Pag-ighit 4

Ti Kamaskihan Diyus Pag-ipakakit sa Panab-anan manga Makadululaw pag manga Buwat

1Nagpaingana si Muysis, “Kabitay nu unman maniwala ti manga Israilita sa kangku ngatay unman mamatingi sa kang sabihun? Barang sabihun nida, ‘Balaw tutuu napakakit ti Panginuun sa kanmu.’ ”

2Magkun sa kanya ti Panginuun, “Unu tunda kanmu bitbit?”

Magkun si Muysis, “Sugkud#4:2 Sugkud: Kay pagtukuyun ti paggamitun sa mag-alaga karanidu. duy.”

3Magkun ti Panginuun, “Yamtan nimu sa daga.”

Iyinmut ngani ni Muysis ti sugkud ag nagbaliw ulay. Nadala si Muysis, nakan nalagiw siya. 4Magkun sa kanya ti Panginuun, “Hiyapti maan nimu sa ikug.” Hiniyaptan ngani ni Muysis ag nagbaliw maan sugkud. 5Magkun ti Panginuun, “Buwata nimu inda pag makadululaw hampay maniwala sida aku, ti Panginuun, ti Diyus nida manga ginurang ni Abraham, ni Isaak, ag ni Hakub ti napakakit sa kanmu.”

6Magkun waya ti Panginuun, “Paulian kanmu kamang sa sulud nimu rutay.” Sinunud ngani inda ni Muysis. Pagka ilinuwas niya kay kamang, nanlagti tunda dahil tinubuan dilikadu pag sakit sa lukub.#4:6 dilikadu pag sakit sa lukub: Sa iba pag salin Bibliya, kitung. Sa Hibriyu pag pamagaw inda paggamitun sa tuhay-tuhay pag kalasi sakit sa lukub pagbaliwun mayagting angay sa Lib. 13. 7Magkun ti Panginuun, “Paulian maan kanmu kamang sa sulud nimu rutay.” Sinunud maan ni Muysis. Pagka ilinuwas niya kay kamang, mayad yi maan parihu sa iba niya bahagi bilug.

8Bag-u magkun ti Panginuun, “Nu unman sida maniwala sa un-an pag makadululaw, sa ikadwa maniwala yi sida. 9Dapat nu unman waya gid sida maniwala sa kanmu sa ikadwa pag makadululaw, pagbuul kawu danum sa Sapa Nilu ag ibuhus nimu inda sa mamara pag daga, inda pag danum bumaliw dugu.”

10Magkun si Muysis sa Panginuun, “Panginuun, unman aku madunung magbagaw. Ginan waya kaybi magkakurian aku magbagaw. Una ngani kainda paghampangun nimu aku, kanmu manugsirbi, hutal-hutal aku nu magbagaw.” 11Magkun sa kanya ti Panginuun, “Si unu ti nagbuwat bibig tawu? Si unu ti may kakayahan baliwun bungul ngatay buyun ti usa ka tawu? Si unu ti magpasya makakit ngatay mabuta siya? Bukun aw aku, ti Panginuun? 12Nakan paglakaw yi, dahil awatan niku kawu sa pagbagaw ag itudlu niku sa kanmu ti manga sarabihun nimu.”

13Dapat magkun si Muysis, “Panginuun, nu mahimu duy pagpadara yi lang kawu tuhay pag tawu.” 14Nangisug ti Panginuun sa kan Muysis, ag magkun siya, “Hu malu, si Aarun yi lang kanmu patar-ari, usa diman siya ka Libita. Alam niku mahusay siya magbagaw. Ataytag yi siya magtagakakiti sa kanmu. Makabaya siya nu makitan kawu. 15Hampanga nimu siya ag tudlui nu hintay kay sabihun. Awatan niku kamu duwa sa pagbagaw, ag itudlu diman niku sa kanyu nu hintay kanyu buwatun. 16Si Aarun kanmu manugbagaw sa manga tawu. Itudlu nimu nu hintay kay bagawun, bilang ga kawu ti Diyus. 17Daran-a kanmu sugkud ag inda ti gamita sa pagbuwat makadululaw.”

Binmalik si Muysis sa Ihiptu

18Nagbalik si Muysis sa kay manugang sa kan Hitru, magkun siya, “Pasnui niyu aku bumalik sa kang manga kasimanwa ati sa Ihiptu hampay duawan ngatay buhi waya sida.” Magkun si Hitru, “Hu, pag may kahusayan mana kanmu lakaw.” 19Bag-u ginminan si Muysis ginan sa Midyan, nagsabi ti Panginuun sa kanya, “Pagbalik yi kawu sa Ihiptu. Namatay yi ti manga magkaibug manmatay sa kanmu.” 20Nakan bin-ul ni Muysis kay asawa hanggan kay manga anak lalaki, isinakay sa asnu ag binmalik sa Ihiptu. Dara di niya kay sugkud ti pagsabihun Diyus sa kanya daran-a.

21Magkun ti Panginuun sa kan Muysis, “Nu kawu rumas-ug yi sa Ihiptu, buwata gid nimu sa atubangan hari Ihiptu ti tanan makadululaw pag-ipabuwat niku sa kanmu. Pinakan-an yi niku kawu kapangyarihan hampay bumuwat tunda. Dapat paganitun niku ti tagipusuun hari hampay balaw niya pahintulutan umighit ti manga Israilita. 22Bag-u sabihun nimu sa kanya, ‘Inda ti pagsabihun Panginuun: Pagbaliwun niku ti Israil kang anak lalaki panganay, 23nakan nagsugu aku pasnui nimu siya umighit hampay mansamba sa kangku, dapat balaw kawu nagpasnu. Nakan matyun niku ti panganay nimu pag anak lalaki!’ ”

24Pagka maglakaw yi sida ni Muysis hanggan kay magtal-anakan, nagpahari sida sa usa ka paraharyan. Inatag Panginuun si Muysis ag pagkaibgan mana matyun. 25-26Dapat binmuul si Sipura matarum pag batu ag tinuri kay anak, ti nab-ul pag lukub ipinakput niya sa lulud#4:25-26 lulud: Sa Hibriyu pag pamagaw inda mahimu “lulud” ngatay “kinatawu”. ni Muysis. Ag magkun si Sipura, “Kawu duguan pag asawa sa kangku.”#4:25-26 Kawu duguan pag asawa sa kangku: sa Hibriyu, asawa dugu kawu sa kangku. Mahimu kay ibug sabihun, binuhi niya si Muysis kay asawa sa panab-anan dugu. (Inda ti sinabi ni Sipura tungkul sa pagturi.) Nakan unman minatay Panginuun si Muysis.

27Magkun ti Panginuun sa kan Aarun, “Paglakaw yi kawu, sulanga si Muysis sa pangawakawaan.” Nakan sinulang niya si Muysis sa Bantud Diyus ag inarkan bilang pangamusta. 28Itinultul ni Muysis sa kan Aarun ti tanan ibinilin Panginuun tag sa kanya, ag ti tanan makadululaw pag-ipabuwat sa kanya.

29Nakan minsan linmakaw sida duwa, ag tinipun ti tanan takinan Israil. 30Itinultul ni Aarun sa kanda ti tanan ibinilin Panginuun sa kan Muysis. Bag-u binuwat ni Muysis ti manga makadululaw sa atubangan manga tawu, 31ag naniwala gid sida. Pagka naalaman nida magdumdum di maaw ti Panginuun sa kanda ag mag-akitan diman niya kanda manga kakurian, linmuhud sida ag sinmamba sa Panginuun.

Currently Selected:

Pag-ighit 4: HNN

Highlight

Copy