Pag-ighit 3

Kay Nagtawag sa kan Muysis

1Usa ka sirang, pag-alagaan ni Muysis ti manga hayup niya manugang si Hitru#3:1 Hitru: Kay usa ka ngaran ni Ruwil. ti manughandug sa Midyan. Dinara niya ti manga hayup sa arani pangawakawaan ag nakaras-ug siya sa Hurib,#3:1 Hurib: ngatay, Sinai. ti bantud Diyus. 2Napakakit ati sa kanya ti anghil Panginuun sa histuda maglabdaban apuy ginan sa karaw-an puun kayu. Nakitan ni Muysis maglabdaban inda, dapat unman diman magkairub. 3Magkun siya, “Lilingutan inda! Hayga nguna tida unman magkairub? Pakaranyan dap niku hampay bantayan.”

4Pagka nakitan Panginuun magpakarani si Muysis sa puun kayu hampay bantayan, tinmawag ngap siya sa kan Muysis ati ginan sa karaw-an puun kayu, “Muysis, Muysis!” Sinmagut si Muysis, “Hintay duy ati?” 5Magkun ti Diyus, “Danga gid kawu magpakarani. Lubada kanmu lapak, dahil banal pag rugar kanmu pagtindugan. 6Aku ti Diyus nimu manga ginurang, ti Diyus nida ni Abraham, ni Isaak, ag ni Hakub.” Pagka nadnugan inda ni Muysis, tinakluban niya kay uyahun, dahil magkadala siya magbantay sa Diyus.

7Bag-u magkun ti Panginuun, “Nakitan niku ti kakurian manga nasakupan niku sa Ihiptu. Nadnugan niku kanda maghagad awat dahil sa masyadu pag-unuunu manga manugpatigayun sa kanda, ag naawa gid aku sa kanda dahil sa kanda manga kakurian. 8Nakan dinmugsun aku hampay iribri sida ginan sa kamang manga Ihipsiyu, ag hampay daran-un sida sa marinu, maluang ag abunda pag daga#3:8 abunda pag daga: sa Hibriyu, daga magbulus ti gatas ag daykut. sa pag-ulian manga Kananiyu, Hitiyu, Amuriyu, Pirisiyu, Hibiyu ag manga Hibusiyu. 9Nadnugan niku kay maghagad awat manga Israilita, ag nakitan niku nu kabitay sida pag-unuunuhun manga Ihipsiyu. 10Nakan kawu kang ipaatag sa hari Ihiptu hampay palpasan kang manga nasakupan Israilita ginan sa Ihiptu.”

11Dapat magkun si Muysis sa Diyus, “Si unu aku hampay umatag sa hari Ihiptu ag ipalwas ti manga Israilita ginan sa Ihiptu?” 12Magkun ti Diyus, “Ibahan niku kawu, ag inda ti puruyba aku ti nagsugu sa kanmu: Nu naipalwas yi nimu ti manga Israilita ginan sa Ihiptu, sambahun niyu aku sa inda pag bantud.”

13Magkun si Muysis sa Diyus, “Nu abi umatag aku taynguna sa manga Israilita ag sabihun niku sa kanda kuntay ti Diyus nida manga ginurang ti nagsugu sa kangku hampay iribri sida, bag-u nu mamaingana sida sa kangku, ‘Si unu kay ngaran?’ Unu ti isagut niku sa kanda?”

14Magkun ti Diyus sa kan Muysis, “Aku si aku.#3:14 Aku si aku: sa Inglis, I am who I am, ngatay, I will be what I will be. Inda kanmu isagut sa kanda: ‘Ti Diyus balaw magkauman imaw ti nagpadara sa kangku tabug sa kanyu.’ ” 15Magkun waya ti Diyus sa kan Muysis, “Sabiha nimu inda sa manga Israilita: ‘Ti Panginuun,#3:15 Panginuun: ngatay, Yawi. Inda sa Hibriyu mahimu ginan sa bagaw “ehyeh” (“I am”) makitan sa talata 14. ti Diyus niyu manga ginurang nida ni Abraham, ni Isaak, ag ni Hakub, ti nagsugu sa kangku tag sa kanyu.’ Kilalan-un aku kang ngaran Yawi hanggan aban.”

16Bag-u magkun waya ti Panginuun sa kan Muysis, “Paglakaw yi kawu ag tipuna ti manga manugpamahala sa Israil bag-u sabiha nimu sa kanda, ‘Ti Panginuun, ti Diyus niyu ginurang, nida ni Abraham, ni Isaak, ag ni Hakub, napakakit sa kangku. Magkun siya: Pagbantayan gid niku kamu, ag nakitan niku ti pagbuwatun manga Ihipsiyu sa kanyu. 17Nanaratu aku ipalwas niku kamu ginan sa Ihiptu nu naan pag magkakurian kamu, ag daran-un niku kamu sa marinu ag abunda pag daga#3:17 marinu ag abunda pag daga: sa litiral, daga magbulus ti gatas ag daykut. manga Kananiyu, Hitiyu, Amuriyu, Pirisiyu, Hibiyu ag manga Hibusiyu.’

18“Sundun kawu manga takinan Israil. Bag-u umatag kawu sa hari Ihiptu kaibahan ti manga takinan Israil. Sabihun nimu sa kanya, ‘Napakakit sa kanmi ti Panginuun, ti Diyus manga Hibriyu. Nakan nu mahimu, pasnui nimu kami umighit manga tulu ka sirang atag sa pangawakawaan hampay manhandug sa Panginuun, sa kanmi Diyus.’ 19Dapat alam niku unman kamu pahintulutan hari Ihiptu nu ud mapilitan siya. 20Nakan parusahan niku ti manga Ihipsiyu sa panab-anan manga makadululaw niku buwatun sa kanda. Bag-u di pahintulutan niya kamu umighit.

21“Ipahintulut niku bumaliw mayad sa kanyu ti manga Ihipsiyu, hampay nu umighit yi kamu pabalunan waya nida. 22Ti manga babayi Israil manhagad manga pamarinu pilak una gintu hanggan manga rutay sa kanda kamalay manga Ihipsiyu ag sa iba waya manga day-uhan ati sa Ihiptu. Ipasulung niyu inda tanan sa kanyu manga anak. Sa kainda pag paraan maagaw niyu ti kasiyunan manga Ihipsiyu.”

Currently Selected:

Pag-ighit 3: HNN

Highlight

Copy