Gimpuunan 6

Ti Kadautan Tawu

1Pagka sa uryan, nagyamu ti manga tawu sa kalibutan, ag mayamu diman kanda manga anak babayi. 2Nakitan manga anak Diyus#6:2 manga anak Diyus: ngatay, manga anak manga takinan. ti manga mararinu pag manga anak babayi, nakan inasawa nida kanda pagkaibgan asawan-un. 3Taynguna, magkun ti Panginuun, “Balaw niku pahintulutan mabuhi dugay masyadu ti tawu dahil sida tawu lang. Nakan kainda ginan, ti tawu mabuhi ud lumampas sa 120 ka timpu.”

4Ati katpung pag panahun, ag sa manga nakalawuy, may manga kilala pag manga tawu#6:4 manga kilala pag manga tawu: sa Hibriyu, Nipilim. sa kalibutan ginan sa lahi manga anak Diyus ti nag-asawa mararinu pag manga babayi. Makapangyarihan sida ag kilala pag manga tawu sa un-an pag manga kapanahunan.

5Pagka nakitan Panginuun ti manga pagbuwatun manga tawu sa kalibutan lunsay lang kadautan, ag kanda pag-isipun pirmi kadautan, 6nagsisi siya nu hayga linalang waya niya ti tawu sa kalibutan. Masyadu gid kay karukuan, 7nakan magkun siya, “Rurisun niku ti tanan linalang niku pag tawu, hanggan ti tanan hayup sa daga kaibahan ti manga hayup maglayang. Magsisi aku nu hayga linalang waya niku sida.” 8Dapat may usa ka tawu nakapasulung sa Panginuun. Si Nuwi kay ngaran.

Si Nuwi

9Inda ti tultulanun tungkul sa linahi ni Nuwi.

Si Nuwi matadlung pag tawu. Siya lang ti magkabuhi matadlung sa kay kapanahunan, ag magkabuhi siya kaibahan ti Diyus. 10May tulu siya ka anak lalaki sida ni Sim, ni Kam ag ni Hapit.

11Sa magbantay Diyus, daut gid ti manga tawu ag kanda kadautan talaptap sa kalibutan. 12Nakitan Diyus masyadu gid daut ti manga tawu sa kalibutan dahil sa kanda pagbuwatun lunsay kadautan. 13Nakan magkun siya sa kan Nuwi, “Rurisun niku ti tanan tawu. Dahil sa kanda, nangalat ti kadautan sa kalibutan. Rurisun niku sida kaibahan kalibutan. 14Nakan kawu Nuwi, pagbuwat kawu barku ginan sa mayad pag kayu, ag buwati manga sulud-sulud inda. Bag-u payidi nimu alkitran kay sulud hanggan kay luwas barku. 15Buwata nimu inda, kay sukat 300 ka luk-an siku kay kaaba, 50 ka luk-an siku kay bulang, ag 30 ka luk-an siku kay abwat. 16Paulian nimu bubung ti barku, ag paulii nimu agwat manga tunga mitrus kay lingub hanggan atup. Buwatan nimu tulu ka ugpu salug ti barku, bag-u paulii sabian sa saruy. 17Dahil gunawun niku ti kalibutan hampay maruris ti tanan magkabuhi. Mamatay ti tanan asan sa kalibutan. 18Dapat mamuwat gid aku kasunduan sa kanmu. Pagsulud kawu sa barku kaibahan kanmu asawa hanggan manga anak ag kanmu manga umagad. 19Pagpaslud diman kawu usa ka lalaki hanggan babayi sa kada kalasi hayup hampay mabuhi sida kaibahan nimu. 20Tigudwa sa kada kalasi tanan hayup: ti maglayang, ti maglakaw hanggan ti magyapang. Pumakarani sida sa kanmu hampay mabuhi. 21Pagdara diman kawu tanan kalasi karan-unun para sa kanmu hanggan para sa manga hayup.” 22Tinupad ngani ni Nuwi ti tanan isinugu Diyus sa kanya.

Currently Selected:

Gimpuunan 6: HNN

Highlight

Copy