Dioni 8
8
Ali pake ne wena Yesu para yola ma-ipisimiya ei
1Wenaali raayore nimuna andaa paisimiyapare Yesuri mo Olipi kana para paisaya.
2Yapi lisayanda palumu nane, Yesu nipuri wala perekeyoma mo Gode para alinau puaisimiya andaa anda para paisaya. Gupuma wenaali waru andapu nipu para mombelisimiyanda nipumi pirainyaoma piri mo wenaali para angele walisaya. 3Monde Mosesimi Rudule Angele waloaisimiya alinu pange mo Parisi alinu rapu mendaa para aperaoma ipula ara wena komea karu ma-ipuma mo alinu angalapuna epa ainyalisimiya. Mo wename wena mendana ali pake nala-ainya andawisimiya alinumi karu ipisimiya. 4Mo alinumi Yesu para lalore, Waloale alio, go wename wena mendana ali pake nala-ainyare menda parame ora andameya, lisimiya. 5Naana Rudule Angele wape pi ei rupara Mosesimi gurupa wape pisaya. Gupi wenare kaname luma komape loma leapare neemere akepi depae, lisimiya. 6Yesu para angele doameya aisa pula ara nipumi dea ei pangolameya ma-kirada ara Ia andisimiyapare Yesumi andainyaoma piri, ki malame suna wape pisaya. 7Mo alinumi angaa angaa meala-ainyare Yesumi rekoma ara mo alinu para lalore, Nimi rapu koae au menda na-pi ali menda aliandare kaname g o wena diia pa, lisaya. 8Go loma wala andainyaoma piri, nipuna ki malame suna wala wape pisaya. 9Mo alinumi go angele pangoma komea komealo raayo paisimiya. Ririna kamo ae alinu ambala penaloma kou nanere pena pena alinu komea komealo paisimiya. Gupisimiyapare Yesu komea pa pirinyalomare mo wena pange pa aisaya. 10Yesu nipumi rekoma ara mo wena para lalore, Wenao, monde alinuri a para aemepae, lisaya. Ali komeame nee para angele yokanali na-piapae, lisaya.
11Mo wename Yesuna angele yango liada ara lalore, Realio, menda dia, lisaya. Go eina Yesumi lalore, Gore neme pange nee lapo angele yokanali na-pulale nee puae. Gupumare werepe nane wala koae einu menda na-pape, lisaya.
Yesuri su raayona paa aya
12Yesumi nimu para wala lalore, Niri go suna paa ae, lisaya. Ali apimi na kou nane raluma epeleandare rimbale para na-pami, paa pea ei para ara endoma alia. Go endoaya eina paa pea ei para alia, lisaya.
13Mo Parisi alinumi Yesu para lalore, Nena pili eiri nena gole la giale eiri ora angele na-lale, lisimiya.
14Yesumi nimuna angele komba pada ara lalore, Dia, neme pi eiri nemele la gulandare ora angele laloae. Go einaya lawa. Ni aoma epawa ei pange werepena polape lena pange nemere kone sialopare ni aoma epawa ei pange werepena polape lena pange nimimiri kone na-wimi, lisaya. 15Nimimi angele yokanali pimi eiri, su alinumi yala ara damepare nemere ali menda para angele yokanali na-pi, lisaya. 16Go peapare angele yokanali pula lama pulandare ora ei pula ara pula, lisaya. Wala akepeanda go angele lalopae. Nina kunuma na-ae, ni rapaya Gode, na Apa lapo aepa eina lawa, lisaya. 17Nimina Mosesimi Rudule Angelenu rupara wape peme eiri gurupa. Ali laapome ali menda andoma angele komea dependare nipuna angelere ora ei dape, lisaya. 18Neme pi einuri ninale la gialo. Gupuma ni rapaya Gode na Apame pange na angele ladae, lisaya.
19Mo alinumi Yesu para angaa meala ara lalore, Nena apare a para ayapa, lisimiya. Yesumi nimuna angele yango liada ara lalore, Ni pange na Apa pange nimi na-andeme. Nimimi ni andola pameyalore na Apa pange andola pame, lisaya.
20Go lisaya angelenuri Yesumi angele walala ara mo muni wisimiya Gode para alinau puaisimiya andaa anda panda para ara lisaya. Gupuma nipuna naare ambe dialisayanda ali mendame nipu ambe na-pa riminyisaya.
Yesumi Ni pulu lena, nimiri epape-na-ya, lisaya ei
21Yesumi nimu para wala lalore, Niri pola, lisaya. Gupuma nimimi ni aisa pula pemepare koae au rapu aoma komeleme. Ni pulu lena nimiri epape-na-ya, lisaya.
22Go lisayanda mo Isaraelimi mandu rangala pae alinumi lalore, Nipumi gupa lande. Ni pulu lena nimiri epape-na-ya loma go da eiri nipumi nipunale duame dapae, lisimiya.
23Yesumi nimuna angele yango liada ara lalore, Nimiri go oro para aeme alinu aemepare niri so mandaa aoma epawa. Nimiri go suna ao-aeme alinu aemepare niri go suna ao-ayo ali dia, lisaya. 24Go peme eina nimi para koae ei rapu aoma komeleme loma lawande. Ni go ali ayo lo lalo angele na-pangelemendare nimiri koae au rapu aoma komeleme, lisaya.
25Mo alinumi Yesu para angaa meala ara lalore, Neere apiyapa, lisimiya. Yesumi nimuna angele yango liada ara lalore, Ande ambala ririna pena para ara lawande ei gole lala ara lalo, lisaya. 26Nimina puaeme auna, neme angele waru loma nimi para angele yokanali papeya. Ni rapaya Gode nipuna auri ora eiye. Gupuma nipuna angaa para pangawa eiri su wenaali para la aloayo, lisaya.
27Mo alinumiri Yesumi nipuna Apa para le lisaya eiri kone na-wisimiya. 28Go eina Yesumi nimu para lalore, Nimimi werepena Alina Si Naki ma-minyasialimindare ni go ali ayo lo lala pawande eiri orayanae loma go naarena kone wilimi. Gupuma pange neme ninale au menda na-pi. Ande Apame walea einu komea puaripunde eiri kone wilimi, lisaya. 29Gupuma ni rapaya Apa saana mendaa para aepa. Neme nipu raname ma-komado au koro raayo puayo eimi, ni angurapo na-ayo. Gupuma nipumi ni na-giaya, lisaya.
30Yesumi go lisaya angele pangomare wenaali waru andapumi nipu para kone rulaisimiya.
Go epe angeleme kuda para pimi wenaali kepe rapaya ei
31Go eina mo Isaraelimi mandu rangala pae alinumi Yesu para kone rulaisimiya alinu para Yesumi lalore, Nimimi neme walawande ei pangoma pala pilimindare gore ora na kou nane raluae alinu arare ora au pi eiri andeleme, lisaya. 32Gupuma mo ora au pi eimi nimi kepe rapaoma aliminyadea, lisaya.
33Mo alinumi nipuna angele yango liada ara lalore, Naare Eparame nipuna repaa alinu aema. Go eina koro komea mendana, naame ali menda para rala siaoma ara nipuna pupudengi pakama na-pao-arimapare neeme lalore, Naare kepe rapae alinuae, lale eiri akepeanda lalepae, lisimiya.
34Yesumi nimu para lalore, Nimi para ora angele lalo. Ali apimi koae au piliandare nipuna koae einumi rongaoma wi ali aya, lisaya. 35Go pea aliri nipuna realina anda repaa rapu, naare raayo na-ao-ala piliapare realina nakiri koro raayo ao-alia, lisaya. 36Ande Simi nimi kepe rapaliandare gore ora kepe rapaoma alimi, lisaya. 37Nimimiri Eparame nipuna anda repaa aeme eiri neme andalopare neme walawande angelenu na-ma-maidame einare ni duame pimi, lisaya. 38Na Apame ni para walea eiri neme nimi para walawandepare nimimi nimina apame walea ei pimi, lisaya.
39Mo alinumi nipuna angele yango liada ara lalore, Naana apare Eparame, lisimiya. Yesumi nimuna angele yango liada ara lalore, Nimiri Eparame nipuna nakinu ala pameyalore Eparame nipumi pisaya einuri ora pula pame, lisaya.
40-41Nemere Gode para pangawa ei komea ora au pi ei nimi para waloayopare nimimi ni duame rapaleme. Eparame nipumiri gupia au na-pisayapare nimina apame pisaya ei pimi, lisaya. Mo alinumi nipuna angele yango liada ara lalore, Naana amame ali menda pake noma mandi nakinu dia. Naana apa komea Gode aya eimi naare ora nipuna nakinu aema, lisimiya.
42Yesumi nimu para lalore, Godere nimina ora Apa ala payalore ni para pumi raname komala pame. Niri Gode para aoma ipuma ambia go ayo eina lawa. Na kone suma na-epe. Nipumi ni raparipanda epa ayo eina lawa, lisaya. 43Nimimi neme lalo angelere akepeanda kone na-sialemepae. Neme lalo ei na-pangelema kone sialeme eina lawa, lisaya. 44Nimiri nimina apa Sadanina siriri aeme. Go peme eimi nimina apana kone pea einu pulame pimi. Ambala ririna pena parare nipuri ali liiape koae remo aisaya. Nipu para ora au pia ei menda na-wi eina nipumi ora au pape-na-ya. Pereke pereke angele deandare nipuna pi eina dea. Nipumi pereke pereke angele loaya eina pange nipuri pereke pereke angelena ree koae remo aya eina lawa, lisaya.
45Neme ora angele loayo eina nimimi na-pangoaeme, lisaya. 46Nimi para aya ali apimi neme koae au pawa ei menda penameyao wadeapae. Neme ora angele doandare gore wala akepeanda na-pangalemepae, lisaya. 47Godena naki nongonumi Godena angelenu pangoamepare nimiri Godena ei na-aeme einare na-pangoaeme, lisaya.
Yesumi Eparame ambe na-mandisaya dinare Niri Pa Ao-ayo lisaya ei
48Mo Isaraelimi mandu rangala pae alinumi Yesuna angele yango liada ara lalore, Naame neere Sameria ali nee para koae remo piri pea lama eiri pa ei lamaya, lisimiya.
49Yesumi nimuna angele yango liada ara lalore, Ni parare koae remo na-pia loma na Apana angele ladopare nimimi na angele rambualuameya pimiae, lisaya. 50Nemere na angele na-ladopare mendame na angele laluame piapare nipuri angele yokanali pula pea eiye, lisaya. 51Nimi para ora angele lalo ei loma ali apimi na waloayo ei pangoma piliandare go aliri koro mendame ora na-komelea, lisaya.
52Mo Isaraelimi mandu rangala pae alinumi Yesu para lalore, Ambiare ora kone sialema lomare nee para koae remo pia. Eparame pange Godena poropedi alinu pange ambala komisimiyapare neeme lalore, Ali apimi na waloayo ei pangoma pia aliri koro mendame ora na-komelea, laende, lisimiya. 53Naana apa Eparamere ambala komisayapare neeme nipu angulaluame lalepa, lisimiya. Gupuma monde Godena poropedi alinu pange ambala komisimiyapare nena koneme neere api loma lalepa, lisimiya.
54Yesumi nimuna angele yango liada ara lalore, Ninale na angele lala pawayalore gore niri pa su ali mandana ala pawa. Na angele lada eiri nina Apame ladae. Nimimi lalore, Nipuri naana Gode aya dameae, lisaya. 55Nipuri nimimi na-andalemepare nemere nipu aya ei andaloae. Nipuri neme na-andalo da pawayalore nimi mandana pereke pereke ali ala pawa. Gupula pawapare neme nipu andomare nipuna angele pangoayo, lisaya. 56Nimina apa Eparame nipumi na naare di andolame raname komoma ara andomare raname komisaya, lisaya.
57Mo Isaraelimi mandu rangala pae alinumi Yesu para lalore, Nena kuni gipa ali ria laapo pereyoma mendane ki laapopu pereyoma rupa ambe na-dia leapare Eparame neeme ambala andisipae, lisimiya.
58Yesumi nimuna angele yango liada ara lalore, Nimi para ora angele lalo lomare Eparame ambe na-mandisaya dinare Niri Pa Ao-ayo, lisaya.
59Mo alinumi Yesu duame kananu misimiyapare Yesuri mo Gode para alinau puaisimiya andaa anda giaoma kundiripu kama nane aisaya.
Currently Selected:
Dioni 8: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
