Luka 1
1
Sǝ Nam Tara 'ya tǝ Ndǝ Rǝbwa Kakadu ni
1Ndzǝ hang hau dǝna ka rǝbwatsǝni ndǝrɛ ata kǝra sǝ yar nam tara 'yatǝdzi akwa ntsa muri, 2dar rǝbwai sǝ nam tǝ ndzǝ gha ala yar ndzǝ nam tara wula sǝ yarni ntsɛ aka ntsɛ ata baditsǝniyari ba dar nkǝr ndǝrǝr Hyal. 3Kadǝbar ǝni, Yi tǝ kǝrna Yi ghyǝngaba tǝ hankal sanga su ata baditsǝniyari, kǝ ndzai kal-kal alai yɛ ka Yi rǝbwai ala gǝ ata ghalarari, Ndǝ ngga ta sang Tiyafulus. 4Ani ka gǝ zǝndi dzǝrkurǝr ndǝrɛ ata kǝra sǝ yarɛ ni nam tǝ ndǝ tara tsǝlɛ ala gǝ.
Ya Yawhana Ndǝr 'ya Bamtizǝma
5 #
1Sǝt 24:10
Akwa sakatǝ Hirudus ani kuhyir Yahudiya, fǝrist laka adai tǝ thlǝmari Zakariya, nam tǝ dzǝ akwa nyavǝr fǝrist nǝr kulfǝr Abidza, mwalarni tsuwɛ sǝba akwa nyavǝr Haruna, nam tǝ thlǝmari Alisabatu. 6Dar gyapu ndzaiyir dar kal-kal akǝma Hyal, dar ada kǝlǝngkǝr ala sanga tsawur Thlaku yarɛ kal-kal kura aka aibai. 7Ama dar adi aka zǝr wɛ, akuya Alisabatu atsǝr, ba dar gyapu kǝ 'ya bwathlu.
8Vǝr laka sakatǝ albwar Zakariya ani ata nya kǝthlǝr ba dzǝ ani aka 'ya kǝthlǝr nǝr fǝrist akǝma Hyal, 9ndǝ tsarba tǝni, akwa whal nam tǝ fǝrist yarɛ ada 'ya, tǝ dzǝ ani ata lǝkwa fǝr Hyal ka dzǝ mba sǝ sǝwur. 10Ba sakatǝ sakar mba sǝ sǝwur 'ya, sanga hangkur ndzǝ nam abǝla ata kǝra 'ya aduwa.
11Antǝ ndǝr hyantǝr Hyal Thlaku ka tsantǝdzi alari, dzǝ ada hyati tǝbwar tsisǝma muɓwɛ nǝr mba sǝ sǝwur ni. 12Sakatǝ Zakariya tara wula tǝni, dzǝ yakatsǝni hyivǝr ka ngǝzǝ tǝni. 13Ama ndǝr hyantǝr Hyal ni nkǝrɛ alari, “Ta gǝ ta hyivǝr, Zakariya; Hyal ngati aduwar ngɛ. Mwalar ngɛ Alisabatu ata yai ala gǝ zǝr sal, ba gǝ ata vǝti thlǝmari Yawhana. 14Dzǝ ata la gǝ kutsari ba ɗǝfu mwapu, ba ndzǝ hang ata 'ya kutsari akuya ka ya tǝni, 15#Tsǝ 6:3akuya dzǝ ata ndzai ndǝ nam ngga akǝma Thlaku. Dzǝ adi ata sa yimǝr inabi wala sǝr sa nam tara multidzi wɛ, ba dzǝ ata ghǝi aka Mambǝl Kartǝ tǝ dzǝ tsu akwa kuta angǝri. 16Dzǝ ani ata ɓakta si aka ndzǝr Izǝraila hang adzǝ Thlaku Hyalǝr dar. 17#Mal 4:5,6Ba dzǝ ata mwari akǝma Thlaku ni, akwa mambǝlɛ ba dǝna nǝr Iliya, Ka dzǝ si aka hankala ndzǝr ya ata kǝra madar dar, ba dzǝ nam kura ada ngandǝrɛ ka dar nu bǝrkawakur nǝr ndzai kal-kal—ka dzǝ ɓui ndzǝ hang nam tara ɗǝmhǝdzi akuya ka Thlaku ni.”
18Zakariya ka yu ndǝr hyantǝr Hyal ni, “Mǝmi tǝ Yi awa zǝndi apǝri sǝ ǝni ata 'ya? Akuya Yi kǝ hali ba mwalarna Yi sǝm fá.”
19 #
Dan 8:16; 9:21 Ndǝr hyantǝr Hyal ni sǝnau alari, “Yi dza Dzǝbrailu. Yi ada hyati akǝma Hyal, ba ndǝ hya tǝra ka Yi gha ala gǝ, ba ka Yi nkǝrɛ ala gǝ ndǝrǝr Hyal nam sǝɗa ni. 20Antǝ kulini gǝ adi ata mǝzi ka mburti nya ka ndǝrti ndǝr wɛ tar ma vǝr tǝ zǝrǝrni yabadzi, kadǝbar gǝ ta mbǝrsa aka ndǝrǝrna yarɛ, nam ata siya ndzai dzǝri ata sakar dar nam kal-kal wɛ.”
21Antǝ ndzǝ nam abǝla nam ada sǝkǝ Zakariya ni, dar kǝ ndatǝdzi akuya tǝ dzǝ tara sǝkar akwa fǝr Hyal ni. 22Sakatǝ dzǝ sǝba, dzǝ adi ada mǝzi ka ndǝrɛ ala dar wɛ, antǝ dar kǝtǝ apǝri dzǝ wulsu akwa fǝr Hyal ni; akuya dzǝ ada lǝkǝma aka tsan su tǝ tsai ala dar ama dzǝ adi awa mǝzi ka ghaba su wɛ.
23Sakatǝ sakar 'ya kǝthlǝrǝrni kuri, dzǝ hyati ka tǝra livi aharni. 24Aghǝla ǝni mwalarni Alisabatu ka kǝtǝ hur ba dzǝ ka ɗǝwar kǝrni aivi har nǝr hya ntufu. 25Dzǝ ada nkǝrɛ, “Thlaku 'yati alai sǝ ǝni. Akwa vǝr yarɛ ni, dzǝ kǝ tsanti alai ɗakurni ba dzǝ kǝlnta sǝr sǝlai nam ata kǝrawai akwa ntsa ndzi.”
Ndǝrǝr Yabadzǝr Yɛsu Kǝrsti
26Akwa hya nǝr nkwakur nǝr hurǝr Alisabatu, Hyal hyanti ndǝr hyantǝrni Dzǝbrailu alǝkwa Nazarat, mǝlmɛ akwa Galili, 27#Mat 1:18ka dzǝ mwari adzǝ nkwa dabugu laka nam tǝ zǝr dakwai laka tǝ thlǝmari Yusufu tara thlaba, nam tǝ dzǝ sǝba akwa kulfǝr Dauda. Thlǝma zǝr nkwani ani Maryamu. 28Ndǝr hyantǝr Hyal ni ka si adzǝni ka nkǝrɛ alari, “Thlawardzi, gǝ nam tara ɓui maiwakur aka Hyal, Thlaku ni dzǝ adzǝ ngɛ.”
29Ama Maryamu yakatsǝnidzi dzau ata kǝra ndǝr yarɛ ni, dzǝ ka lǝkwa ɗǝnga ata kǝr akwa ɗǝfari apǝri, thlawardzi dzǝli madi ǝni. 30Ama ndǝr hyantǝr Hyal ka nkǝrɛ alari, “Ta gǝ ta hyivǝr Maryamu, akuya gǝ ɓui maiwakur aka Hyal. 31#Mat 1:21Gɛ ata kǝtǝ hur, ba gǝ ata yai zǝr sal, ba gǝ ata vǝti thlǝmari Yɛsu. 32#2Sam 7:12,13,16; Isa 9:7Dzǝ ata ndzai ndǝ nam ngga ba ndɛ ata ká tǝni Zǝr Hyal nam ati ta Sang. Thlaku Hyal ni ata lari dǝgǝl kuhyikur nǝr atǝgǝri Dauda. 33Ba dzǝ ata ndzai kuhyi ata kǝra kyǝiyir Yakubu har kura kurkuri; kuhyikurni dǝntari adi wɛ.”
34Maryamu ka yu ndǝr hyantǝr Hyal ni, “Mǝmi tǝ sǝ ǝni awa 'yati dzi, tǝng tǝ Yi tsu dabuga kura ta zǝndi sal?”
35Ndǝr hyantǝr Hyal ni sǝnau, “Mambǝl Kartǝ ata sǝgǝl ata kǝra gǝ, dǝnar Hyal nam Ati ta sang ata tǝrkǝr sangurai ala gǝ. Kadǝbar ǝni Zǝr nam tǝ gǝ ata ya ni dzǝ hyati adzǝ Hyal ba ndɛ ata ká tǝni Zǝr Hyal. 36Wala Alisabatu nam yarkur ngɛ ni dzǝ ata yai zǝr akwa magyakur, ba dzǝ nam tǝ ndzǝ ada gha alari apǝri dzǝ atsǝr ǝni ani hyarni nǝr nkwakur tǝ dzǝ aka hur. 37#Bad 18:14Akuya sǝ adai nam dzau kura Hyal awa mǝrti wɛ.”
38Antǝ Maryamu ka gha, “Yi nkwar kǝiyir Thlaku, ka dzǝ 'ya alai apani apa tǝ gǝ gha.” Ani ndǝr hyantǝr Hyal ni ka ngyar tǝni.
Maryamu Mwari ka Lǝka Thlawar Alisabatu
39Ata saka nda Maryamu ɗǝmhǝ kǝrni dzǝ ka mwari aka dzala akwa mǝlmɛ nam ati ata gar akwa diyir Yahuda, 40dzǝ ka livi ahar Zakariya dzǝ ka thlawar Alisabatu. 41Sakatǝ Alisabatu tara ngati thlawardzǝr Maryamu, zǝr nam akwa kutari ni ka haɓǝti kǝrni, ba Alisabatu ka ghǝiyatǝdzi aka Mambǝl Kartǝ, 42aka kuɗahɛ nam ngga dzǝ ka nkǝrɛ: “Gǝ ndǝr barka akwa ntsa mwahyi, zǝr nam tǝ gǝ ata ya ni dzǝ zǝr nam aka barka! 43Ama kami tǝ Yi ɓui dzǝli maiwakur ǝni, har tǝ angǝra Thlakǝrna ani ata si adzǝra? 44Tǝng sakatǝ Yi ngati kuɗahǝr thlawardzǝr ngɛ akwa thlǝmawai, zǝr nam akwa kutawai ni haɓǝti kǝrni akuya kutsari. 45Gǝ mwala nam aka barka tǝ gǝ mbǝrsa aka sǝ nam tǝ Thlaku tara gha ala gǝ ata siya ghǝiyabadzi ni.”
Har Hǝmɛ tǝ Maryamu 'Ya
46Ba Maryamu nkǝrɛ:
“Ɗǝfawai ada la nggakur ala Thlaku
47ba mambǝlǝrna ada kutsari akwa Hyal Ndǝr Mbati tǝra,
48 #
1Sam 1:11
akuya dzǝ ɗǝngati
ka wular ndǝ nam nkyiɗu apa Yi nkwar kǝiyirni.
Kǝtǝ ka lǝkǝma sanga ndzi akwa zaman yarɛ ata kǝga tǝra ndǝr barka.
49Akuya Hyal nam Ɓwaltasang mǝrti sǝ yarɛ nam ngga-ngga akuya ka yɛ—
Dzǝ duku ɗiɗi ani Hyal.
50Dzǝ la kǝtǝrdzi ala ndzǝ nam ada hyivǝr tǝni,
zaman ka la zaman.
51Dzǝ kǝ mǝrti kǝthlǝr yarɛ nam ngga-ngga aka tsiyari;
dzǝ kikilnta dzǝ nam ada agula akwa ɗǝngar dar yarɛ
52 #
Ayu 5:11; 12:19 Dzǝ ka kǝlghǝl kuhyi yarɛ nam ngga-ngga ata dǝgǝl kuhyikur dar,
ama dzǝ haɓǝti ndzǝ nam ada tǝrghǝl kǝra dar.
53Ndzǝ nam aka mi dzǝ ghǝiyati tǝ dar aka sǝ yarɛ nam ɗaku,
ama ndzǝr gǝna tsuwɛ dzǝ ka kǝdlǝnta tǝ dar aka tsi ɓǝrtu.
54Dzǝ mbana zǝr kǝiyirni Izǝraila,
dzǝ ada mǝzi ɗǝngati ka tsanti
55 #
Bad 17:7
#
1Sam 2:1-10
ala Ibrahim aka kulfǝrni yarɛ har kura kurkuri,
wala apa tǝ dzǝ gha ala tada muri yarɛ.”
56Maryamu ndzai adzǝ Alisabatu apa nǝr hya makǝr kama dza dzǝgwa tǝra aharni.
Ya Yawhana Ndǝr 'Ya Bamtizǝma
57Akwa sakatǝ yar Alisabatu kǝ 'ya, antǝ dzǝ ka yai zǝr sal. 58Ntǝwhulǝrni kaka yarkur ni yarɛ ngati apǝri Thlaku ni tsanti kǝtǝrdzi nam ngga alari, ba dar ka 'ya kutsari kaka dza.
59 #
Fǝr 12:3
Sakatǝ zǝr ni kǝ 'ya vǝr ntsisu dar si ka thlakatsa alari, ba dar ada bara vǝti thlǝmari Zakariya tsu apa thlǝma atǝgǝri, 60ama angǝri hau nya ka nkǝr apǝri, “A'á! Ndɛ ata kǝga tǝni aka Yawhana.”
61Dar ka nkǝrɛ alari, “Ndɛ akwa ntsa ndzǝr gǝri aka thlǝm ǝni adi wɛ.”
62Antǝ dar ka ɓakǝ tsai ala atǝgǝri, ka dar zǝndi thlǝm nam tǝ dzǝ ada bara ka ndǝ vǝti ala zǝrǝrni. 63Dzǝ ka yu sǝr rǝbwa, antǝ dzǝ ka rǝbwai “Thlǝmari Yawhana.” Antǝ sanga dar ka ndatǝdzi. 64Tǝkǝma nya Zakariya ka mburntadzi, antǝ kanyarari ka mpǝlntadzi dzǝ ka baditsǝni ndǝrɛ ka lǝkǝma aka hǝm Hyal. 65Antǝ sanga ntǝwhulǝrni yarɛ nam akwanda hyivǝr ngǝtǝ tǝ dar, ba ndǝrɛ ata kǝra sǝ yarni ka kikilntadzi akwa sanga kuta mǝlmɛ nam ati ata gar akwa diyir Yahudiya; 66kǝlara ndǝ nam tara ngati sǝ ǝni dar ndatǝdzi kari, tǝ dar ada yuwɛ apǝri, “Zǝr ni dzǝ ata siya ndzai mǝrɛ?” Akuya tǝ tsiya Thlaku ni ata kǝrari.
Ha tǝ Zakariya 'ya
67Zakariya, atǝgǝra Yawhana ghǝi aka Mambǝl Kartǝ, ba dzǝ ka 'ya nabikur:
68“Hǝmɛ kǝ ndzai ala Thlaku, Hyalǝr Izǝraila,
kadǝbar tǝ dzǝ tara si ka pǝli ndzǝrni.
69Dzǝ kǝ la muri Ndǝr Mbati nam ngga,
akwa dǝrǝr zǝr kǝiyirni Dauda
70(apa tǝ dzǝ tara 'ya alkawal atar nabiyirni yarɛ akwa zaman watsi),
71mbatǝdzi akwa tsiya dawar muri yarɛ
ba akwa tsiya sanga ndzǝ nam tara ngǝla tǝ muri—
72ka dzǝ tsanti kǝtǝrdzi ala tada muri yarɛ
ba ka dzǝ ɗǝngati sǝrni nam mbwa-mbwa,
73mbǝr ni tǝ dzǝ tara 'ya ala Ibrahim nam tada muri:
74ka mbuli tǝ muri akwa tsiya dawar muri yarɛ,
ba ka dzǝ mǝrti tǝ muri ka 'ya kǝthlǝr alari kura aka hyivǝr,
75akwa kartǝkur ba kalkalkur akǝmari akwa sanga vǝr yarɛ nam tǝ muri akǝr.
76 #
Mal 3:1
“Ba gǝ, zǝrna, ndɛ ata kǝga tǝngɛ nabiyir Hyal nam Ati ta Sang;
akuya gǝ ata mwari kǝma ta Thlaku ni akuya dzǝguti whalɛ alari,
77ka nkǝrnta ala ndzǝrni whalǝr zǝndi ɓui mbatǝdzi
atar kyifǝnta bikǝr dar yarɛ,
78kadǝbar hangkur kǝtǝrdzǝr Hyalǝr muri,
nam atarni tǝ sǝtǝr tsǝtsǝr mbatǝdzi ata si atahyal ka ɓui tǝ muri
79 #
Isa 9:2
ka mbǝli ata kǝra ndzǝ nam ada ndzai akwa kuthlɛ
ba akwi sanguraiyir nti,
ka dzǝ ɓǝla thlǝla muri akwa whalǝr ndzaiyir lapiyakur.”
80Yawhana kǝlí ka ndzai aka dǝna akwa mambǝlɛ; ba dzǝ ka ndzai akwa ntaku, har vǝr nam tǝ dzǝ tsantǝdzi ata babal ala ndzǝr Izǝraila.
Currently Selected:
Luka 1: CKL
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
