Luka 16
16
Lele waru rili alina siapi angele lee ei
1-2Gupuma Yesumi nipuna kou nane raluaisimiya alinu para lalore, gupi lisaya. Ambaisena amo ali menda aripayapare nipumi nipuna olemolenu andere-ainyayare ali menda meaya, lisaya. Go meaya alimi mo nipuna andaa alina muni ma-bembolaripayandare ali mendame mo reali la alaya. Go einare mo andaa alimi mo nipuna pupudengi nao-aya ali wi loma lalore, gupi lisaya. Go neeme pili dame angele pangalo eiri aiyapi para damepae, laya. Gupuma neme nena olemolere go pawalore neeme pepana wape puma na ki nane guneape, laya. Akepeare neeme ambia na olemolenu na-andere-ali, laya. 3Gupumare mo alimi nipuna gole lalore, gupi laya. Na andaa alimiri ambiare ni go pereyaluameya piale neme ake ora pulapae, kone siaya. Niri ipa angena awopape pangere ana na-peale akepeare niri ora puri na-pale pange ni wenaali kongeyalore ni yalame komapeya, kone siaya.
4Neme ambia pula eimi alinu menda andamula, kone siaya. Gupumare na pupudengi nalo ei peredeandare go na andami alinumi nimuna anda para pa ipu da peme rupa, kone siaya. 5Gupumare nipuna andaa ali repara rundu ae wenaali raayo wi laya. Gupuma nipumi ririna ali para lalore, Neeme na andaa ali reparare rundu meale rupare akipurapoyapae, laya.
6Neme rundu meawa rupare wambala duramo ali ria mendane kipu rumbilia ei meawae, laya. Go layandare monde andere-ae alimi lalore, Nena ramayo goyale piri wala duramo ali ria mendane ki rorepaoma pa ali ria laapona ki laapo komea wape pae, laya. 7Gupuma wala mo ali menda para lala ara lalore, Nena runduri akipurapoyapae, laya. Go layanda mo alimi lala ara lalore, Palawanu ali ria mendane ki komea, laya. Go layandare monde andambao pirisaya alimi lalore, Wala mo ali ria komea pinyale pa ali ria malapu komea wape pae, laya. 8Go paya einu andomare ande makirao-ae aunu puae pupudengi nao-ae alina andaa alimi mo nipuna go analao rili au payanda nipuna bi minyasiaripaya, lisaya. Akepeare go suna aeme wenaalinumiri go suna aunu puluameya analao riduameyare pa rupara aeme wenaalinu pange lu angulaeme, lisaya.
9Go ei la eiri puma Yesumi gupi lisaya. Go eina neme nimi para lalo. Go suna amo alenumi andami alinu mumare nimu rapu raminyeke pu alepape, lisaya. Go einare go alenu peredeandare na-kome pa ari puae anda para pange nee ipu loma karu milimi. 10Go einayandare neme nimi para lalo. Ali apimi onge alesi naini pange epe rupa rendepona andere pidiandare andaa alenu pange epe rupa andere pidia, lisaya. Go einayandare wala ali apimi onge alesinu pange koi koi pi rupa andere-aliandare gore andaa alenu pange koi koi pi rupa andere-alia, lisaya. 11Gupuma go suna wia amo alenu rendepona epe rupa na-andere-alimindare apimi nimi endoaya ei gida amo alenuri andere-aliminyaya kone rulaoma giliayapae, lisaya. 12Gupuma neeme mendana alenunda epe rupa rendepona na-andere pidindare gore nena ei dea alere neere apimi giliayapae, lisaya.
13Pupudengi nala alimiri andaa ali laapona pupudengi nape-nae-ya. Ali menda pu alala arare ali mendare yanda dia. Ali menda repara kuma kuma puma ali mendare ora gialia. Nimimi Gode nimina Reali ma-aulaoma muni pange nimina reali mendaa dina ma-ape-nae-ya, lisaya.
Yesumi mana angelenu lisaya ei
(Madiu 11:12-13; 5:31-32; Maka 10:11-12)
14Monde Parisi alinumi Yesu go lisaya ei pangomare giri laisimiya. Akepeare nimu munina kone waru wisimiyanda. 15Yesumi nimu para lala ara lalore, gupi lisaya. Su wenaalina lee ronare ora epe rupa ae repaa mandana au demepare Godemere nimina punu pange nimina konenu raayo nipumi kone wia, lisaya. Go suna ara alimi andaa alenu kone widame alenuri Godena lee ronare ale menda dia, kone wida, lisaya.
16Mosesimi Rudule Angelenu pange Godena poropedi alinumi wape pisimiya einu puri andaai pala eiri ipuma nimuna puri perele auri Dioni Baparaisina naarena perelisaya. Gupuma go naarena kini pumare Godena Ki Rambuao-aya Eina epe angele la deme, lisaya. Wenaali andapumi pange go para epolame puri waru padame, lisaya. 17Go peapare so yaa pange go su laapo alu padore rendaa ongepusi peapare Godena Rudule Angelenare ora onge kupusinu alu padore rendaa ora andaai pea, lisaya.
18Ali menda nipuna were giaoma nipumi wala wena menda lamu miliandare gore nipumi go wena pake nala. Gupuma ali mendame ali giaoma epea wena lamu miliandare gore go ali nipumi pake nala, lisaya.
Amo ali menda pange Lasarasi niipu laapona angele lee ei
19Yesumi wala ramani menda lala ara lalore, go lisaya. Ora ambalande amo ali menda aisayapare naare raayosimiri nipumi yangi andaaimi kamboma ora epe busupi akanu kama marala pisaya. Gupuma naare raayosimi nipumi ora epepe endanu kama noaisaya.
20Gupuma aisayapare mo nipuna anda pora gape para epala pumare narali ali menda nipuna bi Lasarasi lee ali menda piru ala pisaya. Mo ali nipuna donare alenda alendanu para pange reere reerenu waru piru pisaya. 21Go ali nipuna konemere mo amo ali nipuna enda noma popolomasinu lopala paya einu muma ma nola kone siala pisaya. Yananumi pange mo alina reere reerenu angonala pisimiya. 22Monde narali ali komayandare eindiolonu nimumi ria puma so Godena Aya Lena ma-puma Eparame piraya lena enda pambo kumburaoma pirisimiya. Ande amo ali komisaya dinare dapa para wisimiya. 23Gupuma ande aliri repana ralae para piri rendaa andaai nala arare andisayapare papare piri Eparame nipuna perali para Lasarasi ma-piraoma pirisaya. 24Go alimi Eparame andoma wi lala ara go lisaya. Apa Eparameo, lisaya. Neeme ni yarame komae, lisaya. Gupuma neeme Lasarasi nipuna ki ipa para lopaoma na eekena epa warainya lae, lisaya. Akepeare ni go repana para piri rendaa andaai naloae, lisaya. 25Go lisayapare Eparame nipumiri go lisaya. Na nakio, neemere kone sialepae, lisaya. Neeme nena suna arare nee epepe alenu kama mu aripindepare Lasarasi nipuri ora koae alenu kama mu aripande, lisaya. Go peapare ambiare neere repana ralae para rendaa apo mealepare Lasarasi onere nipu ale waidiayapae, lisaya.
26Gupuma pangere neka kombale andaai go wiandae, lisaya. One aoma wenaali apo nane epolameya pilimipare ana na-pea pange apo nane aoma one epolame pu pilimipare ana na-pu pea, lisaya. 27Go lisayandare mo amo alimi lalore, gupi lisaya. Apa Eparameo. Neme nee kongeyalole na apana anda para Lasarasi rapae, lisaya. 28Na apana anda para na ame supu ora pidimiae, lisaya. Lasarasi nipumi puma pua kingi angele pua deandare nimu wala go rendaa puae para wala na-epenayanda laloae, lisaya. 29Gupuma Eparame nipumi wala gupi lisaya. Nena amenu nimuri Mosesimi wape pisaya angelenu pange Godena poropedi alinumi apo wape pu pisimiya angelemere nimu kingi au pula peme angele apo wiandae, lisaya. 30Go lisayapare wala monde amo alimi lalore, Apa Eparameo, lisaya. Go eiri ana na-peae, lisaya. Go peapare ali menda komoma wala rekoma go alinu repara puma pua angele da pameyalore nimuna koae aunu giaoma lekeda pameae, lisaya. 31Go lisayapare Eparame nipumi lalore, gupi lisaya. Gore wala Mosesi pange mo Godena poropedi alinumi wape peme einu yarepema kone na-wilimindare gore ali komea ali rekoma ipuma ara deanda pange mandana na-pangeleme, lisaya.
Currently Selected:
Luka 16: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
