Mata 19

Ngǝla Mwala

1Sakatǝ Yɛsu tara kurai gha sanga sǝ yarni, dzǝ ka ngyar diyir Galili ka mwari akwa diyir Yahudiya abǝla tǝbwanda kyaghar Urdun. 2Hangkur ndzǝ hang ka nuti tǝni, ba dzǝ ka mbǝti tǝ dar akwanda.

3Ndzǝr Farisi yar laka ka si adzǝni akuya ka nkǝrti tǝni. Dar ka yuwɛ, “Kal-kal ka sal ngǝla mwalarni akuya ka kǝlara su ya?”

4 # Bad 1:27; 5:2 Yɛsu ka sǝnau ala dar, “Gǝr ta kǝratsǝni wɛ apǝri akwa baditsǝni Dzǝ nam ndǝr hǝnti ni dzǝ ‘mǝrti tǝ dar sal aka mwala,’ 5#Bad 2:24ba dzǝ ka nkǝrɛ, ‘Akuya ka ǝni sal ata ngyar atǝgǝri aka angǝri ba ka dar paktsǝnidzi aka mwalarni, ba ndzǝ sǝɗǝ ni ata ndzai dzǝ duku’? 6Ani dar tsu adi ndzǝ sǝɗǝ kǝra wɛ, ama ndǝ duku. Kadǝbar ǝni sǝ nam tǝ Hyal tara paktsǝni atakǝmaduku, ta ndǝ ta ndǝghǝba.”

7 # Mab 24:1-4; Mat 5:31 Dar ka nkǝrɛ alari, “Kami dzá tǝ Musa tara tsau apǝri ka sal la kakadǝr ngǝla ala mwalarni ba ka ndǝ kǝdlǝnta tǝni ka dzǝ tǝra?”

8Yɛsu ka nkǝrɛ ala dar, “Musa yiɗɛ ala gǝri ka gǝri ngǝla mwahyir gǝri kadǝbar ɓaɓalkur ɗǝfa gǝri. Ama akwa baditsǝni adi ahani wɛ. 9#Mat 5:32; 1Kwa 7:10,11Yi ada gha ala gǝri kǝlara ndǝ nam tara ngǝla mwalarni, ma adi akuya ndǝ ɓui tǝni aka pi aka sal laka wɛ, tǝ dzǝ ka kǝtǝ mwala damwa dzǝ ada 'ya badawikur.”

10Ndzǝr nuwurni nkǝrɛ alari, “Ma ǝni ani sǝ nam akwa dabwa ndzaiyir sal aka mwala kudzǝ kura ndǝ awa kǝl mwala.”

11Yɛsu ka sǝnau ala dar, “Adi kǝlara ndɛ ani ata mǝzi ka dlutsi labar ni wɛ, ama ala ndzǝ nam tǝ Hyal tara la dar ɗiɗi. 12Akuya ndzǝ laka dar ntsu kadǝbar ahani tǝ ndǝ ya tǝ dar; ndzǝ laka atar ndzǝ tǝ ndǝ mǝrti tǝ dar ahani; ndzǝ laka dar dza ngǝla kǝl mwala kadǝbar kuhyikur nam atahyal ni. Ndzǝ nam ata mǝzi ka dlutsi ǝni ka dzǝ dlutsi.”

Madausai nam Nkyǝnkyiɗu ni ba Yɛsu

(Mar 10:13-16; Luk 18:15-17)

13Antǝ ndzǝ ka si aka madausai nam nkyǝnkyiɗu ala Yɛsu akuya ka dzǝ pukǝr tsiyari ata kǝra dar ba ka dzǝ 'ya aduwa ala dar, ama ndzǝr nuwurni ka ɗǝmnya ala ndzǝ tara si aka dar.

14Yɛsu ka nkǝrɛ, “Ngyaramɛ ka madausai nam nkyǝnkyiɗu ka dar si adzǝra, ba ta gǝri ta kanti ala dar, akuya Kuhyikur nam atahyal ni nǝr dzǝli ǝni yarni.” 15Sakatǝ dzǝ pukǝr tsiyari ata kǝra dar, dzǝ ka tǝra.

Zǝr Dakwai nam Bǝrba ni

(Mar 10:17-31; Luk 18:18-30)

16Kulini ndǝ laka ka si adzǝ Yɛsu ka yuwɛ apǝri, “Malǝm, sǝr mǝ nam ɗaku ntsakǝr tǝ Yi awa 'ya ka Yi ɓui mpikǝ nam kura kurkuri?”

17Yɛsu ka sǝnau alari, “Ka mǝ tǝ gǝ ada yu tǝra ata kǝra sǝ nam ɗaku? Ndǝ nam ɗaku duku ɗiɗi ani adai. Ma gǝ ada bara ka gǝ ɓui mpikɛ, ka gǝ ɓǝlati tsau yarni.”

18 # Sǝb 20:13; Mab 5:17; Sǝb 20:14; Mab 5:18; Sǝb 20:15; Mab 5:19; Sǝb 20:16; Mab 5:20 Ndǝ ni ka yu tǝni, “Tsau yarɛ madi?”

Yɛsu ka sǝnau, “ ‘Ta gǝ ta tsa ndɛ, ta gǝ ta 'ya badawikur, ta gǝ ta hǝlɛ, ta gǝ ta hamnta sakǝidar hawi, 19#Sǝb 20:12; Mab 5:16; Fǝr 19:18ka gǝ la nggakur ala babar ngɛ aka mamar ngɛ,’ ba ‘ka gǝ yiɗǝ ntǝwhulǝr ngɛ apa kǝrngɛ.’”

20Zǝr dakwai ni ka nkǝrɛ, “Sanga tsau ǝni yarni Yi ɓǝlati. Mǝ damwa tǝ Yi nai tari?”

21Yɛsu ka nkǝrɛ alari, “Ma gǝ ada bara ka gǝ ndzai kal-kal, mwari ka gǝ ɗǝlnta sanga sǝ nam tǝ gǝ akǝri ka gǝ la ndǝ nam ngudi, ba gǝ ata siya ɓui gǝna atahyal. Antǝ ka gǝ siya nu tǝra.”

22Sakatǝ zǝr dakwai ni tara ngati ǝni, dzǝ ka tǝra aka ɗǝfu sǝwa-sǝwa, kadǝbar dzǝ aka gǝna hang.

23Antǝ Yɛsu ka nkǝrɛ ala ndzǝr nuwurni, “Yi ada gha ala gǝri dzǝrkur, ata ndzai dzau ala ndǝ bǝrba ka dzǝ lǝkwa kuhyikur nam atahyal. 24Yi ada gha ala gǝri kadamwa, ata ndzai butu ala dlǝgwam ka dzǝ lǝba ata gulǝr yibǝra ta tǝ ndǝ bǝrba awa lǝkwa kuhyikur Hyal.”

25Sakatǝ ndzǝr nuwurni tara ngati ǝni, dar ka ndatǝdzi aka dǝna ba dar ka yuwɛ, “Wa dzá ata mǝzi mbatǝdzi?”

26Yɛsu ka wular tǝ dar ka nkǝrɛ, “Ala ndǝ kam ǝni adi ata mǝzi ka 'ya wɛ, ama ala Hyal sanga su ata mǝzi ka 'ya.”

27Bitrusu ka nkǝrɛ alari, “Yar ngyar kǝlara su ka nu tǝngɛ! Mǝ dzá tǝ yar ata siya ɓui?”

28 # Mat 25:31; Luk 22:30 Yɛsu ka nkǝrɛ ala dar, “Yi ada gha ala gǝri dzǝrkur, akwa zaman nam bǝlin, sakatǝ Zǝr Ndɛ ni ndzai ata nggakur kuhyikurni, gǝri nam tara nu tǝra gǝri yɛ gǝri ata ndzai ata kǝra kuhyikur yarɛ kum kapu sǝɗɛ, tǝ gǝri ada 'ya haka ala ndzǝli yarɛ nǝr Izǝraila. 29Ba kǝlara ndǝ nam tara ngyar kǝi yarɛ wala madar mama yarɛ kaka nkwaiyir mama yarɛ wala tada wala mama wala madausai wala fwaku yarɛ ata nyarna, ata dlutsi kumthlani ka kumɛ hang ba dzǝ ata ɓui mpikǝ nam kura kurkuri. 30#Mat 20:16; Luk 13:30Ama ndzǝ hang nam kǝma ata ndzai aghǝli, ba ndzǝ nam hang aghǝli ata ndzai akǝma.

Currently Selected:

Mata 19: CKL

Highlight

Copy