Madiu 19

Repaalu aeme wenaalimi ali giaya ei pange wena giao-aeme eina angele lea ei

(Maka 10:1-12)

1Yesumi go angele lo pereyaomare Galili andasu minyapalaomare Diodani mone repaa lena ae andasu menda Diudia lee anda nane paisaya. 2Wenaalinu waru andapumi Yesu raluma paisimiyanda nimuna yainyanu ma-pereyaisaya.

3Yesu epa la andalo ara ande Parisi alinumi gupi epa lora pisimiya. Monde Rudule Angelemere ali mendame nipuna rana piliandare nipuna wena giadore anapea leapae lisimiya.

4Nimuna angele lialo arare Yesumi gupi lisaya. Mo Godena angele wia bukana nimimi na-yarepeamepae lisaya.

Ambala ririnare Godeme ali pange

wena pange warisaya.

5Gupuma Godeme gupi lea lisaya.

Go einare ali mendame nipuna apa ama laapo

giaoma nipuna lamea wena rapu komea para

raminyekepa ali pi lea lisaya.

Go peandare niipuri laapo dia komea rupa ao-aepe lisaya. 6Go einare niipu laapo dia lisaya. Gupumare Godeme ma-runaeya alere su wenaalimi na-keralimi lisaya.

7Monde Parisi alinumi wala go angele lisimiya. Mosesimi naa para Rudule Angele gialo ara lalore gupi lea. Ali go wena para ramayo wape muma alape lea. Go eiri akepea lisayapae, lisimiya.

8Yesumi gore wala gupi lisaya. Nimimi repana ree waru yokalemenda Mosesimi nimina wenanu gialiminyayanda pora lombea lisaya. Ambala ririna go su yaa laapo waru ala arare go au na-pisaya. 9Go einare neme nimi para lalo. Ali mendame nipuna wename pake nea aunu na-ande ara gole nipuna wena gialiandare go ali nipumi repaaya aule au go ma-koyadanda. Go au puma nipumi wena menda miliandare gore nipumi go wena pake nala, lisaya.

10Go lisaya einare monde nipuna kou nane rali alinumi lalore go angele lisimiya. Go aunda deandare gore alinumi wena na-laminya pange wename ali na-pena lisimiya.

11Yesumi lalore, Go lalo angelere wenaali raayo para na-lalopare Godeme go au pinya loma lea repaa para komea lalo, lisaya. 12Pangalepa. Alinumi wena na-la mi eina reere go einuna peme. Ali mendaparere nimuna amame gurupa mandeme einare wena na-la mili pange mendaparere ali yangonumi gole rungulimi pange mendaparere ande Godena Ki Rambuao-aya Ei kone sialo arare wena na-la milimi. Go lalo angele pangoma pulua kone wilia alimiri go lalo ei pinya lisaya.

Yesu pange enge nongo nakisinu nimuna angele lea ei

(Maka 10:13-16; Luka 18:15-17)

13Go naarena wenaalimi nongo nakinu Yesumi yainya paoma nipuna ki kaluna winyayanda karu ipisimiyapare monde nipuna kou nane rali alinumi rudu lisimiya. 14Yesumi lalore, Go nongo nakinu ni repara epena na-rudu dapape, lisaya. Akepeare Godena Yaa Nane Wia Ki Rambuao-aya Eiri gurupa repaana ei lisaya.

15Gupumare Yesu nipuna ki monde nongo nakinuna kaluna suma nipu paisaya.

Pena nakimi amo ali aisaya ei

(Maka 10:17-31; Luka 18:18-30)

16Naare mendana pena naki mendame Yesu para ipuma lalore, Epe Waloale Alio lisaya. Neme endoaya ei mulamere epe au menda ake au puluayapae lisaya.

17Go lisayandare nipu para Yesumi gupi lisaya. Ni para epe alenare akepeanda lora pilipae lisaya. Ali komea ora rendepona aya ali aya lisaya. Ora endoaya ei mula kone wilindare gore ande rudule angele raliape lisaya.

18Mo alimi nipu para lalore, Akipi Rudule Angeleyapae lisaya.

Yesumi lalore, Go angelere go eina lalo lisaya.

Ali menda ora komena rupa na-liiape pange ali pe wena na-pake nape pange wena lami ali rapu na-pake nape pange mendana alenu pake na-nape pange yango na-pi na-laopape lisaya. 19Nena apa pange nena ama laapo raname waru komape pange nena gole nee raname komale rupare nena yangonu pange go au pape.

20Monde alimi lalore go angele lisaya. Go lale einu raayo neme ora raluayo lisaya. Go peale ale menda ora ake au puluayapae lisaya.

21Yesumi gore gupi lisaya. Nee ora rendepona ae ali alua kone wilindare gore nee andaa puma nena siamba ali alenu raayo pua yodo mumare mo narali repaa alama alama pumare so yaa nane amo alenu meainya ni raluma epape lisaya.

22Go pena nakimi go angele lisaya ei pangomare nipuna pu romba para kendame waru komisaya. Akepeare nipu ora amo ali aisaya eimi rendaa pisaya.

23Gupuma Yesu nipuna kou nane rali alinu parare gupi lisaya. Neme nimi para ora angele lalo lisaya. Amo ali mendame Godena Yaa Nane Wia Ki Rambuao-aya Ei para puluri ora rendaa waru pea lisaya. 24Gamelo mename nira pondea para puluri rendaa pilia. Go peapare amo alimi Godena Ki Rambuao-aya Ei para puluri ora rendaa andaai pea lisaya.

25Nipuna kou nane raluae alinumi go ei panga mealome rungulu mealo arare gupi lisimiya. Go aunda deandare gore menda rambameape na-yanae lisimiya.

26Yesumi nimuna lee angaana lalore go lisaya. Wenaalimi pape-nae aunu Godeme kome manda pilia lisaya.

27Pidame go ei pangomare gupi lisaya. Naame alenda alenda raayo minyapalaoma nee raluma epamale naare ale milimayapae lisaya.

28Go einare Yesumi gupi lisaya. Neme nimi para ora angele lalo. Werepe go su yaa laapo pereyaoma kangaa naare mendanare go ni raluma pamualeme alinu nimiri kini alinuna sea rali rali puma piri Alina Si Naki kini ali pidia dinare Godena wenaali andere pidimi lisaya. 29Wenaali mendame ni rondona nipuna ame giaoma pange ainya giaoma pange ama apa laapo giaoma pange e mapu giaoma pange anda giaoma pange nipuna ora olemole raayo giaoma epeleandare gore werepe alenda alenda ora waru andapu milimi pange endoaya ei milimi. 30Wenaali ambia go naarena kalu alinu aeme repaare werepere bi na-wi repaa alimi pange ambia go bi na-wi repaare werepere kalu alinu alimi lisaya.

Currently Selected:

Madiu 19: POLENT23

Highlight

Copy