Gimpuunan 2
2
1Kinamhan yi linalang Diyus ti langit, ti daga hanggan ti tanan mag-uli asan. 2Kinamhan niya linalang inda sa sulud unum ka sirang, ag sa ikapitu pag sirang nagpahari siya sa tanan niya buruwatun. 3Pinapaladan niya ti ikapitu pag sirang ag binwat banal, dahil sa tunda pag sirang nagpahari siya igu namhan niya ti tanan. 4Inda ti tultulanun tungkul sa paglalang Diyus sa langit hanggan sa daga.
Si Adam ag si Iba sa Halamanan Idin
Katpung linalang Panginuun Diyus ti daga hanggan ti langit, 5udwaya sa daga ti tanan pag kalasi tanum magkabuhi sa padang, dahil udwaya niya pagpauranan ag unman waya may tawu man-asikasu sa daga. 6Dapat una udwaya mag-uran, ti manga bulbugan sa kalibutan imaw ti magbasa sa buu daga.
7Linalang Panginuun Diyus ti tawu ginan sa daga. Inarupan niya sa irung ti tawu arup magpakaun buhi. Nakan ti tawu may buhi yi ngani.
8Bag-u linalang diman Panginuun Diyus ti usa ka halamanan sa Idin, sa butlakan baliwa, ati pag-ipinauli kay linalang tawu. 9Pinatubu Panginuun Diyus ti tanan kalasi manga kayu marinu bantayun ag kay manga burak masarap kan-un. Sa karaw-an halamanan may imaw puun kayu kabuhian, ag may imaw diman puun kayu magpakaun kadunungan nu hintay ti mayad ag ti daut.
10Ginan sa Idin may sapa magbulus, kay bulus inda maghaug sa halamanan. Inda pag sapa nanibay-sibay sa upat ka sanga. 11Kay un-an pag sapa iningarnan Pisun. Magbulus inda atabug sa buu daga Habila, nu naan ti daga mayamu gintu. 12Lunsay gid pag manga gintu ti makitan ati. Ati diman pag makitan ti mahalaga pag pamanglu kay ngaran bidilyum, hanggan ti mahalaga pag batu uniks. 13Kay ikadwa pag sapa iningarnan Gihun. Magbulus inda atabug sa buu daga Kus. 14Kay ikatlu pag sapa iningarnan Tigris. Magbulus inda atabug sa butlakan baliwa Asirya. Bag-u kay ikap-at pag sapa iningarnan Iyupratis.
15Ipinauli Panginuun Diyus sa halamanan Idin ti tawu hampay mangalaga ag man-asikasu siyun. 16Ag ibinilin Panginuun Diyus sa tawu magkun, “Mahimu nimu kan-un ti una hintay pag burak kayu sa halamanan, 17purya lang sa burak kayu magpakaun kadunungan nu hintay ti mayad ag ti daut. Dahil nu kan-un nimu tunda, sa tunda diman pag sirang pihu gid kawu mamatay.”
18Bag-u magkun ti Panginuun Diyus, “Unman maangay ti tawu magkabuhi usa-usa, nakan buwatan niku siya kaibahan hampay makaawat niya ag angay sa kanya.” 19Linalang Panginuun Diyus ginan sa daga ti tanan pag kalasi hayup sa daga hanggan sa tungud. Bag-u dinara niya inda tanan sa tawu hampay kilalan-un nu hintay ti ipaingaran sa kanda. Nu hintay ti ipaingaran tawu sa kada hayup, imaw yi ngani tunda kay ngaran. 20Pinaingarnan tawu ti tanan hayup, ti mag-uli sa daga hanggan sa tungud. Dapat unman gid una di usa sa manga hayup ti mahimu makaibahan niya hampay makaawat niya ag angay sa kanya. 21Nakan pinaturug Panginuun Diyus ti tawu, mahamuuk gid kay turug. Habang maturugan ti tawu, bin-ul Panginuun Diyus kay usa ka tagyang ag hinirum maan kay nagbul-an. 22Ti bin-ul niya pag tagyang ginan sa lalaki binwat niya usa ka babayi, bag-u dinara niya inda sa lalaki. 23Magkun ti lalaki,
“Taynguna may kaparihu yi aku!
But-ul ginan sa kang but-ul,
ag nayi ginan sa kang nayi.
Ingarnan siya babayi,
dahil ginan sa lalaki siya pag bin-ul.”#2:23 Ingarnan siya babayi, dahil ginan sa lalaki siya pag bin-ul: Sa Hibriyu “isha” (babayi) ginan sa bagaw “ish” (lalaki).
24Inda kay dahilan nu hayga tayakan lalaki kay ama hanggan kay ina, hampay pumausa ti lalaki sa kay asawa, dahil sida inusa yi.
25Tunda katpung una uba-uba sida duwa, unman sida magkaray-ahan.
Currently Selected:
Gimpuunan 2: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines