Gimpuunan 45

Napakilala si Husi sa Kay manga Patar-ari

1Udyi maampara ni Husi kay sadili, nakan pinaluwas niya kay manga suruguun. Igu sida wadi ati, napakilala siya sa kay manga patar-ari. 2Nanlumi matnug si Husi, nakan nasaydan inda manga Ihipsiyu, ag nabaritaan inda sa balay hari Ihiptu.

3Magkun si Husi sa kay manga patar-ari, “Aku si Husi! Ungud aw buhi waya si amang?” Dapat unman nakasagut sa kanya kay manga patar-ari dahil nabung-anan sida. 4Nakan magkun si Husi, “Pagpakarani kamu sa kangku.” Pagka napakarani yi sida, magkun siya, “Aku si Husi kanyu patar-ari, ti ipinabili niyu dinara atay sa Ihiptu. 5Taynguna, danga kamu magkataranta ag danga niyu pagsisiha kanyu sadili sa kanyu binwat sa kangku, dahil ti Diyus imaw ti nagpadara sa kangku atay hampay iribri kanyu buhi. 6Ikadwa di waya inda pag timpu taglun-us, ag may dumasun waya lima ka timpu unman may ani. 7Dapat ipinauna aku Diyus atay hampay mairibri kamu ag masawad di ti kayamuan sa kanyu sitay sa kalibutan. 8Nakan balaw kamu ti nagpadara sa kangku atay nu unman ti Diyus di. Binwat niya aku manugpatigayun hari Ihiptu, ag manugpamahala niya magtal-anakan hanggan buu Ihiptu. 9Taynguna, pagdalidali kamu pagbalik sa kang ama ag tultulan niyu sa kanya kuntay kay anak binwat Diyus manugpamahala buu Ihiptu. Ag sabiha niyu sa kanya pag-ipaataytag niku siya danga yi magpadugay. 10Sabiha diman niyu sa kanya mahimu siya mangulian sa daga Gusin kaibahan kay manga anak hanggan manga umput, una kay manga hayup hanggan ti tanan niya pag kasiyunan, hampay arani siya sa kangku. 11Alagaan niku siya ati sa Gusin dahil may rumas-ug waya lima ka timpu taglun-us. Balaw niku gustu malun-usan siya hanggan kay magtal-anakan, una hanggan ti manga hayup niya.”

12Nagparargu si Husi sa kay magbagaw, “Taynguna alam yi niyu, hanggan niku patar-ari ni Binhamin, aku yi ngani ungud si Husi ti maghampang sa kanyu. 13Sabiha niyu sa kang ama ti tungkul sa natanggap niku pag katungkulan atay sa Ihiptu hanggan ti tanan nakitan niyu tungkul sa kangku. Ag daraha siya ataytabug sa kangku dag padugay.” 14Pagkatapus, hinagkung ni Husi kay patar-ari si Binhamin bag-u nanlumi; nanlumi diman si Binhamin habang mahagkungan sa kan Husi. 15Hinagkung diman niya ti tanan patar-ari niya ag parargu kay maglumi sa kanda. Siyun ginan nanhampang yi sa kanya kay manga patar-ari.

16Pagka nakaaput ti barita sa balay hari Ihiptu kuntay rinmas-ug kay manga patar-ari ni Husi, nakabaya ti hari hanggan kay manga takinan. 17Magkun ti hari sa kan Husi, “Sabiha nimu sa kanmu manga patar-ari pabab-i nida karan-unun kanda manga hayup ag pagbalik sa Kanaan. 18Bag-u daraha nida ataytabug kanda ama hanggan kanda magtal-anakan, dahil ipakaun niku sa kanda ti pinakamarinu pag daga sa Ihiptu ag masamitan nida ti pinakamarinu pag ani siyun.

19“Sabiha diman sa kanda pagdara sida manga kalisa atay ginan sa Ihiptu para sakyan nida asawa hanggan anak sa kanda pag-ighit ataytag. Ag daraha nida ataytag kanda ama. 20Danga yi sida maghinayang sa kanda matayak pag manga kasiyunan dahil ti mararinu pag manga bagay sa buu Ihiptu kanda yi.”

21Tinupad ngani inda manga anak ni Hakub. Ag angay sa sugu hari Ihiptu, pinakan-an ni Husi kalisa ag pinabalunan karan-unun kay manga patar-ari sa kanda maglakaw. 22Pinakan-an diman niya rutay ti kada usa sa kanda; dapat ti inayaw niya sa kan Binhamin lima ka rutay ag 300 ka bilug pilak. 23Pinadarahan diman niya kay ama sampulu ka asnu may baba pinakamarinu pag ani ginan sa Ihiptu, bag-u sampulu ka babayi asnu may baba tirigu ag tinapay hanggan ti balunun niya ama sa kay paglakaw. 24Pagka pinaginan yi niya kay manga patar-ari, sinabi niya danga sida magtalaluhan sa dalan.

25Nakan ginminan sida sa Ihiptu ag nuli sa kanda ama sa Kanaan. 26Pagras-ug nida ati, itinultul nida sa kanda ama kuntay buhi waya si Husi, ag siya waya ngani ti manugpamahala sa buu Ihiptu. Nabung-anan si Hakub; unman siya makapasnu. 27Dapat pagka itinultul nida sa kanya ti tanan sinabi ni Husi sa kanda, ag pagka nakitan niya ti ipinadara ni Husi pag manga kalisa para sa kay pag-atag sa Ihiptu, kadaka siya binmisug. 28Magkun si Hakub, “Magpasnu yi aku! Buhi waya kang anak si Husi. Atihan niku siya bag-u aku mamatay.”

Currently Selected:

Gimpuunan 45: HNN

Highlight

Copy