Mark 13

Yesu n'aane Enuuf ite Atambatun kawelejee

(Májiye 24.1-2; Luk 21.5-6)

1Yesu ti kánuutina ku *t'Enuuf ite Atambatun, ake t'eriboora yeene n'aano:

—Ámuse u, á̱heelin tíme naane sujuju si kayite su keenut súwarie i! A̱juk naane sunuuf su siliite i!

2Yesu n'aano:

—A̱juka sunuuf sondu seeliite sii? Bibin birko, an at'aŋk'ajuk diyu ejuju yeelaŋgatanee t'eke; kiñaan ku kireyi fe káfiitenee.

Kunak kite sílaam sómbombokun su

(Májiye 24.3-14; Luk 21.7-19)

3Yesu n'aja ariiko ti hirij hite *Ñúolifiye ñu, ajoŋoor *n'Enuuf ite Atambatun. Piyeer, Saak, Saaŋ, n'Andere ni kaja kajuko unooniin abe ni kaano:

4—A̱sok uni fee kaakaŋ nu bondu bija fu kabaju, ni te naŋ t'ésuk i eja fu kakeetan kaanuku búlohenno?

5Náami Yesu eeeniin:

—Arinaŋ toko kikawuun, an atum'abuutuun. 6Ábuki bakan keehooje bibin nu huruwu húuma iŋi kaane boko kaamo fu *Afakana u, abe boko kabuutu bakan keehooje-hooj. 7Af'arijam kitiik, man yooŋ kitiik kibajabaj tike tiŋ, atum'árikoleyi, ábuki buwarawar kabaju, bare kamoosen kíteiit etaam i. 8Ésuk birito yeetiik n'ésuk, hikinu birito heetiik ni hikinu. Etaam i buyoŋoŋanooro tu búsuk beehooje, abe bujoñjol kabaju. Bondu búmoomi naane káseñji kítiyar kite anaare eeemo ti bíyihino.

9«Bare aruun, áriwasiyoor kikawuun. Ábuki bakan kajokuuun kaanuku keeja keejoonanuun. Aruun kámiñiee ti *ñáalawum ñite ñ'úne. Boko yooŋ bija n'aruun t'eseef i ni bákayi ku uŋu húuma hu. Iyu, n'aŋ'aribaj bítim ariiseedeiin bifeeneŋ bu t'íñje. 10Bala aduna i emoosen, Hirim Heetoofe hu huwareewar kawaare tánotan fe t'etaam ye. 11Ifi kajokuun kaja kasaan eseef i kaanuku keejoonanuun, atum'arisoŋk bijahale ti b'arija bu kasoku. Bare af'arireeŋ, n'aŋ'arisok kirim k'Atambatun ayakuun ku káwufoor toko-toko. Ábuki kirim k'arija ku kasoku fe iti kíyemi koonuun, bare kite Búwejet Beenabe bu. 12Bakan kásiku bakatiiin kasaan eseef i kayool. Sifaaf su yooŋ, iyu i kaja fu ni bakañiiin. Biñi bu kárahanna ti sifaafiin ni síñaayiin, abe boko kásikiiin kasaan bakan kayool. 13Ésuk i fe kahuufuuun uŋu húuma hu. Bare an eeja u kajoku alit tip bija tu hunak hiraanu hu, Atambatun kafakano.

Ábujaroora éekolinanie u

(Májiye 24.15-28; Luk 21.20-24)

14—Hike hunak, aruun kajuku «Ábujaroora éekolinanie u» n'áyemi t'awarut du káyemi#13.14 Mánoman *t'Anabe-nabe du, *t'Enuuf ite Atambatun. Dañel 9.27; 11.31; 12.11.. (An eeemo u ti bijaŋga bu aja ánandin bo.) Náami keeyak ku káyemi *Súde kawarawar kateyi bija ti kirij ku. 15An af'áyemi ti kaanaaj koone, awarut buyooso t'enuuf bite bike buroon. 16An af'áyemi yooŋ ti hitaaŋaat, awarut bíbatikeina t'enuuf bite kájufa k'ayakare ku te ko. 17Afin ayak buŋ kátaañi kunak kondu ti haare hu keenooto ku fuufiiin, ni keeemo ku ti kájuwan! 18Arilaw Atambatun man bondu itim bibaj ni haajam#13.18 Ni haajam, etiir i eŋ'enub dómbokun t'ésuk ite *Israyel, abe aŋ'ajokokan naane. Iŋ'ite ho hi bija bu ifi bítaañi. Bondu bíkinineŋe fu hi kafaku kite bakate ku Israyel t'enatoora yeeniin kiyak hu kátaañi ni haajam.! 19Ábuki kunak kondu káyemi kunak kite sílaam sómbombokun, s'an ámusut kajuku huta h'Atambatun aŋ'abin áwuwan aduna i bija yooŋ t'úmiye, abe utu susooñ yooŋ sibaj hikee-kee#13.19 A̱juk yooŋ Dañel 12.1.. 20Abe arko Atemit aanut fu yéeni éekasinan tu kunak kondu, an fe man aroŋ. Bare ákasinanakasinan te ko iŋ'ite bakan k'ajifane ku. 21Náami an af'aanuun: «Arijuk, *Afakana u ondu diye!» man yooŋ: «Ondu diya!», atum'áriyileno. 22Ábuki bakaake bibin, abe n'iŋi kajuus kaane boko kaamo fu Afakana u, man yooŋ *eyiŋana yite Atambatun. Boko káhinu buroon úkaan beejahale ésuk i, kaanuku keebuut ti káyinie, bakan k'Atambatun ajifane ku. 23Náami arinaŋ toko kikawuun! Hahiyu isoŋkuun bo busok.

Bíbatikeina bite Añi ute Húŋgowulan hu

(Májiye 24.29-31; Luk 21.25-28)

24—Bare tu kunak kondu, kane sílaam sondu sihabano, taanak tu kákumbu, hiim hu huroŋut kajaaŋan, 25búloofiiloof bu káneyina, abe sembe site t'etiir buyoŋoŋanooro#13.25 Siferse su 24-25, a̱juk yooŋ Esayi 13.10; 34.4; Esekiyel 32.7; Sowel 2.10; 3.4.. 26Abe ésuk i n'iŋi kajuk *Añi ute Húŋgowulan hu ti bibin tu bufor bu ni sembe sómbokun, o káanikin naane#13.26 Dañel 7.13.. 27O kaboñu emalaka yeene t'etaam i ereyi fe keekuukan bakan k'ajifane ku, huta hu t'etaam i éjabina du, bija yooŋ t'éraanna du#13.27 A̱juk yooŋ Buluwa bu 30.4; Nehemi 1.9..

Beeliikenee bu ti nífigiye nu

(Májiye 24.32-35; Luk 21.29-33)

28—Arijondoman ti *nífigiye ariijuk. Af'aja ayak abin áami biland boone bíyeyino, búsuus bu busooña búlooñin, aŋ'árimeyi kaanuku haajam hu húlohenno. 29Náami af'arijuk yooŋ kane buroon bondu bibaj, árimeyi kaanuku *Añi ute Húŋgowulan hu álohenno, memee n'aŋ'áreeŋin. 30Iisokuun bifeeneŋ bu: bakate ku hahiye iti kaket kareyi tu bondu fe bibajoorut. 31Etaam i nu bufor bu kamoosen, bare báhamin búuma iti biket hikee-kee.

An ámeyiit hunak hu n'ewahatu i

(Májiye 24.36-44)

32—An ámeyiit hunak hu hondu kaakaŋ, n'ewahatu i; humuum emalaka i t'etiir bufor bu, bija Añi u fe kámeyiit, kane arko Faaf u unoono taŋ. 33Arinaŋ toko kikawuun. Áriheelin féet, ábuki árimeyiit kaakaŋ nu bondu bibaj fu. 34Anokooreenokoor naane ániine eeemo ti bija kátuki. N'awas t'enuuf te o eroka yeene, abe n'asokiin huruw fe burok b'aware bu káhinu. Ahaban, n'aane ajukara u: «Hahiyu enuuf yendu.» 35Náami áriheelin féet, ábuki árimeyiit kaakaŋ n'ate enuuf i abin fu: maske to ti bija kajonu, man yooŋ nu huhuk, man yooŋ bújuloon bu ti kasoku, man yooŋ nu nuwasanoor. 36Bibin boone ufu búfuf, atum'áŋaabeinuun t'ariŋote. 37B'isok bee n'aruun, ésuk i ereyi fe k'isok fu bo: áriheelin féet!

Currently Selected:

Mark 13: cwt

Highlight

Copy