Saaŋ 19

1Náami Pilat eeeniin kajok Yesu kéemiño ni hikarawas. 2Kahaban, esulaan i ni kayit miland meebaje bisisa keeniir mo naane ékuhe yite áyi, abe ni káhin yo ti hikaw hite Yesu. Ni kasolo yooŋ kájufa kéeyuuse keelaañe#19.2 Kóŋkeyin, bákayi ku ifi kasol wañ weelaañe naane wondu.. 3Ni katof kaloho abe n'iŋi kaano:

—Írihamin n'awe, Áyi ite Esuwif i!

Abe n'iŋi karofaŋato.

4Pilat n'asooñ ánuutin abe n'aane hahooja hu:

—Arijamatan, iibinuun ne o tíyaŋ áriimeyi kaanuku ijukut te naŋ t'atine fu.

5Náami Yesu éenuutin, o n'ékuhe yite bisisa bu, ni kájufa kéeyuuse keelaañe ku. Pilat n'aaniin:

—Ániine u ondu!

6Bare h'eseef ite *esaraha i, ni kiŋki kajukar *Enuuf ite Atambatun kajuko hu, ni kataŋk kaane:

—A̱tibo *t'ekuruwa eeket! A̱tibo t'ekuruwa eeket!

Pilat n'aaniin:

—Árisiko aruun kumuumuun ariitibo t'ekuruwa, ábuki íñje ijukut te naŋ t'atine fu.

7Esuwif i ni kaano:

—Iribajabaj eluwa, abe t'eluwa i awarawar kaketu, ábuki aanaan akina aamo fu Añi ite Atambatun#19.7 A̱juk yooŋ Esaraha i 24.16..

8Hi Pilat ajame hu kirim kondu, n'ahaŋ kákoleyi. 9N'asooñ ayooso t'enuuf i abe n'aane Yesu:

—Diin t'á̱nuutina fu?

Bare Yesu ásafinuto. 10Náami Pilat eeeno:

—Butum a̱ateñeko káhamin n'íñje? Á̱meyiit kaanuku íkooki sembe site kawasani, ni sembe site yooŋ káhinu a̱atibee t'ekuruwa?

11Yesu n'aano:

—A̱bajut t'íñje mayet sembe, kane arko taŋ s'Atambatun eeemo u t'etiir awuni su. Iŋ'ite ho aamo fu katin kite an éesikam u asaani kihaŋahaŋ kúuwe ku.

12Áfiitin t'ewahatu yendu, Pilat n'aŋes efehe kaanuku eewasan Yesu. Bare Esuwif i n'iŋi kataŋk kaane:

—Af'a̱wasan áyin ondu, n'aŋ'áami á̱siiŋooreinoot *n'áyi ómbokun eeemo u Rom! Ábuki an fe eeene akina áyi, an ondu anatoora áyi ómbokun u!

13Hi Pilat ajame hu bondu, n'ánuutann Yesu tíyaŋ, abe n'aja ariiko t'eriikeey ite ajoonana u yeeemo i tindi kaane «Kaanaaj kite bujuju bu» (aamo fu «Gabata» ti kíhaminiin kite Esuwif i). 14Bondu bibajabaj inde kaajiŋgan ku#19.14 kaajiŋgan ku: áfiitin t'ewahatu yendu n'Esuwif i ifi kayool bimetek bu *t'Enuuf ite Atambatun bija *t'efeet ite Kánuutina ku Esipt., efeet ite Kánuutina ku Esipt káayemiin naane kuwaatu. Pilat n'aane Esuwif i:

—Áyi oonuun ondu!

15Bare ni kataŋk iŋi kaane:

—A̱yoolo! A̱yoolo! A̱tibo t'ekuruwa eeket!

Pilat n'aaniin:

—Butum iitib áyi oonuun t'ekuruwa?

Eseef ite esaraha i ni kaano:

—Iribajut ake áyi eewayee n'áyi ómbokun eeemo u Rom.

16Náami Pilat éesik Yesu asaaniin kaanuku keetibo t'ekuruwa.

Yesu n'atibee t'ekuruwa

(Májiye 27.32-44; Mark 15.21-32; Luk 23.26-43)

Náami esulaan i keejok Yesu. 17Yesu humuumo n'akando *ekuruwa yeene eenuut hikinu hu, bija tindi kaane «t'Esendeen i» (aamo fu «Golgota» ti kíhaminiin kite Esuwif i). 18Kareeŋa toko, esulaan i ni katib Yesu t'ekuruwa i. Ni katib yooŋ toko bákasuba tu sukuruwa, Yesu éeyemiiin t'etut.

19*Pilat asokasok t'akiñj bike, abe ni kanaŋ bo t'ekuruwa i. Bonde bikiñjee fu toko: «Yesu ite u *Nasaret, Áyi ite Esuwif i.» 20Keehooje t'Esuwif i kajaŋgajaŋga beekiñjee bu, ábuki ti Yesu atibee du t'ekuruwa i akamboorutee ni hikinu hu, abe bikiñjeekiñj ti kíhaminiin kooniin, ni ti kíhaminiin kite bakate ku *Rom, ni ti *kigerekaay. 21Eseef ite *esaraha i ni kaja kaane Pilat:

—A̱warut kakiñju «Áyi ite Esuwif i.» A̱warawar kakiñju aane: «Áyin onde aanaan akina aamo fu Áyi ite Esuwif i.»

22Pilat n'aaniin:

—B'ikiñje bu utu bunuut.

23H'esulaan i katibe hu Yesu t'ekuruwa i kahaban, ni kásik wañ woone w'asiimee wu, abe ni káruboor wo kúrub kibaakiir, huruw fe eebaj hifeeneŋ. Ni kásik yooŋ kájufa koone keeliilee ku huta hu t'etiir bija yooŋ t'etaam, abe keekiikutee. 24Esulaan i ni kaanoor:

—Utum'újeh kájufa konde. Úya bukuuj núuyit núujuk eeja u ko kásiku.

Iyu i báhamin bonde beesokee bu ti *Míkiñjin mu bihaŋe fu bibaj. Meenaan:

«Kásikasik wañ w'isiimee wu káruboor,

abe ni kaya bukuuj keeyit keejuk

eeja u kásiku kájufa kúuma#19.24 Élookiin i 22.19..»

Bondu b'esulaan i káhine fu.

25Mari íñaay ite Yesu ámoomi t'asiiŋee kaagoroor n'ekuruwa i ti katibo du, akina n'at'o, ni Mari anaare Kilewopas, ni Mari ite u Magdala. 26Hi Yesu ajuke hu íñaayo t'asiiŋee du kaagoroor n'ariboora u a ámaŋie-maŋie u, n'aane íñaayo:

—Waay, añi úuwe ondu.

27Ahaban, n'aane ariboora u:

—Íñaayi ondu.

Áfiitin tu hunak hondu, ariboora u n'arahan anaare u t'enuuf te o.

Eket ite Yesu

(Májiye 27.45-56; Mark 15.33-41; Luk 23.44-49)

28Bondu buwas, Yesu n'ámeyi kaanuku ahabanee areyi fe. N'áhamin kaanuku man beesokee bu ti *Míkiñjin mu ni bibaj. N'aane:

—Búhujo bondu t'íñje#19.28 Élookiin i 69.22; a̱juk yooŋ Élookiin i 22.16..

29Éndiis émoomi toko yeehooje bib n'ébiñ yeekeese. Náami esulaan i kéesik hupoons kéehujan ho ébiñ yendu#19.29 A̱juk yooŋ Élookiin i 69.22., abe ni kaya ho tu hunuk hite nike nunukanuk iŋi kaane no hisop. Kahaban, ni kamaaren ho tu butum bite Yesu. 30Hi Yesu áhujee hu ébiñ i, n'aane:

—Ahabanee areyi fe!

Ahaban, n'aleeb nukuno, abe n'aket.

Ake asulaan n'aya Yesu ni kataf

31*Erimaas ite Esuwif i n'éyemi naane kuwaatu, abe hunak hómbokun tu boko, ábuki hífimboorafimboor *n'efeet yeeniin ite Kánuutina ku Esipt. Makamu Esuwif i kámaŋiit kawasu sini su tu *bukuruwa bu t'erimaas yeeniin, ni kalaw *Pilat kaanuku man wuwot wute keetibee ku tu bukuruwa bu nu wurebejee#19.31 An af'atibee *t'ekuruwa, aŋ'ásit tu wuwoto éeyini kayihu. Náami kaanuku an u eesoŋk aket, iŋi karebej wuwoto., suhunuŋ su seenuutanee toko. 32Esulaan i ni kabin, abe ni kafiit wuwot wute átiyar u, n'ásooboriyan u keetibee ku ni Yesu. 33Hi kareeŋe hu Yesu, ni kajuk kaanuku aheeka eeket. Iŋ'ite ho hi kafiituto fu wuwot. 34Bare ake t'esulaan i n'ayao ni kataf koone ti kaaheeh. Halan ni hihaŋ híteyin, nu móhujo. 35An eenabane u bonde ajukajuk bo ni ñíkino féet, abe b'anabane bu bite nu múniyo. Ámoomi kaanuku b'asoke bu bite nu múniyo, abe asokasok bo kaanuku man aruun yooŋ n'áriyilen. 36Iye i bonde bije fu kaanuku man beesokee bu ti *Míkiñjin mu ni bibaj. Meenaan: «At'abaj mayet hujojo hifeeneŋ heeyakee kafiitu#19.36 A̱juk Kafakan ku 12.46; Kayuunoor ku 9.12; Élookiin i 34.21..» 37Nu musooñ yooŋ meene: «Boko káheelin t'an i kaye u#19.37 Sakari 12.10..»

Ehok ite Yesu

(Májiye 27.57-61; Mark 15.42-47; Luk 23.50-56)

38Hunuut toko, Siseef ite u ti hikinu hihi kaane Arimate n'abin eelaw *Pilat ehunuŋ ite Yesu kaanuku eeja eehok yo. Pilat n'aano hee. (Siseef ite t'eriboora yite Yesu, bare ánuusanuuso, ábuki ákolakoleyi eseef ite Esuwif i.) N'aja abe n'ayit ehunuŋ i. 39Nikodem eebine u aja haahu káajiim ku kajuku kite Yesu#19.39 A̱juk Saaŋ 3.1-2. n'abin yooŋ. Áyitinoyitin doon deereeŋe síkilo butuman nu sumoŋu site mátiso meerokee ni *miir n'alowes. 40Ni kayit ehunuŋ i t'ésubaiin, abe ni kahut yo nu wuhuuy ti káyuusu yooŋ toko mátiso meehunde mu kep. (Iyu e Esuwif i ifi káhin buhunuŋ booniin bala kahok.) 41Ti katibe du yéeni Yesu *t'ekuruwa i, etool émoomi toko. N'abaj níbahindaa élum éyeni yeewakee t'elaaliñj, abe an ámusut kahokiee te yo. 42Makamu *erimaas ite Esuwif i émoomi naane kuwaatu#19.42 A̱juk Saaŋ 19.31., abe élum i yooŋ ekambut, ni kahok toko Yesu.

Currently Selected:

Saaŋ 19: cwt

Highlight

Copy