Markusu 10

Ngǝla Mwala

(Mat 19:1-12; Luk 16:18)

1Ani Yɛsu ngyar vui nda ba dzǝ ka tǝra akwa kǝla diyir Yahudiya ba ata ngwama kyaghar Urdun. Dlamiyir ndzi ka si adzǝni kadamwa, ba dzǝ ka hyipɛ ala dar, apa tǝ dzǝ ada 'ya.

2Farisi yar laka ka si ka nkǝrti tǝni atar yuwɛ, “Ata ndzai kal-kal ya ka sal ngǝla mwalarni?”

3Yɛsu ka kalaktsǝni, “Mi tǝ Musa tsau ala gǝri?”

4 # Mab 24:1-4; Mat 5:31 Dar nkǝrɛ, “Musa yiɗɛ ka ndǝ rǝbwai kakadǝr ngǝla ka ndǝ hyanti tǝni atǝra.”

5Yɛsu sǝnau ala dar, “Musa rǝbwai ala gǝri mabari ni. Kadǝbar ɓaɓalkur ɗǝfa gǝri” 6#Bad 1:27; 5:2“Ama tsu sakar baditsǝni dunya, Hyal ‘mǝrti tǝ dar sal aka mwala.’ 7#Bad 2:24‘Akuya ka ǝni sal ata ngyar atǝgǝri aka angǝri ba ka dar paktsǝnidzi aka mwalarni, ba ndzǝ sǝɗǝ ni ata ndzai dzǝ duku.’ 8Ani dar tsu adi ndzǝ sǝɗǝ kǝra wɛ, ama ndǝ duku. 9Kadǝbar ǝni sǝ nam tǝ Hyal tara paktsǝni atakǝmaduku, ta ndǝ ta ndǝghǝba.”

10Sakatǝ dar tsu aivi kadamwa, ndzǝr nuwɛ yu Yɛsu ata kǝra labar ni. 11#Mat 5:32; 1Kwa 7:10,11Dzǝ nkǝrɛ ala dar, “Kǝlara ndǝ nam tara ngǝla mwalarni ka kǝtǝ damwa, badawikur tǝ dzǝ ada 'ya aka mwala ni. 12Ba ma dzǝ nam mwala ani tara ngǝla salǝrni ka kǝtǝ sal damwa, dzǝ 'ya badawikur.”

Madausai Nkyǝnkyiɗu ni ba Yɛsu

(Mat 19:13-15; Luk 18:15-17)

13Dar ka si aka madausai nam nkyǝnkyiɗu ala Yɛsu ka dzǝ tsǝkwar tǝ dar. Ama ndzǝr nuwurni kanti ala dar. 14Sakatǝ Yɛsu tara wula ǝni, ɗǝfari ka sǝwa. Dzǝ ka nkǝrɛ ala dar, “Ngyaramɛ ka madausai nam nkyǝnkyiɗu ka dar si adzǝra, ta gǝri ta kanti ala dar. Kadǝbar kuhyikur Hyal ni nǝr dzǝli ǝni yarni. 15#Mat 18:3Yi ada nkǝrɛ ala gǝri dzǝri, kǝlara ndǝ nam kura ta dlutsi kuhyikur Hyal apa zǝr waza nam nkyiɗu dzǝ adi ata lǝkwa kuhyikur Hyal wɛ.” 16Ba dzǝ ka fati madausai yarni akwa ghyimbiyari, dzǝ ka pukǝr tsiyari ata kǝra dar ba dzǝ ka vǝkǝr ala dar barka.

Zǝr Dakwai nam Bǝrba ni

(Mat 19:16-30; Luk 18:18-30)

17Sakatǝ Yɛsu angwada sǝba ata kǝra whalɛ, ndǝ laka ka whuiya lǝngui adzǝni, ka zǝɗi akǝmari, dzǝ ka yu tǝni, “Malǝm nam ɗaku, mǝ tǝ Yi awa 'ya ka Yi ɓui mpikǝ nam kura kurkuri?”

18Yɛsu sǝnau alari apǝri, “Kami tǝ gǝ kǝga tǝra ndǝ nam ɗaku? Ndǝ ɗaku adi wɛ—tar Hyal ɗiɗi. 19#Sǝb 20:13; Mab 5:17; Sǝb 20:14; Mab 5:18; Sǝb 20:15; Mab 5:19; Sǝb 20:16; Mab 5:20; Sǝb 20:12; Mab 5:16Gǝ zǝndi tsau yarni: ‘Gǝ adi ata tsa ndɛ wɛ, gǝ adi ata 'ya badawikur wɛ, gǝ adi ata hǝl wɛ, gǝ adi ata ndzai sakǝidar sǝ nam kura gǝ ta wula aka ntsa gǝ wɛ, gǝ adi ata 'ya dlǝrpǝtsǝni wɛ, ka gǝ vǝkǝr sǝlai ala ba aka ma.’”

20Dzǝ ka nkǝrɛ apǝri, “Malǝm Yi ɓǝlati ǝni yarni sang sakatǝ Yi tsu zǝr dakwai.”

21Yɛsu ka wul tǝni dzǝ ka yiɗɛ tǝni. Dzǝ ka nkǝrɛ alari, “Su pathlu tǝ gǝ nai tari,” “Mwari, ka gǝ ɗǝgǝlnta sanga sǝ nam tǝ gǝ akǝri ka gǝ la ndzǝ nam ngudi, gǝ ata ɓui bitǝmbal atahyal. Antǝ ka gǝ si nu tǝra.”

22Ama tǝ dzǝ ngati ahani, dzǝ hai kǝrari alǝghǝl ka dai. Dzǝ ka tǝrarni aka ɗǝfu sǝwa-sǝwa. Kadǝbar dzǝ ndǝ nam bǝrba dzǝr dzǝri.

23Yɛsu ka ɗǝwulnta ntsɛ ba dzǝ ka nkǝrɛ ala ndzǝr nuwurni, “Mǝmi dzaukur tǝ ndzǝ bǝrba awa lǝkwa kuhyikur Hyal!”

24Ndzǝr nuwurni ka ndatǝdzi ata kǝra labar ni. Ama Yɛsu nkǝrɛ kadamwa, “Pazǝrna yarɛ mǝmi dzaukur tǝ ndǝ awa lǝkwa kuhyikur Hyal! 25Ata ndzai butu ala dlǝgwam ka dzǝ lǝba ata gulǝr yibǝra ta tǝ ndǝ bǝrba awa lǝkwa kuhyikur Hyal.”

26Dar ka lǝkwa ndatǝdzi dzǝr dzǝri, dar nkǝrɛ ala kǝma dar, “Wa ani ata ɓui mbatǝdzi?”

27Yɛsu ka wul tǝ dar ka nkǝrɛ, “Aka ndzi ǝni adi butu wɛ, ama aka Hyal sanga su butu.”

28Bitrusu ka yu tǝni apǝri, “Thlaku yar ngyar sanga su ka nu tǝngɛ!”

29Yɛsu sǝnau, “Yi ada nkǝrɛ ala gǝri dzǝri,” “ndɛ adai nam tara ngyar kǝi wala zǝr mama wala nkwaiyir mama wala angǝri, atǝgǝri, madarni, wala fwakǝrni akuya ka yɛ ba ndǝrǝr Hyal nam sǝɗa, 30dzǝ ata ɓui ɗǝruwurni ka kumthlani akwa saka ǝni (kǝi yarɛ, madar mama, nkwaiyir mama, mama yarɛ, madausai ba fwaku yarɛ—ba aka dar, bwanai yarɛ) aka akwa zaman nam ata si dar ata ɓui mpikǝ nam kura kurkuri. 31#Mat 20:16; Luk 13:30Ama ndzǝ nam tangkǝma hang ni dar ata siya ndzai aghǝli, ndzǝ nam aghǝli yarni tsuwɛ dar ani ata sǝngui ndzai nǝr tangkur.”

Yɛsu Ɓakta Ndǝrɛ ata Kǝra Ntǝrni

(Mat 20:17-19; Luk 18:31-34)

32Dar ata whalɛ atǝra lǝti akwa Ursalima. Yɛsu ada mwari akǝma ndzǝr nuwurni, nam tara ghǝi aka sǝr ndati; ndzǝ nam ada nu tǝni aghǝli dar ada hyivǝr. Dzǝ ka ɓakta kǝtǝ ndzǝr nuwɛ yarɛ kum kapu sǝɗǝ ni ata ngwam ka nkǝrɛ sǝ nam ata si 'ya alari. 33Dzǝ nkǝrɛ, “Muri ata lǝkwa Ursalima ani ndɛ ata hamnta Zǝr Ndɛ akwa tsiya nggar fǝrist yarni kaka malǝmǝr mabari yarni. Dar ata thlakǝr alari hakar tsi tǝni ba dar ata hamnta tǝni ala ndzǝ nam kura Yahudi. 34Dar ata zǝla tǝni, ka dar kifǝkǝr nkyǝli alari, ka dar dlaɓwɛ tǝni, ka dar tsi tǝni, ama vǝr makǝr dzǝ ata hyati.”

Barar Yakubu aka Yawhana

(Mat 20:20-28)

35Yakubu aka Yawhana madar zabadi dar ka dangudzi adzǝni dar ka nkǝrɛ alari apǝri, “Malǝm, yar ada bara ka gǝ 'ya ala yar sǝ nam tǝ yar ata yuwɛ adzǝ ngɛ.”

36Dzǝ ka nkǝrɛ ala dar apǝri, “Mi tǝ gǝri ada bara kǝi 'ya ala gǝri?”

37Dar ka sǝnau, “Ngyar ka dukwa yar ndzai tǝbwar tsisǝma gǝ pathlu tǝbwar tsi aghya gǝ, sakatǝ gǝ ada 'ya kuhyikur akwa nggakur ngɛ.”

38 # Luk 12:50 Ma Yɛsu ka nkǝrɛ ala dar apǝri, “Gǝri ta zǝndi sǝ nam tǝ gǝri ada kǝgyǝ ma wɛ, gǝri ata mǝzi sa sǝr sa nam tǝ Yi tara sa ni kǝna? Gǝri ata mǝzi dlutsi bamtizǝma nam tǝ Yi dlutsi ni ya?”

39Dar ka sǝnau, “Yar ata mǝzi 'ya.”

Yɛsu ka nkǝrɛ ala dar, “Sǝr sa nam tǝ Yi ata sa gǝri ata sa, ba dzǝli bamtizǝma nam tǝ Yi dlutsi gǝri yɛ gǝri ata dlutsi. 40Ama ndzai tǝbwar palai tsisǝmawai wala tsi aghyawai ni adi Yi dza ani aka dǝnar gha tǝ Yi awa la gǝri wɛ. Ama Hyal dza ani ata la ndzǝ nam tǝ ndǝ ɗǝmhǝi ala dar.”

41Sakatǝ laka kumɛ nda tara ngati ahani hankalǝr dar baditsǝni hyati ɗǝfa dar ada sǝwa ala Yakubu aka Yawhana. 42#Luk 22:25,26Yɛsu ka kǝga tǝ dar adzǝni, dzǝ ka nkǝrɛ, “Gǝr zǝndi apǝri akwa ntsa ndzǝ nam kura Yahudi ndzǝ ngga-ngga dar nam aka kuhyikur, dar ada tsanǝ dǝna ata kǝra ndzǝr dar, ndzǝ ngganggar dar yɛ ada tsanǝ dǝna ata kǝra ndzǝr dar. 43#Mat 23:11; Mar 9:35; Luk 22:26Adi ahani ala gǝri wɛ. Ata vuiya ǝni, kǝlara ndǝ nam ada bara ka dzǝ ndzai ndǝ nam ngga akwa ntsa gǝri dzǝ ata ndzai zǝr kǝiyir gǝri; 44Tsuwɛ ma ndǝ nam ada bara ka dzǝ ndzai kǝma akwa ntsa gǝri, kǝ ndzai ntsakǝr dzǝ ani ata ndzai faliyir sanga ndɛ. 45Akuya wala Zǝr Ndɛ ta si akuya ka ndǝ dza 'ya alari kǝthlǝr wɛ, ama ka dzǝ dza 'ya kǝthlǝr ala ndzi, ba ka dzǝ hamnta mpikari akuya ka pǝli ndzǝ hang.”

Bartimiyus Ghyang kǝ Wula Su

(Mat 20:29-34; Luk 18:35-43)

46Dar ka si akwa Dzarikau. Sakatǝ Yɛsu ada sǝba akwa mǝlmɛ, vwam kaka ndzǝr nuwurni kaka ndzǝ hang, ghyang laka ada ndzai ata ngwama whalɛ ada kǝgyɛ. Tǝ thlǝmari Bartimiyus (nam ada nkǝrɛ apǝri zǝr Timiyus). 47Sakatǝ dzǝ ngati apǝri, Yɛsu ndǝr Nazarat ada kwatsǝni, dzǝ ka haɓǝtǝ kuɗahari dzǝ ada nkǝrɛ apǝri, “Yɛsu, Zǝr Dauda, 'ya kǝtǝrdzi ala yar!”

48Ndzǝ yar laka ada ntsǝha tǝni, ndzai kǝɗǝk, ama dzǝ ada dzagǝi haɓǝ kuɗahari aka dǝna, ka nkǝrɛ, “Zǝr Dauda, 'ya kǝtǝrdzi ala yar!”

49Yɛsu ka hyati dzǝ ka nkǝrɛ, “Kǝga tǝni!” Dar ka kǝga ghyang ndari, ka nkǝrɛ, “'Ya mwapukur ɗǝfu! Hyati, dzǝ ada kǝga tǝngɛ.” 50Dzǝ ma tǝ dzǝ ngati ahani dzǝ ɗalnta lǝkutǝrni ka hyati bǝtu ka whuiya si adzǝ Yɛsu.

51Yɛsu ka yu tǝni apǝri, “Mi tǝ gǝ ada bara ka Yi 'ya ala gǝ?”

Ghyang ndari ka nkǝrɛ, “Malǝm, Yi ada bara ka Yi wula.”

52Yɛsu ka nkǝrɛ alari apǝri, “Mwara tǝrar ngɛ. Hamnta dzǝrǝr ngɛ kǝ mbǝti tǝngɛ.” Tǝkǝma ntsari mburntadzi tǝ dzǝ ada wula su dzǝ ka nu tǝni akwa whalɛ.

Currently Selected:

Markusu 10: CKL

Highlight

Copy