Lukas 17

Ti manga Magpaturun tabug sa Kasalanan

(Mat. 18:6-7; 18:21-22; Mk. 9:42)

1Sinabi ni Hisus sa kay tuludluan magkun, “Dayu maamanan tawu ti kasalanan, dapat madala gid masyadu kay patabgan tawu nu siya ti nagpaturun tag sa kasalanan. 2Mayad waya pag tawu nu higtan bitinan galingan batu kay liug bag-u ilagpak sa abasad pag dagat, sa ud pumaturun siya atag sa kasalanan sa inda pag manga dariit anak#17:2 manga dariit anak: Mahimu kay ibug sabihun, ti malumuy kay pagsarig ngatay ti manga pagkilalan-un busal ngatay ababa ngatay dariit anak. magsarig sa kangku. 3Pagdahan kamu.

“Nu magkasala kanmu patar-ari sa kanmu, tamyawa siya bag-u nu iampu niya kay kasalanan, patawadun nimu siya. 4Nu magbuwat siya kasalanan sa kanmu pitu ka pag-ulit sa sulud usa ka sirang bag-u magpakarani siya sa kanmu pitu ka pagbalik magkun, ‘Nag-ampu aku sa kang binwat kasalanan,’ kailangan gid duy patawadun nimu siya.”

Pagsarig sa Diyus

5Sinabi manga apustul sa Panginuun magkun, “Dagdagan duy nimu kanmi sarig.” 6Sinabi maan Panginuun, “Nu kamu may sarig yi una di ga butir mutsasa kay kadaka, mahimu kamu magsabi sa inda pag puun kayu, ‘Ayita nimu kanmu gamut sa daga bag-u pagpahalin tag sa dagat.’ Pihu gid ti puun kayu pumaniwala sa kanyu bilin.”

Ti Katungkulan Panawuhun

7Sinabi ni Hisus, “Nu abi kamu may panawuhun mag-aradu ngatay mag-alaga sa manga karanidu, kamu dayu sumabi sa kanya pagka siya nuli ginan sa tanman, ‘Abala yi kawu, mangaun yi.’ 8Bagkus ngap sabihun niyu sa kanya, ‘Paggatung yi kawu kang yapun. Nu tama yi pag-ilis yi kawu, tawuha nimu hanggan sa udwaya aku makakaun makainum. Nu makatapus aku bag-u kawu maan ti pangaun pag-inum.’ 9Dayu waydi sumabi ti amu sa panawuhun, ‘Salamat duy dahil binwat nimu ti tanan isinugu niku sa kanmu.’ 10Nakan katunda diman kamu nu tinabu sinunud niyu ti tanan pag isinugu sa kanyu, sabiha niyu, ‘Unman nimu mapakinabangan kami pag manga panawuhun, dahil natupad lang waydi nimi ti dapat nimi buwatun.’ ”

Pinaayad ti Sampulu ka may Dilikadu pag Sakit sa Lukub

11Sa kay pag-atag ni Hisus sa Hirusalim nanunsun siya sa tab-anan Samarya manga Galiliya. 12Sa kay magkaaput sa usa ka baryu, sinulang siya sampulu ka tawu may dilikadu pag sakit sa lukub.#17:12 dilikadu pag sakit sa lukub: Bantayi ti footnote sa 4:27. Arayu waya si Hisus, nagpat-ung yi sida. 13Nanawag sida daka magkun, “Hisus, Maisturu, duy kaawai gid nimu kami.” 14Pagka nakitan niya sida, sinabi ni Hisus sa kanda, “Pag-ati yi kamu pakakit sa manga manughandug.”#17:14 Pag-ati yi kamu pakakit sa manga manughandug. Bantayi diman ti Lib. 14:1-11. Maglakaw di waya sida rargu naayadan kanda dilikadu pag sakit sa lukub. 15Ti usa sa kanda, pagka nakitan niya mayad yi maaw siya, nagbalik siya ainalsa kay dayaw sa Diyus. 16Napadapa siya sa atubangan ni Hisus magpasalamat sa kanya. Usa ka taga Samarya siya pag tawu. 17Sinabi ni Hisus magkun, “Unman aw sampulu ti naayadan kay dilikadu pag sakit sa lukub? Dapat naan yi duy kay siyam? 18Una di usa udyi aw may nagbalik nagdayaw sa Diyus nu ud ngap inda pag ginan sa iba daga?” 19Magkun si Hisus sa kanya, “Pagtindug duy kawu, pag-uli yi. Naribri kawu dahil sa kanmu pagsarig.”

Tungkul sa kay Paghari Diyus

(Mat. 24:23-28,37-41)

20Nagpaingana ti manga Parisiyu sa kan Hisus magkun, “Kapira nguna pag rumas-ug ti kaharian Diyus?” Sinmagut siya magkun, “Ti kaharian Diyus balaw mag-akitan sa mata kay pagras-ug. 21Unman masabi manga tawu, ‘Tunda ay ngani’, ngatay ‘Ati ay’. Dahil nu sa ungud nag-umpisa yi naghari yi gid ti Diyus sa kanyu karaw-an.”

22Bag-u sinabi ni Hisus sa kay manga tuludluan magkun, “Aban pumatigagad yi gid kamu sa kangku, sa Anak Tawu, hampay makitan niyu kay kaudasan. 23Kanda aban sabihun sa kanyu, ‘Tunda ay ngani,’ ngatay, ‘Ati ay.’ Danga kamu umati, danga kamu magpaniwala sa kanda. 24Dahil nu magkilat kabay magkarayawan ti langit baliw-baliw. Katida waydi ti Anak Tawu sa kay kaudasan niya pagras-ug aban. 25Dapat kailangan dapu mag-agwanta siya sa mayamu pag kakurian, ag pagdayuun siya niya kadungan pag manga tawu.

26“Nu kabitay ti nangyari kaybi sa ati katpung sa kan Nuwi katunda waydi aban sa kaudasan pagbalik Anak Tawu. 27Nagkaun ti manga tawu, nag-inum, nagpangasawa sida ag ipinaasawa hanggan sa ati katpung pag sirang pagka sinmaka si Nuwi sa kay sakayan ag binmaha daka napapas sida tanan. 28Katunda diman ti nangyari ati katpung pagka si Lut sa Suduma. Nagkaun ti manga tawu, nag-inum, nagbili, nagpabili, nagtanum sida, nagbuwat balay. 29Dapat pagka nighit lang sa Suduma si Lut, ati katpung pag sirang nalagpak ginan sa langit ti apuy hanggan asupri ga manga uran ag natabu yi lang namatay ti tanan tawu sa banwa Suduma. 30Katunda diman nu miburayhaw yi aban ti Anak Tawu.

31“Ati katpung aban ti matukawan sa kay babaw atup danga yi magdugsun hampay mam-ul kay butang ginan sa sulud balay. Una ti sa tanman danga yi mag-uli sa kay balay. 32Isipa niyu kan Lut asawa. 33Una si unu ti masipag maghanap paraan hampay iribri kay kinabuhi, siya ngap ti mabul-an kay buhi. Dapat una si unu ti maduraan kay kinabuhi dahil sa kangku, siya ngap ti makaribri. 34Kang pagsabihun sa kanyu, sa ati katpung pag yabi aban may duwa ka tawu minsan sa igyaan, bul-un kay usa, tayakan kay usa. 35May duwa ka babayi mag-arawatan sa galing, bul-un kay usa, tayakan kay usa. 36May duwa ka tawu sa tanman, bul-un kay usa, tayakan kay usa.” 37Pinmaingana kay manga tuludluan magkun, “Naan duy, Panginuun?” Nagsagut si Hisus, “Nu naan ti may buyuk asan pag magkatigsun ti manga uwak.”

Currently Selected:

Lukas 17: HNN

Highlight

Copy