Markus 10
10
Kəndəshe da Yesu a nə taka nzaa hwoɗye
(Matta 19.1-12; Luka 16.18)
1Yesu a ɗaka hangɨn a muɗə vor njiya Yawudiya a nggɨrə ɓayatɨ gbɨnuwo Urdun. Təkə-təkətɨ ɓwaare a mɨna paya a hakan, nda kənərən shee ɓətɨ nda duwa ɗa.
2I Farise a shi hakan a kanarən, təna ɗiyən atɨ, “Ɓashita Musa və mure humwatə nda om mesən a dɨmdə gə hwoɗye ma?”
3Yesu a ɗiyərən atɨ, “Ndo gɨraha nə Musa a vəwnə a ɓashitɨ dan?”
4Təna san atɨ, “Musa vədə humwatə atɨ mure a dor malɨmtɨ taka nzaa hwoɗye a om mesən.”
5Yesu a luwa a sarən atɨ, “Gəkɨlə wule nyerəta hubosəwnə Musa a ɓə dorownə atɨ a hwuna ɗaasə. 6Ite Həmɨnpwa a ɗa vɨratə a kwamətə, ‘Nda ɗatɨrən mure ka metə.’#10.6 Naasə: Tiyatə 1.27. 7‘Gə ləngɨn, mure ɓa ɗaka baagən ka nuwogən, a dɨ peyə ka mesən, 8gə tən dɨ kpeyə təna gəə sɨtə hiɗə.’#10.8 Naasə: Tiyatə 2.24. Tən yə tamdə kpe, tən gəə sɨtə hiɗə nə. 9Gə ləngɨn, sa Həmɨnpwa a pedən, ɓe ama aa takan.”
10Ite təna mɨna a vor hwoɗye, lagbe da Yesu a ɗiyən le a nə la nda boyə nə nzaa hwoɗye. 11Nda sarən atɨ, “Nagi ndo ma kat taka nzaa hwoɗye om mesən dɨmdə mɨni ɗɨm itɨ meti som, sharawnə nda dɨ ɗa kaarə. 12Mete mgban taka nzaa hwoɗye ɗaka murəngrə dɨmi ɗɨm a murə som nza kan, nggi mgban sharawnə ngga dɨ ɗa.”
Yesu a ɗɨkə ji-kurkurye fukatə
(Matta 19.13-15; Luka 18.15-17)
13Ɓwaare nee dɨ shi ka ji-kurkurye a haka Yesu gə nda parən a ɗɨkərən fukatə, shezə lagbe dan a gɨratɨrən. 14Ite Yesu a naa omte lagbe dan a dɨ om jingɨn, nda ɗa yedi-kɨttə ka ləngɨn. Nda sarən atɨ, “Ɗakamə ji-kurkurye a təna shi hake, ɓe hwunaa kərərən shitə, gəkɨlə həmne da Həmɨnpwa nə hɨnggə jee ɓətɨ wule 'ye. 15Diyalə na dɨ boyownə, ma kat aa luu həmne da Həmɨnpwa ɓətɨgə nzə-ɓyeləngə, mangɨn aa dɨ ga pɨrə vor həmnəngɨn.” 16Yesu a por je a tyefingɨn, nda puk tyefingɨn a nəngrən a ɗɨkərən fukatə.
Lagba nzə-gɨnətə
(Matta 19.16-30; Luka 18.18-30)
17Beetɨ ite Yesu dɨmə nə tɨfe dɨ muɗi, ama a giɓa a shi hakan, nda gyerə humwasən a san atɨ, “Nzə-kəndəshe ma femə, mɨnə kana na ɗa na ɓə ɗɨm myente kaaru-kaaru?”
18Yesu a san, “Ɓə ya hye dɨ sa atɨ hɨn ma fema? Di taa ama femə də pɨrgə Həmɨnpwa hiɗə kal-kal. 19Hye lee ɓashita Həmɨnpwa, ‘Ɓe ɓɨl we, ɓe ɗa sharawne, ɓe hɨri, ɓe kər-jeronye a nə ama, ɓe tɨmbɨr ama a lugən shee dan, hye ndukodə baagu ka nuwogu.’ ”
20Mangɨn luwa a sa Yesu atɨ, “Nzə-kəndəshe, shingɨn kat hɨn ɗatɨrən ka swaɗəshi baa ɓəgəng.”
21Yesu a nidən ka mwoha a san atɨ, “Se hiɗə hye ɗongən. Muɗi wudə ɗərdə shee dəw 'ye hye gə kaarən kat, hye ɓyana ji-poritə taangɨn, hye ɓa ɗɨm gɨnətə a vor pwa. Hye mɨna asɨ kwaɗe.”
22Ite mangɨn a kɨl la Yesu a boyən, nda twaka kɨr-kɨr a virwo a muɗə gəkɨlə ndi nzə-gɨnəti kɨr-kɨr.
23Yesu a nidə haa a taka, nda sa lagbe dan atɨ, “Ɓa gə ka otə nzə-gɨnətə a pɨrə həmne da Həmɨnpwa!”
24Lagbe dan a ɗa ndəle ka la nda boyo. Yesu a mɨna sarən, “Hwun je de, pɨrtə a həmne da Həmɨnpwa nee 'wi-'wi! 25Ka ite atɨ nzə-gɨnətə a pɨrə həmne da Həmɨnpwa, ɓa gə lukwaptə pupuluk ngga gɨɗɨkə a dɨmə dɨ gwo lerɨme.”
26Lagbe dan ta kɨl ləngɨn, təna mɨna ɗa ndəle kɨr-kɨr, tən ta ɗiyəsə le atɨ, “Ɓə wonə ɓa ɗɨm mbəta?”
27Yesu a nidərən a sa atɨ, “Sa ɓwaara aa dɨ mban a ɗa, angɨn a haka Həmɨnpwa sə ɗati, gəkɨlə taa asə də a ɓa saragə Həmɨnpwa ka ɗatə.”
28Bitrus a san, “Zə niyi, hin ɗaka shee kat hinə dɨ koɗu!”
29Yesu a luwa a san, “Diyalə na dɨ boyownə atɨ, ma kat ɗaka hwoɗye ka zəbərye ka mwafe i morye ka mandye, ka nuwogən ka baagən ka jingɨn ka gaashe dan, gəkɨlə le de ka ləmə feme da Həmɨnpwa, 30mangɨn mgban ɓa ɗɨm moone kaɓa kpan laka haru a vor vɨratə a nzatɨnə ɓəgəng. Mangɨn ɓa ɗɨm hwoɗye ka mwafe morye ka i mandye ka nuwoye ka je ka gaashe, kat ka tənətə. A nzate ɓaga shi mgban, mangɨn ɓa ɗɨm myente kaaru-kaaru. 31Shezə mi kwamətə hananang, ɓa sɨ gəə tənə mi mbatə. Sə mgban myee tənə mi mbatə hananang, ɓa mɨna asɨ gəə tənə mi kwamətə.”
Yesu a mɨna bwe wule mbɨrte ndi ɓa mbɨrə
(Matta 20.17-19; Luka 18.31-34)
32Təne a nə tɨfe dɨ muɗə Urshelima, Yesu a luu kwamətə ta muɗi. Lagbe dan a ɗa ndəle ka ləngɨn, kala mgban a gə myee dɨ koɗə beesən. Yesu a mɨna waga lagbe dan bəw a mbiɗi-kpe a gyenge a boyərən lə sa ɓa bəngrən. 33Nda sarən atɨ, “Gəngnə hɨm nə dɨ muɗəmə Urshelima, mye ɓa dɨ vədi hɨn Nze da Ɓwaara a tɨfə kɨsehəmi kpan-kpanye kat ka ji-lee kəndə ɓashita Musa. Tən ɓa ɗe ɓashitɨ we, tən ɓa vədi a tɨfə myee aa Yawude. 34Tən ɓa sharti a təfi nawye, tən ɓa byengri, təna ɓə shea ɓɨlti. Beetɨ bətə mwaakɨn, hɨn ɓa maggə we.”
Sa Yakubu ka Yohana a nyisə Yesu
(Matta 20.20-28)
35Yakubu ka Yohana, je da Zabadi, a shi haka Yesu, a san atɨ, “Nzə-kəndəshe, hinə ka sa hin ɓa nyisu, nagi mɨnə səngɨn hye gwadenə kan.”
36Nda ɗiyərən, “Mɨnə hwuna dɨ mwo atɨ na gwadəwnə kan?”
37Təna san atɨ, “Na hye mwa, zə gwadenə, a ma hiɗə a wakasenə a nza tɨfə zɨməngu, ma hiɗə mgban a nza tɨfə lyekɗəngu a vor həmne dəw.”
38Yesu a sarən, “Hwunaa lee wule sa hwuna dɨ nyisə. Hwun ɓa mban a soɓwo ka kpaa tənəte hɨn ɓa soɓwo kan ma? Naasə mgban batisɨmate mye ɓa ɗe, hwun ɓa mwa mya ɗəwnə batisɨmatɨngɨn?”
39Təna mwan atɨ, “Hin ɓa mba angɨn.”
Yesu a sarən, “Mbak-mbak hwun ɓa sop wule kpaa tənətə de, mya ɗəwnə wule batisɨmatɨ de, 40kat ka angɨn, byelə nzatə a tɨfə zɨməngi ka tɨfə lyekɗəng gi aa hɨnggi nə ɓətɨ na vəwnə. Wule heengɨn mya ɗatɨrən gə le da myee Həmɨnpwa a nggɨlə.”
41Ite mbiɗitɨ lagbee bəw a kɨl ləngɨn, yedingrən a kɨɗərən ka Yakubu ka Yohana. 42Yesu a wagatɨrən a paya dərən kat a sarən atɨ, “Hwun leyə atɨ myee mya watɨrən atɨ tənə həmye da myee aa Yawude a vɨratə, a dɨ ɗa ɓwaare sɨmwarashe ka mbamtə. 43Ganə a wakasəwnə, myaa dɨ ɗaasə. Ma kat dɨ mwi atɨ nda gəə makpanə a wakasəwnə, mangɨn nə ma ɓa hyata nəngɨn ɓətɨ kɨsa a wakasəwnə, 44ma mgban dɨ mwo kpanətə, mangɨn nə ɓa gəə kɨsa dəwnə kat. 45Gə hɨn Nze da Ɓwaara hɨn taa shi vor vɨratə gə mya ɗe kɨsawne, shezə na shi gə na gəə kɨsa da ɓwaare. Na shi mgban gə na vədə myenshi a luwa ɓwaare furi-furi.”
46Beetɨ angɨn, təna pɨrə vor vɨra Jeriko. Ite Yesu ka lagbe dan ka ɓwaare hananang woyo dɨ dɨmgə vor vɨratɨngɨn, a welə nə də nzə-nyitshi mya dɨ warən atɨ Batimawus (sɨnə nze da Timawus). Sɨne nza gyengə tɨfe dɨ nyit shee. 47Ite nda kɨlə atɨ Yesu a dɨ Nazarat nə dɨ pɨri, nda tiya wagaha ka kormɨngɨn a pwa atɨ, “Yesu, Nze da Dawuda, ɗa purushi gwadi.”
48Ɓwaare furi-furi a gɨrarən a san atɨ, gbə kwaamɨnga nza ɗəng. Nda ɓə shea mɨna maddə kormɨngɨn a pwa kaɓa kpan a waha, “Nze da Dawuda, ɗa purushi gwadi!”
49Yesu a kangə a sa atɨ, “Wamrən.”
Təna warən a san atɨ, “Nanga wula, maɗa wa sɨne dɨ wara.” 50Nda ɗongdə ɓarawtɨ dan a gyenge a bɨrpə a maɗə a kangə a zə haka Yesu.
51Yesu a ɗiyən, “Mɨnə hye dɨ mwo atɨ na ɗəw?”
Weləngɨn a san atɨ, “Rabi, hɨne dɨ mwi atɨ, na ɗɨm naa haa.”
52Yesu a san atɨ, “Wudə, mwadiyale dəw mbəda.” Də a hangɨn diingɨn a wonə nda koɗə Yesu a muɗə.
Currently Selected:
Markus 10: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
