Markus 5
5
Yesu a dɨmdə pɨle ji-dwatə gə sɨtɨ ama a Garasa
(Matta 8.28-34; Luka 8.26-39)
1Yesu ka lagbe dan a lyembərə dɨ nə kwaka gərə Galili a zə njiya Garasa. 2Ite Yesu a janga gə koombotə a dɨ nggɨra a haa kpamtə, tee ɗəng ama ka pɨle ji-dwatə a sɨsən a dɨma dɨ gonggoryi faree mya dɨ ɗək wogye də, a giɓa a jipa Yesu. 3Mangɨn a gonggoryi farengɨn nda dɨ nza, nda maɗə a mgbɨləha, gəkɨlə mye kana pukən gbərəwe nda dɨ tawan. 4Mba-dɨ-mba, mye kana pukən malye a tyefingɨn ka mbwaye, nda duwa tawarən, nda ɓe gbərəwa mya pukən a mbwayingɨn. Ama aa yə mban a kɨsə a gbaltən. 5Fərə-fərə, tuko-tuko sɨne a gonggoryi farengɨn ka wake mogye dɨ hyendəwi dɨ ta waga kawahəme, ta maga sɨsən ka fare.
6Ite nda niyə a naa Yesu a haa ɓonge, nda giɓə a jiparən, asɨ gyerə humwasən. 7Nda maddə kormɨngɨn a wa kawahəme ta sa atɨ, “Yesu, Nze da Həmɨnpwa Həmɨ gətə kat, mɨnə pedi kəw? Hɨnə dɨ nyisu a vor kwakɨ Həmɨnpwa, ɓe tənəə di.” 8Gələ Yesu boyə pɨlengɨn le atɨ, “Hwun pɨle ji-dwatə, dɨmam gə sɨtɨ ma.”
9Yesu a ɗiyə mangɨn atɨ, “Kwakɨnga a shiya?”
Mangɨn a luwa a sa Yesu atɨ, “Kwaka nə Hananang gə hinə furi-furi.” 10Pɨle ji-dwate a sɨtɨ mangɨn a nyisə Yesu anəsə-anəsə atɨ, ɓe Yesu aa omtɨrən gə vor njiya hangɨn.
11Itɨngɨn doomo gusune nee a hangɨn kanyi dɨ zəmi a mbwara mwe. 12Ji-dwatɨngɨn a nyisə Yesu a san atɨ, “Na hye dɨmdenə gə sɨtɨ manə, ɗakenə maa hina pɨrə sɨtɨ gusuna nə.” 13Yesu a mwarən ɓətɨ təna nyisən. Pɨle ji-dwatɨngɨn a dɨmgə sɨtɨ mangɨn a muɗə a dɨ pɨrə sɨtɨ gusune. Gusunəngɨn a rɨfə a sargə zangtə a pɨrə vor haɓye a soɓwo a mbərə kat. Furo gusunəngɨn tɨl haru bəwtə kpe.
14Ji-nidə gusunəngɨn a gyeɓə a muɗə a boyə ɓwaaree a vor vɨratə, ka mbiɗitɨ hee kat lə sa ɗa ɗatɨngɨn. Ɓwaare a dɨmə a zə hangɨn gə təna naa sa ɗa. 15Ite təna shi haka Yesu, təna sɨ pa mangɨn a pɨle ji-dwatə furi-furi a dɨmgə sɨsən ɓə mɨna a sombingɨn mye kalan sɨɓwetə sɨne nza, kala a gərən. 16Mingɨn 'ye naa ləngɨn nə boyə ɓwaare le a nə ma mya dɨmdə pɨle ji-dwatə gə sɨsən, ka mɨni lə sa bəng gusune mgban. 17Də mgban mingɨn a tiya nyittə nyisə Yesu atɨ, nda muɗə a ɗaka gombo njiya darən.
18Ite Yesu a jengə koombotə ɓa muɗə, mangɨn a mya dɨmən də pɨle ji-dwatə gə sɨsən a nyisə Yesu a san atɨ, ndi ɓa koɗən təna muɗə kan. 19Yesu a kwo, nda san atɨ, “Muɗə haka myee dəw a hwoɗye, hye boyərən lə kaɓa sə kɨr-kɨra Həmɨnpwa a ɗəw, ka ɗate nda ɗa purusa a wulakəw.” 20Mangɨn a virwo a muɗə mgban a tiya hiwatə ka ləngɨn a vor bətɨ Dikapolis, ndi ta boyə ɓwaare lə sə kpanaa Yesu a ɗan, ka gwate nda gwadən. Ɓwaare kat a ɗa ndəle.
Yesu a gwadə njite mbɨri ka mete aa mworə
(Matta 9.18-26; Luka 8.40-56)
21Ite Yesu a ɗaka hangɨn ka koombotə a nggɨrə ɓayate hiɗə, təkə-təkətɨ ɓwaare asɨ paya a takadən a kwaka haɓye. 22Ama hiɗə dɨ vor mi kpan-kpani lyentə a vɨnə kəndəshe da Yawude a shi haka Yesu, kwakɨ mangɨn nə Yayirus. Ndi ɓe naa Yesu, nda shi a gyerə mbwayingɨn. 23Nda nyisən kɨr-kɨr atɨ, “Njishi ndə aa mworə, kotɨrə bə waka we ka myentə. Wa hye sɨ parə ka tɨfanga gəkɨlə ngga piyagə ootə, ngga ɗɨmə a mbə.” 24Yesu a koɗən təna muɗə.
Ɓwaare mgban hananang a koɗərən a tiltən. 25Itɨ meti nee də a vor ɓwaarengɨn ka ootɨ dɨmtɨ zaambe kyawatə bəw a mbiɗi-kpe. 26Nggi ɓongə kote dɨ tənə ka ootɨngɨn, nggi kɨɗa taa kɨr-kɨr a nə nggomye a haka ji-ɓwatə, kat ka angɨn ootɨngɨn pɨrə ngga dɨ pɨrə humwa. 27Ite metɨngɨn a kɨlə atɨ Yesu nee a hangɨn, ngga kwaɗa beesən a vor ɓwaare, ngga shi a dɨ pa jiimə ɓarawtɨ dan, 28gəkɨlə nggi boyə atɨ, “Nagi nda sɨɓwetɨ dan nə na ɗɨmə a parən, hɨn leyə atɨ hɨn ɓa piyagə ootɨnə.” 29Ite ngga sɨ pa ɓarawtɨ dan, tee gbyel a hangɨn zaamba dɨ dɨmgərə a kangə, ngga kɨla sɨsə dwat, ootə mbəə.
30A hangɨn Yesu a leyə atɨ gətə dɨmə dɨ sɨsən. Sɨne a vor ɓwaare, nda ɓiya tan-tan, a ɗi le atɨ, “Wonə pee ya?”
31Lagbe dan a san atɨ, “A ɓwaare nə peyi tilta dɨ fye sɨsa, hye ɓə mɨna dɨ ɗi le atɨ, ‘Wonə pa sɨsa?’ ”
32Yesu a pɨrə humwa ta nii hee gə nda naa wonə pa sɨsən. 33Mete sɨ pa sɨsən lee sa ngga kɨlan a sɨsə, ngga sɨ gyerə humwasən ka kala, sɨsə ta waragərə ngga boyən diyalə ləngɨn kat. 34Yesu a sarə, “Njishi, mwadiyale dəw mbəda gə ootə. Zə muɗə vor ɗoltə, hye piyagə tənətə.”
35Ite Yesu nee a vor byele, imi a shi dɨ hwoda Yayirus ndi makpanə vɨnə kəndəshe da Yawude. Təna sa Yayirus atɨ, “Njisa mbɨrə mbəə, ɓə ya hye dɨ mɨna ɓwadə nzə-kəndəshe ɓə?”
36Yesu kɨl la təna boyə, kat ka angɨn nda ɗa ɓətɨgə ndaa kɨlə, nda virwo haka Yayirus a san atɨ, “Ɓe kala aa gu, zə mwake ɗəng.”
37Ite nda pɨrə a dɨ muɗə hwoɗingɨn, ndaa mwa ama a koɗərən də, Bitrus ka Yakubu ka Yohana mufə Yakubu nə koɗən ɓəmbə. 38Ite təna tɨlə hwoda Yayirus, ɓwaare naa pas, təne dɨ təwi dɨ kehee. 39Nda pɨrə vor hwoɗye a sarən, “Ɓə mɨnə ɗa hwuna dɨ təwo a dɨ kehee? Njitɨngɨn aa mbɨrə, shinə ngga dɨ shinə.” 40Myee a vor hwoɗingɨn a fɨlə ka kyeɗəke ta kyeɗəkgən.
Ite nda dɨmdə myee a vor hwoɗye kat a haa bwange, nda wa baagə njitə ka nuwogərə, ɗɨkənə lagbe dan dɨ mwaakɨnə təna pɨrə vor haa wo njitə a bə də. 41Yesu a kɨt tɨfə njitɨngɨn, a sarə ka kwaame darən atɨ, “Talitha kumi,” naarə ləngɨn nə atɨ, “Nji swatə, hɨnə dɨ səw atɨ, maɗi!” 42Də ngga maɗə a kangə shant a tiya wetə a hangɨn (njitɨngɨn nə ka kyawatə bəw a mbiɗi-kpe). Tən kat təna ɗa ndəle kɨr-kɨr! 43Yesu a fyel-kwakingrən atɨ ɓe tənaa boyə ama lə sa nda ɗa. Nda mɨna sarən atɨ a mya vərə sɨzɨmtə gə ngga zɨmə.
Currently Selected:
Markus 5: bcy
Highlight
Share
Copy
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
