Lukas 13

Tungkul sa Pag-ampu sa Kasalanan

1Ati katpung may manga tawu nagbarita sa kan Hisus tungkul sa manga taga Galiliya kay ipinamatay ni Pilatu habang maghandug sida sa Balay Diyus. 2Bag-u sinabi ni Hisus magkun, “Barang kanyu isip nakan linibun sida dahil daka man kanda kasalanan sa tanan kaparihu nida ati sa Galiliya. 3Bukun ay duy katida, dapat kang pagsabihun sa kanyu, nu unman iampu niyu kanyu manga kasalanan, pihu midamhak diman waydi gid kamu tanan. 4Hanggan ati pag sampulu may walu ka tawu nagpuan bantayaw sa Silui ag namatay, barang kanyu isip daka man kanda kasalanan sa tanan kaparihu nida mag-uli sa Hirusalim. 5Bukun ay duy katida, dapat kang pagsabihun sa kanyu, nu unman iampu niyu kanyu manga kasalanan, pihu midamhak diman waydi gid kamu tanan.”

Kay Pahalimbawa tungkul sa Puun Igus Unman Magburak

6Itinultul ni Hisus inda pag pahalimbawa magkun, “May tawu nagtanum igus ati sa kay ubasan. Pagka dugay kay dinuawan maghanap mana kay burak, dapat unman siya may nakitan. 7Magkun kay apu tag sa manug-alaga ubasan, ‘Malu ungud duy aku sa tulu ka timpu magpakasitay magpakahanap kay burak inda pag puun igus, dapat unman aku may mag-akitan. Pukana yi lang nimu. Sayang lang inda pag daga unman may pakinabang.’ 8Dapat magkun ti manug-alaga, ‘Danga dapu duy taynguna pag timpu hanggan sa udwaya makalihan niku kay libut bag-u mapaulian abunu. 9Nu mamurak inda aban sa usa ka timpu, mayad gid. Dapat nu unman bumurak mapukan diman ngani nimu inda.’ ”

Pinaayad ni Hisus ti Usa ka Babayi Baruktut

10Nagtudlu si Hisus ati sa usa ka simbahan manga Hudiyu sa Sirang Pamahari. 11Ati may usa ka babayi pinasakit labang kay awak dugay yi, sampulu may walu yi ka timpu. Baruktut siya unman makahunat kay awak. 12Pagka nakitan ni Hisus, tinawagan siya ag sinabi ni Hisus sa kanya, “Linbadan yi duy kawu sa kanmu sakit.” 13Bag-u kinup-an niya manga kamang ti babayi, kadaka naghunat kay awak. Bag-u dinmayaw gid ti babayi sa Diyus. 14Dapat ti pangulu simbahan manga Hudiyu nagalit ngap, dahil nagpaayad si Hisus katpung Sirang Pamahari. Kainda kay bilin manug-asikasu sa manga tawu magkun, “Sa sulud unum ka sirang kailangan magtarabahu ti manga tawu. Pagluwang kamu sa tunda pag manga sirang hampay kamu paayadun, danga gid sa Sirang Pamahari.”

15Dapat sinabi ngap Panginuun sa kanya magkun, “Kamu katna manga magpabalhinguun lang. Nu Sirang Pamahari unman aw ti kada usa sa kanyu maglubad kanyu manga higut baka una nangus asnu ginan sa kurumpayan hampay kanyu pagguyudun ipagpaslup sa danum? 16Unman aw kailangan lugud sa Sirang Pamahari lubadan inda pag babayi kan Abraham linahi? Ginapus siya ni Satanas sa sulud sampulu may walu ka timpu kay kadugay.” 17Pagka sinabi niya inda nangay-a lang ti tanan niya manga kalaban. Nagbaya gid ti tanan tawu sa tanan pag makamaskihan binwat ni Hisus.

Ti Pahalimbawa sa Butir Mutsasa

(Mat. 13:31,32; Mk. 4:30-32)

18Sinabi ni Hisus, “Hintay ti kaparihu sa paghari Diyus, ag sa unu ipaparihu niku inda? 19Kay paghari Diyus parihu sa usa ka butir mutsasa kay bin-ul usa ka tawu bag-u kay sinabug sa kay namay. Tinmubu ti butir mutsasa. Pagka dugay nagdaka nagbaliw ga puun kayu bag-u mag-apun ti manga manuk sa magkahamyan pag sanga.”

Ti Pahalimbawa tungkul sa Pamadaka sa Tinapay

(Mat. 13:33)

20Nagsabi di gid maan si Hisus, “Sa unu ipaparihu niku ti paghari Diyus? 21Ti paghari Diyus parihu sa pamadaka sa tinapay, ilinahuk babayi sa tulu ka pulak arina bag-u naglabtug kay buu pinkul arina.”

Ti Diit pag Sabian

(Mat. 7:13-14,21-23)

22Nagparargu si Hisus sa kay lakaw atabug sa Hirusalim. Nanhapit-hapit nanudlu siya sa manga tawu sa manga banwa, sa manga baryu. 23May tawu nagpaingana sa kanya, “Panginuun, pira-pira lang aw ti maribri?” Sinabi ni Hisus sa kanda, 24“Pagpilit kamu sa kanyu sadili hampay makaslud lakaw sa diit pag sabian. Dahil ungud gid kang pagsabihun sa kanyu, mayamu ti sumamit hampay sumulud dapat unman sida makaslud.

25“Nu tumindug ti may apu balay bag-u kay talakpan yi ti sabian, kamu bay matindugan lang sa luwas sabian mag-ayawun tag sa sulud magkun, ‘Panginuun, bukasi yi duy ti sabian.’ Sumabi siya sa kanyu, ‘Unman aku magkilala sa kanyu nu taga naan kamu.’ 26Bag-u sumabi kamu, ‘Nagkaun nag-inum kami sa kanmu atubangan. Nagtudlu kawu sa manga tawu sa kanmi manga karsada.’ 27Dapat sumabi di maan gid siya, ‘Kang pagsabihun sa kanyu unman aku magkilala sa kanyu nu taga naan kamu. Danga yi kamu sitay, pagpakarayu yi kamu sa kangku, kamu tanan pag manga manugbuwat kasalanan.’ 28Ati mamiyak kamu aban, mangubut gid kanyu manga ngipun, nu makakit kamu sa kanda ni Abraham, ni Isaak, ni Hakub hanggan ti tanan manga purupita ati sa kaharian Diyus, kamu bay anung sa luwas di. 29Rumas-ug ti manga tawu ginan sa butlakan init hanggan isalpan init, ginan sa salatan hanggan sa kanaway, dumulud sa karan-an sa kaharian Diyus. 30Malu, may manga natayak umuna ngap ag may manga nag-una matayak ngap.”

Kay Pagmahal ni Hisus sa Banwa Hirusalim

(Mat. 23:37-39)

31Ati katpung pag udas may rinmas-ug manga Parisiyu nagsabi sa kan Hisus magkun, “Pag-ighit yi kawu sitay ginan, dahil pagkaibgan ni Hirudis kawu kay matyun.” 32Sinabi ni Hisus magkun, “Si Hirudis katna ga simarun idu kay ugali. Pag-ati kamu sa kanya sabihun niyu, magpaluwas aku manga labang, magpaayad aku taynguna hanggan aldaw sa may manga sakit, makadwa bay tapusun yi niku kang tarabahu. 33Dapat kailangan magparargu kang lakaw kainda ginan hanggan aldaw tugka sa makadwa dahil balaw mahimu ti usa ka purupita matyun nu unman sa banwa gid Hirusalim.

34“Hirusalim, Hirusalim, pagpanmatyun nimu ti manga purupita, pagbatuhun pagmatyun nimu ti manga sinugu Diyus tag sa kanmu. Kapira yi ginan kang hinanap ti manga mag-uli asan hampay kang tipunun parihu ga inaan manuk mag-ukub sa kay butu, dapat dayu di ngap kamu. 35Bantayi niyu ti Balay Diyus asan tinayakan yi, udyi mag-uli asan kay apu. Pagsabihun niku sa kanyu udyi gid niyu aku makitan hanggan sa udwaya rumas-ug pag udas nu kanyu sabihun magkun, ‘Dayawun ti magras-ug sa ngaran Panginuun.’#13:35 Dayawun ti magras-ug sa ngaran Panginuun: Bantayi diman ti Kanta 118:26.”

Currently Selected:

Lukas 13: HNN

Highlight

Copy