Luka 9

Yesu Kerisome mo ki laapo pereya angena laapo kou nane raluaisimiya alinu menda para rapaisaya ei

(Madiu 10:5-15; Maka 6:7-13)

1Yesu nipumi mo ki laapo pereya angena laapopu kou nane raluaisimiya alinu para ipulupa loma komea para ma-mombeaisaya. Gupuma Yesu nipumi yainyanu ma-epeao pange koae remonu raayosi ralu rumbalore nimu ana pea loma puri alama alama pisaya. 2-5Yesumi lalore gupi lisaya. Nimi raayosi gurupa polameyandare ale menda na-ma-ripinyalepape, lisaya. Gupuma rimapunu pange maa nusinu pange enda pange muninu pange ropo pape akanu pange menda ora na-ma-ripinyalepape, lisaya. Ale menda para pelemepare nimi anda para ipulupa pinda loma enda pange kongore ipanunda giala pulu ara nimi epe rupa andere-ala pilimindare gore menda anda para pa aoma go ree anda minyapalalimindare gore gurupa go anda giala pipape, lisaya. Ale menda para niminda ipulupa pi na-loma pange nimi epe rupa na-andere-alimindare gore nimimi nimuna lee para danga randalo pamboma pulupape, lisaya. Go eimiri gore nimu repara kingi angele mandana dame, lisaya. Go einu loma Yesumi nimumi Godena Ki Rambuao-aya Eina angele walenaya pange yainya ae wenaalinu ma-epeainyaya gupi loma rapaisaya.

6Go einu lo pereya ainyalomare ande Yesuna kou nane raluaisimiya alinuri Yesu minyapalaoma andayaya pamulopala ara ande epe angele wala eiri pamuala ara alenda alenda para wenaali ma-epea eiri pamisimiya.

Erodi nipu kone kendame komisaya ei

(Madiu 14:1-12; Maka 6:14-29)

7Mo Galili andasu para kalu ali Erodi nipumi go pisaya eina angelenu raayosi pangisaya eimi nipuna kone raayosi ora bembolaisaya. Akepeandare alinu menda parame nipu para gurupa la alisimiya. Dioni Baparaisi dapa para suma wala rekande, lisimiya.

8Menda para wenaalinumiri Ilaidia penameyao epande, lisimiya. Menda paramere gupi lisimiya. Ambalana Godena poropedi ali menda wala rekande, lisimiya.

9Go einare Erodi nipumi lalore, Neme Dioni nipuna maa ma-rungulawandepare go angele menda menda pangalo aliri ora ali apiyapae, lisaya. Go einare Yesu ora andolame rapisaya.

Yesu nipumi daoseni ki komea alinu para enda alisaya ei

(Madiu 14:13-21; Maka 6:30-44; Dioni 6:1-14)

10Gupuma mo Yesuna angele ma-puao-aisimiya alinu wala ipuma nimumi pisimiya einu raayosi Yesu para epa la alisimiya. Go einare Yesu nipumi mo alinu nipu rapu karu pumare nimu komeare Bedesaida ree anda para paisimiya. 11Gupisimiyandare mo mombelisimiya wenaalinumi nimuna paisimiya ei pangomare nimumi Yesu raluma paisimiya. Gupuma Yesu nipumi mo ipisimiya wenaalinu andoma mo wenaali para ipulupa, loma Godena Ki Rambuao-aya Eina angele nimu para walisaya pange nipumi yainya komisimiya wenaalinu ma-epeaisaya.

12Naare pereyoma pambala eina gaepame nanere monde ki laapo pereya angena laapo alinu Yesu para ipuma epa nimu para lalore, Go naa aema andasu parare wenaalinu na-aeme. Go peale go wenaali go alena aya andasinu pange go paranu nape enda pange paliape andanu wasu pinya pane rapae, lisimiya.

13Go lisimiyapare Yesu nipumi nimu para lalore, Nimimi niminale nimu para endanu adapape, lisaya. Go einare nimumi nipuna angele yango liada ara lalore, Naa parare enda andapu na-wia, lisimiya. Naa parare palawa kiri ki kalelepu wia pange repali laapopu komea wia, lisimiya. Nena rana pea eiri naame go wenaali raayosina endanu raayosi naame kambala pomonoyapae, loma angaa misimiya. 14Akepeandare daoseni ki komeapu alinu go para aisimiya. Gupuma Yesu nipumi nipuna kou nane raluaisimiya alinu para lalore, Mo wenaalinu ali ria laapo pereyoma ki laapopu mombema suna ma-pirama pirama pipape, lisaya.

15-16Mo kou nane raluaisimiya alinumi go au pisimiyandare mo wenaalinu raayosi pidapa loma ma-piraisimiyandare Yesu nipumiri monde ki kalele palawa kiri pange monde repali laapopu misaya. Go einare go endanu muma sia arare so yaa andasiaoma ara Gode para ranae angele lisaya. Go loma nipumi mo enda rondope rondope pumare nipuna kou nane raluaisimiya alinu para mo wenaali raayo para rali palepa lomare alisaya. 17Mo wenaali andapumi monde enda anana no rumbia rumbia pisimiya. Go enda nisimiyandare mo Yesuna kou nane raluaisimiya alinumi enda rupanu pa wisaya einuri mo ki laapo pereya angena laapo wisaya koponu rumbia rumbia pupere puma wisimiya.

Pidame Yesuri ora Keriso ali lisaya ei

(Madiu 16:13-19; Maka 8:27-29)

18Naare mendana Yesu nipumi nipuna kunuma ara yainya pulu-ainyaloma nipuna kou nane raluaisimiya alinumi nipu para ipisimiya. Yesu nipumi go alinu para angaa meala ara lalore, Wenaali andapumi na bi demendare apina bi loaemepae, loma angaa misaya.

19Nipuna kou nane raluaisimiya alinumi nipuna angele yango liada ara lalore, Wenaali mendamere neere Dioni Baparaisi loaeme, lisimiya. Mendane wenaalinumi neere Ilaidia loaeme pange mendapareme neere Godena poropedi ali menda ambaisena komisiyapare ambia gosi wala rekoma ale ali loaeme, lisimiya.

20Go lisimiyandare Yesu nipumi nimu para angaa meala ara lalore, gupi lisaya. Nimimi pange naa biri api loaemepae, lisaya. Go einare Pida nipumi Yesuna angele yango liada ara lalore, Neere Godeme misayande Keriso ali ale, lisaya.

Yesumi nipu rendaa noma komola pa eina angele lisaya ei

(Madiu 16:20-28; Maka 8:30–9:1)

21Gupuma Yesu nipumi nipuna kou nane raluaisimiya alinu para lalore, Neme lalole, go angele wenaali menda para na-dapape, lisaya. 22Nipumi wala angele menda lalore, Alina Si Naki rendaa pi einu andapu milia, lisaya. Mo Isaraelimi mandu rangala pae wenaalinuna anda rili alinumi pange mo Gode repara alinau puaisimiya alinuna kalu alinumi pange mo Mosesimi Rudule Angelenuna waloaeme alinumi pange go alinu raayosimi go Alina Si giaoma ora gialimi, lisaya. Nimumi nipu ora lu ma-komala pemepare yapi laapome su para suma repopao eimiri wala ma-rekalia, lisaya.

23Go lomare Yesu nipumi nimu raayo para lalore, Ali menda ni repara epolame piliandare nipuna rana pi einu minyapalaoma nipuna ekeraisa wape pi repana ma-ruma ni raluma epelea, lisaya. 24Akepeare ali menda nipuna endoaya ei alu papanaya sese pili ali nipuna endoaya eiri ora alu pilia lisaya. Go peapare ali mendame ni mana nipuna endoaya ei ma-alu paliandare nipumi endoaya ei ora milia. 25Ali mendame go suna wia olemolenu raayo minyabaoma nipuna endoaya ei manda ma-adeapae lisaya. Ora diae, lisaya. 26Na kou nane raluae ali menda apimi wenaali para lalore, Yesuna bi na-pangawande, pange nipuna waloaya angele giaripu, deandare gore go ali nipu Alina Si Naki nipu nipuna pange Apana pange ande yaakopi eindiolonu nimuna epe paa puma puri waru palea ei rupara ipumare gore Alina Si Nakimi go ali repara pange Go ali ni na-ande, dea, lisaya. 27Neme nimi para ora angele lalo, go aeme alinu mendapare ambe na-kome-ainya Godena Ki Rambuao-aya Ei ora andeleme, lisaya.

Yesu Mosesi pange Ilaidia nimuna angele lea ei

(Madiu 17:1-8; Maka 9:2-8)

28Yesu nipumi go angele loma warapu naare komea perelisayandare nipumi kana rumu mandaa para yainya pulame paisaya. Nipumi Pida, Dioni, Dieimusi nimu raayosi nipu rapu karu puma opasiaisimiya.

29Nipumi yainya pula pirinyalomare nipuna lee angaare rando menda pi ei andisimiya pange nipuna pambaisaya akanuri ora kake puma rumbisaya eimi lee yaru yaru pisaya. 30Go gole ali laapomere Yesu rapu ara angele lisimiya. Mo ali laapore Mosesi pange Ilaidia laapome lisipiya. 31Niipu laapore paa puma puri waru pale ei rapu penameyao epa ara Yesu rapu angele lala ara Yesu nipuri reesi para Godeme pinya kone wia rupa Diurusaleme anda para komele lo angele loaisimiya.

32Pida nipu pange niipusi pa pirisipiya ali laapo rapu u yokoluala puameyapare nimu repome rekoma Yesuna puri pale paa pi ei pange go nipu rapu aisipiya ali laapo andisimiya. 33Go einare niipu laapore Yesu minyapalaoma polame pulu-ainyalomare Pida nipumi Yesu para lalore, Andaa Alio, naa go para ae auri ora epe pamayae, lisaya. Ria anda repo pamonolae, lisaya. Menda nena ei pange menda Mosesina ei pange menda Ilaidiana ei puma pamonolae, lisaya. Pida nipumi lisaya angelenuri neme go angele la alala ara pangere kone waru na-wisaya.

34Pida nipumi angele lala-ainyalomare koame ipuma nimu rambuaoma go koana wasupamere nimu kea pisaya. Mo koame nimu epama koro rumbuma kea pisayandare mo Yesuna kou nane raluaisimiya ali repome paalame waru komisimiya. 35Mo koaa rupara mendame angele lainyada ara lalore, Gore nipuri na misua Naki ae, lainyaisaya. Nipuna angele pangoalepape, lainyaisaya.

36Go einare mo angele da ei pereyomare Yesu komea aisaya ei andisimiya. Go dinare mo Yesuna kou nane raluaisimiya alinumi so andamende einu wenaali menda para angele na-lale nimuna komea kone wisimiya.

Yesumi koae remo piri naki menda ma-epeaisaya ei

(Madiu 17:14-18; Maka 9:14-27)

37Yapi kepea nanere Yesu nipuna kou nane raluaisimiya ali repo rapu mo kana rumu minyapalaoma kolopinyaisimiyapare wenaali waru andapumi Yesu porana epa mandaisimiya. 38Monde wenaalinu angalapuna rupara ali menda aisaya alimi Yesu para wi andapu wi loma lalore, Waloale alio, neme nee para kongeyalole na naki epa andae, lisaya. Nipuri na nakisi komea komea, lisaya. 39Koae remome e dada ipuma suna epa lu lopaoma ki ange laapo ma-yalipuli laoma angaa para pange rako supi lomboma go naki pa ma-bembolaoma go koae remome nipu ora na-rapaya, lisaya. 40Go einare neme nena kou nane raluaisimiya alinu para kongeyala ara lalore, Nimimi go koae remo ralu rumbalepa, lawapare nimumi go au pape-nae-ya, lisaya.

41Go einare Yesu nipumi nipuna angele yango liada ara lalore, Nimiri Gode repara kone na-rulae wenaaliae lisaya. Gupuma pangere nimi rendepona aunu na-puaeme lisaya. Nimi rapu rana andepele rapo aluapae lisaya. Nimimi ni rendaa andepele rapo gualimiyapae, lisaya. Gupi lomare nipumi mo ali para lalore, Nena naki ni repara karu ipuae, lisaya.

42Gupuma nipuna naki ipula-ainya monde koae remome mo naki suna ma-lopaisaya pange nipuna ki ange laapo ma-yalipuli laisaya. Go einare Yesu nipumi mo koae remo para puri waru pale angele loma mo naki ma-epeaoma nipuna apa para wala alisaya.

43-44Go au andisimiya wenaalinu raayome Godena puri waru pale aunu andala ara paalame komala ara rungula mealo pambisimiya.

Yesumi nipuna komala pea eina angele wala lisaya ei

(Madiu 17:22-23; Maka 9:30-32)

Wenaali raayome Yesumi pamu paya leenu andoma rungula meala-ainyare Yesu nipumi nipuna kou nane raluaisimiya alinu para lala ara lalore, Nimimi na doa angele pangoma kone na-rungulalepape, lisaya. Alina Si Nakiri mendame alinuna ki para su monedea, lisaya.

45Go angele lisayapare nipuna kou nane raluaisimiya alinumi go angelena ree kone na-wisimiya. Mo angelena ree nimu para kundiri puma nimuna koneme kone siape-nae-ya. Go einare nimumi go angelena ree angaa meapeyare paalame komala ara na-angaa misimiya.

Ora ririna bi wi aliri apiyapae, lea ei

(Madiu 18:1-5; Maka 9:33-37)

46Gupuma Yesuna kou nane raluaisimiya alinumi nimuna nimunale Naa rapu bi wia aliri api ayapae, loma angele angele loma ape, lisimiya. 47Gupuma Yesu nipumi go konenu nimuna lo romba kone para wisimiya einu nipu andisaya. Go einare Yesu nipumi onge nakisi menda karu ipuma nipu rapu epa reka aisipiya.

48Nipumi nimu para lalore, Menda apimi go nongo nakinu para ipulupa lama para lombo sialimindare gore ni pange ipu loma para lombo siademe, lisaya. Gupuma ni lamu mida alimiri gore ni rapaya Gode lamu mida, lisaya. Nimi rupara bi na-wi ali menda aliandare gore nipumi nimi raayosi lu angulaya, lisaya.

Ali menda apimi nimi repara yanda na-diandare gore nipuri nimina ei, lisaya ei

(Maka 9:38-40)

49Gupuma Dioni nipumi angele lala ara lalore, Andaa Alio, ali mendame nena bina koae remonu ralu rumbala papare mo aliri naa rapu na-runayandare naame go au na-pape loma sese pama, lisaya.

50Go lisayapare Yesu nipumi nipu para pange mo kou nane raluaisimiya alinu menda para pange lala ara lalore, Nimimi nipu sese na-pipape, lisaya. Akepeare nimi rapu yanda na-dia aliri gore nimina eiye, lisaya.

Sameria anda para palisimiya wenaalinumi Yesu lamu meapeya gimi komisimiya ei

51Gupuma Gode nipumi Yesu so Godena Aya Lena ma-pope naarele repara rulaisayandare Yesu nipumi Diurusaleme ree anda nane polameya polopa ei kone suma paisaya. 52Go einare Yesu nipumi Sameria ree anda menda nane nipuna angele ma-penaya alinumi nipuna pora wamo pu siainyayanda rapaisaya.

53Gupisimiyapare go para aisimiya wenaalinumi kone sialore, Yesu nipu mo Diurusaleme ree anda nane popelea, kone sumare nipu mandana na-lamu misimiya.

54Go einare Yesu nipuna kou nane raluaisipiya ali laapo niipuna biri Dieimusi pange Dioni laapome go au andoma Yesu para lalore, Realio, nena konemere saame so yaa nane masuyame repana lengaa ipuma go wenali ma-pereainya laponayapae, lisipiya.

55Gupi lisipiyandare Yesu nipumi lekeyala ara niipu laapo para lalore, Go au na-dapape, lisaya. 56Gupuma Yesu nipuna kou nane raluaisimiya alinu rapu ree anda menda nane paisimiya.

Yesuna kou nane raduame rapisimiya alinumi lisaya ei

(Madiu 8:19-22)

57Yesu pange nipuna kou nane raluaisimiya alinu rapu porana pulu-ainyaloma ali menda opolo ipulu ara Yesu para lalore, gupi lisaya. Niri nee pele paranu pange raluma epola, lisaya.

58Yesumi go ali para gupi lisaya. Rarane yananuri nimu paliape andasunu pange wia. Yaanu pange nimu paliape andanu ao-peapare Alina Si Naki nipuri nipuna kou rindapeape pange palupape andanu pange menda ora dia, lisaya.

59Gupuma Yesumi ali menda para lala ara lalore, Ni raluma ipuae, lisaya. Go lisayapare gonde alimi lalore, gupi lisaya. Ririnare na apa ambala ma dapa pula ponolae, lisaya.

60Yesumi nipuna angele yango liada ara lalore, gupi lisaya. Komaleme wenaalinuri komeme repaame dapa pinyale neemere Godena Ki Rambuao-aya Eina angele pua lape, loma lisaya.

61Gupuma ali mendamere gurupa lalore, Realio, niri nee raluma epolale ririna na anda repaa wenaalinu para paidapa da pono, lisaya.

62Yesu nipumi nipu para lalore, Ali menda apimi pupudengi kini pu nomayapare mu andolendi puma koro pirala puae ali nipuri mo Godena Ki Rambuao-aya Ei ruparare ri na-pilia, lisaya.

Currently Selected:

Luka 9: POLENT23

Highlight

Copy