Lukas 6

Tungkul sa Sirang Pamahari

(Mat. 12:1-8; Mk. 2:23-28)

1Sa usa ka Sirang Pamahari nakasabuk sida ni Hisus sa matiriguhan. Naggutul uhay tirigu kay manga tuludluan ni Hisus, inayipis nida sa kanda babaw dalukap bag-u kinaun nida. 2Dapat may manga Parisiyu nagpaingana sa kanda, “Hayga nagbunggu kamu tirigu sa Sirang Pamahari? Labag sa Kasuguan tunda.” 3Nagsagut si Hisus magkun, “Udwaya aw lugud kamu nakabasa tungkul sa kay binwat ni Dabid pagka linun-us siya hanggan kay manga kaibahan? 4Nagsaka kabay si Dabid sa Balay Diyus, binmuul siya tinapay, tunda pag tinapay ihinandug sa Diyus, kinmaun siya ag pinakan-an diman niya hanggan kay manga kaibahan. Tunda pag tinapay unman mana may makakaun iba nu unman ti manga manughandug lang.” 5Sinabi ni Hisus sa kanda, “Ti Sirang Pamahari sa sirung di karampatan Anak Tawu.”

Ti Tawu Pilay kay Kamang

(Mat. 12:9-14; Mk. 3:1-6)

6Pagka sa usa ka Sirang Pamahari, sinmaka si Hisus sa simbahan manga Hudiyu ag nanudlu. May usa ka tawu ati pilay kay sikun pag kamang. 7Tiniidan si Hisus manga manugtudlu Kasuguan hanggan manga Parisiyu nu ngatay paayadun niya tunda pag tawu sa Sirang Pamahari, hampay nu may makitan puruyba laban sa kanya, isumbung yi siya. 8Dapat alam di ni Hisus kanda manga isip ag sinabi niya sa tawu pilay kay kamang, “Abala kawu, pagtindug sitay.” Nagtindug ngani siya nagpakarani sa kan Hisus. 9Bag-u sinabi ni Hisus sa manga tawu magkun, “May paingana aku sa kanyu, hintay nguna ti angay sa Kasuguan sa Sirang Pamahari, ngatay tigbuwat ikaayad sa kaparihu, ngatay tigbuwat ikadaut? Ngatay tig bawi buhi tawu ngatay tigpahamak buhi tawu?” 10Namarantayun si Hisus sa kanda tanan bag-u sinabi niya sa tawu pilay, “Hunatan duy kanmu kamang.” Pagka ihinunat ngani niya kay kamang, mayad yi ngap. 11Dapat lalu sida nagalit, nakan nagpululungan sida nu hintay ti buwatun nida laban sa kan Hisus.

Pinili ni Hisus ti Sampulu may Duwa ka Tuludluan

(Mat. 10:1-4; Mk. 3:13-19)

12Ati katpung pag sirang, nag-atag si Hisus sa bantud hampay mandarangin. Usa ka yabi sadsad surip nagparargu kay darangin sa Diyus. 13Pagka surip yi, bin-ul niya kay manga tuludluan, nagpili siya sampulu may duwa, iningarnan niya manga apustul. 14Inda ngani ti manga pinili niya: si Simun (binansagan niya Pidru), si Andiris kay patar-ari ni Simun, si Santiyagu, si Huwan, si Pilipi, si Bartulumi, 15si Matiyu, si Tumas, si Santiyagu kan Alpiyu anak, si Simun (imaw ti pagsabihun makabayan#6:15 makabayan: Si Simun nakaibahan diman sa gurupu manga Hudiyu maglaban sa manga taga Ruma.), 16si Hudas anak ni Santiyagu, hanggan si Hudas Iskariyuti, imaw ti nagpakampi sa kalaban ni Hisus.

Si Hisus Nagtudlu ag Nagpaayad

(Mat. 4:23-25)

17Naglus-ug maan si Hisus sa bantud kaibahan niya ti manga apustul. Pagka rinmas-ug sida sa ratag, napaminsan sa kanya ti mayamu pag tuludluan niya. Nagluwang ti kayamuan tawu ginan sa buu Hudiya ag Hirusalim, hanggan ti manga taga Tiru ag Sidun sa baybay dagat. 18Nag-atag sida sa kan Hisus hampay mamatingi, ag hampay paayadun niya kanda manga sakit. Pinaayad diman ti manga pinakurian labang. 19Nandurutdutan ti kayamuan tawu hampay makaigpil sida sa kan Hisus dahil may kapangyarihan ginan sa kanya magpaayad sa kanda tanan.

Ti Papaladan Diyus

(Mat. 5:1-12)

20Nagbantay si Hisus sa kay manga tuludluan, bag-u sinabi niya magkun,

“Papaladan Diyus kamu pag manga pugri, dahil kamu pagharian Diyus.

21Papaladan Diyus kamu ti manga magkalun-us taynguna,

dahil mabsug kamu aban.

Papaladan Diyus kamu ti manga maglumi,

dahil pasulungun kamu aban.

22Papaladan Diyus kamu nu pagkagalitan manga tawu, nu pagdayuun ag pagmuransahun,

nu pag-ikadaut kamu dahil sa kanyu pakiusa sa Anak Tawu.

23Pagbaya kamu nu katida ti mangyari sa kanyu, pag-utbaw waya sa kanyu kabayaan,

dahil daka pag pirimyu aban sa kanyu ati sa langit.

Katida diman waydi ti binwat nida manga ginurang sa manga purupita.

24Dapat kaawaawa kamu pag manga mayaman dahil nakarubtan#6:24 nakarubtan: sa Tagalog, natanggap. yi niyu ti kanyu pagbayaun.

25Kaawaawa kamu pag manga busug yi kainda dahil kamu lun-usun aban.

Kaawaawa kamu pag manga magkasari kainda dahil manruku aban ag manlumi kamu.

26Kaawaawa kamu nu pagbayaun tanan tawu, dahil katida waydi binaya nida manga ginurang ti manga pudilun pag purupita.”

Mahala Niyu Kanyu Kalaban

(Mat. 5:38-48; 7:12)

27Magkun si Hisus, “Kang pagsabihun sa kanyu sa magpatingi, mahala niyu kanyu manga kalaban, ti manga magkagalit sa kanyu balusan di ngap niyu mayad. 28Papaladan niyu ti manga magsaad sa kanyu. Idarangin niyu ti manga mag-unuunu sa kanyu. 29Nu sampalun tawu kanmu pingi, kay baliw iatubang waydi. Ti magbuul kanmu kulimpay pakan-an yi lang nimu hanggan kanmu balukas. 30Pakan-an nimu ti kada maghagad sa kanmu. Nu bin-ul kanmu butang danga yi pagbawia. 31Nu kabitay kanyu ibug buwatun manga tawu tabug sa kanyu, pagkatunda diman kanyu buwatun sa kanda.

32“Nu kamu magmahal lang sa manga magmahal sa kanyu, hintay waya pag pirimyu kanyu matanggap? Dahil ti manga makasalanan magmahal waydi sa manga magmahal sa kanda. 33Nu kamu magbuwat lang mayad sa manga magbuwat mayad sa kanyu, hintay waya pag pirimyu kanyu matanggap? Dahil katida diman ti pagbuwatun manga makasalanan. 34Nu kamu magpaudam lang sa tawu kanyu pagsarigan may iuli maan sa kanyu, hintay waya pag pirimyu kanyu matanggap? Dahil ti manga makasalanan magpaudam diman sa kaparihu makasalanan hampay iuli maan sa kanda ti kanda ipinad-am. 35Dapat mahala niyu kanyu manga kalaban, pakan-an niyu sida mayad, pagpaudam kamu danga yi magsarig kuntay ulian kamu. Nu katunda, daka pag pirimyu kanyu tanggapun ag kilalan-un kamu manga anak Makamaskihan pag Diyus. Dahil magbaya siya una sa manga tawu unman may pasunaid ag makasalanan. 36Pagmaawaun kamu, parihu sa kanyu Ama maawaun diman.”

Danga Pagsauluha ti Magbuwat Kasalanan sa Kanmu

(Mat. 7:1-5)

37Sinabi ni Hisus magkun, “Danga pagpihua niyu ti daut ti mayad niyu kaparihu hampay unman waydi kamu pihuun Diyus nu daut nu mayad. Danga kamu magpasipala sa kanyu kaparihu, hampay balaw kamu ipasipala Diyus. Pagmapinatawadun kamu, hampay patawadun waydi kamu Diyus. 38Pagmarapakaun kamu sa iba ag pakan-an waydi kamu Diyus. Iuli niya sa kanyu subra waya sa kanyu ipinakaun ag mag-awas waya. Dahil nu kabitay kamu magpakaun sa iba, katida diman ti magpakaun Diyus sa kanyu.”

39Nagtultul si Hisus usa ka pahalimbawa sa kanda magkun, “Makaabat aw ti buta sa kay kaparihu niya buta? Unman aw nguna sida parihu malagpak sa abwat? 40Balaw mataas sa kay maisturu ti tuludluan. Dapat ti kada usa nu tinudluan yi lubus, siya aban parihu yi sa kay maisturu.

41“Hayga mag-akitan nimu ti paruk sa mata nimu patar-ari dapat unman kanmu pagbatiun ti batang sa kanmu sadili mata? 42Kabitay kawu pag sumabi sa kanmu patar-ari, ‘Tar-ari, mahimu aw aku bum-ul kanmu paruk sa kanmu mata,’ nu unman nimu nakitan ti batang sa kanmu sadili mata? Kawu duy magpabalhinguun lang. Bul-a dap ti batang sa kam sadili mata, bag-u makakit mayad kawu hampay mab-ul nimu ti paruk sa kanmu patar-ari mata.”

Makilala ti Tawu sa kay manga Buwat

(Mat. 7:17-20; 12:34-35)

43Sinabi ni Hisus magkun, “Ti mayad pag puun kayu dayu mahimu bumurak daut, ag ti daut pag puun kayu dayu waydi bumurak mayad. 44Magkakilala nita ti kada puun kayu sa kay burak nu mayad nu daut. Unman pagputihun ti burak igus ngatay paggutluhun ti ubas ginan sa dugihan. 45Ti mayad pag tawu magbulwat mayad pag naisipan ginan sa kay hinamnu kaayadan sa kay tagipusuun. Dapat ti daut pag tawu magbulwat daut pag naisipan ginan sa kay hinamnu kadautan sa kay tagipusuun. Dahil nu hintay ti pagbagawun bibig, imaw kay sukad sa kay tagipusuun.”

Duwa ka Tawu Magpatindug Balay

(Mat. 7:24-27)

46Sinabi ni Hisus magkun, “Hayga lugud aku kanyu pagpakaingarnan Panginuun, Panginuun, bag-u unman diman kanyu pagtupadun kang pagbagawun sa kanyu? 47Ti kada magpakarani sa kangku ag magpatingi sa kang manga bagaw bag-u siya magtupad sa kay nadnugan, malu, ipakilala niku sa kanyu sa pahalimbawa nu kabitay pag tawu siya. 48Siya ga usa ka tawu magbuwat kay balay kinmali abasad tugka sa batu bag-u ibinungsud niya kay tulduk. Pagka binmaha binmalusbus ti baha tag yi sa balay, dapat ud natandug dahil marig-un kay nabungsudan tunda. 49Dapat ti magdungug sa kang manga bagaw, bag-u unman niya pagtupadun, parihu siya sa usa ka tawu nagbungsud balay sa babaw lang daga, balaw yi ikinali. Binalusbusan baha, kadaka nagpu gid, lubus yi nadaut tunda pag balay.”

Currently Selected:

Lukas 6: HNN

Highlight

Copy