Gimpuunan 16

Si Hagar ag si Ismail

1Si Saray kay asawa ni Abram balaw mag-anak. May suruguun siya babayi Ihipsiyu kay ngaran si Hagar. 2Magkun si Saray sa kan Abram, “Dahil balaw pinahintulutan Panginuun magkaanak aku, mayad waya siguru pag-ulid kawu sa kang suruguun babayi, barang ngani magkaimaw kita anak sa panab-anan niya.”

Nagpasnu ngani si Abram sa sinabi niya asawa. 3Nakan ipinakaun ni Saray si Hagar sa kan Abram hampay kay maasawa. (Nangyari inda pagkatapus mangulian si Abram sa Kanaan sa sulud sampulu ka timpu.) 4Ag namuduy ngani si Hagar.

Pagka naalaman ni Hagar magbuduy maaw siya, kay yi pinuyaan si Saray. 5Dahil siyun, magkun si Saray sa kan Abram, “Taynguna pagka magbuduy yi si Hagar pagpuyaan yi ngap niya aku. Kawu ti dapat sisihun. Ipinakaun niku siya sa kanmu ag kawu ti kailangan magsungyaw sa kanya. Ti Panginuun yi ti humusay nu si unu sa kanta ti tama.”

6Nagsagut si Abram, “Nu katida, iuli niku siya sa kanmu bilang kanmu suruguun ag bahala kawu nu hintay kanmu gustu buwatun sa kanya.” Tunda ginan, balaw yi mayad kay magpakiusa ni Saray sa kan Hagar, nakan linmayas yi lang inda.

7Nakitan anghil Panginuun si Hagar ati sa may bulbugan sa pangawakawaan. Inda pag bulbugan arani sa may dalan atabug sa Sur. 8Pinaingana siya anghil, “Hagar, suruguun ni Saray, naan ginan lugud kawu ag naan tabug kawu?”

Sinmagut siya, “Linmayas duy aku sa kang amu sa kan Saray.”

9Magkun ti anghil sa kanya, “Pagbalik kawu sa kanmu amu ag pagpakumbaba kawu sa kanya.” 10Bag-u magkun waya ti anghil,

“Payamuun niku kanmu linahi balaw gid inda mabilang.”

11Magkun waya ti anghil sa kanya, “Magbuduy yi kawu ag balaw dumugay manganak kawu lalaki. Paingarnan nimu siya Ismail,#16:11 Ismail: Kay ibug sabihun, magpatingi ti Diyus. dahil pinatingihan Panginuun kanmu paghagadun.

12Dapat kanmu anak mabuhi parihu ga usa ka talun asnu. Labanan niya ti tanan, ag ti tanan lumaban sa kanya. Una kay manga katawuhan kalabanun niya.”

13Iningarnan ni Hagar “Diyus Maghiling” ti naghampang sa kanya pag Panginuun, dahil magkun siya, “Nakitan aw gid niku ti Diyus, ti maghiling sa kangku sa inda pag rugar?” 14Nakan ati sa karaw-an Kadis ag Birid pag bulbugan iningarnan Biir Lahay Ruy.#16:14 Biir Lahay Ruy: Kay ibug sabihun, Bulbugan Diyus buhi imaw ti maghiling sa kangku.

15Binmalik ngani si Hagar sa kan Saray, ag rinmas-ug ti kaudasan nanganak ngani siya usa ka lalaki. Pinaingarnan ni Abram ti anak Ismail. 16Kay idad ni Abram 86 ka timpu pagka ainanak si Ismail.

Currently Selected:

Gimpuunan 16: HNN

Highlight

Copy