Ап.паш 1

1 ГЛАВА

1-5 Ончылмут. 6-11 Иисусын пылпомышко кӱзен кайымыже. 12-26 Иуда олмеш вес Апостолым сайлымаш.

1-3Поро Феофил, орланен колымыж деч вара Иисус илыше улмыжым ойырен налме Апостолжо-влаклан тӱрлын ӱшандарен ончыктен, нылле кече нунылан кончен да Юмын Кугыжаныш нерген каласкален. Нунылан Святой Шӱлыш дене кӱштымашыжым кодымеке, Иисус пылпомышко нӧлталтын. Тӱҥалтыш гычак тиде кече марте мом ыштымыже да мом туныктымыж нерген чылажымат икымше книгаште возенам. 4Кунам Иисус Апостол-влак дене пырля погынен, кӱштен ойлен: «Иерусалим гыч ида кай, Ачан сӧрымыжын шукталтмым вучыза. Тиде сӧрымӧ нерген те Мый дечем колында. 5Иоанн вӱд дене тынеш пуртен, а тылеч вара икмыняр кече гыч те Святой Шӱлыш дене тынеш пуртымо лийыда».

6Тыгеракын, пырля улмышт годым Апостол-влак Иисус деч йодыныт: «Господь, кызыт мо Израиль кугыжанышым угыч ыштет?» 7Иисус нунылан каласен: «Ачан шке властьше дене палемдыме жап ден кечым тыланда палыме ок кӱл, 8но кунам ӱмбакыда Святой Шӱлыш вола, те вийым налыда – Иерусалимыштат, уло Иудей ден Самарий мучкат, мланде тӱр мартеат Мыйын таныклышем лийыда».

9Тыге манмеке, Апостол-влакын шинча ончылныштак Иисус пылпомышко кӱзен каен, да пыл Тудым нунын шинча ужмышт гыч наҥгаен. 10Тудын торлымыж годым нуно пылпомышко тӱткын онченыт. Тунам воктенышт ош вургеман кок пӧръеҥ шогымым ужыныт, 11нунышт каласеныт: «Галилейын еҥже-влак, мом тыге пылпомышко ончен шогеда? Тиде Иисусын тендан деч пылпомышко нӧлталтмыжым ужында. Кузе Тудо каен, тугак мӧҥгеш пӧртылеш».

12Тунам Апостол-влак Елеон манме курык гыч Иерусалимыш пӧртылыныт, курыкшо Иерусалим воктене, шуматкече корно#1:12 Шуматкече корно – ик меҥге наре. наре ӧрдыжтӧ верлана. 13Иерусалимыш толмекышт, кӱшыл пачашеш погынымо пӧлемышкышт пуреныт, Петр ден Иаков, Иоанн ден Андрей, Филипп ден Фома, Варфоломей ден Матфей, Алфейын Иаковшо ден Зилот манме Симон да Иаковын Иудаже тыште лийыныт. 14Нуно чыланат ик ой дене лым лийде кумалыныт да Юмым сӧрваленыт, нунын дене пырля икмыняр ӱдырамаш, Иисусын Мария Аваже да изаж-влак лийыныт.

15Ик кечын, кунам шӱдӧ коло наре еҥ погынен улмаш, Петр тунемше-влак коклашке лектын шогалын да каласен: 16«Иза-шольо-влак! Иисусым кучен наҥгайыше тӱшкам вӱдышӧ лийше Иуда нерген Святой Шӱлыш Возымаште Давид гоч мом ончылгоч каласен, тудо шукталтшаш улмаш. 17Иуда мемнан кокла гыч иктыже лийын, тудынат тиде служитлыме пашаште шке ужашыже улмаш». 18Осалым ыштымылан налме оксаж дене мландым налын, но шуҥгалт возынат, мӱшкыржӧ шелын, чыла кӧргӧ ӱзгарже лектын возын. 19Тидын нерген Иерусалимыште чылан пален налыныт, тыгеракын тиде мландыжымат шкеныштын йылмышт дене Акелдама манын лӱмденыт, вес семынже «Вӱран мланде» лиеш. 20Петр умбакыже ойлен: «Псалтирь книгаште возымо:

”Тек тудын суртшо яра лиеш,

тек тушто нигӧ ок иле”,

да тыгак возымо:

”Тек тудын пашажым весе налеш”.#1:20 Пс 68:26, 108:8.

21-22Сандене Господь Иисусын коклаштына илымыж годым мемнан дене лийше нине еҥ-влак гыч иктыже мемнан дене пырля Тудын ылыж кынелмыжым таныклыше лийшаш. Тудыжо, Иоаннын тынеш пуртымыж гыч тӱҥалын, Иисусын мемнан деч пылпомышко нӧлталтме кечыже марте пеленна коштшо еҥ лийшаш».

23Кокытым темленыт: Варсава манме Иосифым, тудым эше Иуст маныныт, да Матфийым. 24-25Погынышо-влак тыге ойлен кумалыныт: «Тый, Господь, чылан шӱмыштым палет. Иуда, логалшаш верышкыже каяш манын, служитлыме пашажым, Апостол вержым кудалтен. Нине кок еҥ гыч кудыжым олмешыже ойыренат, мыланна ончыкто». 26Вара нуно шывагам#1:26 Шывага – жребий. кученыт, шывага Матфийлан логалын, латик Апостол деке тудым ушеныт.

Currently Selected:

Ап.паш 1: УС

Highlight

Copy