Maka 15

Yesu mo Pailadi para karu popisimiya ei

(Madiu 27:1-2,11-14; Luka 23:1-5; Dioni 18:28-38)

1Gupuma yapi kepeala-ainya mo Gode repara alinau puaisimiya alinuna kalu alinumi pange mo kamo ae alinumi pange Mosesimi Rudule Angele waloaisimiya alinumi pange kalesoro alinu raayome mombea ara angele lisimiya. Mo alinumi Yesu Pailadi para andi riminyuma paisimiya. 2Go parare Pailadimi Yesu para angaa meala ara lalore, Neere Isaraelimi mandu rangala pae wenaali raayona Kini ali alepae, lisaya. Yesumi nipu para lalore, Nena gole go lalenda, lisaya. 3Go dina mo Gode repara alinau puaisimiya alinuna kalu alinumi Yesumi na-pisaya einu gole loma ma-riaisimiya. 4Gupuma Pailadimi Yesu para wala lora pula ara lalore, Angele menda yangi lia ei na-depae, lisaya. Neeme ora pi einu pale na-pi einu nee para la ma-riademe, pale pa marea, lisaya.

5Go lisayapare Yesumi angele menda yangi lia ei na-lisayandare Pailadimi rungula mealo pambisaya.

Pailadimi Yesu ekeraisa repanana lu andialepape, lisaya ei

(Madiu 27:15-26; Luka 23:13-25; Dioni 18:39–19:16)

6Kuni gipa raayo monde Pasopa enda pamboaisimiya dinare Isaraelimi mandu rangala pae wenaalinumi Pailadi para gurupa dipula piri ali menda komea koya rapainyaya kongeyala puaisimiya. 7Go dina gapamani alinuna angele wi einu rungulisimiya alinu mendaa para dipula anda para pirisimiya. Go para ali komea menda nipuna bi Barabasi, pirisaya. Go alimi gapamani para yanda liisimiya dina ali menda lu komaoma dipula pirisaya. 8Gupuma wenaali raayome Pailadi para epa kongeyala ara lalore, Kuni gipayalo naana pao-alende ei pae, lisimiya. 9Pailadimi nimu para angele lora pula ara lalore, Nimina konemere ande Isaraelimi mandu rangala pae wenaalina Kini ali pa rapanopae, lisaya. 10Yesumi epe au puaisaya einu andoma monde Gode repara alinau puaisimiya alinuna kalu alinumi Yesu para kundipa pula ara nipu karu ma-lamua ipisimiya eiri Pailadimi kone wisaya. 11Pailadimi monde angele lora pisayapare mo Gode repara alinau puaisimiya alinuna kalu alinumiri wenaalimi Pailadi para konge lainyayanda rapaoma lalore, Yesu na-rapae, Barabasi rapainya, loma rapaisimiya. Gurupa konge dapa loma rimbu lisimiya. 12Pailadimi nimu para wala lalore, Gore nimimi loaemende Isaraelimi mandu rangala pae wenaali raayona Kini ali parare ake au panoyapae, lisaya. 13Nimumi wala angele rendaa pulolo pula ara lalore, Ekeraisa wape pi repanana lu andia, loma lisimiya. 14Pailadimi nimu para lalore, Akepeandayapae, lisaya. Nipumi koae au pula arare ake au papae, lisayapare angele andapu rendaa pimi lalore, Ekeraisa wape pi repanana lu andia, loma wi wala wala lisimiya. 15Go eina Pailadimi mo wenaali raayona kone pea ei paluameya Barabasi koya rapaisaya. Gupuma Yesu raki lu rumbenalomare ekeraisa pi repana mandaa komenaya, mo alinu para Yesu ma-alisaya.

Ami alinumi Yesu para ewaisa paisimiya ei

(Madiu 27:27-31; Dioni 19:2-3)

16Gupuma mo endali ripinyi alinumi mo gapamani andaa alina anda panda rupara Yesu karu paisimiya. Mo endali ripinyi alinu raayo epenaya, wi lisimiya. 17Nimumi kini alina busupi aka mandana mumare Yesuna dona ma-pambaisimiya. Reke reke aya alenu pange mumare paki puma nipuna kaluna marainyaisimiya. 18Gupuma ki polope aoma sarusi puma nipu para giri lada ara lalore, Isaraelimi mandu rangala pae wenaalina Kini alio, loma lalore, Ambe na-kome, ao-ape, lisimiya. 19Nimumi kambeme nipuna kaluna liiala puma nipu supi ra kirala pisimiya. Gupuma rumu yaruala puma nipu para giri lada ara panda punyala pisimiya. 20Go au pumare Yesu giri giri lao ma-bembolaomare monde busupi aka laisa mu pumare nipuna ora akanu ma-yamaisimiya. Gupuma ekeraisa pi repanana ikoko luma mundialuameya, Yesu kama karu paisimiya.

Yesu ekeraisa wape pi repanana lu andiaisimiya ei

(Madiu 27:32-44; Luka 23:26-43; Dioni 19:17-27)

21Mo alinumi porana pa pupula ara ali komea menda mandaisimiya. Mo ali nipuna biri Saimono. Nipuri ree anda para pamulopolame, kimisu ipisaya. Gupisayapare nimumi mo ali ripinyuma Yesuna ekeraisa wape pi repana ma-riaisimiya. Mo Saimono nipuna andasuri Sairini lisaya. Nipuri Rupasi Alekasanda ameayana ara lisaya.

22Gupuma nimumi Yesu mo Golokoda su runduna karu paisimiya. Ali kalu kulimi ande su rundu aisayanda Golokoda su rundu lisimiya. 23Go para nimumi waini ipa pange rendaa mulamulame andeale rapu komea para lekeyaoma Yesu alisimiyapare nipumi na-nisaya. 24Gupisimiyandare nimumi mo ekeraisa wape pi repanana Yesu raminyakepao andiomare nipuna akanu rali pisimiya. Go au pulameyare kanasinumi ande alenu ma-lopa lopa puma rombo waraisaya alimi nipuna kone pea ei minyaya ma-lopala pisimiya.

25Nimumi Yesu mo ekeraisa pi repanana raminyekepao ikoko lu andiaisimiya eiri naare weno ririna ainya pisimiya. 26Ekeraisa wape pi repanana, Pailadimi gurupa wape pisaya.

Go aliri, Isaraelimi mandu rangala pae wenaali raayona Kini Ali ae wape pisaya.

Go wape pisaya eiri, Yesumi gapamani alinuna rudule angele ai rungulisayapae, loma wape pu andiaisaya. 27Gupuma koae au andaai pisipiya ali laapo pange nipu rapu ekeraisa wape pi repanana raminyekepaoma ikoko lu andiaisimiya. Mendare Yesuna popeke ki nane, mendare Yesuna koaya ki nane raminyekepao ma-andiaisimiya. 28[Gupuma mo Godena angele wia buka para gurupa wape pea angelere ora misaya.

Koae au pisimiya alinu rapu Yesu pange

koae au pi ali aya, loma lisimiya.

Godena angele wia buka rupara gurupa ambala ririna wape pisaya.]

29Go dinare porana lombae pu popola pisimiya wenaalinumi Yesu giri lala pula ara lalore, Neere monde Gode repara alinau puaisimiya andaa anda koyaomare koro repona wala pula laende ali ae, loma ero la eiri popala pisimiya. 30Ambiare nena gole mo ekeraisa wape pi repanana kolopinyaoma ambe nena ipu, loma ero laisimiya. 31Gore mo Gode repara alinau puaisimiya alinuna kalu alinumi pange mo Mosesimi Rudule Angele waloaisimiya alinumi nimuna nimunale Yesu giri lada ara mo wenaalinumi lisimiya rupa lalore, Mendane wenaali ma-rekala pande rupa nipumi nipuna gole na-ma-rekada, loma ero laisimiya. 32Nipu Kerisore, Isaraeli wenaali raayona Kini ali deandare naa raayome andoma nipuna angele meamono epena dapae, lisimiya. Monde nipu rapu raminyekepao andiaisimiya ali laapome pange Yesu para pu rero pi angele lisipiya.

Yesu ora komisaya ei

(Madiu 27:45-56; Luka 23:44-49; Dioni 19:28-30)

33Gupuma naare kalu rikirana-ainya mo su raayo rimbalo pambomare naare pereke da popisaya dinare paa wala pisaya. 34Go naarenare Yesumi e waru andapu lisaya. E lala ara lalore, Eloi, Eloi, lama sabakadani, wi lisaya. Go lisaya eiri,

Na Gode, Na Gode, niri akepeanda giadepae,

loma lisaya.

35Mo nipu repara aisimiya ali menda parame pangoma lalore, Pangalepae, lisimiya. Ilaidia wi dae, lisimiya.

36Gore ali mendame alo puma lumbimi ande ale menda misaya. Gupuma angaa likine waini ipa para palioma ipa rumbia ainya, repana kuli kunina kapu laisaya. Gupuma Yesumi beso lenaya, nipuna angaa para minyasiaisaya. Go au pula ara mo alimi go lena pamboaisimiya alinu para lalore, Ilaidiame nipu ma-kolopinyaluame epelea ei andaminya, waru andere-aminya, lisaya. 37Gore Yesumi wi andapu lomare pomo rungulaoma ora komisaya.

38Go gole mo Gode repara alinau puaisimiya andaa anda rupara monde rupale pi akare so kalu naneyame rekele punyaoma mendane mendane wisaya. 39Ami alinuna yanda mundu ali menda Yesu ekeraisa wape pi repana repara ara Yesumi e ree waru loma komisaya rupa andoma lalore, Gore go aliri ora Godena Nakiyanae, lisaya.

40Gupuma pange wenanu menda parame paparele ara Yesu para pisimiya ei andere-aisimiya. Go wenanu rapu Makedala ree anda wena komea Meari aisaya. Meari menda pange mo werepe nane naki Dieimusi Diosese ameayana angi pange Salome pange aisimiya. 41Go wenanuri Yesu mo Galili nane aisaya dinare nipuna kou nane raluma pamuala ara nipu rambamea eiri pamuaisimiya. Gupuma pange wenanu menda para Yesu nipu rapu Diurusaleme ree anda nane ipumare go para aisimiya.

Yesu dapa pisimiya ei

(Madiu 27:57-61; Luka 23:50-56; Dioni 19:38-42)

42-43Naare pena pambala-ainya Diosepare Arimadia anda ali ipisaya. Nipuri epe kalesoro ali ara Godena Ki Rambuao-aya Ei epenayanda maisambo aisaya. Go dina noleyala-ainya mo Isaraelimi mandu rangala pae wenaalinuna koro piri naare kini pisaya. Go peanda mo koro piri naarele na-kini pi ainyare nimuna alenda alenda mu analaisimiya. Go eina Diosepare Arimadia ree anda ali paalame na-kome, puri paloma Pailadi repara paisaya. Puma Yesu ro pua konge lisaya. 44Pailadimi Yesu ambala komanae angele pangomare rungula mealo pamboma monde endali ripinyi alinuna yanda mundu ali epenaya wi lo muma angaa meala ara lalore, Yesu ambala komapae, lisaya. 45Pailadimi mo endali ripinyi alinuna yanda mundu alimi Ambala komande, lisaya ei pangomare Diosepame Yesu ro mula pena, lisaya. 46Diosepame epe aka kambomare Yesu ro konda muma monde epe aka raisiao rongaoma mea ria puma mo kana rombema apenda mandana wapuma wisaya para pua dapa pisaya. Gupuma kana andaai menda ma-pereyaoma mo kana pondea para pora poainyaisaya. 47Makedala ree anda wena Mearimi pange Diosese nipuna angi Mearimi Yesu dapa pisaya ei, andisipiya.

Currently Selected:

Maka 15: POLENT23

Highlight

Copy