Yawhana 9
9
Yɛsu Mbǝti Ndǝ tǝ Ndǝ Ya Tǝni ghyang
1Vǝr laka Yɛsu ada kwatsǝni ani dzǝ ka wula ndǝ laka tǝ ndǝ yai tǝni ghyang. 2Ndzǝr nuwurni ka yu tǝni, “Malǝm, wa dzǝ ani tara 'ya biku tǝ ndǝ yai ndǝ ni ghyang, dzǝ kǝna ndzǝr yarni?”
3Yɛsu sǝnau ka nkǝrɛ, “Adi ndǝ ni wala ndzǝr yarni dza 'ya biku wɛ, ama ka ndǝ tsanti kǝthlǝr Hyal akwa ndziyirni. 4Pakat dzá, ka muri 'ya kǝthlǝr ndǝ nam tara hyanti tǝra tǝ tsǝtsi tsu adai. Vǝri ata si kura ndǝr 'yati kǝthlǝr adai. 5#Mat 5:14; Yaw 8:12Sakatǝ Yi akwa dunya Yi dza parakǝr dunya.”
6Tǝ dzǝ tara nkǝrba ahani ani ba dzǝ ka kyǝfi nkyǝli ata dai, dzǝ ka hǝrti hai, dzǝ ka fati ata ntsa ndǝ ndari. 7Dzǝ ka nkǝrɛ alari, “Mwar kǝtsǝnta akwa kufar Silaum” (thlǝm ǝni ada nkǝrɛ Hyanti). Kadǝbar ǝni dzǝ mwar ka kǝtsǝnta, dzǝ ka ɓitasi tǝ dzǝ ada wuti su.
8Ntǝwhulǝrni kaka ndzǝ nam tara tsǝli wula tǝni watsi tǝ dzǝ ada kǝgyɛ, dar ka yuwɛ, “Adi ndǝ ni ani ada ndzai ka kǝgyǝ ni wɛ?” 9Ndzǝ yar laka ka nkǝrɛ, “Ani dza tǝm.”
Ndzǝ yar laka ka nkǝrɛ, “A'a, dar pa diyɛ.”
Ama ndǝ nam ghyang watsi ni gha, “Ani yɛ!”
10Antǝ dar ka nkǝrɛ alari, “Mǝmi tǝ ntsa gǝ tara mburntadzi?”
11Dzǝ ka sǝnau, “Ndǝ tǝ ndɛ ada kǝga tǝ Yɛsu ani tara hǝrti hai ka fati ata ntsawai, dzǝ ka nkǝrɛ alai mwari akwa silaum ka gǝ kǝtsǝnta. Yi ka mwar ka kǝtsǝnta ani Yi ka ɓui wula su.”
12Dar ka yu tǝni, “Ama dza?”
Dzǝ ka sǝnau, “Yi ta zǝndi wɛ.”
Ndzǝr Farisi Yihǝ Whal Nam tǝ Ndǝ Mbǝti Ndǝ Ghyang ni
13Antǝ dar ka mwari aka dza ala ndzǝr farisi ndǝ nam tǝ dzǝ ghyang watsi ni. 14Yau, vǝr nam tǝ Yɛsu hǝrti hai ka mburnta ntsa ndǝ ni ata vǝr Sǝbdu. 15Kadǝbar ǝni, ndzǝr farisi ma ka yu tǝni mǝmi tǝ dzǝ ɓui wuti su. Dzǝ ka gha ala dar, “Dzǝ fati hai hǝrhǝri ata ntsawai. Yi kǝtsǝnta, Yi ka ɓui wuti su.”
16Kadǝbar ǝni, ndǝr Farisi yar laka ka nkǝrɛ, “Ndǝ ǝni dzǝ ta hyati adzǝ Hyal wɛ, kadǝbar dzǝ adi ada ɓǝlati Vǝr Sǝbdu wɛ!”
Ama ndzǝ yar laka yuwɛ, “Mǝmi tǝ ndǝr biku awa mǝzi 'yati parsu nǝr ndatǝdzi yarɛ apani?” Ani ndǝghǝ nya ka lǝkwa ɓwanga dar.
17Antǝ dar ka ɓǝla yu ghyang ndari, “Gǝ dza tǝ dzǝ mburnta ala gǝ ntsɛ, yau, mǝ tǝ gǝ gha ata kǝrari?”
Ndǝ ǝnari ka sǝnau, “Dzǝ nabi.”
18Ndzǝr Yahudi ta mbǝrsa apǝri dzǝ ghyang watsi tǝ dzǝ ɓui wuti su wɛ, har tǝ dar ka kǝga ndzǝr yar ndǝ nam tǝ ndǝ mburnta alari ntsǝ ndari. 19Dar ka yu tǝ dar, “Əni zǝr gǝri ya? Gǝri ada nkǝrɛ apǝri ndǝ yai tǝni ghyang? Yau, mǝmi tǝ dzǝ ada wula su kulini?”
20Ndzǝr yarni ka sǝnau, “Yar kǝ zǝndi apǝri ǝni zǝr yar, ba yar zǝndi ndǝ yai tǝni ghyang. 21Ama whal nam tǝ dzǝ ada wula su kulini, wala ndǝ nam tara mburnta ntsari, yar ta zǝndi wɛ. Yuwamɛ tǝni; ai dzǝ adi waza wɛ, dzǝ ata mǝzi ka kalaktsǝni tǝ kǝrni.” 22Ndzǝr yarni dar gha apani ni akuya ka hyivǝr ndzǝr Yahudi, kadǝbar ka ndzǝr Yahudi kurtaka mbwai apǝri, kǝlara ndǝ nam tara gha apǝri Yɛsu dza Kǝrsti, ndɛ ata kǝlba tǝni akwa fǝr vǝkǝr sǝlai ala Hyal. 23Ani sǝ nam tara 'ya tǝ ndzǝr yarni tara nkǝrɛ apǝri, “Ai, dza adi waza wɛ, yuwɛ mɛ tǝni ǝnari.”
24Antǝ dar ka ɓǝla kǝga ndǝ ni nam ghyang watsi ni, ka nkǝrɛ alari, “Kǝtǝ alkawal akǝma Hyal ka gǝ gha dzǝri! Yar zǝndi apǝri ndǝ ni dzǝ ndǝr biku.”
25Dzǝ ka sǝnau, “Wala dzǝ ndǝr biku ma Yi ta zǝndi wɛ. Su duku nam tǝ Yi zǝndi: ani watsi Yi ghyang, ama kulini Yi ada wuti su.”
26Antǝ dar ka yu tǝni, “Sǝr mi tǝ dzǝ 'ya ala gɛ? Mǝmi tǝ dzǝ mburnta ala gǝ ntsɛ?”
27Dzǝ sǝnau ala dar, “Yi kurtaka gha ala gǝri, gǝri ta ngati wɛ. Kami tǝ gǝri ada bara ka Yi ɓǝla gha ala gǝri? Kǝna gǝr ma gǝri ada bara ka gǝri ndzai ndzǝr nuwurni ya?”
28Antǝ dar ka ɗǝkǝr alari tǝ ngǝngǝlɛ, dar ka gha, “Gǝ dza ndǝr nuwurni, ama yar ndzǝr nuwur Musa! 29Yar kurtaka zǝndi apǝri Hyal ndǝrɛ aka Musa, ama ndǝ ni yar ta zǝndi vui nam tǝ dzǝ hyati akwa wɛ.”
30Antǝ ndǝ ǝnari ka sǝnau ala dar, “Əni sǝr ndati! Nda dzǝ mburnta ntsawai, ama gǝri ta zǝndi vui nam tǝ dzǝ hyati akwa wɛ! 31Yar zǝndi Hyal adi ada si thlǝmɛ ala ndzǝr biku wɛ; ama kǝlara ndǝ nam ada vǝkǝr sǝlai alari, tǝ dzǝ ada 'yati sǝ nam tǝ dzǝ ada bara, Hyal ada si thlǝmɛ alari. 32Ata tǝ ndǝ vi dunya ndǝ ata saga ngati ndǝ laka tara mburnta ntsa ndǝ nam tǝ ndǝ ya tǝni ghyang wɛ. 33Ma apǝri ndǝ ni adi adzǝ Hyal tǝ dzǝ sǝba wɛ, sǝ tǝ dzǝ awa mǝzi ka mǝrti adi wɛ.”
34Dar ka sǝnau alari, “Gǝ nam tǝ ndǝ yai akwa biku pǝlǝk ani tǝ gǝ awa tsǝlɛ ala yar su?” Antǝ dar ka kǝdlǝba tǝni.
Ghyangkur Nǝr Mambǝlɛ
35Yɛsu ngati apǝri dar kǝdlǝba tǝni. Sakatǝ dzǝ ɓui tǝni, dzǝ nkǝrɛ alari, “Gǝ mbǝrsa akwa Zǝr Ndɛ ni ya?”
36Ndǝ ǝnari sǝnau ka nkǝrɛ, “Dza ani warɛ, thlaku? Gha alai kasa ka Yi mbǝrsa akwa dza.”
37Yɛsu nkǝrɛ alari, “Ai, gǝ wula tǝni, dzǝ ma ani ada ndǝrɛ aka gɛ.”
38Dzǝ ka nkǝrɛ, “Thlaku, Yi mbǝrsa.” Ba dzǝ ka vǝkǝr sǝlai alari.
39Yɛsu ka nkǝrɛ alari, “Yi lǝkwa dunya ni akuya ka Yi 'ya haka, kadǝbar ǝni, ndzǝ nam ghyang dar ata wula su, ndzǝ nam ada wula su dar ata 'ya ghyang.”
40Tǝ ndzǝr Farisi yar nam vwam kaka dza tara ngati tǝ dzǝ ada gha su ahani, dar ka nkǝrɛ, “Kasa yar ma yar ghyang ya?”
41Yɛsu ka nkǝrɛ ala dar, “Ai, ma apǝri gǝr ghyang, gǝri adi aka biku wɛ. Ama kadǝbar tǝ gǝri nkǝrɛ apǝri gǝri ada wula su, yau, bikǝr gǝri kǝ ndzai.”
Currently Selected:
Yawhana 9: CKL
Highlight
Share
Copy
Want to have your highlights saved across all your devices? Sign up or sign in
©2023 Seed Company in collaboration with Language Developers and Bible Translators Association
