'Ya Su 9

Tubiyir Sawulu

1Ata saka ǝni, Sawulu ada 'ya kulɗakurni ala ndzǝr nu Thlaku, ba dzǝ aka ɗǝnga ka dzǝ kurnta tǝ dar. Ani dzǝ mwari adzǝ kuhyir fǝrist ni 2ka yu kakadu adzǝni nǝr mwari akwa fǝr vǝkǝr sǝlai akwa Damaskus, ani ka ma dzǝ ɓui kǝlara ndɛ akwanda ndzǝ nam akwa Whalǝr Yɛsu, wala ndzǝ sǝli wala mwahyi, dzǝ ata kǝtǝ tǝ dar apa ndzǝr fǝrsǝna akwa Ursalima. 3Apa tǝ Sawulu si kudzǝghɛ adzǝ mǝlmǝ nam ngga nǝr Damaskus, tǝkǝma paraku atahyal mbǝlkǝrdzi ata kǝrari. 4Dzǝ dla ata dai ba dzǝ ngati kuɗahu ada nkǝrɛ alari, “Sawulu, Sawulu, kami tǝ gǝ ada 'ya kulɗakur alai?”

5Sawulu yuwɛ, “Gǝ warɛ, Thlaku?”

Dzǝ sǝnau, “Yi ani Yɛsu, nam tǝ gǝ ada 'ya kulɗakur alari ni. 6Kulini hyati ka gǝ mwari alǝkwa mǝlmɛ, ba ndɛ ata nkǝrɛ ala ngɛ sǝ nam tǝ gǝ ata 'ya.”

7Ndzǝ nam ada mwari kaka Sawulu ni dar hyati akwanda kura ndǝrti ndǝrɛ; akuya dar ngati kuɗahǝ ama dar ata wula waima wɛ. 8Sawulu hyati ata dai, ama sakatǝ dzǝ mburnta ntsari, dzǝ adi ada wula su wɛ. Ani dar ngǝzi tsiyari ka dǝr tǝni alǝkwa Damaskus. 9Akuya vǝrari makǝr dzǝ adi ada wula su wɛ, ba dzǝ adi ada sǝmɛ wala sa su wɛ.

10Akwa Damaskus ndǝr nu laka adai tǝ thlǝmari Hananiya. Thlaku kǝga tǝni akwa sǝni, “Hananiya!”

Dzǝ ka sǝnau, “Wai, Thlaku!”

11Thlaku ka nkǝrɛ alari, “Mwari akwa Whal nam Daɗu, ba akwa kǝiyir Yahuda, ka gǝ yu ndǝ laka Sawulu ndǝr diyir Tarsus, akuya dzǝ ada 'ya aduwa. 12Akwa sǝni dzǝ wula ndǝ laka tǝ thlǝmari Hananiya si ka pukǝr tsiyari ata kǝrari ani ka dzǝ wula kadamwa.”

13Hananiya ka sǝnau, “Thlaku, ndzǝ hang nkǝrɛ alai ata kǝra ndǝ ni ba ata kǝra sanga sǝ nam kulɗa tǝ dzǝ 'yati ala ndzǝr ngɛ akwa Ursalima. 14Ba dzǝ si akwa Damaskus aka wada adzǝ nggar fǝrist yarni ka dzǝ ngǝti sanga ndzǝ nam tara vǝkǝr sǝlai ala ngɛ.”

15Ama Thlaku nkǝrɛ ala Hananiya, “Mwari, kadǝbar Yi tsarba tǝni ka dzǝ kǝthlǝr Alai, ba ka mǝrti ndzǝ kura Yahudi ba kuhyi yarɛ ba ndzǝr Izǝraila ka dar zǝndi thlǝmawai. 16Yi ata tsanti alari hangkur bwanai nam tǝ dzǝ ata ɗar ka thlǝmawai.”

17Antǝ Hananiya mwari akwa kǝi nda ka livi. Dzǝ ka pukǝr tsiyari ata kǝra Sawulu, dzǝ nkǝrɛ, “Sawulu zǝr mama, Thlaku Yɛsu, nam tara tsantǝdzi ala ngɛ ata whalɛ sakatǝ gǝ ada si akwani, dzǝ hyanti tǝra ani ka gǝ wulɛ kadamwa ba ka gǝ ghǝi aka Mambǝl Kartǝ.” 18Tǝkǝma, sǝ laka apa kyaɓǝkɛ pughǝldzi ata ntsa Sawulu, ba dzǝ ada mǝzi wula su kadamwa. Dzǝ hyati ndǝ ka 'ya alari bamtizǝma, 19ba aghǝla tǝ dzǝ sǝm sǝr sǝmɛ, dzǝ ɓui dǝna.

Sawulu akwa Damaskus ba Ursalima

Sawulu ndzai nǝr vǝr yar laka kaka ndzǝr nuwɛ akwa Damaskus. 20Ba kura aka santa saka, dzǝ baditsǝni nkǝr labar akwa fǝr vǝkǝr sǝlaiyir ndzǝr Yahudi yarɛ apǝri Yɛsu dzǝ dza Zǝr Hyal. 21Sanga ndǝ nam tara ngati tǝni ka ndatǝdzi ka yuwɛ, “Əni adi ani ndǝ nam akwa Ursalima ada dlǝnta ndzǝr nu Yɛsu ni wɛ? Ba dzǝ ta si akwani ka dzǝ fati tǝ dar ka mwari aka dar ala nggar fǝrist yarni, ka ndǝ pu tǝ dar akwa fǝrsǝna wɛ?” 22Ama nkǝr labarǝr Sawulu ada dzakdzakǝi aka dǝna, ba ndzǝr Yahudi nam akwa Damaskus, dar ta mǝzi ngǝla tsanǝbarni apǝri Yɛsu ani Kǝrsti ni.

23 # 2Kwa 11:32,33 Aghǝla saka laka, laka ndzǝr Yahudi ada mbwai nya atakǝmaduku ka dar tsi tǝni. 24Dar ada wul tǝni tsǝtsi aka vǝri akwa nyavǝr mǝlmɛ nda ani ka dar tsi tǝni, ama ndǝ nkǝrɛ ala Sawulu ata kǝra mbwai nyar dar. 25Ama avǝrvǝri, ndzǝr nu laka yarɛ haghǝl tǝni akwa wulna nam ngga ata gulɛ nam ata dza garuwur mǝlmari.

26Sakatǝ Sawulu tara si akwa Ursalima, dzǝ bara ka dzǝ kǝɓai kaka ndzǝr nuwɛ, ama dar ada hyivǝr tǝni. Dar ta mbǝrsa apǝri dzǝri dzǝ 'ya ndǝr nuwɛ! 27Antǝ Barnabas ka si aka dza ala ndzǝr hya yarɛ; ka nkǝrɛ ala dar whal nam tǝ Sawulu akwa buraburá ni tara wula Thlaku, ba nam tǝ Thlaku ndǝrɛ alari, ba whal nam akwa Damaskus tǝ dzǝ nkǝr labar kura hyivǝr akwa thlǝma Yɛsu. 28Ani Sawulu ndzai kaka dar ba nuɗɛ akwa Ursalima, dzǝ ada ndǝr aka dǝna akwa thlǝma Thlaku. 29Dza ada ɓwalnya kaka ndzǝr Yahudi nam ada labar aka nyar Gǝriku, ani dar ada bara ka dar tsi tǝni. 30Sakatǝ ndzǝ nam aka mbǝrsa tara ngati ata kǝra ǝni, dar kǝtǝ tǝni alǝkwa Kaisariya ba hyanti tǝni alǝkwa Tarsus.

31Antǝ ikǝlizǝya nam akwa Yahudiya, Galili, ba Samariya ka nga sǝɗa akwa saka ndzai lapiya. Ikǝlizǝya ɓui dǝna ba dǝnautsǝnidzi aka Mambǝl Kartǝ, ada kǝlí aka hangkur, ka ndzai akwa hyivǝr Thlaku.

Bitrusu Mbǝti Iniyasu ba Daukas

32Saka laka Bitrusu ada mwari akwa vui pam-pam, antǝ dzǝ si adzǝ ndzǝr Hyal akwa mǝlmǝr Lida. 33Akwanda dzǝ kǝɓai aka ndǝ laka tǝ thlǝmari Iniyasu, dzǝ masǝkǝn tǝ dzǝ ada pi akwa dǝgǝl nǝr fá ntsisu. 34Bitrusu nkǝrɛ alari, “Iniyasu, Yɛsu Kǝrsti mbǝti tǝngɛ! Hyati ka gǝ pǝrti butsǝr ngɛ!” Ba dzǝ ɓui mbǝtǝdzi tǝkǝma. 35Antǝ sanga ndzǝ nam akwa Lida ba Saraun kǝ wula Iniyasu ada nuɗɛ, dar ka ndaltǝdzi ka nu Thlaku.

36Akwa Dzaupa ndǝr nuwɛ laka adai tǝ thlǝmari Tabita (akwa nyar Gǝriku, ndǝ ada ka tǝ Daukas#9:36 Gyapu Tabita (Aramaik, nam ani nyar Yahudi) ba Daukas (Gǝriku) ada nkǝrɛ kimal. ), kǝlara saka dzǝ ada 'ya sǝ nam ɗaku ba dzǝ ada dlar ndzǝ nam ngudi yarɛ. 37Ata saka ǝni dzǝ 'ya kura kalang ba dzǝ ka nti. Ndǝ pǝrati tǝni tǝ ndǝ ata harɛ ka panyi tǝni akwa fǝr nam ati. 38Lida ni kudzǝghɛ adzǝ Dzaupa; ani sakatǝ ndzǝr nuwɛ ngati apǝri Bitrusu akwa Lida, ani dar hyanti ndzǝ sǝɗɛ ka kǝgyǝ tǝni, “Usɛ ka gǝ si bǝtǝbǝtu ma apǝri awa 'ya!”

39Ani Bitrusu ka si vwam kaka dar; ani kura aka santa saka, dar ka mwari aka dza alǝti akwa fǝr nam ati ndari. Sanga kuɗǝghum yarɛ ada hyati adzǝni, tǝ dar ada tuwa ka tsanti alari lǝkutu yarɛ ba laka kari yarɛ tǝ Daukas tara mǝrti ala dar.

40Bitrusu hyanti tǝ dar sang alǝba ka ngyar fǝr nda, ba dzǝ ka zǝɗi tǝ dza ada 'ya aduwa. Dzǝ wul palaiyir sai ndari, dzǝ ka nkǝrɛ, “Tabita, hyati” dzǝ ka mburnta ntsari, Sakatǝ dzǝ wula Bitrusu, dzǝ ka hyati ka ndzai. 41Dzǝ hati alari tsiyari tǝ dzǝ dlar ka hyanti tǝni, antǝ dzǝ kǝga ndzǝr mbǝrsa ba kuɗǝghum yarɛ, dzǝ la dar tǝni aka mpikɛ. 42Labarari kikilntadzi alǝkwa sanga Dzaupa, ba hanga ndzi mbǝrsa aka Thlaku. 43Ba Bitrusu ndzai hang akwa Dzaupa, dar ndzai vwam aka ndǝ laka tǝ thlǝmari Simaun ndǝr 'ya kutsi.

Currently Selected:

'Ya Su 9: CKL

Highlight

Copy