Marku 1

IISUSAN RUADOLOIN ALGU 1-3

Iivan Ristii

(Matf. 3:1-12; Luk. 3:1-18; Iiv. 1:19-28)

1Hyvä viesti Iisussah Hristossah, Jumalan Poigah näh, lähti liikkehele nenga: 2Jumalan iänenkandajan Isaijan kniigas on kirjutettu nämä Jumalan sanat:

– Minä työnnän iel Sinuu oman viestinvedäjän,

kudai varustau Sinule dorogan.

3Kirgujan iäni kuuluu elämättömäs muas:

– Valmistakkua Ižändäle dorogu,

luajikkua oigiekse Hänen tropat!

4Muga rodihgi. Iivan ristii rahvastu elämättömäs muas da saneli, ku heil pidäy hyllätä riähkät, kiändyö Jumalan puoleh da ottua ristindy, ku suaja prosken՚n՚u riähkis. 5Hänen luo tuli äijy rahvastu Jerusalimaspäi da Juudien joga puolespäi. Hyö sanottih omat riähkät, i Iivan ristii heidy Jordanjoves.

6Iivanal oli piäl verbl՚uudan villas luajittu soba, kudai oli vyötetty nahkuvyöl, hänen syömizenny oldih čirkat da meččykimalehien mezi. 7Häi saneli: «Jälles minuu tulou minuu vägevembi. Minä en päi ni kumardumah, ni kerittämäh Hänen jallaččiloin nuorazii. 8Minä ristiin teidy viel, Häi ristiy teidy Pyhäl Hengel.»

Iisussua ristitäh da Hänen mielii opitah

(Matf. 3:13-4:11; Luk. 3:21-22; 4:1-13)

9Niilöinny päivin Iisus tuli Galilein Nazarietan linnaspäi, i Iivan ristii Händy Jordanjoves. 10Vies nostes Iisus nägi, kui taivahat levähtettihes avvoi, da Hengi kyyhköilinduzennu heityi Hänen piäle. 11I taivahispäi kuului iäni: «Sinä olet Minun armas Poigu, Sinuh Minä olen mieldynyh.»

12Kerras sen jälgeh Hengi ajoi Händy elämättömäh muah. 13Iisus oli elämättömäs muas n՚ellikymmen päiviä sattanan muaniteltavannu. Häi eli meččyelättilöin joukos, a anhelit piettih Hänes huoldu.

Iisus algau oman ruavon

(Matf. 4:12-17; Luk. 4:14-15)

14Sen jälgeh, ku Iivan oli otettu kiini, Iisus tuli järilleh Galileih da saneli Jumalan jevangeliedu. 15Häi sanoi: «Aigu on tulluh, Jumalan valdu on tulluh lähäle. Hylläkkiä riähkät da uskokkua hyväh viestih!»

Enzimäzet opastujat

(Matf. 4:18-22; Luk. 5:1-11)

16Konzu Iisus astui Galileinjärven randua myöte, Häi nägi Simonan da sen vellen Andrein. Hyö oldih laskemas verkuo järveh, ku oldih kalastajat. 17Iisus sanoi heile: «Astukkua minule jälles. Minä luajin teis ristikanzoin pyydäjii.» 18Sil sanal hyö jätettih verkot da lähtiettih Hänele jälles.

19Palazen peräs Iisus nägi Juakoin da hänen vellen Iivanan, Zevedein poijat. Hyögi oldih venehes, sellitettih verkoloi. 20Iisus kerras kučui heidy. Hyö jätettih Zevedei-tuatto da hänen palkuruadajat veneheh, a iče lähtiettih Iisusale jälles.

Iisus Kapernauman sinagougas

(Luk. 4:31-37)

21Hyö tuldih Kapernauman linnah. Suovattan Iisus meni kohti sinagougah da opasti sie. 22Rahvas diivuittihes Hänen opastandoi. Häi opasti heidy muga, kui opastau se, kel on valdu, a ei muga, kui opastetah zakonanopastajat.

23Sil kerdua linnan sinagougas oli mies, kudai oli paganhengen vallas. Häi rubei kirgumah: 24«Midäbo sinä meispäi tahtot, Iisus Nazariettalaine? Oletgo tulluh meidy hävittämäh? Minä tiijän, ken sinä olet, Jumalan Pyhä!» 25No Iisus käski kovah paganhengele: «Salbua suu! Lähte hänespäi iäre!» 26Sit paganhengi puistaldi miesty i suuren iänenke lähti hänespäi. 27Kaikin hämmästyttih i kyzeltih toine toizel: «Mibo tämä ollou? Täl miehel on valdu opastua uudeh luaduh! Paganhengetgi kuunnellah Hänen käskyy.» 28Paginat Hänes levittih kaikkiele ymbäri Galilein muadu.

Iisus piästäy Simonan muatkoin da muut voimattomat

(Matf. 8:14-17; Luk. 4:38-41)

29Sinagougaspäi hyö kerras mendih Simonan da Andrein kodih. Juakoi da Iivan oldih heijänke. 30Simonan muatkoi virui suures žuarus, hyö kerras sanottih Iisusale häneh näh. 31Iisus meni hänen luo, otti käis i avvutti nosta. Žuaru lähti naizespäi, häi rubei gostittamah tulluzii.

32Ehtäl, konzu päiväine laskih, Iisusan luo tuodih kai voimattomat da net, kudamat oldih karuloin muokatut. 33Kai linnu kerävyi uksen edeh. 34Iisus piästi äijii, kedä vaivattih kaikenmoizet voimattomuot, da ajoi ristikanzoispäi äijän karuu. Häi ei andanuh karuloile paista, ku net tiettih, ken Häi on.

Iisus lähtöy iäre Kapernaumaspäi

(Luk. 4:42-44)

35Aijoi huondeksel, konzu vie oli pimei, Iisus nouzi da lähti pihale. Häi meni yksinäzeh kohtah da moliihes sie. 36Simon da hänenke olijat mendih Iisussua eččimäh, 37löyttih Händy da sanottih: «Kaikin ečitäh Sinuu.» 38No Iisus sanoi: «Davaikkua lähtemmö tiäpäi iäre da menemmö rinnalolijoih kylih. Minul pidäy niilöisgi sanella Jumalan sanua, sendähhäi minä olen tiä.» 39Muga Häi lähti da käveli kaikkiel Galilein muadu myöte, saneli Jumalan sanua sinagougis da ajoi iäres karuloi.

Iisus piästäy prokuazal voimattoman

(Matf. 8:1-4; Luk. 5:12-16)

40Iisusan luo tuli prokuazal voimatoi, langei polvilleh da pokoroiččih: «Ku tahtonet, Sinä voit puhtastua minuu.» 41Iisusale rodih žiäli händy. Häi oijendi käin, kosketti miesty da sanoi: «Minä tahton. Puhtastu.» 42Kerras prokuazu lähti miehes iäre, häi rodiihes puhtahakse. 43Iisus työndi hänen iäres da kieldi lujah: 44«Kačo, ku nikelle et sanos nimidä täh niškoi. Mene vai ozuttai papile da anna omas puhtastundas se, min Moisei on käskenyh andua, ku kaikin nähtäs sinun puhtastundu.» 45No siepäi lähtehyy mies rubei kaikkiel sanelemah, midä Iisus oli luadinuh. Sendäh Iisus ei voinnuh enämbiä kaikkien nähten mennä ni yhteh linnah. Häi pyzyttelih linnoin ulgopuolel elämättömis kohtis, i kaikkielpäi tuli Hänen luo rahvastu.

Currently Selected:

Marku 1: LIVVI

Highlight

Copy