Pag-ighit 1
1
Pag-unuunuhun ti manga Israilita sa Ihiptu
1Inda kay manga anak lalaki ni Israil (imaw diman si Hakub) ti kaibahan niya atag sa Ihiptu, kaibahan kanda magtal-anakan: 2Sida ni Rubin, ni Simyun, ni Libi, ni Huda, 3ni Isakar, ni Sabulun, ni Binhamin, 4ni Dan, ni Niptali, ni Gad, ag ni Asir. 5Si Husi daan di ati sa Ihiptu. 70 ti tanan-tanan linahi ni Hakub katpung nag-atag siya sa Ihiptu.
6Rinmas-ug ti udas namatay si Husi hanggan kay manga patar-ari ag kadungan pag manga tawu, 7dapat madali nagyamu kanda lahi. Dahil sa masyadu mayamu sida, nas-ub yi harus ti daga Ihiptu.
8Dapat pagka dugay nagkaimaw bag-u hari ti Ihiptu, unman may alam siya tungkul sa kan Husi. 9Magkun siya sa kay manga nasakupan, “Malu, bantayi niyu, masyadu yi aduk ti manga Israilita, nakan mahawag kanta kahamtangan. 10Manhanap kita paraan hampay balaw yi sida umaduk. Dahil barang sa udas girahun kita pabliwa sida sa kalaban ag lumaban sa kanta hampay makaighit ginan sa kanta nasyun.”
11Nakan nagpili sida mahigpit pag manga mandumara sa manga Israilita hampay pakurianan sida ag patarabahuun marabuyat. Ipinabwat sa manga Israilita ti manga banwa Pitum ag Ramisis hampay buwatun balay haramnuan hari Ihiptu.#1:11 hari Ihiptu: sa Hibriyu, Paraun. 12Dapat madi pagpakurianan sida, mag-amat di magyamu sida ag naglantap sa Ihiptu. Lalu gid nadala ti manga taga Ihiptu sa kanda. 13Nakan ngani, inamat waya gid nida pinakurianan ti manga Israilita. 14Unman sida may pangaawa sa manga Israilita. Pagpakurianan nida ti manga Israilita sa panab-anan pagbuwat manga daga pinaganit hanggan kay panmahuput siyun, bag-u pag-ipatarabahu mahigpit sa tanman.
15Pagka sa usa ka sirang, magkun ti hari Ihiptu sa manga manugpaanak Hibriyu sa kanda ni Sipra ag ni Puwa, 16“Nu mamaanak kamu manga babayi Hibriyu, matya niyu nu lalaki ti anak, dapat nu babayi, pabay-ani niyu mabuhi.” 17Dapat dahil magkadala sa Diyus ti manga manugpaanak, balaw nida sinunud ti sugu hari, bagkus ngap pinabay-anan nida mabuhi ti manga lapsag lalaki.
18Nakan pinatawag hari Ihiptu ti manga manugpaanak ag pinaingana, “Hayga katida kanyu binuwat? Hayga kanyu pinabay-anan mabuhi ti manga lapsag lalaki?” 19Sinmagut sida, “Ti manga babayi Hibriyu balaw parihu sa manga babayi Ihipsiyu; malpus lang sida mag-anak bag-u di kami magras-ug, nakaanak yi sida.” 20Nakan pinapaladan Diyus ti manga manugpaanak. Ti manga Israilita mag-amat di gid magyamu. 21Ag dahil magkadala sa Diyus ti manga manugpaanak, pinakan-an Diyus sida sadili magtal-anakan. 22Pagka sa uryan, nagsugu ti hari Ihiptu sa tanan niya nasakupan magkun, “Iyamut niyu sa Sapa Nilu ti tanan ilusad pag lapsag lalaki manga Israilita, dapat pabay-ani niyu mabuhi ti manga babayi pag lapsag.”
Currently Selected:
Pag-ighit 1: HNN
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
