Мф 20

20 ГЛАВА

1-16 Виноград аҥаште ыштыше-влак нерген туштен ойлымаш. 17-19 Иисус шке колымыж да ылыжмыж нерген кумшо гана каласкала. 20-28 Иаков ден Иоаннын йодмышт. 29-34 Кок сокырым паремдымаш.

1Пылпомыш Кугыжанышым сурт оза дене таҥастараш лиеш. Эрдене эрак тудо пашазе-влакым шке виноград аҥашкыже тарлаш лектын. 2Кечылан ик динарий дене тӱлаш мутланен келшымеке, пашазе-влакым виноград аҥаш колтен. 3Кумшо шагат годым#20:3 «Кумшо шагат годым» – мемнан жап дене индеш шагат эр. тудо адак уремыш лектын да пазарыште паша деч посна шогылтшо еҥ-влакым ужын. 4Нунылан ойлен: ”Теат мыйын виноград аҥашкем кайыза, вочшаш пашадарым тыландат тӱлем”. Нунат каеныт. 5Кудымшо шагат, индешымше шагат жапыштат оза угыч лектын да тыгак ыштен. 6Латикымше шагат жапыште адак уремыш лектын да яра шогышо вес еҥ-влакым ужын. ”Те молан тыге кечыгут паша деч посна шогеда?” – нунын деч йодын. 7”Мемнам нигӧ тарлен огыл”, – нунышт каласеныт. ”Теат мыйын виноград аҥашкем кайыза, да вочшаш пашадарым налыда,” – нунылан манын.

8Кас шумеке, виноград аҥан озаже паша виктарышылан каласен: ”Пашаеҥ-влакым ӱж, пытартышлан тарлыме-влак деч тӱҥалын, эн ондак тарлыме марте пашадарым тӱлӧ”. 9Латикымше шагат жапыште тарлыме-влак толыныт да ик динарий гыч налыныт. 10Эн ондак тарлыме-влакше миеныт да оксам шукырак пуат шоненыт, но нунат динарий гычак налыныт. 11Оксам налмекышт, сурт озалан ӧпкелен ойлаш тӱҥалыныт: 12”Пытартышлан толшо-влак ик шагат веле пашам ыштеныт, а ме кечыгут пелтыше кече йымалне пашам ыштенна, но тый нунылан мемнан висак тӱленат!” 13Нунын кокла гыч иктыжлан оза каласен: ”Йолташ, мый тыйым ондален омыл. Але тый ик динарийлан пашам ышташ келшен отыл? 14Шкендыным нал да кай. Кунар тылат пуэнам, мучаште тарлыме саде еҥланат тунарак тӱлынем. 15Мыланем шке оксам дене шонымем семын ышташ ок лий мо? Але поро улмемлан кӧра кӧранет?”

16Тыге шеҥгелнысе-влак ончылно лийыт, а ончылнысо-влак – шеҥгелне. Ӱжмӧ – шуко, ойырен налме – шагал».

17Иерусалим деке тайыл ваштареш кӱзымӧ годым корнышто Иисус латкок тунемшыжым ӧрдыжкӧ ӱжын да нунылан ойлен: 18«Теве ме Иерусалимыш миен шуына. Айдеме Эрге архиерей ден закон туныктышо-влаклан кучен пуалтеш. Нуно Тудым пушташ пунчалыт 19да чын Юмым палыдыме калыкын кидыш мыскылаш, сола дене кыраш да ыресеш пудален сакаш пуат, но кумшо кечын Тудо ылыж кынелеш».

20Тунам Иисус деке Зеведейын эргыж-влакын аваже эргыж-влак дене пырля толын да, кумык возын, Тудын деч ала-мом йодын. 21Иисус тудлан каласен: «Мом йоднет?» Ӱдырамаш ойлен: «Кугыжаныштет нине кок эргым гыч иктыжым пурла могырышкет, весыжым шола могырышкет шындаш мутым пу». 22Иисус вашештен: «Те мом йодмыдам огыда пале. Мыйын йӱшаш чаше гыч йӱын але Мыйын тынеш пурымем семын тынеш пурен кертыда мо?» «Кертына», – вашештеныт. 23Иисус нунылан ойлен: «Мыйын йӱшаш чаше гыч теат йӱаш тӱҥалыда, Мыйын тынеш пурымем семын теат тынеш пуреда, но воктекем пурла але шола велыш шындаш Мый дечем огыл, а Ачам нине верым кӧлан ямдылен, нунын лийыт».

24Моло лу тунемшыже, тиде мутланыме нерген колмеке, кок изак-шоляклан чот сыреныт. 25Иисус нуным Шкеж деке ӱжын да каласен: «Калык-влакын вуйлатышышт нунын дене озаланат, да виянышт калык-влакым кид йымалнышт кучат. Те тидым паледа. 26Но тендан коклаштыда тек тыге ок лий. Тендан коклаште кӧ кугу лийнеже, тудо тек тарзыда лиеш; 27тендан кокла гыч кӧ ончылно лийнеже, тек тыланда кул лиеш. 28Айдеме Эргат Шкаланже тарзыланыкташ огыл, а тарзе лияш да, шуко айдемым тӱлен налаш манын, шке чонжым пуаш толын».

29Иерихон гыч лекмышт годым Иисус почеш шуко калык ошкылын. 30Теве корно воктене шинчыше кок сокыр еҥ, воктечше Иисус эртыме нерген колмеке, кычкыраш тӱҥалын: «Господь, Давидын Эргыже, мемнам серлаге!» 31Калык нунылан шып лияш кӱштен, но нуно чотрак веле кычкыраш тӱҥалыныт: «Господь, Давидын Эргыже, мемнам серлаге!» 32Иисус шогалын, нуным Шкеж деке ӱжын да каласен: «Те Мый дечем мом ыштымым вучеда?» 33«Господь, мемнан шинчана почылтшо ыле», – нуно ойленыт. 34Иисус нуным чаманен, шинчаштым тӱкалтен, шинчашт тунамак ужаш тӱҥалын, да нине еҥ-влак Иисус почеш каеныт.

Currently Selected:

Мф 20: УС

Highlight

Copy