Мф 3

3 ГЛАВА

1-12 Тынеш Пуртышо Иоанн. 13-17 Иисусым тынеш пуртымаш.

1Тиде жапыште Тынеш Пуртышо Иоанн толын да Иудей ир мландыште увертарен туныкташ тӱҥалын. 2Тудо ойлен: «Языкым касарыктен, Юмо деке савырныза! Пылпомыш Кугыжаныш ынде лишемын!» 3Исаия пророк тудын нергенак тыге каласен:

«Ир мландыште кычкырышын йӱкшӧ шокта:

Господьлан корным ямдылыза,

Тудын йолгорныжым вияшым ыштыза!»#3:3 Ис 40:3.

4Иоанн верблюд меж вургеман улмаш, кыдалыштыже шӱштӧ ӱштӧ лийын, кочкышыжо шурнышырчык да ир мӱкш мӱй лийыныт. 5Тудын деке Иерусалим, уло Иудей да Иордан эҥер воктенысе чыла вер гыч шуко калык толын. 6Нуно языкыштым почын ойленыт, да Иоанн нуным Иордан эҥереш тынеш пуртен.

7Тынеш пураш толшо шуко фарисей ден саддукей-влакым ужмеке, Иоанн нунылан каласен: «Те, шем кишкын шочшыж-влак! Ончыкылык шыде логалме деч утлен куржаш кӧ тыланда каҥашым пуэн? 8Языкым касарыктен, Юмо деке савырнымыланда келшен толшо саскам шочыктыза. 9”Мемнан ачана Авраам” манын, кӧргыштыда ида шоно. Тыланда ойлем: Юмо теве нине кӱ-влак гычат Авраамын икшывыж-влакым ыштен кертеш. 10Ынде пушеҥге вож воктене товар ямде кия: сай саскам пуыдымо чыла пушеҥгым руат да тулыш шуат. 11Языкдам касарыктен, Юмо деке савырныза манын, мый тендам вӱд дене тынеш пуртем, но почешем Толшо мый дечем виянрак, мый Тудын йолчиемжым нумалашат ом йӧрӧ. Тудо тендам Святой Шӱлыш да тул дене тынеш пурта. 12Тудын кидыштыже кольмо, Тудо Шкенжын идымжым эрыкта: шыдаҥжым клатыш пога, а арважым йӧрташ лийдыме тулеш йӱлалта».

13Тунам Иисус Галилей гыч Иордан эҥер воктеке Иоанн деке тынеш пураш толын. 14Но Иоанн Тудым чарен ойлен: «Мыйым Тый тынеш пуртышаш улат ыле, а Тый мый декем толынат!» 15Иисус вашештен: «Ынде тек тыге лиеш. Тидын дене ме кӱлеш семын Юмын эрыкшым#3:15 Эрык – воля, желание. шуктена». Тунам Иоанн тынеш пурташ келшен. 16Тынеш пуртымо деч вара Иисус тунамак вӱд гыч лектын. Тудлан пылпомыш почылтын, да Тудо Юмын Шӱлышым ужын. Шӱлыш кӧгӧрчен семын волен да ӱмбакыже толын. 17Пылпомыш гыч йӱк шоктен: «Тиде Мыйын йӧратыме Эргым, Мыйын поро кумылем Тудын дене».

Currently Selected:

Мф 3: УС

Highlight

Copy