Markusu 12

Karabu ata Kǝra Ndzǝr Tsǝwhɛ ni

(Mat 21:33-46; Luk 20:9-19)

1 # Isa 5:1,2 Ani Yɛsu baditsǝni labar ala dar akwa karabu: “Ndǝ laka tara thlǝkati fwakǝr inabi, dzǝ ka dǝrtsǝni aka mǝtsǝɓɛ, dzǝ ka lai kau akuya ka ɓǝtsǝ yimǝr inabi ba#12:1 Dar ada kǝthlǝr aka kau ka ɓǝtsǝ madar fwɛ ka 'ya yimǝr inabi. dzǝ ka tsati sarar wul fwaku. Antǝ dzǝ hayanta fwakǝr inabi ni ala ndzǝr tsǝwhu yar laka ba dzǝ ngyar kǝi ka tǝra akwa buraburá. 2Ata sakar tsaɓtsǝni kari fwaku dzǝ ka hyanti duku akwa ntsa zǝr kǝi ni ka dzǝ dlutsi nǝbwarni nǝr kari fwakǝr inabi aka ndzǝ ni. 3Ama dar ngǝti tǝni, ka tasǝ tǝni ka kǝdlǝnta tǝni alivi kura ka su. 4Antǝ thlaku ni hyanti zǝr kǝi damwa ala dar; ndzǝr wul fwaku ni ka dlaɓu tǝni ata kǝrari ka hau tǝni akwa sǝlai. 5Dzǝ ka hyanti zǝr kǝi damwa kadamwa, ba dar ka tsi tǝni. Dzǝ ka hyanti ndzǝ damwa hang; dar ka dlaɓu laka dar, ndzǝ laka dar ka tsai.

6“Nam duku tara mbi ka dzǝ hya ani zǝrǝrni tǝ dzǝ yiɗɛ. Ata dǝntari, ani, dzǝ hyanti zǝr ni ala ndzǝr wul fwaku ni ka nkǝrɛ, ‘Yi mbǝrsa dar ata vǝkǝr sǝlai ala zǝrna.’

7“Ama ndzǝr wul fwaku ni nkǝrɛ ala kǝma dar, ‘Əni ani zǝr fa wartari. Siyamɛ, ngyar ka muri tsi tǝni, ka warta ni ndzai nǝmuri!’ 8Ani dar ka ngǝti zǝrari ka tsi tǝni ka ɗalba dzari abǝla ta fwakǝr inabi.”

9Yɛsu yu, “Mi dzá, tǝ thlakǝr fwakǝr inabi ni awa 'ya? Dzǝ ata si ka kurnta ndzǝr wul fwaku ni, ka dzǝ la fwakǝr inabi ni ala ndzǝ damwa. 10#Zab 118:22,23Gǝri ta kǝra akwa Labar Hyal wɛ:

“ ‘Paya nam tǝ ndzǝr tsa fǝr yarɛ tara ngǝla

kǝ siya ndzai payar kuɗǝma ni;

11Thlaku ni dza 'yati ǝni,

ba kǝ ndzai sǝr ndati ata ntsa muri’?”

12Ani dar ada wul whal nam tǝ dar awa ngǝzǝ tǝni kadǝbar dar zǝndi apǝri dzǝ 'ya karabu ni ata kǝra dar. Ama dar ada hyivǝr ndzi, ani dar ka ngyar tǝni ka tǝrar dar.

Pu Tsǝmɛ ala Kaisar

(Mat 22:15-22; Luk 20:20-26)

13Aghǝla ǝni dar ka hyanti ndzǝ yar laka akwa ntsa Farisi yarɛ, kaka akwa ntsa ndzǝr Hirudus adzǝ Yɛsu ka dar ngǝti tǝni akwa labar. 14Dar si adzǝni ka nkǝrɛ, “Malǝm, yar zǝndi tǝngɛ apǝri gǝ ndǝ nam ada nkǝr dzǝri. Gǝ ndǝ nam kura ada pali ɗǝngar ngɛ kadǝbar ndzi, akuya gǝ adi ada wul ndɛ ata kǝma wɛ, ama gǝ ada hyipɛ whalǝr Hyal akwa dzǝrkur, ata ndzai kal-kal ya ka yar tsǝm budu ala Kaisar kǝna ka yar ngǝla?”

15Ama Yɛsu zǝndi kǝlikatsaɗǝmkur dar. Dzǝ ka yu, “Kami tǝ gǝri ada bara ka gǝr mbǝlai tǝra? Azǝramɛ aka dinariyus ni alai ka Yi wula tǝni.” 16Dar si aka kwapa ni, ba dzǝ ka yu tǝ dar, “Ənǝni par wa? Ba thlǝma wa rǝbwa-rǝbwa ni?”

Dar ka nkǝrɛ alari, “Nǝr Kaisar.”

17Antǝ Yɛsu ka nkǝrɛ ala dar, “Ka gǝri la Kaisar sǝ nam nǝr Kaisar, ba ka gǝri la Hyal sǝ nam nǝr Hyal.” Ba dar ka ndatǝdzi ata kǝrari.

Kǝldzi ata Vǝr Hyati akwa Ntǝnti ni

(Mat 22:21-33; Luk 20:27-40)

18 # 'YaSu 23:8 Antǝ ndzǝr Saduki nam tara nkǝrɛ apǝri hyati akwa nti adi wɛ, dar si adzǝni#12:18 Ndzǝ laka yarɛ nam kura ata mbǝrsa apǝri hyati akwa nti adai. ka yu tǝni apǝri, 19#Mab 25:5“Malǝm, Musa rǝbwai ala yar apǝri ma apǝri sal nti ka ngyar mwalarni kura aka zǝr, kǝ ndzai ntsakǝr ka zǝrangǝri kǝtǝ kuɗǝghum ni ka dzǝ yaba zǝr ala ndǝ nam tara nti ni. 20Madar mama murfwɛ adai, nam ngari kǝtǝ mwala, ama dzǝ ka nti kura dzǝ ata yai zǝr. 21Ani ndǝ sǝɗǝkur kǝtǝ kuɗǝghum ni, dzǝ yɛ dzǝ nti kura dzǝ ta yaba zǝr akwa, ba nǝr makǝrkur yɛ tsu ahani, ani sanga dar murfwɛ ni ta yaba zǝr akwa dza wɛ. 22Ata dǝnta mwala ndari yɛ nti. 23Akwa hyati akwa ntǝnti dzǝ mwalar wa akwa ntsa dar, kadǝbar dar murfwɛ ni sanga kǝl tǝni ka mwalakur?”

24Yɛsu ka sǝnau ala dar apǝri, “Gǝri ta 'ya kal-kal wɛ! Kadǝbar gǝri ta zǝndi Labar Hyal wala dǝnar Hyal wɛ. 25Ma sakatǝ ndzǝ ntǝnti hyati, kǝl mwala wala pwarnta nkwa ala sal adi wɛ, ama dar ata ndzai apa ndzǝr hyantǝr Hyal atahyal. 26#Sǝb 3:6Ama ngyar ka muri labar ata kǝra hyati akwa ntǝnti ni—gǝri ta kǝratsǝni akwa kakadǝr Musa wɛ, sakatǝ zǝr fwɛ ada mba akwa ntaku, whal nam tǝ Hyal tara nkǝrɛ ala Musa, ‘Yi dza Hyalǝr Ibrahim ni, Hyalǝr Isaku ni, ba Hyalǝr Yakubu ni’? 27Dzǝ adi Hyalǝr nti wɛ, ama dzǝ Hyal nam aka mpikɛ. Gǝr sa dzǝr dzǝri!”

Tsau nam Ngga Ta sang ni

(Mat 22:34-40; Luk 10:25-28)

28Pathlu akwa ntsa malǝmǝr mabari yarni si dzǝ ka ngati Yɛsu kaka ndzǝr Saduki ada ɓwalnya. Sakatǝ dzǝ ngati Yɛsu kalaktsǝni nam ɗaku, dzǝ yu tǝni, “Akwa ntsa sanga tsau yarni madi dza ani ɓwaltasang?”

29 # Mab 6:4,5 Yɛsu sǝnau, “Nam ɓwaltasang nkǝrɛ: ‘Ndzǝr Izǝraila siyamɛ thlǝmɛ, Thlaku Hyalǝr yar, Thlaku ani duku. 30Yiɗɛ Thlaku Hyalǝr ngɛ ni aka sanga ɗǝfa gɛ ba aka sanga sangura gɛ ba aka sanga ɗǝngar ngɛ ba aka sanga dǝnar ngɛ.’ 31#Fǝr 19:18Nǝr sǝɗǝkur nkǝrɛ, ‘Yiɗɛ ntǝwhulǝr ngɛ apa kǝrngɛ.’ Tsau nam tara kwatsǝni ǝni adi wɛ.”

32 # Mab 4:35 Ani malǝm mabari ndari ka nkǝrɛ ǝni, “Gǝ kal-kal malǝm, gǝ aka dzǝri akwa labarǝr ngǝ ni apǝri Hyal dzǝ duku ba damwa adi wɛ tar dza. 33#Hau 6:6Sǝ nam ɓwaltasang ani ka gǝ yiɗɛ tǝni aka sanga ɗǝfa gǝ, ba sanga zǝndǝr ngɛ aka sanga dǝnar ngɛ, ba ka gǝ yiɗɛ ntǝwhulǝr apa kǝrngɛ, ǝni dzǝ dza ɓwalta sanga kǝdlǝrsu aka hamnta su.”

34 # Luk 10:25-28 Sakatǝ Yɛsu wula apǝri dzǝ sǝnau aka bǝrkawakur, dzǝ ka nkǝrɛ alari, “Gǝ adi pǝɗǝm aka kuhyikur Hyal wɛ.” Ani aghǝla ǝnda, ndǝ nam dǝnawa tara ɓakta yu tǝni adi wɛ.

Zǝr Wa ani Kǝrsti ni

(Mat 22:41-46; Luk 20:41-44)

35Ani apa tǝ Yɛsu tara hyipɛ akwa babalǝr fǝr Hyal, dzǝ yuwɛ, “Mǝmi tǝ malǝmǝr mabari yarni awa nkǝrɛ apǝri Kǝrsti#12:35 Wala Masiha. dzǝ zǝr Dauda?” 36#Zab 110:1Mambǝl Kartǝ nkǝrɛ ala Dauda tǝ kǝrni ka dzǝ gha sǝni:

“ ‘Thlaku ni nkǝrɛ ala Thlakǝrna apǝri:

“Ndzai tǝbwar tsisǝmawai

tar ma Yi pukur dawar ngɛ

akur thlǝla gɛ.” ’

37Dauda tǝ kǝrni ma kǝga tǝni ‘Thlaku.’ Ama awa 'ya kara 'ya tǝ ndɛ awa nkǝrɛ apǝri Kǝrsti dzǝ zǝrǝrni?”

Dlamiyir ndzi hang ngati tǝni aka kutsari.

38Apa tǝ dzǝ tara hyipɛ, Yɛsu nkǝrɛ, “Ka gǝri vǝdzǝ hankal ala malǝmǝr mabari yarni. Dar yiɗǝ nuɗɛ aka lǝkutu dzǝgam, ka ndǝ thlawar tǝ dar akwa vui kasuku yarɛ, 39ba dar ada yiɗɛ vui ndzai nam dangaram akwa fǝr vǝkǝr sǝlai ba vui ndzai nam akwa vui gyali tǝ ndǝ ada hǝm hǝmɛ. 40Dar ada sǝnya kǝiyir kuɗǝghum yarɛ, ba dar ada 'ya aduwa yarɛ dzǝgam akuya ka ndǝ wula. Dzǝli ndzǝ yarni ata ɓui haka nam dzau.”

Hamnta Sǝr Kuɗǝghum ni

(Luk 21:1-4)

41Yɛsu ndzai akǝma vui nam tǝ ndzǝ ada hamnta kwapa akwa tǝ dzǝ ada wul dlamiyir ndzi ada pu kwapar dar akwa bitǝmbal nǝr fǝr Hyal. Ndzǝ nam bǝrba hang ada hamnta kwapa hang, 42ama kuɗǝghum laka ngudi si ka pu kwapa nkyiɗǝ laka anini sǝɗɛ.

43Yɛsu kǝgati ndzǝr nuwurni adzǝni, dzǝ ka nkǝrɛ, “Yi ada nkǝrɛ ala gǝri dzǝr dzǝri, kuɗǝghum nam ngudi ni dzǝ dza hamnta sǝ nam ɓwalta sanga ndzǝ. 44Kadǝbar sanga dar hamnta akwa ntsa hang nam tǝ dar akǝr, ama kuɗǝghum nam ngudi ni dzǝ hamnta akwa ngudikur, dzǝ pu sanga su—sanga sǝ nam tǝ dzǝ ada ndzai ata kǝri.”

Currently Selected:

Markusu 12: CKL

Highlight

Copy