Markus 9
9
1Yesu a sa lagbe dan atɨ, “Diyalə na dɨ boyownə, imi a vorsəwnə 'ye kanyi ganə ɓəgəng, aa dɨ kɨla we baa fəra tən ɓa naa shita həmne da Həmɨnpwa ka gətə.”
Nggətta sɨtɨ Yesu
(Matta 17.1-13; Luka 9.28-36)
2Beetɨ bətə tukoltaka, Yesu a por yə Bitrus, ka Yakubu, ka Yohana a nggɨrə kaarən a nə mwotɨ gbyalatə, tənə dɨsərən ɓəmbə. Gaarə a hangɨn Yesu a nggəɗə humwaasərən kat təna dɨ nan. 3Sɨɓwetɨ dan a nggəɗə a huɗa pwat-pwat ta ɓɨra hal-hal, wule huɗatɨngɨn tam a vɨratə. 4Də a hangɨn Iliya ka Musa a dɨma kaarən, tən ta byeli ka Yesu.
5Bitrus a sa Yesu atɨ, “Rabi, ɓə wula atɨ hinə ganə. Ndɨka hina ɗa bolkye mwaakɨn ganə, hiɗə hɨnggu, hiɗə hɨnggə kpale Musa, hiɗə mgban hɨnggə kpale Iliya.” 6Ndaa yə lee la ndi ɓa boyə, gəkɨlə tən kat kala gərən.
7A hangɨn pɨrɓatə a janga a gbərən kat, təna kɨla korme dɨ vor pɨrɓatɨngɨn dɨ sa atɨ, “Nze de a na dɨ mworən nə anə. Samdə kwakingəwnə kɨləmrən.” 8Tee gbyel aa ɓongə təna niyə tənaa yə naa ama, Yesu nə mbiɗi kanyi dɨsərən.
9Ite təne dɨ janga gə nə mwe, Yesu a fyel-kwakingrən, atɨ ɓe tənaa boyə ama lə sa təna nan, a təna kula a zə fəra ndi Nze da Ɓwaara kana maggə we ka myentə a mbəə. 10Təna gbəə kwaamɨngrən, a kɨr ləngɨn a hubosərən tənaa boyə ama a wakasərən. Təna dɨ ɗiyəsə le atɨ, “Mɨnə naarə mattə gə we ka myenta?”
11Lagbe dan a ɗiyən, “Mɨnə ɗa ji-lee kəndə ɓashita Musa a dɨ sa atɨ kpale Iliya ɓa luwa kwamətə a shi a mbəə, Ma Həmɨnpwa Yaɓwarən a ɓə shi?”
12Yesu a luwa a sarən atɨ, “Sə gən, Iliya shi mbəə, ɓə ɗadə shee kat mgban. Ɓə gə mɨnə mgban mya doro nə Nze da Ɓwaara atɨ, ndi ɓa tənə kɨr-kɨr, ɓwaare mgban ɓa kworən? 13Hɨnə dɨ səwnə, sə mgban təna ɗa ka Iliya ite nda shi, ɓətɨya mya doro nəngɨn.#9.13 A Matta 17.13 Yesu bɨlərən bwang atɨ Yohana nzə-ɗa batisɨmatə nə nda dɨ kənə, ite nda wadə kwakɨ Iliya.”
Yesu a dɨmdə pɨle ji-dwatə dɨ sɨtɨ a nzə
(Matta 17.14-20; Luka 9.37-43a)
14Ite Yesu a janga gə nə mwotə ka yə Bitrus ka Yakubu ka Yohana asɨ pa mbiɗitɨ lagbe dan, təna naa təkə-təkətɨ ɓwaare ka ji-lee kəndə ɓashita Musa nee takadərən kanyi dɨ mənəsətəmətə kaarən. 15Ite ɓwaarengɨn 'ye gbəwi kanyi a naa Yesu, təna ɗa ndəle kɨr-kɨr, təna virwo a zə hakan a wunakan.
16Yesu a ɗiyərən atɨ, “Ɓə lə mɨnə hwuna dɨ mənəsətəməsən ka mingɨn 'ye takaa dəwna?”
17Ama a vor mingɨn a maddə kormɨngɨn a luwa a san atɨ, “Nzə-kəndəshe, hɨnə shikəw ka nze de, gəkɨlə sɨnə ka pɨla nzə-dwatə a sɨsən, ndaawa byelə. 18Pɨlangɨn kana maɗə nəngɨn, nda dɨ baladən a njiya, pwapɨle a naa pas a kwaamɨngɨn, nda dɨ tuula lyeningɨn, a maɗə a suwə kpəngmgbəng a nyerə ɓətɨ kada. Na nyisə lagbe dəw a təna dɨmdə pɨlangɨn gə sɨtɨ nze, tənaa mban a dɨmdən.”
19Yesu a luwa a sarən atɨ, “Hii! Hwun ji-ɗongə mwadiyalə wanetɨnə! Baa goɗi na ɓə nza kəwnə? Baa goɗi hɨn ɓa ɓwamosowa kəwnə? Wemi ka nzəngɨn ganə.”
20Təna shikan a haka Yesu. Ite pɨla nzə-dwatɨngɨn ɓe naa Yesu, nda baladə nze a njiya, nze a mbərhe ta rwati, ta mgbəntəngə njiya ka pwapule a kwaamɨngɨn.
21Yesu a ɗiyə baagə nze atɨ, “Goɗinə ootɨ pɨla nzə-dwatɨngɨn a kɨttən?”
Baagə nze a san atɨ, “Ka ɓyeləngsən. 22Mba-dɨ-mba nee pɨlangɨn a dɨ ɗongdən a ɗiye, a fərə mgban nda baladən a vor haɓye gəkɨlə nda ɓɨltən. Anda hye ɓa mba asə a ɗa, zə ɗa purusenə, hye gwadenə.”
23Yesu a luwa a san, “Nda lə mɨnə hye dɨ boyə ka sate atɨ, ‘Anda hye ɓa mba asə a ɗa’? Taa asə də Həmɨnpwa aa dɨ mba ɗatə ɓa ɗa ma mwakan.”
24Də a hangɨn gbyel baagə nze a luwa a san atɨ, “Hɨn mwadiyale, gwadi na təkəsə ka ɗongə mwadiyale de.”
25Ite Yesu a niyə ɓwaare gyaɓa kat dɨ paya a hangɨn, nda gɨra pɨlangɨn a san atɨ, “Hye pɨla gbingtə ka muu-kwaame, hinə dɨ gɨrara, dɨmgə sɨsən, ɓe yə ga mɨna pɨrə sɨsən.”
26Pɨlangɨn a gəəshe a wa kawahəme a tyeɓəldə nze kɨr-kɨr, nda ɓə shea dɨmgə sɨsən. Nze a bə ɗəng, ndaa yə humuro ɓətɨ wo bi. Ɓwaare hananang a sa atɨ, “Ɓə mbɨrə.” 27Shezə Yesu a kɨt tɨfə nze a maddən, nda maɗə a kangə.
28Ite Yesu a pɨrə vor hwoɗye, lagbe dan a ɗiyən le a haa ɓotə atɨ, “Mɨnə ɗa hinaa ɓə mba pɨla nzə-dwatɨngɨn a dɨmdən?”
29Yesu a sarən atɨ, “Wule pɨlaa aawa dɨmə na aa ka hiwtə.”
Yesu a mɨna bwe wule mbɨrte ndi ɓa mbɨrə
(Matta 17.22-23; Luka 9.43-45)
30Təna ɗaka hangɨn a koɗə dɨ wake njiya Galili. Yesu aa mwa atɨ ɓwaare a lee haa nda gə də, 31gəkɨlə itɨngɨn sɨne dɨ kənə lagbe dan shee. Nda sarən atɨ, “Hɨn Nze da Ɓwaara hɨne mya dɨ ɗərdi a vədi a tɨfə ɓwaare. Tən ɓa ɓɨlti, beetɨ bətə mwaakɨn hɨn ɓa maggə we ka myentə.” 32Lagbe da Yesu aa lee naarə la nda dɨ boyo, tən mgban kala ɗi la tən ɓa ɗiyən a nə naarə ləngɨn a gərən.
Ɓə wonə pɨri ka kpanətə?
(Matta 18.1-5; Luka 9.46-50)
33Təna tɨla a vɨra Kafanawum. Ite təna pɨrə hwoɗye a nza, Yesu a ɗiyə lagbe dan le atɨ, “Lə mɨnə hwuna dɨ məntəməsən dinəng a nə tɨfe?”
34Təna nza ɗəng tənaa bwe le gəkɨlə ite tənə dɨ waya a nə tɨfe, tən ta məntəmətə a wakasərən a nə wonə pɨri ka kpanətə.
35Nzata Yesu nə le, nda wagatɨrən tən bəw a mbiɗi-kpesərən a sarən atɨ, “Hwun a wakasəwnə kat ma dɨ mwa atɨ nda gəə sɨnə ma kwamətə, a mangɨn a gəə sɨnə ma mbatə, nda mɨna gəə sɨnə kɨsa dəwnə kat.”
36Yesu a nggur a nzə-ɓyeləngə a kangdən a wakasərən. Ndi ta nggur nzəngɨn a tɨfəngɨn nda sarən atɨ, 37“Nagi ndo ma kat luu nzə-ɓyelənge ɓətɨ wule anə gə le de, hɨnə mangɨn a luwo. Ma luri mgban, aa hɨnə ɓəmbə nda luwo, ma lyanari nə nda lurən.”
38Yohana a san, “Nzə-kəndəshe, hina naa ama sɨne dɨ dɨmdə pɨle ji-dwatə gə sɨtɨ ɓwaare a kwakɨnga, hina boyən atɨ nda ɗakan gəkɨlə ɓə tam a vorsəm.”
39Yesu a san, “Ɓe hwunaa kərə mangɨn. Gəkɨlə taa ndəng ma ɓa ɗa səkushipe a vor kwaka, a ɓa mɨna virwo a bwelə hase a na. 40Ma kat aawa kwo nəngəm, mangɨn nee ɓwaa kam. 41Diyalə na dɨ boyownə atɨ, nagi ndo ma kat ma vəwnə haɓi saɓwatə gəkɨlə hwunə hɨnggə Ma Həmɨnpwa a Yaɓwarən, mbak-mbak mangɨn ɓa ɗɨm moone.
Ɗɨkdə ɓwaara a ɗa səhase
(Matta 18.7-9; Luka 17.1-2)
42“Nagi ndo ma kat a ɓa ɗɨkdə hiɗə dɨ vor ji-ɓyeləng ɓyelənyee dɨ mwadiyale ke a ɗa səhase, ɓa pɨrən mya ɓoyən kaɓa tɨmtɨ-sɨdatə ka salake a wurangɨn, a ɗiman a vor gbɨnuwtɨ sɨkorən. 43Anda hye niyə tɨfanga nə ɓa ɗɨkda hye ɗa səhase, hye bənggən. Ndɨka hye ɗɨm myente kaaru-kaaru ka gbɨlə tɨfe, angɨn pɨrgə ite hye ɓa pɨrə vor ɗiya dɨ ləwi kaaru-kaaru ka tyefinga dɨ kpeyə.#9.43 I dorshi kada 44 a sa atɨ, “Eeshe dɨ zɨmrən aawa mbərə, ɗiyəngɨn mgban myaawa ɓɨlə.” 45Anda hye niyə mbwaranga nə ɓa ɗɨkda gə hye ɗa səhase, hye bənggən. Ndɨka hye ɗɨm myente kaaru-kaaru ka gbəgərune a nə ite mya ɗongda a ɗiya aawa mbɨrə ka mbwayinga dɨ kpeyə.#9.45 I dorshi kada 46 a sa atɨ, “Eeshe dɨ zɨmrən aawa mbərə, ɗiyəngɨn mgban myaawa ɓɨlə.” 47Anda hye niyə diisa nə mgban ɓa ɗɨkda a ɗa səhase, hye gwanggaɗagərə a ɗongdə. Ndɨka hye pɨrə həmne da Həmɨnpwa ka diitə hiɗə, angɨn nə pɨrgə ite mya ɗongda a vor ɗiye ka diinga dɨ kpeyə kat, 48a wule haa
“ ‘Eeshe dɨ zɨmrən də
aawa mbərə,
ɗiyəngɨn mgban myaawa mbaran.’#9.48 Naasə: Ishaya 66.24.
49Gə nagi ndo ma mye ɓa ɗadən ka ɗiye ɓətɨ mya dɨ ɗadə se ka fitəkwana.
50“Fitəkwana nee pepe, shezə ndi kana təkəsə ka nɨngsən, ka mɨnə mya ɗadən nda ɓə nɨnga? Gəm ka fitəkwana a sɨsəwnə, hwuna nza ka ɗoltə a wakasəwnə.”
Currently Selected:
Markus 9: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
