Gimpuunan 37

Si Husi ag Kay manga Patar-ari

1Napatayak si Hakub hampay mangulian sa Kanaan, ti inulianan diman kaybi pag daga niya ama.

2Inda ti tultulanun tungkul sa magtal-anakan ni Hakub:

Igu 17 ka timpu si Husi, magbantay siya manga hayup kaibahan niya manga patar-ari kay anak ni Bilha ag ni Silpa, manga asawa niya ama. Itinapat ni Husi sa kanda ama ti daut pag buruwatun niya manga patar-ari.

3Mahal ni Hakub#37:3 Hakub: Sa Hibriyu, Israil. Katunda diman sa talata 13,14. si Husi kaysa iba niya ka manga anak, dahil gurangun yi siya igu iinanak si Husi. Nakan pinatahian niya si Husi marinu ag aba pag rutay.#37:3 marinu ag aba pag rutay: Balaw malinaw kay ibug sabihun sa Hibriyu inda. 4Dapat igu napansin manga patar-ari ni Husi mas mahal siya nida ama kaysa kanda, nagalit sida sa kan Husi ag binagawan marasakit pag bagaw.

5Sa usa ka yabi, nanagin-up si Husi. Igu kay pag-itultul inda sa kay manga patar-ari, nag-amat di ti pangagalit nida sa kanya. 6Dahil inda kay pagsabihun, “Nantagin-up aku 7habang ati kita sa tanman magbugkus manga uhay, kadaka lang tinmindug kang binugkus pag uhay ag sinangputan niyu mayungyungan uhay.”

8Magkun kay manga patar-ari, “Hintay duy? Humari aw kawu ag manpangulu sa kanmi?” Nakan lalu waya gid sida nagalit sa kan Husi.

9Nanagin-up maan si Husi ag itinultul maan niya sa kay manga patar-ari. Magkun siya, “Nanagin-up maan aku, nakitan niku ti init, ti bulan ag ti 11 ka pamgasan magyuk-ub sa kangku.”

10Itinultul diman ni Husi kay tagin-up sa kay ama dapat nangisug kay ama sa kanya. Magkun siya, “Hintay kanmu ibug sabihun? Kami nimu ina hanggan kanmu manga patar-ari manyuk-ub sa kanmu?” 11Naghirak kay manga patar-ari ni Husi sa kanya, dapat si Hakub sinadili yi lang niya inda pag manga bagay.

Ipinabili si Husi Niya manga Patar-ari

12Usa ka sirang, nag-ati kay manga patar-ari ni Husi sa Sikim hampay manbantay manga hayup nida ama. 13-14Magkun si Hakub sa kan Husi, “Kanmu manga patar-ari ati sa Sikim magbantay manga hayup. Pag-ati kawu ag bantayi nimu nu mayad ti kahamtangan nimu manga patar-ari hanggan manga hayup. Pagbalik kawu madali hampay maalaman niku.” Nagsagut si Husi, “Hu, amang.”

Nakan ginan sa Luung Hibrun, nag-atag si Husi sa Sikim. 15Igu ati yi siya palakaw-lakaw sa padang, may lalaki nagpaingana sa kanya nu hintay kay paghanapun niya.

16Nagsagut siya, “Paghanapun duy niku kang manga patar-ari. Alam aw duy nimu nu naan sida pag magpastur?”

17Magkun ti lalaki, “Unman yi sida atay. Nasaydan niku atabug kunu sida sa Dutan.” Nakan inusig ni Husi sida ag nakitan niya sida ati sa Dutan.

18Arayu di waya si Husi nakitan yi siya niya manga patar-ari. Bag-u siya nakaras-ug, ginayak yi nida siya matyun. 19Magkun sida, “Tunda yi ti maratagin-up. 20Abala kamu, matyun nita siya ag ilagpak sa usa ka bubun atay. Sabihun lang nita minatay siya maisug pag hayup. Bantayan nita nu ungud magkatutuu gid ngani kay manga tagin-up.”

21Pagka nasaydan ni Rubin ti gayak nida, ginayak niya iribri si Husi. Magkun siya, “Danga yi lang nita siya pagmatya. 22Lagpakan yi lang niyu siya sa bubun atay sa pangawakawaan, dapat danga niyu siya pag matya.” Sinabi tunda ni Rubin dahil gayak yi niya iribri si Husi ag ibalik sa kanda ama.

23Nakan igu rinmas-ug si Husi, inuba nida kay rutay marinu ag aba, 24bag-u ilinagpak sa bubun balaw may danum.

25Habang magkaun sida, may naalantaw sida manugnigusyu pag manga Ismailita ginan sa Gilyad. Kanda manga kamilyu may karga manga panlakay, manga pamulung hanggan pamanglu darahun sa Ihiptu.

26Magkun si Huda sa kay manga patar-ari, “Hintay kanta mab-ul nu matyun nita kanta patar-ari ag ilihim kay pagkamatay? 27Ti mayad siguru ipabili nita siya sa tunda pag manga Ismailita. Danga nita siya pag matya dahil patar-ari nita siya.” Nagpasnu kay manga patar-ari ni Huda sa sinabi niya.

28Nakan igu nanlawuy ti manga manugnigusyu Ismailita, kanda manga linahi Midyanita, bin-ul nida si Husi ginan sa bubun ag ipinabili nida sa halaga 20 ka bilug pilak. Bag-u dinara si Husi manga Ismailita sa Ihiptu.

29Igu binmalik si Rubin sa bubun, udyi lagan ati si Husi. Nakan ginitas niya kay rutay dahil sa karukuan. 30Pagkatapus, binmalik siya sa kay manga patar-ari ag magkun, “Udyi lagan ati kanta ari. Kabitay wadi aku makauli taynguna sa kan amang?”

31Nangiyaw sida kambing ag isinugmaw sa dugu kay rutay ni Husi. 32Bag-u dinara nida sa kanda ama kay rutay ni Husi ag magkun, “Nakitan duy nimi inda. Bantayi duy niyu kaayad nu kan Husi ngani inda ngatay bukun.”

33Nakilala gid ni Hakub ti rutay. Magkun siya, “Kanya ngani duy inda! Minatay siya maisug pag hayup! Pihu gid ginutay-gutay siya hayup.”

34Ginisi ni Hakub kay rutay ag nanrutay saku bilang pagpakakit niya karukuan. Nanhimanglaw siya dugay sa pagkamatay niya anak. 35Linibang siya niya tanan manga anak, dapat imaw diman gid kay magpanrukuan. Magkun siya, “Pabay-ani yi lang niyu aku! Mamatay aku magpanhimanglaw dahil sa pagkamatay niku anak.” Ag parargu siya maglumi dahil sa kan Husi.

36Ati sa Ihiptu, ipinabili manga Midyanita#37:36 Midyanita: Mahimu usa sa manga linahi manga Ismailita. si Husi sa kan Putipar usa sa manga takinan hari Ihiptu.#37:36 hari Ihiptu: sa Hibriyu, Paraun. Kapitan siya manga guwardiya sa balay hari.

Currently Selected:

Gimpuunan 37: HNN

Highlight

Copy