Апостолтнэнь тевест 1

Иневанькс Оймеялтто Иисусонь алтавксось

1Васенце книгасонть мон сёрмадынь теть, Теофил, весемеденть, мезе Иисус тейсь ды мезес тонавтсь ушодома шкасто саезь 2се чинть самс, зярдо Сон кепедевсь менельс. Теде икеле Сон Иневанькс Оймеялтонть вельде макссь кармавтовкст Эсь кочкавт апостолтнэнень. 3Эсензэ куломадо мейле Иисус эрьва кодамо невтевкссэ кемевиксстэ невтизе Эсь прянзо вельмезекс. Сон лиснесь сынст икелев ниленьгемень чинь перть ды ёвтнесь Пазонь Инязорксчиденть. 4Весть, апостолтнэнь марто ярсамо шкасто, Сон макссь тенст истямо кармавтовкс: «Илядо тукшно Ерусалимстэ, мекевланк, учодо Тетянть алтазь казнензэ, конадонть Мон тенк кортынь. 5Иоанн нававтсь-лемдсь ломантнень ведьсэ, тынь жо зярыя чинь ютазь ультядо нававтозь Иневанькс Оймеялтсо».

Иисусонь менелев кепедевемазо

6Секскак, зярдо тонавтницятне пурнавсть Иисусонь перька, сынь кевкстизь Сонзэ: «Азоро, паряк сась Теть шкась одс велявтомс весень лангсо Израилень инязорксчинть?» 7Сон мерсь тенст: «Аволь тынк тевесь содамс шкатнень ды читнень, конатнень Тетям путынзе Эсь азорксчинзэ вийсэ. 8Ансяк зярдо Иневанькс Оймеялтось валги лангозонк, сестэ тыненк максови вий ды тынь карматадо улеме Монь эйстэ ёвтницякс-яволявтницякс Ерусалимсэ, весе Иудеясонть ды Самариясонть, ды моданть сехте васоло таркатнесэяк». 9Тень мерезь, Сон сынст сельмест икеле кармась кепедевеме верев, ды пелесь кекшизе Сонзэ эйстэст. 10Иисусонь кепедевемадо мейлеяк тонавтницятне пштистэ вансть менелентень, зярдо апак учо ваксозост лиссть ашосо оршазь кавто ломанть. 11Сынь мерсть: «Галилеянь ломанть! Мекс тынь аштетядо ды вантадо менельс? Те Иисус, кона саезь ваксстонк менелев, истямо ладсо велявтыяк, кода неинк менельс туеманзо».

Иудань таркас апостолонь кочкамось

12Теде мейле апостолтнэ валгсть пандонть лангсто, конанень мерильть Ойумарькс пандо, ды састь мекев Ерусалимев. Те пандонть ды Ерусалименть ютксо молема таркась ульнесь авасоло, вайгельбень кувалмошка. 13Зярдо састь ошов, сынь пурнавсть вере покш нупальс, косо пурнавкшность свал. Тосо ульнесть Петра ды Яков, Иоанн ды Андрей, Филип ды Фома, Бартоломей ды Матвей, Алфеень Яков, Симон Зилот* ды Яковонь Иуда цёразо. 14Весе сынь сеедьстэ пуромкшность тозо ве мельсэ озномо ды энялдомо. Сынст марто озность зярыя аваткак, Иисусонь братонзо ды Марияяк, Иисусонь авазо. 15Зярыя чинь ютазь, кемицянь промкссо, косо ульнесть сядо комсешка ломанть, Петра стясь ды кармась кортамо: 16«Кемиця ялгат! Эрявсь топавтовомс се Сёрмадовксонтень, конань эйсэ Иневанькс Оймеялтось Давидэнь вельде умок икелев ёвтась Иудадо. Иуда ульнесь кинь невтицякс Иисусонь кундыцятнень туртов. 17Сон ульнесь минек ютксо вейкекс ды важодсь мартонок вейсэнь тевсэнть». 18– Ярмактнень лангс, конат тензэ максозельть зыянов тевензэ кисэ, сон рамась пакся, косо прась прянзо лангс ды истя яжавсь, мик пекезэяк сезевсь, ды ёртневсть сюлонзо-пекензэ. 19Теде кармасть содамо весе Ерусалимень эрицятне ды лемдизьгак те паксянть эсест кельсэ Акелдамакс, Верь Паксякс. – 20«Псалтирьсэ сёрмадозь:

“Кадовозо чавокс сонзэ кудозо,

ды илязо кадово сонзэ эйс эриця”,

ды истя жо:

“Кадык лиясь сайсы эсензэ лангс сонзэ ваныцянь важодеманзо”.

21Секскак миненек эряви кочкамс Иудань таркас ломань сетнень ютксто, конат свал якасть мартонок, зярдо ютксонок ульнесь Иисус Азорось, 22Иоаннонь пельде Иисусонь нававтовомастонть саезь се чинть самс, зярдо Иисус саезель минек ютксто менелев. Те ломанентень, кода миненеккак, улема Иисусонь вельмемадонзо ёвтницякс».

23Пуромозтне яволявтсть кавто лемть: Иосифень, конанень мерильть Барсаба эли Юстус, ды Матвиень. 24Седе мейле весе сынь озность: «Азоронок, Тон содасак эрьванть седеензэ. Невтик тенек, конань неть кавтотнень ютксто кочкик 25важодеме апостолокс Иудань таркас, эдь сон тусь тов, косо тензэ улемаяк». 26Мейле сынь каясть жеребейсэ, ды уцяскась прась Матвей лангс. Ды сон совавтозель кевейкее апостолтнэнь юткс.

Currently Selected:

Апостолтнэнь тевест 1: ОВ

Highlight

Copy