Мф 21

21 ГЛАВА

1-11 Иисус Иерусалимыш миен шуэш. 12-17 Иисус храм гыч сатучо-влакым поктен луктеш. 18-22 Кошкышо смоква пушеҥге. 23-27 Иисусын властьше нерген йодыш. 28-32 Кок эрге нерген туштен каласымаш. 33-46 Виноград аҥам кучышо-влак нерген туштен каласымаш.

1Иерусалим деке лишеммышт годым Елеон курыкеш#21:1 «Елеон курык» – грекла возымаште «Олив курык» але «Олив пушеҥган курык». верланыше Виффагий деке шумекышт, Иисус кок тунемшыжым ончык колтен 2да нунылан каласен: «Ончылно койшо ялыш мийыза. Миен шумекыда, йолыштен шогалтыме вӱльӧ оселым ужыда, пеленже самырык осел лиеш, нуным мучыштарыза да Мый декем кондыза. 3Тыланда иктаж-кӧ иктаж-мом каласа гын, тыге вашештыза: ”Нуно Господьлан кӱлыт”. Тудо тунамак нуным колта». 4Пророк гоч ойлымо шомак шукталтше манын, тыге лийын. Пророк ойлен:

5«Сионын ӱдыржылан каласыза:

теве тыйын Кугыжат тый декет толеш,

Тудо – ӱҥышӧ,

вӱльӧ осел ден самырык оселым,

кычкыме оселын чомажым, кушкыж шинча».#21:5 Ис 62:11, Зах 9:9. «Сионын ӱдыржӧ» – Иерусалим манын умылыман.

6Тунемшыж-влак каеныт да, кузе Иисус кӱштен, тугак ыштеныт. 7Вӱльӧ осел ден самырык оселым конденыт, нунын ӱмбак вургемыштым шарен пыштеныт, Иисус кушкыж шинчын. 8Тушто моткоч шуко калык лийын, иктышт вургемыштым корнеш шареныт, а весышт пушеҥге укшым пӱчкеденыт да корныш оптеныт. 9Ончылно кайыше калыкат, почеш толшо-влакат виян кычкыреныт:

«Осанна#21:9 Осанна – тиде мут ’утаре’, ’полшо’ манмым ончыкта. Давидын Эргыжлан!

Господь лӱм дене Толшо

тек моктымо лиеш!

Тек осанна пылпомышто йоҥгалтеш!»

10Кунам Тудо Иерусалимыш пурен, уло ола пудыранен, да чыланат йодыштыныт: «Кӧ Тиде?» 11А еҥ-влак вашештеныт: «Тиде Иисус, Галилейысе Назарет гыч Пророк».

12Иисус Юмын храмыш пурен да ужалыше ден наледыше-влакым чылаштымат тушечын поктен луктын. Окса вашталтыше-влакын ӱстелыштым да кӧгӧрчен ужалыше-влакын теҥгылыштым савырен шуэн 13да нунылан ойлен: «Возымо: ”Мыйын пӧртем кумалме пӧрт лиеш”, а те тудым агыше-влакын пыжашышкышт савыренда».#21:13 Ис 56:7, Иер 7:11.

14Храмыште Иисус деке сокыр ден окшак-влак миеныт, Тудо нуным паремден. 15Иисусын ыштыме ӧрыктарыше пашаж-влакым ужын да йоча-влакын «Осанна Давидын Эргыжлан!» манын храмыште кычкырымыштым колын, архиерей ден закон туныктышо-влак шыдешкенытат, 16Тудлан каласеныт: «Мом ойлымыштым Тый колат?» «Колам, – Иисус нунылан вашештен. – Возымо: ”Изи икшывын да чызе кочшын умшашт гоч Тый моктымашым ямдыленат”. Але те тидым нигунам лудын огыдал?»#21:16 Пс 8:3. 17Вара нуным коден, ола деч ӧрдыжсӧ Вифанийыш каен да туштак йӱдым эртарен.

18Эрдене эрак олашке пӧртылмыж годым Иисус шужымым шижын. 19Корно воктене смоква пушеҥгым#21:19 Смоква пушеҥге – саскан пушеҥге, кызытсе йылмыште саскажым эн чӱчкыдын инжир маныт. ужмеке, тудын деке лишемын, лышташ деч молым муын огылат, пушеҥгылан каласен: «Тек тый дечет саска ынде нигунам ынже шоч». Смоква пушеҥге тунамак кошкен. 20Тунемшыж-влак, тидым ужмеке, ӧрыныт да ойленыт: «Кузе тыге смоква пушеҥге кенета кошкыш?» 21А Иисус нунылан вашештен: «Мый тыланда чынак ойлем: Юмылан ӱшанымашда лиеш да кокыте огыда шоно гын, смоква пушеҥге дене ыштыме гайым веле огыл ыштен кертыда, а тиде курыклан ”Нӧлталт да теҥызыш шуҥгалт” манын каласеда гынат, тыгак лиеш. 22Кумалмыда годым мом ӱшанен йодыда, чылажымат налыда».

23Храмыш пурен туныктымыж годым Иисус деке архиерей ден калык кугурак-влак миеныт да каласеныт: «Могай власть дене Тый чыла тидым ыштет? Кӧ Тыланет тидым ышташ властьым пуэн?» 24Иисус нунылан вашештен каласен: «Мыят тыланда йодышым пуэм. Тудлан вашештеда гын, Мыят могай власть дене чыла тидым ыштымем каласем. 25Иоаннын тынеш пуртымыжо кушеч лийын: Пылпомыш гыч але айдеме деч?»

Нуно шке коклаштышт каҥашеныт: «Пылпомыш гыч манына гын, Тудо мыланна каласа: ”Молан вара те тудлан ӱшанен огыдал?” 26Айдеме деч манына гын, калык деч лӱдаш логалеш, вет Иоанным чылан пророклан шотлат». 27Сандене нуно Иисуслан вашештеныт: «Огына пале». Тудат нунылан каласен: «Тугеже Мыят могай власть дене тидым ыштымем ом ойло».

28«Кузе те шонеда? Ик еҥын кок эргыже улмаш. Иктыж деке миен да каласен: ”Эргым, мий, таче виноград аҥаштем пашам ыште!” 29”Ыштыме ок шу”, – тудыжо вашештен, а вара ӧкынен да каен. 30Ача вес эргыж деке миен да тидымак каласен. ”Каем, оза”, – манын тидыже, но каен огыл. 31Кокыт гыч кудыжо ачажын кӱштымыжым шуктен?» «Икымшыже», – Тудлан ойленыт. Иисус нунылан каласен: «Тыланда чынак ойлем: яжар ӱдырамаш да йозак погышо-влак Юмын Кугыжанышыш тендан деч ондак каят. 32Вет Иоанн тендан деке чын илымын корныж дене толын, те тудлан ӱшанен огыдал, а яжар ӱдырамаш да йозак погышо-влак тудлан ӱшаненыт. Те тидым ужында гынат, варажымат ӧкынен огыдал да тудлан ӱшанен огыдал.

33Вес туштен каласымым колыштса. Ик сурт оза лийын. Тудо аҥашыже виноградым шынден, йырже печым печен, саска вӱдым темден лукмо верым кӱнчен келыштарен, башньым ыштен. Вара аҥажым виноградым куштышо-влаклан кучаш пуэн да шкеже каен. 34Саска поген налме жап шумеке, виноград лектышлан тарзыж-влакым виноград ончышо-влак деке колтен. 35А виноградым ончышо-влак тудын тарзыж-влакым руалтен кученыт, иктым кыреныт, весым пуштыныт, кумшо ӱмбаке кӱм кышкеныт. 36Ынде тудо ончычсо деч шукырак тарзым колтен, но нунын денат тугак ыштеныт. 37Пытартышлан нунын деке эргыжым колтен да ойлен: ”Эргым ончылно нуно вожылыт”. 38Но виноградым ончышо-влак, эргыжым ужмеке, икте-весылан ойленыт: ”Тиде наследник. Айста миена да тудым пуштына, тунам наследствыжым ме налына”. 39Тудым руалтен кученыт, виноград аҥа гыч луктын шуэныт да пуштыныт.

40Аҥа оза, толмекыже, виноградым куштышо-влак дене мом ышта?» 41Иисуслан вашештеныт: «Нине осал-влакым чаманыде пытара, а виноград аҥажым весе-влаклан кучаш пуа. Шке жапыште саскам поген пуышо еҥ-влак аҥажым ончаш тӱҥалыт». 42Иисус нунылан ойлен: «Возымаште каласыме:

”Чоҥышо-влакын йӧрдымыш лукмо кӱышт

негыз пусак кӱ лийын:

тидыже Господь деч,

мемнан шинча ончылнына моткоч ӧрыктарыше”.

Те тидым нигунам лудын огыдал мо?#21:42 Пс 117:22-23. 43Мый тыланда ойлем: Юмын Кугыжаныш тендан деч налалтеш да Кугыжанышын саскажым шочыктышо калыклан пуалтеш. 44Кӧ тиде кӱ ӱмбаке камвозеш, тудо пудырга, а кӧн ӱмбаке кӱ камвозеш, тудым пытара».

45Иисусын туштен каласкалымыжым колыштмеке, архиерей ден фарисей-влак шкешт нерген ойлымым умыленыт. 46Нуно Тудым руалтен кучаш йӧным кычалыныт, но Иисусым еҥ-влак пророклан шотленыт, сандене калык деч лӱдыныт.

Currently Selected:

Мф 21: УС

Highlight

Copy