Markusu 8

Yɛsu Ghǝiyati Ndzǝ Kumthlani Kumɛ ka Fwaɗu ni

(Mat 15:32-39)

1Akwa vǝr yarɛ ǝnda dlamiyir ndzi hang damwa tsaɓtsǝnidzi. Tǝng tǝ dar adi aka su tǝ dar awa sǝm wɛ, Yɛsu ka kǝga ndzǝr nuwurni adzǝni ka nkǝrɛ, 2“Yi aka kalhur ala ndzǝ yarni; kadǝbar dar kurtaka ndzai kaka yɛ vǝr makǝr ba adi aka su tǝ dar awa sǝm wɛ. 3Ma Yi hyanti tǝ dar alivi mi, kura Yi ta la dar sǝr sǝmɛ kǝla dǝri ata ngǝzǝ tǝ dar ata whalɛ, kadǝbar laka dar hyati akwa vui pǝɗǝm.”

4Ndzǝr nuwurni ka sǝnau, “Ama akwa madi tǝ ndǝ awa ɓui sǝr sǝmɛ akwa ntaku ni ka ghǝiyati tǝ dar?”

5Yɛsu ka yuwɛ, “Takwara ɗǝvɛ yiɗau tǝ gǝri akǝri?”

Dar ka nkǝrɛ, “Murfwɛ.”

6Dzǝ nkǝrɛ ala dlamiyir ndzi ni ka dar ndzai ata dai. Sakatǝ dzǝ kǝtǝ takwara murfwǝ ni ba dzǝ ka 'ya gwaditsǝni yarɛ, dzǝ ka pupwasi tǝ dar ba dzǝ ka la ndzǝr nuwurni yarɛ ba dar vǝkǝma ala ndzi yarni, ba dar ka 'ya apani. 7Dar aka madar kulfa yiɗau laka tsuwɛ; Yɛsu usar Hyal tsuwɛ ba dzǝ ka gha ala ndzǝr nuwurni ka dar ndǝghǝnta tǝ dar. 8Ndzǝ ni sǝmɛ ba dar ka ghǝi. Aghǝla ǝni ndzǝr nuwurni ka ɗǝɗǝmti nam ɓutǝr-ɓutǝr yarɛ nam tara mbi ka ghǝiyati wulna murfwɛ. 9Ata 'ya sǝli kumthlani kumɛ ka fwaɗu akwanda. Dzǝ ka salamtsǝni tǝ dar atǝra, 10ba aghǝla ǝni dzǝ ka lǝkwa sar kaka ndzǝr nuwurni ka tǝra akwa kurikuriyir Dalmanuthla.

11 # Mat 12:38; Luk 11:16 Ndzǝr Farisi yarni ka si ba dar baditsǝni yu Yɛsu. Ka dar nkǝrti tǝni, dar ka yu tǝni akuya ka parsu atahyal. 12#Mat 12:39; Luk 11:29Dzǝ ka pu mpihɛ dzǝgam ka nkǝrɛ, “Kami tǝ ndzǝr zaman ǝni ada yu parsu nǝr ndatǝdzi? Yi ada gha ala gǝri dzǝri, sǝr ndati adi nam tǝ ndǝ ata tsanti ala gǝri wɛ!” 13Antǝ dzǝ ka ngyar tǝ dar, dzǝ ɓakta lǝkwa sar ni ka fǝlba tǝbwanda manda ni.

Thlǝlamǝr Farisi yarni ba Hirudus

(Mat 16:5-12)

14Ndzǝr nuwurni ka fwanta kura dar ta si aka mantsǝkǝl, ɗiɗi takwara duku tǝ dar akǝri akwa sar ni. 15#Luk 12:1 Yɛsu ka la dar mbari, “Ka gǝr vǝdzǝ hankal, ka gǝri ɓǝla kǝr gǝri ta thlǝlamǝr ndzǝr Farisi aka nǝr Hirudus.”

16Dar ka ndǝrɛ ala kǝma dar ka nkǝrɛ, “Dzǝ gha ahani kadǝbar kura muri aka mantsǝkǝl.”

17Dzǝ zǝndi ndǝrǝr dar, Yɛsu ka yu tǝ dar: “Kami tǝ gǝri ada ndǝrɛ ata kǝra kura gǝri aka mantsǝkǝl? Gǝr tsu ta wula wala ngaba wɛ? Ɗǝfa gǝri yarɛ ɓaɓal ya? 18#Iri 5:21; Izǝ 12:2; Mar 4:12Gǝri aka ntsɛ ama gǝri adi ada wula wɛ, ba gǝri aka thlǝmɛ ama gǝri adi ada ngati wɛ? ba gǝri adi ada ɗǝngati wɛ? 19Sakatǝ Yi pupwasi takwara ntǝfu ni ala ndzǝ kumthlani kumɛ ka ntǝfu ni, ɓutǝr-ɓutǝr wulna ghǝi-ghǝi yiɗau tara mbi tǝ gǝri tara ɗǝɗǝmti?”

Dar ka nkǝrɛ, “Kum kapu sǝɗɛ.”

20“Ba sakatǝ Yi pupwasi takwara murfwɛ ala ndzǝ kumthlani kumɛ ka fwaɗu ni, ɓutǝr-ɓutǝr wulna ghǝi-ghǝi yiɗau tara mbi tǝ gǝri tara ɗǝɗǝmti?”

Dar ka nkǝrɛ apǝri “Murfwɛ.”

21Dzǝ ka nkǝrɛ ala dar, “Gǝri tsu ta ngaba wɛ?”

Ndǝ Mbǝti Ndǝ Ghyang ni akwa Bathsaida

22Dar si akwa Bathsaida, ba ndzǝ laka si aka sal laka ghyang ka kǝgyǝ Yɛsu ka dzǝ tsǝkwar tǝni. 23Dzǝ ngǝzi tsiya ghyang ni ka lǝba aka dza abǝla ta kuta mǝlmɛ ni. Sakatǝ dzǝ kǝ kyifǝti nkyǝli ata ntsa ndǝ ni, ba dzǝ ka puti tsiyari ata dza, Yɛsu ka yu tǝni, “Gɛ ada wula sǝ ya?”

24Dzǝ ka wulɛ ati ka nkǝrɛ, “Yi ada wula ndzi; Yi ada wul tǝ dar apa fwɛ ada mwari.”

25Yɛsu puti tsiyari ata ntsa ndǝ ni kadamwa. Antǝ ntsari ka mburntadzi, ntsari kǝ mbǝtǝdzi, ba dzǝ ada wula kǝlara su paraku. 26Yɛsu hyanti tǝni alivi, ka gha alari, “Ta gǝ ta mwara lǝkwa kuta mǝlmɛ ni.#8:26 Laka rǝbwar tsai yarɛ Ta gǝ ta mwari ka gha ala waima akwa kuta mǝlmǝ ni.”

Bitrusu Nkǝrɛ Yɛsu Dzǝ ani Kǝrsti

(Mat 16:13-20; Luk 9:18-21)

27Yɛsu kaka ndzǝr nuwurni ka tǝra akwa mǝlmɛ yarɛ kudzǝghɛ adzǝ diyir Kaisariya Filibi. Ata whalɛ dzǝ yu tǝ dar, “Ndzi ada gha apǝri Yi wa?”

28 # Mar 6:14,15; Luk 9:7,8 Dar ka sǝnau, “Ndzǝ laka gha apǝri gǝ Yawhana Ndǝr 'Ya Bamtizǝma, ndzǝ damwa yarɛ gha apǝri gǝ Iliya; ba tsuwɛ ndzǝ damwa yarɛ, gha apǝri gǝ pathlu akwa ntsa nabi yarɛ.”

29 # Yaw 6:68,69 “Ama gǝri fa?” tǝ dzǝ yuwɛ, “Gǝri ada gha apǝri Yi wa?”

Bitrusu ka sǝnau, “Gǝ ani Kǝrsti.#8:29 Wala Masiha. “Kǝrsti ni” (Gǝriku) ba “Masiha ni” (nyar Yahudi) gyapu ada nkǝrɛ “Ndǝ tǝ ndǝ Pukǝr Mal ni.””

30Yɛsu ka la dar mbari ta dar ta gha ala waima ata kǝrari.

Yɛsu Ndǝrɛ ata Kǝra Ntǝrni

(Mat 16:21-28; Luk 9:22-27)

31Dzǝ baditsǝni hyipɛ ala dar apǝri Zǝr Ndɛ ni ntsakǝr ka dzǝ ɗar bwaniyir sǝ hang ba ndzǝ ngga-ngga yarni ata ngǝla tǝni, nggar fǝrist yarni kaka malǝmǝr mabari yarni, ba apǝri ntsakǝr ka ndǝ tsi tǝni ama aghǝla vǝr makǝr dzǝ ata hyati kadamwa. 32Dzǝ ndǝrɛ ala dar ata babal ata kǝra ǝni, Bitrusu ka ndǝrnta tǝni tǝ ngwam ka baditsǝni ɗǝmnya alari.

33Ama sakatǝ Yɛsu mbaltǝ kǝrni ka wular ndzǝr nuwurni, dzǝ ka ɗǝmnya ala Bitrusu, dzǝ ka nkǝrɛ, “Tǝrbardzi aghǝlawai, Satan! Gǝ adi aka ɗǝnga sǝ yarɛ nǝr Hyal wɛ, ama sǝ yarɛ nǝr kum aka masi.”

34 # Mat 10:38; Luk 14:27 Antǝ dzǝ ka kǝga dlamiyir ndzǝ ni vwam kaka ndzǝr nuwurni ka nkǝrɛ: “Ma kǝlara ndǝ nam ada bara nu tǝra, ntsakǝr ka dzǝ ngǝla kǝrni ka dzǝ kǝtǝ undzum kadlǝkadlǝrni ka dzǝ nu tǝra. 35#Mat 10:39; Luk 17:33; Yaw 12:25Akuya kǝlara ndǝ nam ada bara tsǝlpi mpikari dzǝ ata nai tari, ama kǝlara ndǝ nam tara ɗalnta mpikari akuya ka yɛ ba akuya ndǝrǝr Hyal nam sǝɗa ni dzǝ ata mbatǝ tǝni. 36Sǝr mi ɗakurari ala ndɛ ma dzǝ ɓui sanga su akwa dunya, ama ata nyar sangurari? 37Wala mi tǝ ndǝ awa mǝzi hamnta ka palti aka sangurari? 38Ma kǝlara ndǝ nam tara nga sǝlai akuya ka yɛ, ba labarna yarɛ akwa zamanǝr 'ya badawikur aka 'ya biku, Zǝr Ndɛ ni ata nga sǝlaiyirni sakatǝ dzǝ si akwa nggakur Atǝgǝri kaka ndzǝr hyantǝr Hyal.”

Currently Selected:

Markusu 8: CKL

Highlight

Copy