sinabi ni Hisus sa kanya, “Ipiyar nimu sa unman may manga buhi ti lumubung sa manga namatay. Dapat pag-ati kawu, ibarita nimu sa manga tawu magkun, Diyus ti maghari sa tanan bagay.” 61Nagsabi ti usa, “Kumuyug aku sa kanmu, Panginuun, dapat pahintuluti dapu nimu aku pumaalam waya sa kang manga kasunu balay.” 62Magkun si Hisus sa kanya, “Ti tawu nu maghiyaput aradu bag-u mag-aliwliw waya sa kay uryan, unman masarigan sa buruwatun kaharian Diyus.”

Currently Selected:

Lukas 9: HNN

Highlight

Copy