Yawhana 19

Ndǝ Thlanta Hakar Kukwanta ala Yɛsu

1Antǝ Pǝlatus hau ka ndǝ tǝra aka Yɛsu ka ndǝ lar kwangyang. 2Antǝ saudza ka 'yati darar ntsǝkǝɗa, ka ntsakur ata kǝrari. Dar ka hadzɛ alari lǝkutu apa yimǝr galura. 3Dar ada si-si adzǝni, tǝ dar ada nkǝrɛ alari, “Tǝ barkar ngɛ, kuhyir ndzǝr Yahudi!” Ba dar tsa tǝni akwa kǝma.

4Pǝlatus ka ɓǝla sǝba ka nkǝrɛ ala ndzǝr Yahudi, “Nda gǝri dza, Yi ada sǝba aka dza ala gǝri, ka gǝri zǝndi apǝri Yi ta ɓui tǝni aka biku laka wɛ.” 5Ani Yɛsu ka sǝba, akǝr ata dzari darar ntsǝkǝɗa ba lǝkutu nam apa yimǝr galura. Pǝlatus ka nkǝrɛ ala dar, “Yau, ndza mɛ ndǝ ǝnari!”

6Sakatǝ nggar fǝrist yarni kaka ndzǝr ɓǝla fǝr vǝkǝr sǝlai ala Hyal tǝ dar wula tǝni, dar ka puti lǝlɛ tǝ dar ada nkǝrɛ, “Ka ndǝ kukwanta tǝni! Ka ndǝ kukwanta tǝni!”

Pǝlatus ka nkǝrɛ ala dar, “Tǝramɛ aka dza ka gǝri kukwanta tǝni gǝr tǝ kǝr gǝri. Yi dza Yi ta ɓui tǝni aka biku laka wɛ.”

7Ndzǝr Yahudi ka sǝnau alari ka nkǝrɛ, “Ai, yar aka mabari, ba apa tǝ mabari ni gha si ma dzǝ nti, kadǝbar dzǝ mǝrti kǝrni apǝri dzǝ Zǝr Hyal.”

8Sakatǝ Pǝlatus tara ngati ǝni, dzǝ ka dzakti hyivǝr. 9Dzǝ ɓǝla livi akwa kuta kǝi, dzǝ ka yu Yɛsu, “Gǝ hyati akwa madi?” Ama Yɛsu ta ndǝrɛ alari wɛ. 10Ani Pǝlatus ka nkǝrɛ alari, “Gǝ adi ata ndǝrɛ alai wɛ? Gǝ ta zǝndi apǝri Yi dza aka wada nǝr sǝntá tǝngɛ, wala kukwanta tǝngɛ wɛ?”

11Yɛsu sǝnau, “Gǝ adi aka wada ata kǝrawai wɛ, ma ndǝ ata la gǝ atahyal wɛ. Kadǝbar ǝni ndǝ nam tara ngǝti tǝra ala gɛ bikǝrni dza hang.”

12Antǝ Pǝlatus bara whal nam tǝ dzǝ awa sǝntá Yɛsu, ama ndzǝr Yahudi tsu ada pu lǝlɛ tǝ dar ada nkǝrɛ, “Ma gǝ sǝntá ndǝ ni, gǝ adi pazǝr Kaisar wɛ. Kǝlara ndǝ nam tara mǝrti kǝrni kuhyi, dzǝ dawar Kaisar.”

13Sakatǝ Pǝlatus tara ngati labar ni, dzǝ ka sǝba aka Yɛsu, dzǝ ka ndzai ata kudzaliyir 'ya hakarni ata Vui nam tǝ ndǝ Ɓuti tǝ Paya (akwa nyar Yahudi ndǝ ada ka tǝ Gabathla). 14Vǝr ndari vǝrǝr ɗǝmhǝdzi ka Wudzǝr Ngǝmba, apa tsǝtsi talangkǝr. Dzǝ ka nkǝrɛ ala ndzǝr Yahudi, “Ndamɛ kuhyir gǝri!”

15Ama dar ka puti lǝlɛ ada nkǝrɛ, “Kǝtamɛ tǝni atǝra! Kǝtamɛ tǝni atǝra! Ka ndǝ kukwanta tǝni!”

Pǝlatus yu tǝ dar, “Ka Yi kukwanta kuhyir gǝri?”

Nggar fǝrist yarni ka sǝnau, Yar adi aka kuhyi damwa wɛ ama Kaisar.

16Antǝ Pǝlatus hamnta Yɛsu ala dar ka dar kukwanta tǝni. Ani dar kǝtǝ Yɛsu atǝra.

Ndǝ Kukwanta Yɛsu

(Mat 27:32-44; Mar 15:21-32; Luk 23:26-43)

17Yɛsu ada kǝl undzum kadlǝkadlǝrni, dzǝ lǝba akwa “Vuiyir hahaiyir kǝr” (akwa nyar Yahudi ndɛ ada ka tǝ Gwalgwathla.) 18Akwanda tǝ dar kukwanta tǝni, ba dar kukwanta dzǝ laka sǝɗɛ kaka dza pathlu tǝbwa ǝni pathlu tǝbwa ǝni, Yɛsu akwa ɓwanga dar.

19Pǝlatus rǝbwai sǝr ɗǝnga laka, dzǝ ka kukwai tǝni ata undzum kadlǝkadlǝr Yɛsu. Sǝ nam tǝ ndǝ rǝbwai dza ani: YƐSU NDƏR NAZARAT, KUHYIR NDZƏR YAHUDI NI. 20Ndzǝr Yahudi hang kǝratsǝni sǝr ɗǝnga ǝni, akuya vui nam tǝ ndǝ kukwanta Yɛsu kudzǝghɛ adzǝ mǝlmɛ nam ngga#19:20 Ndǝ kukwanta Yɛsu kudzǝghɛ adzǝ Ursalima., ba akuya ndǝ rǝbwari akwa nyar Yahudi, Rauma, ba Gǝriku. 21Nggar fǝrist yarni nkǝrɛ ala Pǝlatus, “Ta gǝ ta rǝbwa ‘Kuhyir Ndzǝr Yahudi,’ ama ka gǝ rǝbwai apǝri, ‘Ndǝ ǝni nkǝrɛ apǝri dzǝ ani kuhyir Yahudi.’ ”

22Pǝlatus sǝnau, “Sǝ nam tǝ Yi rǝbwai, Yi rǝbwai.”

23Aghǝla tǝ saudza yarɛ ni tara kukwanta Yɛsu, dar ka fati kariyirni, ba dar ka ndǝghǝi aka bwa fwaɗu, kǝlara saudza kǝtǝ kǝrtǝ pathlu, ba lǝkutu nǝr ha akur ni mbi. Lǝkutu ni tsuwɛ ngiɓwɛ adi ati wɛ, ndǝ tsakati tǝni atakǝmaduku.

24 # Zab 22:18 Antǝ dar ka nkǝrɛ ala kǝma dar, “Ta muri ta thlǝkwanta tǝni, ngyar ka muri dza nǝbwa ani ka mur wula ndǝ nam ata sǝnya tǝni.” Əni 'ya akuya ka ndǝ ghǝiyaba Labar Hyal apǝri,

“Dar ndǝghǝi kariyirna akwa ɓwanga dar,

lǝkutǝrna tsuwɛ dar ka dza nǝbwa ata kǝr.”

Əni ani sǝ nam tǝ saudza yarni 'ya.

25Kudzǝghɛ adzǝ undzum kadlǝkadlǝr Yɛsu, angǝri aka kwanyangǝri, Maryamu mwalar Kǝlaupas, ba tsuwɛ Maryamu Magǝdaliya, dar ada hyati. 26Sakatǝ Yɛsu tara wula angǝri ba ndǝr nuwurni nam tǝ dzǝ yiɗɛ dar ada hyati kudzǝghɛ, dzǝ ka nkǝrɛ ala angǝri, “Ma, nda zǝr ngɛ!” 27Antǝ Dzǝ nkǝrɛ ala ndǝr nuwurni nda, “Mwala ni ani mamar ngɛ kulini!” Ngǝzi ata saka ǝnda, ndǝr nuwurni ka kǝtǝ tǝni alivi aharni.

Ntǝr Yɛsu

(Mat 27:45-46; Mar 15:33-41; Luk 23:44-49)

28 # Zab 69:21; 22:15 Aghǝla apani, Yɛsu zǝndi apǝri sanga su kurta kuri, ani ka Labar Hyal ghǝiyabadzi, Yɛsu ka nkǝrɛ, “Yi ada nga thlǝlai.” 29Mpǝla laka adai ghǝi-ghǝi aka yimǝr inabi nam mwamwasu ada vi akwanda. Antǝ dar ka lǝɓǝti sausau akwa yimi mwamwasu ndari, dar ka hati ata zuwa ka haɓǝti alari ka dzǝ sa. 30Sakatǝ Yɛsu tara ɗar yimi mwamwasu ndari Dzǝ ka nkǝrɛ, “Kǝ kuri!” Dzǝ nganyi kǝrari ka hamnta mpikari.

31Yau, vǝr ndari vǝr Ɗǝmhǝdzi, ba sǝbar arpɛ ani vǝr tsartsari nǝr vǝr Sǝbdu. Kadǝbar ndzǝr Yahudi adi ada bara ka ndǝ ngyar dza ndzǝ yar ndari ati ata undzum kadlǝkadlɛ akwa Sǝbdu ndari wɛ, dar yu Pǝlatus ka dar ɓǝgǝlnta thlǝla dar ba ka dar faghǝl tǝ dar. 32Ani saudza ka si ka ɓǝgǝlu thlǝla ndzǝ sǝɗǝ nam tǝ ndǝ kukwanta kaka Yɛsu. 33Ama sakatǝ dar si ata kǝra Yɛsu, dar wula apǝri Dzǝ kurta nti, ani dar ta ɓǝgǝl thlǝlari wɛ. 34Pathlu akwa ntsa saudza yarni ka ntsavui tǝni aka mwasi ata ghyimbiyari, kura aka santa saka ani masi aka yimi ada whui. 35Ndǝ nam tara wulari dzǝ ani tara hamnta sakǝida, sakǝidarni dzǝri. Dzǝ zǝndi apǝri dzǝri tǝ dzǝ gha, ba dzǝ ka sakǝidatsǝni ani ka gǝr ma ka gǝr mbǝrsa. 36#Sǝb 12:46; Tsǝ 9:12; Zab 34:20Sǝ ǝni 'ya ka ndǝ ghǝiyaba Labar Hyal apǝri,

“Ɗahyirni tsuwɛ wala duku ma ndɛ adi ata ɓǝlu wɛ.”

37 # Zak 12:10; Wul 1:7 Ba dar ka ghǝiyaba Labar Hyal apǝri,

“Dar ata wula ndǝ nam tǝ dar tara ntsavui.”

Har Yɛsu

(Mat 27:57-61; Mar 15:42-47; Luk 23:50-56)

38Aghǝla ǝni, Yusufu ndǝr Armathliya, dzǝ yu whalɛ adzǝ Pǝlatus, ka dzǝ kǝtǝ saiyir Yɛsu. (Yau, Yusufu dzǝ ndǝr nu Yɛsu, ama ɗǝwa-ɗǝwa kadǝbar hyivǝr ndzǝr Yahudi.) Pǝlatus lar whalɛ, ba dzǝ ka si ka kǝtǝ saiyari. 39#Yaw 3:1,2Nikadimus, ndǝ nam tara mwari kǝma-kǝma adzǝ Yɛsu avǝrvǝri nda, dar aka Yusufu ani tara mwari. Nikadimus si aka mǝr#19:39 Wul kakadǝr Mata 2:11. tǝ dzǝ gwazǝti aka fu tǝ ndɛ ada ka tǝ al'ul, kǝgǝɓǝkurni hang ta ngal kilau makǝr thlani. 40Antǝ dar ka kǝtǝ saiyir Yɛsu ka baru akwa baktar lilǝng kaka sǝ sǝwur nam sǝɗa nda, apa tǝ ndzǝr Yahudi ada 'ya ata kǝra har ndɛ. 41Akwa vui nam tǝ ndǝ kukwanta Yɛsu fwaku laka adai, adzǝ fwaku ndari kul bǝlin adai, nam kura ndǝ ta saga vǝ ndɛ akwa. 42Kadǝbar ka ani vǝr ɗǝmhǝdzǝr ndzǝr Yahudi, ba tǝng tǝ kulari kudzǝghɛ, dar ka hau Yɛsu akwa.

Currently Selected:

Yawhana 19: CKL

Highlight

Copy