Huwan 19

1Nakan ipinab-ul ni Pilatu si Hisus sa kay manga sundalu hampay kanda garutihun. 2Bag-u sinulapid nida ti dugihan kanda ipinasangbaw sa kay ulu ni Hisus ga sangbaw hari bag-u kanda pinakulimpayan waya rutay marara. 3Kada usa nagpakarani sa kanya magkun, “Pagmasulung kawu, Hari manga Hudiyu.” Bag-u kanda pagpakahampakun.

4Nagluwas maan si Pilatu bag-u kay sinabi sa manga tawu magkun, “Malu duy, pag-ipalwang maan niku siya tag sa kanyu hampay maalaman niyu unman aku may nakitan dapat ikaparusa sa kanya.” 5Linmuwang ngani si Hisus may sangbaw dugi ag may kulimpay rutay marara. Bag-u sinabi ni Pilatu sa manga tawu magkun, “Inda yi ti tawu.” 6Pagka ti manga pangulu manughandug hanggan ti manga pulis nakakit sa kan Hisus, nagringgit sida magkun, “Ipaku siya sa kurus, ipaku siya sa kurus!” Sinabi ni Pilatu sa kanda magkun, “Bul-a niyu siya, kamu ti bahala magpaku sa kanya dahil aku unman may nakitan kasalanan sa kanya.” 7Sinmagut ti manga Hudiyu magkun, “May Kasuguan kami ag angay sa tunda pag Kasuguan kailangan siya matyun dahil inaku niya siya kunu ti Anak Diyus.”

8Pagka nadnugan ni Pilatu kanda sinabi, lalu waya nadala siya. 9Nakan dinara maan niya si Hisus sa sulud balay kay pinaingana magkun, “Taga naan kawu?” Dapat unman sinagut ni Hisus kay paingana. 10Sinabi ni Pilatu, “Hayga duy kawu dayu magbagaw sa kangku? Unman aw nimu alam may karampatan aku magpalpas sa kanmu ag may karampatan diman waydi aku hampay ipapaku niku kawu sa kurus?” 11Sinmagut si Hisus magkun, “Nakan lang kawu may karampatan magbuwat katida sa kangku, dahil Diyus ti may pahintulut tunda sa kanmu. Nakan mabuyat man ti kasalanan tunda pag tawu ti nag-intirga sa kangku sa kanmu kamang.” 12Pagka nadnugan ni Pilatu kan Hisus binagaw naghanap siya paraan hampay sa mipalpas ngani niya si Hisus. Dapat nagringgit maan ti manga Hudiyu magkun, “Nu kanmu palpasan tunda pag tawu, udyi masabi kawu kay ampud Pangulu Hari. Una hintay pag tawu nu mag-aku kuntay siya hari, kalaban siya Pangulu Hari.” 13Pagka nadnugan ni Pilatu tunda pag manga bagaw, ipinaluwang niya si Hisus ginan sa sulud balay. Bag-u tinmukaw si Pilatu sa kay tukawan biristahan. Tunda pag tukawan asan sa babaw batu pinantay. Nu sa bagaw Hibriyu kay ngaran tunda pag batu pinantay Gabata.

14Ati katpung pag sirang kanda pangalistu sa Kapistahan sa Pag-alaala sa Karibrihan. Sinabi ni Pilatu sa manga Hudiyu magkun, “Inda yi ngani kanyu hari.” 15Nanriringgitan sida magkun, “Bul-a, bul-a, papakuan siya sa kurus.” Pinmaingana si Pilatu sa kanda magkun, “Ipapaku aw niku sa kurus kanyu hari?” Sinmagut maan ti manga pangulu manughandug magkun, “Unman kami may hari nu ud ti Pangulu Hari lang.” 16Bag-u ipinakaun ni Pilatu si Hisus sa kanda hampay siya ipaku sa kurus.

Ipinaku si Hisus sa Kurus

(Mat. 27:32-44; Mk. 15:21-32; Lukas 23:26-43)

17Dinara yi ngani manga sundalu si Hisus. Nagpas-an siya kay kurus sa kay maglakaw atag sa luwas banwa atabug sa rugar kay ngaran Rugar But-ul Ulu Tawu. (Nu sa bagaw Hibriyu tunda pag rugar kay ngaran Gulguta.) 18Pagka rinmas-ug sida ati, kanda yi ipinaku siya sa kurus. Ati katpung may duwa waya ka tawu kanda ipinaku sa manga kurus, ti usa sa wala baliwa pag kurus, ti usa sa sikun baliwa, si Hisus sa karaw-an. 19May ipinasurat diman si Pilatu bag-u kanda ipinauli sa kurus. Inda ti nakasurat magkun, “Si Hisus taga Nasarit, ti Hari manga Hudiyu.” 20Mayamu pag manga Hudiyu ti nakabasa tunda pag kasuratan dahil kay nagkapakuan ni Hisus arani lang sa banwa. Isinurat paman sa bagaw Hibriyu, sa pamagaw Latin hanggan sa pamagaw Giriyigu. 21Nakan sinabi manga pangulu manughandug sa kan Pilatu magkun, “Danga nimu isurat magkun, ‘Hari manga Hudiyu.’ Inda di ti kailangan nimu isurat magkun, ‘Inda pag tawu nag-aku kuntay siya ti Hari manga Hudiyu.’ ” 22Sinabi ni Pilatu sa kanda magkun, “Nu hintay kang ipinasurat, balaw yi mauman.”

23Pagka si Hisus ipinaku yi manga sundalu sa kurus, bin-ul nida kay manga rutay, inupat nida ka bahagi, sa kada usa ka sundalu inayaw-ayaw. Bin-ul diman nida hanggan kay pamaunib balukas sadsad. Tunda pag balukas minsan lang hinabul ginan sa tungud sadsad sa sirung, unman may kadugpak. 24Nanharampangan ngani ti manga sundalu magkun, “Danga duy nita paggitasa. Kanta ilaban sa lunggungan nu sa kantapu tag inda.” Tida ti nangyari hampay matupad ti isinurat sa Banal Kasuratan magkun,

“Inayaw-ayaw nida kang manga rutay.

Ilinaban nida sa lunggungan kang balukas sadsad.”#19:24 Bantayi diman ti Kanta 22:18.

Katida ngani ti binwat manga sundalu.

25Siyun diman arani sa kay kurus ni Hisus may matindugan manga babayi. Kay ina ngani ni Hisus hanggan ti patar-ari babayi niya ina hanggan si Marya kan Kulupas asawa hanggan si Marya Magdalina. 26Nakitan ni Hisus kay ina hanggan kay pagmahalun niya pag tuludluan matindugan siyun. 27Bag-u sinabi ni Hisus sa kay ina magkun, “Tunda yi duy kanmu pinagkaanak.” Bag-u sinabi niya sa kay tuludluan magkun, “Siya yi duy kanmu pinagkaina.” Nakan ginan sa ati katpung tinaban ngani tuludluan kay ina ni Hisus hampay magpasunu sa kay balay.

Sa kay Pagkamatay ni Hisus

(Mat. 27:54-56; Mk. 15:33-41; Lukas 23:44-49)

28Pagkatapus tunda, alam ni Hisus tapus yi ti tanan. Bag-u sinabi niya magkun, “Magkauwaw aku.” Tunda kay sinabi hampay lubus matupad ti isinurat sa Banal Kasuratan. 29May usa ka sukadan ati punu maaslum pag intus. Binasa nida maaslum pag intus ti usa ka ispungha bag-u kanda ipinauli sa pudpud ga anyamu bag-u itinur-ug nida tag sa kay bibig ni Hisus. 30Pagka sinupsup ni Hisus ti maaslum pag intus, sinabi niya magkun, “Taynguna tapus yi.” Bag-u nisug-uk yi kay ulu, naugtasan yi arup.

Binunu Sundalu kay Habig ni Hisus

31Ati katpung sirang pangalistu sa kapistahan. Unman pagpahintulutan manga Hudiyu nu pabay-anan lang ti manga bangkay sa manga kurus sa Sirang Pamahari dahil tutuu mahalaga tunda pag Sirang Pamahari. Nakan nakihampang sida sa kan Pilatu nu mahimu pabarian yi ti manga kapusgan manga tawu ipinaku sa kurus hampay bul-un yi ti manga bangkay. 32Nakan nag-ati ngani ti manga sundalu, binari nida ti manga lulud duwa ka tawu kadungan ni Hisus ipinaku sa kurus. 33Pagka ti manga sundalu nagpakarani sa kan Hisus, nakitan nida siya namatay yi. Nakan balaw yi binari nida kay manga lulud. 34Dapat binunu waya bangkaw usa ka sundalu kay habig ni Hisus. Susun binmulus ti dugu hanggan danum. 35Ti nakakit gid sa tunda pag nangyari imaw diman ti nagtultul hampay kamu hanggan sumarig. Dahil tutuu gid kay itinultul, alam niya balaw pudil kay pagsabihun. 36Tunda ngani kanda binwat sa kan Hisus hampay matupad ti isinurat sa Banal Kasuratan magkun, “Una di usa ka but-ul niya dayu bariun.”#19:36 Bantayi diman ti Pag. 12:46; Bil. 9:12; Kanta 34:20. 37Ag inda waya ti isinurat sa Banal Kasuratan magkun, “Bantayan nida mata ti kanda binunu.”#19:37 Bantayi diman ti Sak. 12:10.

Kay Naglubung sa kan Hisus

(Mat. 27:57-61; Mk. 15:42-47; Lukas 23:50-56)

38Bag-u si Husi taga Arimatiya naghagad pahintulut sa kan Pilatu hampay mab-ul niya ti bangkay ni Hisus. Tuludluan diman waydi ni Hisus si Husi, dapat sa lihim lang, dahil magkadala siya sa manga pinunu Hudiyu. Pagka nagpasnu si Pilatu, nag-ati ngani si Husi, bag-u bin-ul niya ti bangkay. 39Nag-ati diman si Nikudimu, imaw ngani pag tawu ti nanabang kaybi sa kan Hisus sa yabi. May dara si Nikudimu tatlumpulu may lima ka litru pamanglu mira may libug aluwi. 40Bin-ul nida kay bangkay ni Hisus, bag-u kanda sinaput sa pisahan linu pag rutay may manga pamanglu, angay sa ugali manga Hudiyu sa kanda maglubung. 41Sa kay arani nagkapakuan ni Hisus may gardin. Ati sa may gardin may bag-u tinaguktukan batu, udwaya napaulian bangkay. 42Balaw arayu tunda pag tinaguktukan batu, nakan ati ngani ipinauli nida kay bangkay ni Hisus. Dahil ati katpung pag sirang kanda pangalistu sa kapistahan.

Currently Selected:

Huwan 19: HNN

Highlight

Copy