Luka 11

Yainya pi ei walisaya ei

(Madiu 6:9-13; 7:7-11)

1Rana menda Yesu nipumi ale menda nane pua yainya pu pirisaya. Go einare yainya pu pereyomare nipuna kou nane raluaisaya ali mendame nipu para lalore, Realio, ambalande Dionimi nipuna kou nane raluaisimiya alinu para Gode para yainya pi ei mongere-aisaya rupa neeme naa para go Gode para yainya pi eiri gurupa walapeae, lisaya.

2Go einare Yesu nipumi nimu para walala ara lalore, Nimimi yainya pilimindare gurupa yainya pipape, lisaya.

Apao,

wenaali raayome nena bi yaako pi ei

minyasiainya.

Nena Ki Rambuao-aya Einu naa para

epenalape.

3Neeme naa para naare menda mendame

enda anana giapeae.

4Naana koae aunu repara kone na-siapeae.

Akepeare naame pange naana yangonumi

naa para koae aunu pimi einu repara

kone na-wilima.

Gupuma naa para rendaa pi la andala einu

na-epenalapeae, lisaya.

5Gupuma Yesu nipumi nipuna kou nane raluaisimiya alinu para lalore, gupi lisaya. Rimba urumu rumuna nena yango mendana anda para puma nipu para lalore ni mondo repo gi angele nimimiri manda demeyapae lisaya. 6Naa andami ali menda kimisu polameya ipuma naa anda para opaparipapare nipu para alape endanu menda na-wianda, lalo de loma de, lisaya. 7Go einare pa marea nena ameme nipuna anda rupara piri nena angele yango liada ara lalore, Ni para pupudengi andaai na-giape, dea, loma lisaya. Na anda pora ambalande poawande pange na nongo nakinu ni rapu anda panda para ambala paliamande dea, lisaya. Ni wala rekoma nee para ale menda giape-na-ya, dea, loma lisaya. 8Neere nipuna andami ali ainyayapare golere endare mandana na-gula peapare neere yalame na-kome pa lora pa eiri pula-ainyare nena rana pea leenu raayosi mandana gilia, lisaya. 9Go einare neme nimi para go angele la gialo, lisaya. Nee ale menda dia deandare Gode repara konge dendare nee ora gilia. Neeme ale menda go waisalo loma waidindare ora andawili. Godena pora gape dindare nipumi pora ora lombelea, lisaya. 10Go einare ali apimi Gode para yainya pula ara ale menda nipu para konge deandare mo konge dea leenu ora milia, lisaya. Gupuma ali mendame ale menda aisaya piliandare ora andawilia, lisaya. Gupuma ali mendame pora pombae ale para epa koro deandare ali mendame go pora nipu para ora lombelea, lisaya. 11Nimi runane go pimi apanu nimina nakimi, Apao, ni repali menda giae, loma konge deandare nimimi nipu parare kolombaisia ma-ademepae, lisaya. 12O nipumiri, yaa kapa menda giae, loma konge deandare nimimiri nipu para kaala ei ma-ademepae, lisaya. 13Nimiri koae alinuyapare golere nimina naki nongosinu repara epepe alenu alape einunare kone waru wimi, lisaya. Go einayandare nimina yaa nane Apamere suna apanu pange lu angulaoma Yaakopi Sipiridiri nipu lora pilimi repaa repara adea, lisaya.

Yesu pange Bielesepulu nipuna angele wia ei

(Madiu 12:22-30; Maka 3:20-27)

14Ali menda angele na-le koae remo piri ali menda aisaya. Yesumi go koae remo ralu rumbisayandare wala go alimi angele kini pu lisaya. 15Mendapare wenaalinumi lalo ara lalore, Yesu gurupa koae remonu ralu rumbinyaya puri adare ande koae remonuna kalu ali Bielesepulu#11:15 Bielesepuluri Sadanina bi menda. nipumi ada eimi pia ae, lisimiya. Go ei andoma go para arimiya wenaali andapumi rungulu meala pambisimiyapare wenaali menda parame lalore, Monde koae remonuna mundu remo Bielesepulu nipumi Yesu para puri adanda go koae remonu ralu rumbae, lisimiya.

16Mendapare wenaalinumi Yesu para la andelema kone sumare Gode nipuna Yesu para epe kone wi ei wadoameyanda nimumi Yesu para lalore, Na-ande aunu mendapare neeme pae, lisimiya. 17Go lisimiyapare Yesu nipumi nimuna kone wisimiya ei ambala kone suma nimu para lalore, Anda ruru menda parame nimuna gole rumaalolo puma yanda pilimindare nimuna ao-paida peme ei kodea pange nimuna ao-paida peme ei repara peredea, lisaya. Gurupa pange anda repaa mendaparame nimuna gole rumaalolo puma yanda pilimindare nimuna ao-paliape ei kodea, lisaya. 18Go einare Sadanina ki rambuao-aya ei ruparare aeme repaame ruru ruru lalolo puma yanda pulolo pilimindare nimuri puri waru na-pademe. Nimimi ni para lalore, Bielesepulu nipumi puri gidanda koae remonu ralu rumbala dame, lisaya. 19Neme koae remonu go aunu puma ralu rumbuluandare nimi raluaeme repaamere koae remo ralu rumbu lamere akepu ralu rumbu aemepae, lisaya. Nimi raluma pamuaeme alinumi gole lalore, Nimiri payapo au pimi loaeme, lisaya. 20Dia, Godena purimi koae remonu ralu rumbalo pange Godena Ki Rambuao-aya Eiri nimi repara ambala epande, lore nimi repara penameyao wada, lisaya.

21Puri waru pale ali mendame dolo endalinu siamba ara mo nipuna anda andere-aliandare nipuna anda rupara wia leenu epe rupa pa wilia, lisaya. 22Go peapare ora puri andaai palea ali mendame go anda reali rapu yanda pulame epeleandare nipumi ora lu rumbiliandare anda reali nipuna ma-siae endali dolo raayosi epa milia, lisaya. Gupuma mo pake mea alenu pane ma ria puma mo pake noae alimi pua rali pilia, loma lisaya.

23Ali menda apimi ni rapu na-radiandare gore ni rapu yanda liale, lisaya. Gurupa pange ali menda apimi ni rambamu ale menda mendaa para na-mu mombedeandare gore nipumiri pane ma-kepea kepea pia, lisaya.

Mo koae remo wala lekeya ipisaya ei

(Madiu 12:43-45)

24Gupuma Yesumi lala ara lalore, Koae remo ali mendana lo romba para piri ei kama opolumba popeleandare su kapulea lena pamulopala ara liru meape andasu wasuaya, lisaya. Mo liru pirape lena na-andawiliandare mo koae remome nipuna gole lalore, Nina minyapalaoma epawande anda nane wala lekeya pola, lisaya. 25Go au pumare mo koae remo wala lekeya puma nipuna anda pua andisayapare nipuna minyapalaoma epaya anda ludare waru wamo pu suma epe rupa kiima isimiya, lisaya. 26Gupuma mo koae remo nipu puma koae remonu mendane ki pereya mendane kina laapopu pua karu misaya, lisaya. Go remonuri nimuna koae aunu puluri nipu pange lu angulaeme. Nimu raayo mendaa para epa aisimiya. Go aunu pisaya einu raayosi perelisayandare go ali nipuri ambala ririna ao-palia rupa na-ala peapare nipuna ao-paliape ei ambiare ora koyapale wia, lisaya.

Ora epe rana kome ei

27Yesu nipumi mo angele lisayandare mo wenaali andapu angalapuna pirisaya wena mendame angele minyasioma lalore, Nee mandea pange nee andu gea wena nipuri epe lo para piruma ipulu pea, lisaya.

28Go lisayapare Yesu nipumi lalore, Dia, lisaya. Ali apimi Godena angele pangoma pia alinuri yakili aya, lisaya.

Wenaalinumi na-ande aunu mendapare andolameya konge lisimiya ei

(Madiu 12:38-42)

29Wenaali andapu Yesu epa mombe kopalioma ainya nipumi lalore, Ambia naarena aeme wenaali raayosiri ora koae wenaalinu aeme, lisaya. Nimumi na-ande au menda andolameya ni para angaa midamepare neme nimu para na-ande au menda na-wadapepare Godeme Diona nipumi na-ande au pisaya ei andamende ei komea anana adea, lisaya. 30Gupuma Godena poropedi ali Diona nipuri Ninipa wenaali repara pare au pisaya rupa mandanare Alina Si nipuri ambia wenaali repara pare au pea, lisaya. 31Werepe nanere Godeme wenaalinu komea lena mombeaoma Rali Pilia Naarena Sipa andasu andere-aisaya Kalu Wename reka ara ambia naarena aeme wenaali ma-rialia, lisaya. Akepeandare mo Kalu Wename pora kimi su andalupu wi eina ipuma nipuna andasu nane aoma mo kini ali Solomono nipuna ora epe kone waru rekele puma wada angelenu pangolameya ipisaya, lisaya. Neme nimi para lalo. Solomono angulapao pida pea ale menda go wiandae, lisaya. 32Werepe nanere Godeme wenaalinu komea lena mombeaoma Rali Pilia Naarena Ninipa ree anda wenaalinumi reka ara nimi ma-rialimi, lisaya. Akepeandare Diona nipumi angele walisaya dina go wenaalinumi nimuna koae koae einu giaisimiya, lisaya. Go peandare neme nimi para lalo. Diona mandana angulapao pida pea ale menda go wiandae, lisaya.

Do paa pi eina walisaya ei

(Madiu 5:15; 6:22-23)

33Gupuma Yesumi lala ara lalore, gupi lisaya. Ali mendame lamepa kewomare na-panga suaya pange ale mendame na-mandalao-aeme, lisaya. Go au na-piri nipumiri kewoma wenaalinu anda para konda pambada ara andala pula peme rupa mo lamepa kewoma suaya lena pua wilia, lisaya. Mo andare paa piliandare wenaalimi anana andapeya, lisaya. 34Nena leere nena dona lamepa mandana. Nena leenda ora epedeandare, nena do raayo paa pi eimi rumbidia, lisaya. Nena leenda kodeandare gore nena ru raayosi ora rimbale para aoma ora rimbadea, lisaya. 35Go einare mo nena do rupara paa pi eiri rimbada ei na-au lena waru andere-ape, lisaya. 36Go einare nena do raayo paa pu rumbima rimba rimba komenda na-deandare gore lamepa yano nena dona paa pu ralala ipuma puainya, dea, lisaya.

Yesu nipumi mo Parisi alinu pange Mosesimi Rudule Angele waloaisimiya alinu ma-riaisaya ei

(Madiu 23:1-36; Maka 12:38-40)

37Yesu nipumi go angelenu lo pereyaripaya dinare Parisi ali mendame nipuna anda para piri enda napana kone wisaya. Go kone wisayandare Yesu nipu go alina anda rupara pua konda pambaoma enda noae dapa mandaa pirisaya. 38Go Parisi alimi rungula mealo pambisaya. Nipumi kone sialore, Yesu nipumi enda nolame nipuna ki ambala na-randepelisayandare nipumi kone andapu waru wisaya. 39Go einare ande Realimi gupi lisaya. Gupumare nimi Parisi alinumiri nimina ipa noaeme kenangenu pange enda noaeme kopore mandaa nane komea randepeaemepare ruparare nimiri rendaa rendaa waru puma pange ora koae remonuna ree aeme, lisaya. 40Nimiri kone na-wi alinu, lisaya. Gode nipumi kama nane warea rupa rupara pange na-wareapae, lisaya. 41Go peapare nimina kenange kaponu mandaa nani wilia leenu mo narali wenaali para adapape, lisaya. Go au pilimindare Godena lee rona gore alenda alenda raayo ora kunilia pange kake waru pilia, lisaya.

42Nimi Parisi alinu waru andere-alepape, lisaya. Nimimiri ora ande Godena angeleme lalore, Nena warali alenu raayosi ongepusi ni repara giapeae, lea ei raduameyare ora ande rakiya sinu pange rumaoma nimina ei nala Godena ei ala moneala puaemepare nimi niri epe rupa ao-paliape ei pange Gode repara pu alape eiri kone rungulao-aeme. Go einuri na-giala pipape, lisaya.

43Nimi Parisi alinu waru andere-alepape, lisaya. Godena angele kuruaeme anda paranu nimina binu loma mu siala peme alenuna piduame rana waru komoaeme pange enda rapao-aeme kama naini pange nee andasioma andala puma ora mandala pinya kone suaeme, lisaya. 44Nimi waru andere-alepape, lisaya. Nimiri ali dapa gondae lomapare au na-peanda wenaalinumi kone na-wi ara rambuaoma pupuaeme ei mandana, lisaya.

45Go lisayandare Mosesimi Rudule Angele waloaisaya ali mendame Yesu para lalore, Waloale alio, neeme go angelenu lale eimiri naa manda manda meae nono pia, lisaya.

46Yesu nipumi nipuna angele yango lialo ara lalore, Nimi Mosesimi Rudule Angele waloaeme alinu waru andere-alepape, lisaya. Nimimi wenaalina kou mandaa kenda pi alenu ma-riao-aemepare nimi nimina gole nimina ki engalimi mo kenda pi alenu ma-ridame wenaali ma-riapeyanda gialimi, lisaya. 47Nimi waru andere-alepape. Nimimi mo Godena poropedi alinuna ro siape apendare epe rupa wamo pu siao-aemepare nimina aya kasuanumi ande Godena poropedi alinu lu aisimiya alinuae, lisaya. 48Nimimi pimi einumiri nimina aya kasuanumi pisimiya einu para raname komala ara ora pisimiya angele dame, lisaya. Nimumi ande Godena poropedi alinu lu piraisimiya. Gupumare nimimiri nimu ma dapa pape apendanu wamopu suaeme. 49Go einare Godena kone waru suma rekele pu wi eimiri go lea. Neme na poropedi alinu pange na angele ma-pu-ao-aeme alinu nimi repara rapalua, lisaya. Mendaparere lu rumbuma mendaparere rendaa pia lena ma-alimi, lisaya. 50-51Go einayandare ambia wenaalinuri rendaa pia lena alimi, lisaya. Su yaa kini pu ipuma ambia pereyado Godena poropedi alinu raayo Apele liisana dina kini puma Sakaraya mo Gode repara alinau puaeme alena pange mo epe yaakopi ale laapona rupara liisimiya einuna rendaa pia lena alimi, lisaya. Go einu raayosina ambia wenaalinuri rendaa pia lena alimi, lisaya.

52Nimi Mosesimi Rudule Angele waloale alinu, waru andere-alepape, lisaya. Nimimi mo kone waru andapu meape anda para lombape kiri nimina siamba ara nimi nimina gole na-konda pambae pange mo konda pambaluame rapaleme wenaalinu sese puaeme, lisaya.

53-54Yesumi go lena minyapalaoma puaya dinare Mosesimi Rudule Angele waloae alinu pange Parisi alinumi Yesu manda manda mea ae angelenu lada ara pange rero pi angelenu pange ora andapupe nipuna ki kinyalu kondo duameya lisimiya. Gupuma Yesu nipu olemole andapu pena angaa misimiya.

Currently Selected:

Luka 11: POLENT23

Highlight

Copy