Ап.паш 2

2 ГЛАВА

1-13 Святой Шӱлышын толмыжо. 14-41 Петрын ойлымыжо. 42-47 Ӱшаныше-влакын илышышт.

1Витлыгече пайрем толын шумеке, нуно чыланат пырля икоян лийыныт. 2Кенета пылпомыш гыч виян мардеж гай лӱшкымӧ йӱк шоктен да нунын погынымо уло пӧртым темен. 3Нунылан йылмын-йылмын шелалтше тулора гай кончен, да кажныж ӱмбаке ик посна тулйылме волен. 4Чыланат Святой Шӱлыш дене темыныт да моло йылме дене ойлаш тӱҥалыныт, мом Шӱлыш ойлаш пуэн, тудым увертареныт.

5Иерусалимыште тӱнясе чыла калык кокла гыч толшо, Юмым уло чон дене пагалыше иудей-влак лийыныт. 6Тиде йӱк лекмеке, калык погынен да чот ӧрын: кажныже шке йылмыж дене ойлымым колын. 7Чылан ӧрыныт да икте-весыштлан ӧрмалген ойленыт: «Нине ойлышо-влакше чыланат Галилей гыч огытыл мо? 8Кузе ме кажныже шкенан шочмо йылмынам колына? 9Ме чылан: парфян калык, мидий калык, еламит-влак, Месопотамийыште, Иудейыште да Каппадокийыште, Понтышто да Асий кундемыште, 10Фригийыште, Памфилийыште, Египетыште, Ливийын Кириней воктенысе ужашыштыже илыше-влак, Рим гыч толшо-влак, иудей-влак, Израильын Юмыжлан кумалше йот калык еҥ-влак, 11крит да араб калык – чылан ме Юмын кугу пашаж нерген шочмо йылмына дене ойлымыштым колына». 12Чылан пеш ӧрыныт, да, умылен кертде, икте-весылан ойленыт: «Мо тиде тыгай?» 13А южышт игылт воштыл маныныт: «Нуно тамле йошкар аракам утыждене шуко йӱыныт».

14А Петр моло латик Апостол дене пырля кынел шогалын, йӱкым кугемден ойлаш тӱҥалын:

«Пагалыме иудей-влак, Иерусалимыште чыла илыше-влак! Мом ойлымем тӱткын колыштса, тидым пален лийза: 15нине еҥ-влак тендан шонымыда семын йӱшӧ огытыл, вет кызыт улыжат кече тӱҥалмылан кумшо шагат веле.#2:15 Кумшо шагат – кызытсе жап дене индешымше шагат эр. 16Мом те ужыда, тудым пророк Иоиль гоч ончылгоч каласыме:

17”Пытартыш кечылаште, – ойла Юмо, –

Мый чыла айдеме ӱмбаке Шӱлышемым опталам,

тунам тендан эргыда ден ӱдырда-влак

пророкла ойлаш тӱҥалыт,

рвезе-влак тӱрлӧ кончышым ужыт,

а шоҥго пӧръеҥ-влак – омым.

18Тудо кечылаште Шкемын Шӱлышем

Мый тарзе-влакем ӱмбаке опталам, –

пӧръеҥынат, ӱдырамашынат, –

чыланат пророкла ойлаш тӱҥалыт.

19Ӧрыктарыше пашам кӱшнӧ пылпомышто,

палдарыше палым ӱлнӧ, мландӱмбалне, ончыктем:

вӱрым, тулым да шикш тӱргымым.

20Господьын кӱдыратле чапле кечыже толмо деч ончыч

кече пычкемышалтеш, тылзе вӱрыш савырна;

21а, полышым йодын, Господьын лӱмжым ӱжшӧ

кеч-кӧат утарыме лиеш”.#2:17-21 Иоиль 2:28-32.

22Израильын пагалыме еҥже-влак, тиде ойлымем колыштса: Назорей Иисус тыланда Юмын ойырен налме Еҥже лийын. Те шкеат паледа: тидым Юмо тӱрлӧ чудым, ӧрыктарыше пашам да палдарыше палым тендан коклаштыда Тудын гоч ыштымыж дене ончыктен. 23Тудо тендан кидышкыда Юмын ончылгоч шонен пыштымыже да палымыже семын пуалтын, а те Тудым налында да законым палыдыме-влакын полшымышт дене ыресеш пудален пуштында. 24Но Юмо Тудым ылыжтен да колымашын орлыкшо гыч утарен – колымашын Тудым кучен кертше вийжат лийын огыл. 25Давид Тудын нерген тыге ойлен:

”Шке ончылнем Господьым эре ужам,

мыланем тайнышташ огыл манын,

Тудо мыйын пурла могырыштем.

26Тидлан кӧра шӱмем куана,

йылмем йывырта,

капемат ончыкылыкым ӱшанен вучаш тӱҥалеш:

27Тый мыйын чонемым тамыкеш от кодо,

святоетлан шӱйын кияш от пу.

28Тый мыланем илыш корным ончыктет,

ончылнет мыйым куан дене темет”.#2:25-28 Пс 15:8-11.

29Иза-шольо-влак, мемнан Давид кугезе кочана нерген тыланда тура каласаш лиеш: тудо колен, тудым тойымо, тудын шӱгарже але тачат мемнан дене. 30Пророк лийынат, Давид пален: Христосым тудын тукымжо гыч шогалташ да тудын престолышкыжо шындаш Юмо товатлен сӧрен. 31Христосын ылыж кынелшашым тудо ончылгоч ужын да, чонжо тамыкеш кодымо ок лий, капше шӱйын кияш ок тӱҥал, манын ойлен. 32Саде Иисусым Юмо ылыжтен, тидым ме чылан таныклена. 33Тыгеракын, Юмо Тудым пурла кидше дене#2:33 «Пурла кидше дене» – тидым «Пурла велышкыже» манынат кусараш лиеш. кӱзыктен шынден. Иисусшо сӧрымӧ Святой Шӱлышым Ача деч налын да опталын, те кызыт тидым ужыда да колыда. 34-35Давидше пылпомышко кӱзен огыл, но тыге ойлен:

”Господь мыйын Господемлан каласен:

Тыйын тушманет-влакым йол йымакет пыштымешкем,

пурла велыштем шинче”.#2:34-35 Пс 109:1.

36Тыгеракын, чумыр Израиль калык пеҥгыдын палыже: Иисусым, Кӧм те ыресеш пудаленда, Юмо Господьым да Христосым ыштен».

37Тиде ой шӱмешышт чот логалын. Нуно Петр ден моло Апостоллан каласеныт: «Иза-шольо-влак, мом мыланна ышташ?» 38А Петр нунылан ойлен: «Юмо языкдам кудалтыже манын, язык деч кораҥза да Иисус Христос лӱмеш чыланат тынеш пурыза, тунам пӧлек семын Святой Шӱлышым налыда. 39Мемнан Господь Юмына кӧм гына ӱжеш, чылаштлан Святой Шӱлышым пуаш сӧрен: тыландат, шочшыландат, тораште илыше-влакланат». 40Тыгак шуко моло кумылаҥдыше шомак денат Петр ӱшандарен ойлен да каҥашым пуэден. Тудо каласен: «Тиде пужлышо тукым деч утаралтса». 41Тыгеракын, тудын шомакшым порын вашлийше-влак тынеш пуреныт, да ӱшаныше-влак тиде кечын кум тӱжем наре еҥлан ешаралтыныт.

42Ӱшаныше-шамыч, Апостол-влакын туныктымыштым колыштын, изак-шӱжаракла иленыт, киндым тодылын кочкаш да кумалаш погыненыт. 43Чыла еҥ лӱдын, Апостол-влак гоч Иерусалимыште ӧрыктарыше паша да палдарыше пале шуко лийын. 44Но ӱшаныше-влак пырля лийыныт да чылажат нунын иктеш улмаш. 45Нуно суртыштым да погыштым ужаленыт, оксажым кажнылан кӱлмӧ семын пайлен пуэденыт, 46кече еда храмыште икоян погыненыт, мӧҥгыштышт киндым пырля тодылыныт, йывыртен да тыматле шӱм дене кочкыныт. 47Нуно Юмым моктеныт, да уло калык нунын ӱмбаке порын ончен. Господь утарыме-влакым кече еда Черкыш ешарен шоген.

Currently Selected:

Ап.паш 2: УС

Highlight

Copy