Huwan 1

Ti Bagaw Nabilug Tawu

1Pagka udwaya linalang ti kalibutan, ti Bagaw daan di. Kaybi kaibahan siya Diyus ag lubus siya Diyus. 2Ginan waya sa kabag-u ti Bagaw daan asan diman sa Diyus. 3Ginan sa kanya pag binwat Diyus ti tanan pag manga bagay. Sa tanan-tanan linalang unman may nabuwat ti Diyus nu ud ginan lang sa kanya. 4Ti Bagaw ti gimpuunan buhi. Inda pag buhi ti sulu tigpakaun karayawan sa manga tawu. 5Ti sulu magrayaw sa kadudulman ag unman dinaug kadudulman ti sulu.

6Sinugu Diyus ti usa ka tawu kay ngaran si Huwan. 7Nagras-ug siya nagtultul sa manga tawu tungkul sa sulu hampay nu madnugan tanan tawu kay barita, sida sumarig yi. 8Bukun si Huwan tigpakaun karayawan sa manga tawu, nu unman nagsitay siya hampay ipagbarita niya ti sulu. 9Tunda ngani ti tutuu gid pag sulu ti nagsitay sa kalibutan hampay kay marayawan ti tanan manga tawu.

10Sitay yi sa babaw daga ti Bagaw. Madi kay linalang Diyus ti kalibutan ginan sa kanya, unman waydi nakilala siya manga tawu sa kalibutan. 11Nagsitay siya sa kay sadili daga, dapat kay manga kasimanwa unman nagtanggap sa kanya. 12Dapat una si unu ti nagtanggap ag nagsarig sa kanya pinakan-an niya karampatan hampay sida manga anak yi Diyus. 13Sida manga anak yi Diyus dapat balaw parihu sa tawu pag kapanganakan may ama may ina, nu unman dahil sa kagustuhan Diyus.

14Nagpakatawu ti Bagaw, ag nangulian siya sitay sa kanta. Mayad gid kay nabubut-un ag lubus ipinakilala niya ti katutuuhanan tungkul sa Diyus. Nakitan nimi kay kadayawan kay tinanggap ginan sa Ama dahil siya ti Bugtung Anak.

15Pinatutuuhanan ni Huwan tungkul sa kanya sa manga tawu. Iinalsa niya kay busis magkun, “Inda yi ngani ti pagsabihun niku, may dumasun usa ka tawu sa kang uryan, makapangyarihan man sa kangku, dahil udwaya aku ainanak daan di siya.”

16Unman may kinatabwanan ti kaayadan kay ipinapalad sa kanta dahil sa kay lubus mayad nabubut-un. 17Ti Kasuguan ipinadakit ni Muysis sa kanta. Dapat ginan sa kan Hisu-Kiristu pag naalaman nita ti mayad nabubut-un Diyus hanggan ti katutuuhanan tungkul sa kanya. 18Kaybi ginan unman may tawu nakakit sa Diyus. Ti Bugtung Anak ti nagpakilala sa manga tawu nu kabitay ti Diyus. Dahil ti Bugtung Anak kaibahan Diyus ag pirmi gid sa kay arani Ama.

Itinultul ni Huwan Manugtulbaw kay Katungkulan

(Mat. 3:1-12; Mk. 1:7-8; Lukas 3:15-17)

19Ti manga pinunu Hudiyu nagsugu sa manga manughandug hanggan sa manga Libita ginan sa Hirusalim hampay mamaingana sa kan Huwan magkun, “Si unu kawu?” Bag-u inda yi kay itinultul ni Huwan. 20Balaw may salawahan kay sagut, itinapat yi gid magkun, “Balaw aku ti Pinili Diyus Manugribri pag Hari.” 21Pinmaingana maan sida magkun, “Nu katunda, si unu ngani kawu? Kawu yi aw si Ilyas?” Sinagut ni Huwan magkun, “Bukun duy, balaw aku si Ilyas.” Magkun sida, “Kawu aw ti Purupita, ti pag-alagdun nimi?” Sinmagut si Huwan magkun, “Balaw aku.” 22Sinabi nida sa kanya magkun, “Si unu gid kawu? Kailangan may isagut kami sa manga nagsugu sa kanmi. Kabitay kanmu masabi tungkul sa kanmu sadili?” 23Sa kay nagsagut ginamit ni Huwan ti manga isinurat ni Purupita Isayas. Magkun si Huwan, “Aku duy ‘ti busis usa ka magtawag sa pangawakawaan magkun, tadlunga niyu ti dalan kay lakawan Panginuun.’ ”#1:23 Bantayi diman ti Isa. 40:3.

24Tunda pag manga sinugu ginan ngani sa manga Parisiyu. 25Bag-u nagpaingana maan sida sa kan Huwan magkun, “Hayga kawu magtulbaw nu unman kawu ti Pinili Diyus Manugribri pag Hari, bukun diman kawu si Ilyas ag nu unman diman waydi kawu ti Purupita?” 26Sinmagut si Huwan magkun, “Aku magtulbaw sa danum. Dapat may usa ka tawu matindugan sa kanyu karaw-an unman niyu nakilala. 27Siya ti dumasun sa kang uryan, dapat unman gid aku may karampatan makalubad kay higut niya manga lapak.”#1:27 unman gid aku may karampatan makalubad kay higut niya manga lapak: Kay ibug sabihun, maging suruguun.

28Inda tanan nangyari sa banwa Bitanya, baliwa sa butlakan init sapa Hurdan, sa kan Huwan pagtulbawan.

Tigbuul Kasalanan sa Kalibutan

29Pagka surip, nakitan ni Huwan si Hisus magpakarani sa kanya. Sinabi ni Huwan magkun, “Tunda yi ti Anak Karanidu kay ihinanda Diyus hampay mapatawad ti kasalanan kalibutan. 30Imaw yi ngani kang pagsabihun may dumasun usa ka tawu sa kang uryan, makapangyarihan man sa kangku, dahil udwaya aku ainanak daan di siya. 31Unman aku nakaalam nu si unu tunda ti dumasun sa kangku. Dapat nagsitay aku magtulbaw sa manga tawu sa danum hampay ipakilala niku siya sa nasyun Israil.”

32Bag-u nagtultul si Huwan sa manga tawu magkun, “Nakitan niku ti Ispiritu ga kalampati magpakababa ginan sa langit bag-u nangulian ti Ispiritu sa kanya. 33Ati katpung udwaya nakilala niku siya. Dapat Diyus ti nagsugu sa kangku hampay magtulbaw sa danum, imaw diman ti nagsabi sa kangku magkun, ‘Makitan nimu aban ti Ispiritu magpakababa tag sa usa ka tawu hampay mangulian sa kanya. Tunda yi ngani pag tawu imaw ti tumulbaw sa manga tawu sa Ispiritu Banal.’ ” 34Magkun si Huwan, “Nakitan yi ngani niku tunda pag nangyari. Pagpatutuuhanan ngani niku sa kanyu tunda pag tawu imaw yi gid ti Anak Diyus.”

Kay Kabag-u pag manga Tuludluan ni Hisus

35Kinaaldawan asan yi maan matindugan si Huwan hanggan kay duwa ka tuludluan. 36Nakitan niya si Hisus maglawuy. Sinabi ni Huwan magkun, “Tunda yi ti Anak Karanidu kay ihinanda Diyus.” 37Ti duwa ka tuludluan nakadnug sa kay sinabi ni Huwan bag-u kinmuyug sida sa kan Hisus. 38Nangaliwliw si Hisus. Pagka nakitan niya sida magkuyug, pinmaingana siya sa kanda magkun, “Hintay duy kanyu paghanapun?” Sinmagut sida magkun, “Naan duy kawu pag mag-uli, Rabi?” (Ti Rabi kay ibug sabihun Maisturu.) 39Sinmagut si Hisus sa kanda magkun, “Atag yi lugud kita hampay makitan niyu kang ulian.” Ati katpung manga alas kuwatru ti malambung. Kinmuyug ngani sida bag-u nakitan nida kay ulian ni Hisus. Nadugay sida sa kan Hisus hanggan di magkayabi yi.

40Ti usa sa kanda duwa si Andiris, kay patar-ari ni Simun Pidru. 41Susun yi hinanap ni Andiris kay patar-ari si Simun. Bag-u kan Andiris sinabi sa kanya magkun, “Nakitan duy nimi ti Pinili Diyus Manugribri pag Hari!” (Sa Giriyigu, Kiristu.) 42Bag-u kan Andiris tinaban si Simun tag sa kan Hisus. Nagbantay si Hisus sa kan Simun bag-u kay sinabi magkun, “Kawu si Simun, kan Huwan anak. Dapat ingarnan kawu Sipas.” (Kay usa ka ngaran Pidru. Una Sipas una Pidru parihu kay kahulugan tanang batu daka).

Kay Nagtaban ni Hisus sa Kanda ni Pilipi ni Natanail

43Pagka surip inisip ni Hisus siya atag yi sa Galiliya. Nakitan niya si Pilipi bag-u kay sinabi, “Pagkuyug duy kawu sa kangku.” 44Taga Bitsayda si Pilipi, parihu sa kanda ni Andiris ni Pidru taga Bitsayda waydi. 45Nakitan maan ni Pilipi si Natanail. Bag-u sinabi ni Pilipi sa kanya magkun, “Nakabtaan nimi si Hisus taga Nasarit kay anak ni Husi. Imaw ti pagturunuhun ni Muysis sa kay isinurat sa Kasuguan, siya diman waydi hanggan ti pagturunuhun manga purupita.” 46Nagpaingana si Natanail magkun, “May lumuwang aw lugud kaayadan ginan sa Nasarit?” Sinmagut si Pilipi magkun, “Atag lugud kita, bantayi nimu.”

47Pagka nakitan ni Hisus si Natanail magpakarani sa kanya, sinabi niya tungkul sa kan Natanail magkun, “Tunda pag tawu tutuu gid Israilita. Unman gid siya maradaya.” 48Bag-u pinaingana ni Natanail sa kan Hisus magkun, “Kabitay duy kawu pag nakakilala yi sa kangku?” Sinmagut si Hisus magkun, “Pagka udwaya kawu bin-ul ni Pilipi, daan yi duy kawu nakitan niku kanmu waya sa sirung puun igus.” 49Magkun si Natanail, “Maisturu, kawu yi duy ti Anak Diyus, kawu yi ti Hari nasyun Israil.” 50Sinabi ni Hisus magkun, “Nakan aw duy kawu maniwala dahil sa kang sinabi magkun, nakitan yi niku kawu kanmu waya sa sirung puun igus? Makitan nimu aban ti lalu waya makadululaw.”

51Bag-u sinabi ni Hisus sa kanya magkun, “Ungud duy kang pagsabihun sa kanyu, makitan niyu aban nabukasan ti langit, ti manga anghil Diyus may tag sa daga may tag sa langit dahil sa kanda magpasakup sa kapangyarihan Anak Tawu.”

Currently Selected:

Huwan 1: HNN

Highlight

Copy