མ་ཏི། 8

ཡི་ཤུ་གི་ ཀླུ་ནད་ཁེ་ཁཱན་ དྲག་ཉི་གནང་མ༌ལ།

1ཡི་ཤུ་ ཕུ་གེ་དོང་བྱོན་མ་ཀབ་ཉི་ སོ་ངོ་མང་པུ་ཐུར་གི་ རོ་ཀ་ཕྱག་ཞུ་ཉི་ དི་ཝ༌ལ། 2ཡིད་ཀ་རྣམ་ཏོག་མ་ཝ་ ཀླུ་ནད་ཟུན་ཁཱན་ སོ་ངོ་ཐུར་གི་ ཡི་ཤུ་ག་ སྐུན་མདུན་ག་བཅག་ཐཱན་ ཏོང་ཟིང་ས་ག་ཏེས་ཉི་ ཞུ་ཝ་ལ་ གཙོ་བོ་ ན་ག་ཐུགས་བཞེད་ཆོ་ནེ་ལ་ ནཱན་གི་ ཇང་དྲག་ཉི་གནང་ཤོ་དག༌ཉི།

3ཡི་ཤུ་གི་ རོ་ཀ་ཕྱག་ ཨོ་ཉ་སོ་ངོ་ཐུང་ཀ་ཀེ་ཐཱན་ ཇ་ག་སེམས་ཅ་ ནཱན་ཧིང་སང་སང་རི་དག་ཉི་ གསུངས་མ༌ལ། ཨོ་ཉ་ཐྲེ་ཀེ་རང་ ཀླུ་ན་ཚ་གེ་ ཁམས་སངས་ཀིན་རང་ དྲག་པ༌ལ། 4བཱརའ་ཨི་བི་ག་རང་མ་ཡེག་པཱན་ ཐྲང་ཐྲང་རང་ བླ་མ་བཱརང་ཀ་དིན་ཐཱན་ ནཱན་ནཱན་ཏེན་གི་གེན༌ཤོ། ཉི་ནཱན་དྲག་པ་གི་ལ་ཨ་ཉི་ འཛོམས་དཔང་ཨ་ལེ་དེན་གེ་ མོ་ས་ག་ བཀའ་ཁྲིམས་དང་ཏུ་ཉི སྙན་དར་ཕུལ་ཤོ་དག་ཉི་ ཡི་ཤུ་གི་ རོ་ཀ་གསུངས་མ༌ལ༎

དམག་དཔོན་ག་དད་པ།

5ཡི་ཤུ་ ཀ་ཕར་ན་ཧུམ་ནང་ཀ་ ཕེབས་ཏེན་གེ་ རོ་མི་ག་དམག་དཔོན་ཐུར་ རོ་ཀ་སྐུན་མདུན་ག་བཅག་ཐཱན་ ཞུ་ཝ་ལ་ 6གཙོ་བོ་ ཇ་ག་གཡོག་པ་ཐུར་ ཟ་ན་ཚ་ཁེ་ཉི་ ཕའི་ག་ཆོ་ཝ༌ཅ། ཉི་རོག་ གནམ་མེད་ས་མེད་ ནང་དོག་པ་ཅ་དག༌ཉི།

7ཇང་ན་ག་ཕའི་ག་དིན་ཐཱན་ རོག་དྲག་བི་ལེ་དག་ཉི་ ཡི་ཤུ་གི་གསུངས་མ༌ལ།

8དག་པ་ཀབ་ཉི་ དམག་དཔོན་གི་ཞུ་ཝ་ལ་ གཙོ་བོ་ ཇང་ཤོ་ ནཱན་ཇ་ག་ཕའི་ག་ ཞུ་ལེ་མ་རུང་ཁཱན་ སོ་ངོ་ཐུར་གི༌ལ། ནཱན་གི་ ཇ་ག་གཡོག་པ་དྲག་པེ་ཨ་ཉི་ གསུངས་གནང་ཤོ་ ཉི་རོག་དྲག་པེ་གི༌ལ། 9ཧང་ཡ་དག་ནེ་ལ་ ཇང་བུ་ འགོ་དཔོན་ཆི་ལུ་བ་ཀ་ དབང་ཚད་ཕརའ་ཁེ་ཆོ་ཁཱན་ སོ་ངོ་གི༌ལ། ཉི་ཇ་ག་ཕརའ་ཁེ་བུ་ དམག་མི་བ༌ཅ། ཇི་གི་ཐུར་ག་ཏཱན་ དི་ཨ་ཉི་ཡེག་པ་ཀབ་ཉི་ དིན༌ཅ། ཉི་ཨོམ་ཐུར་ག་ཏཱན་ ཨོ་དོ་ཨ་ཉི་ཡེག་པ་ཀབ་ཉི་ ཨུན༌ཅ། ཉི་ཇི་གི་ ཇ་ག་གཡོག་པ་ག་ ཨུ་ཐུ་ཨའི་དག་པ་ཀབ་ཉི་ ཨན་ཅ་དག༌ཉི།

10དམག་དཔོན་གི་ཞུ་ཁཱན་ཁེ་པ་ སྙན་གསེང་པ་ཀབ་ཉི་ ཡི་ཤུ་ཡིད་ཆི་ཉི་ རོ་ཀ་ཕྱག་ཞུ་ཁཱན་བ་ཀ་ གསུངས་མ་ལ་ ཇི་གི་ ན་ཧ་ཐྲང་ཉི་ཡེག་ཅ་ ཨིས་རེལ་ག་ཆང་ ཇི་གི་ཨོ་ཐ་སོ་ངོ་ག་ དད་པ་ད་བུ་མ་ཐོང་ཤི། 11ཇི་གི་ ན་ཧ་ཡེག་ཅ་ ཤར་དང་ནུབ་ཀེ་ཨུ་ཁཱན་ སོ་ངོ་མང་པུ་ཐུར་གི་ ཞིང་ཁམས་ག་རྒྱལ་སྲིད་ག་ནང་ཀ་ ཨ་བཱརའ་ཧམ་དང་ཨི་སག་ ཉི་ཡ་ཀུབ་ཀབ་ཉི་ ཏབ་ཐུར་ལང་ཐཱན་ མཛར་ཅུམ་ཟ༌ལེ། 12དག་པ་ཀབ་ཉི་ རྒྱལ་སྲིད་ག་དེན་གེ་ཅམ་ཁཱན་ ཨིས་རེལ་ག་སོ་ངོ་བ་ཤོ་ མེར་བུ་ནང་ཀ་ ཐུབ་ཉི་གེ༌མེ། ཉི་རོག་ཏེ་བ་ གནམ་མེད་ས་མེད་ གེབ་ཉི་ ཤ་རིག་ཉི་ཆོ་ལེ་ཁེ༌ལེ། 13ནཱན་ཕའི་ག་དི། ཉི་ནཱན་གི་ དད་པ་ཨ་ཝ་དང་ཏུ་ཉི་ ཇུང་མེ་དག་ཉི་ ཡི་ཤུ་གི་ དམག་དཔོན་ག་གསུངས་མ༌ལ།

ཉི་ཨོ་ཉ་དུས་ཙུན་ག་རང་ རོ་ཀ་གཡོག་པ་དྲག་པ༌ལ༎

ཡི་ཤུ་གི་ སོ་ངོ་མང་པུ་ཐུར་ དྲག་ཉི་གནང་མ༌ལ།

14ཡི་ཤུ་ པ་ཏྲུས་ག་ཕའི་ག་ ཕེབས་པ་ཀབ་ཉི་ པ་ཏྲུས་ག་མེ་ཝག་ཙ་ག་ཨ་མ་ ཁུར་ཆང་པུ་ཨ་ཉི་ མར་ཉི་ཝུ་ལེ་མར་བ་ཅ་གི་ཝ༌ལ། 15ཡི་ཤུ་གི་ རོ་ཀ་ག་དང་ག་ཐོ་ཕ་ཀབ་ཉི་ ཁུར་ཆང་པུ་ཨ་ལེ་ནོར་བ༌ལ། ཉི་རོག་ཝུན་ཐཱན་ ཡི་ཤུ་ག་ ཕུལ་བེ་དྲང་མེ་གོ་ཙུག་པ༌ལ།

16ཨོ་ཉ་ངེ་རི་ སོ་ངོ་བ་ཀི་ ཡི་ཤུ་ག་སྐུན་མདུན་ག་ དོན་གི་ནོད་ཁཱན་བ་ མང་པུ་ཐུར་ཕ་ཝ༌ལ། ཉི་རོ་ཀི་དོན་ག་བ་ སོ་ངོ་བ་ཀེ་ ཕིས་ཀ་ཤོན་ཇོང་ཤོ་དག་ བཀའ་གནང་ཉི་ ཁོན་མ༌ལ། ཉི་མར་ཁཱན་སོ་ངོ་བ་ དྲག་ཉི་གནང་མ༌ལ། 17ཉི་ཨུ་ཐུ་ཤོ་ ལུང་བསྟན་པ་ ཡ་ཤའི་ཡ་གི་ གསུངས་ཁཱན་ཁེ་པ་ དེན་ཐ་འགྲུབ་ཕེ་དེན་གེ་ ཇུང་མ་ཆོ་ཝ༌ལ།

རོ་ཀི་ ཨ་ཧ་ན་ཚ་བ་བསྣམས་པ། ཉི་ཨ་ཧ་རེམ་པ་བ་ བང་མ་#8:17 ཡ་ཤའི་ཡ་ག་དཔེ་ཆ་ 53:4 དག་ཉི་

ལུང་བསྟན་མ་ཆོ་ཝ༌ལ༎

ཡི་ཤུ་ག་ཕྱག་ཞུ་ཝ་ག་ངེ་ལོང་།

18ཡི་ཤུ་གི་ སོ་ངོ་མང་པུ་ཐུར་ རོ་ཀ་ཀོ་ལོ་ལོ་ ཛོ་མ་གཟིགས་པ་ཀབ་ཉི་ རོ་ཀི་ རོ་ཀ་སློ་མ་བ་ཀ་ ན་ཧ་བ་ ཉ་ལོ་ཀ་མཚོ་ནེ་མ་ག་ཏཱན་དི་དག་ཉི་ གསུངས་མ༌ལ།

19བཀའ་ཁྲིམས་ག་ སློབ་དཔོན་ཐུར་ རོ་ཀ་སྐུན་མདུན་ག་ཨུན་ཐཱན་ སློབ་དཔོན་ ནཱན་ཨོ་ག་བྱོན་མ་ཐུར་ ཇང་ན་ག་ཕྱག་ཞུ་ཉི་དི་ལེ་དག་ཉི་ ཞུ་ཝ༌ལ།

20ཤིའུ་ལི་ཆོ་ལེ་ག་གང་ཅ་ ཉི་ངབ་ཀེ་ཕེན་ཁཱན་ཁ་ག་ཤུམ༌ཅ། དག་པ་ཀབ་ཉི་ སོ་ངོ་ག་ཟ་ཤོང་ལ་ཉི་ རོ་ཀ་ཤ་རང་ཐ་ལེ་ག་ བཱརང་རང་མཱན་ཅ་དག་ཉི་ ཡི་ཤུ་གི་ རོ་ཀ་གསུངས་མ༌ལ།

21བཱརའ་སློ་མ་ཐུར་གི་ རོ་ཀ་ཞུ་ཝ་ལ་ གཙོ་བོ་ གོ་མ་རང་ ཇང་དིན་ཐཱན་ ཇ་ག་ཨ་པ་ག་རོ་ ཝང་ཕི་ཉི་ཐ་ལེ་དག༌ཉི།

22ནཱན་ཇ་ག་ཚིང་ཚིང་ཨོ་དོ། ཉི་ཤི་ཁཱན་དའི་ཏེན་གི་ ཤི་ཁཱན་དའི་ཏེན་ག་ ཝང་ཕིན་ཆེན་དག་ཉི་ ཡི་ཤུ་གི་ རོ་ཀ་གསུངས་མ༌ལ༎

ཡི་ཤུ་གི་ མཚོ་རི་ཁག་ཉི་གནང་མ༌ལ།

23ཡི་ཤུ་གྲུ་ནང་ཀ་བྱོན་མ༌ལ། ཉི་རོ་ཀ་སློ་མ་བ་བུ་ རོག་ཀབ་ཉི་བྱོན་མ༌ལ། 24ཡིད་ཀ་རྣམ་ཏོག་མ་ཝ་ མཚོ་ག་རི་དི་ གནམ་མེད་ས་མེད་ ཤུག་ཨ་ཉི་ཨོ་ཕ༌ལ། ཉི་མཚོ་རི་ལག་ཉི་ གྲུ་རི་གི་ཕུང་མ༌ལ། དག་པ་ཀབ་ཉི་ ཡི་ཤུ་ཤོ་ གཟིམ་ཉི་བཞུགས་པ་ཆོ་ཝ༌ལ། 25ཉི་རོག་ཏེ་བ་དི་ཉི་ ཡི་ཤུ་གཟིམ་མ་གེ་ ཚོར་ཐཱན་ཞུ་ཝ་ལ་ གཙོ་བོ་ ཨ་ཧ་སྐྱབས་ཨ་ཉི་གནང༌ཤོ། ཨའི་མཚོ་ག་ ཐི་མེ་ཅབ་ལ་དག༌ཉི།

26ཡི་ཤུ་གི་ རོག་ཏེ་བ་ཀ་ གསུངས་མ་ལ་ ན་ཧ་བ་ ཧང་ཨ་ཉི་ ཡོང་ཁེན་ཅ་ཡ། ན་ཧ་དད་པ་ ཧབ་ཏུར་རང་ཟེ་མུ་ཡ་དག༌ཉི། ཉི་རོག་ ག་བཞེངས་ཐཱན་ རི་དི་དང་མཚོ་རི་ལག་ཁཱན་ག་ ནོར་ཤོ་དག་ཉི་ བཀའ་གནང་མ༌ལ། ཉི་ཨོ་ཉ་ཐྲེ་ཀེ་རང་ ཁམས་སངས་ཀིན་རང་ ནོར་བ༌ལ།

27རོག་ཏེ་བ་ ཐམས་ཅན་རང་ ཡིད་ཆི་ཉི་ཡེག་པ་ལ་ ཨོ་ཐ་སོ་ངོ་ ཨི་བི་གི་ལ་ཡ། རི་དི་དང་མཚོ་རི་གི་ཆང་ རོ་ཀ་བཀའ་ག་ཆ་གནས་ཐ་ན་དག༌ཉི༎

བདུད་ཀི་ནོད་ཁཱན་སོ་ངོ་ཉིག་ཙིང་ དྲག་ཉི་གནང་མ༌ལ།

28ཡི་ཤུ་ མཚོ་ཉ་ལོ་ཀ་ ནབ་ཀ་ཕེབས་པ༌ལ། ཉི་ཨོ་ཉ་ས་ཆ་ཤོ་ ག་ད་རི་ནི་དག་ཁཱན་ག་ ཆ་འོག་གི་ཝ་ཆོ་ཝ༌ལ། ཉི་ཉ་ག་ དོན་གི་ནོད་ཁཱན་ སོ་ངོ་ཉིག་ཙིང་གི་ ཡི་ཤུ་རུ་མ༌ལ། རོག་ཉིག་ཙིང་ དི་ཁྲོ་ག་ཆོན་ཅ་གི་ཝ༌ལ། ཉི་རོག་ཉིག་ཙིང་ གནམ་མེད་ས་མེད་ ཏེ་ངན་ཆོ་ཝ་ཨ་དེན་གེ་ ཨོ་ཉ་ལམ་གེ་ སོ་ངོ་ཨི་བི་རང་ མ་དང་ཅ་གི་ཝ༌ལ།

29ཉི་རོག་ཉིག་ཙིང་གི་ ཤ་དར་ཕི་ཉི་ཡེག་པ་ལ་ དཀོན་མཆོག་ག་སྲས་ ནཱན་གི་ ཨའི་ཀབ་ཉི་ ཧང་ལའི་ཅ་ཡ། ཧང་དུས་ཙུན་མ་རེན་པེ་གོ་མ་རང་ ཨ་ཧ་ཁྲིམས་ཀེ་བེ་དེན་གེ་ བྱོན་མ་སྨོ་དག༌ཉི།

30ཨོ་ཉ་གེ་ ཇང་ཀིན་ག་ ཕག་པ་ཆུ་ཐུར་ ལྟོ་ཟ་ཉི་ཆོ་ཝ་ཅ་གི་ཝ༌ལ། 31ཨའི་ཁོན་མེ་རང་གི་ནེ་ལ་ ཨའི་ཨོ་ཉ་ཕག་པ་བ་ཀ་ནང་ཀ་ཏཱན་ ཀུན་ཏི་དག་ཉི་ དོན་བ་ཀི་ཞུ་ཝ༌ལ།

32དྲིག་པེ་ དི་དག་ཉི་ བཀའ་གནང་མ་ཐུར་ག་རང་ དོན་ག་བ་ སོ་ངོ་གེ་ ཕིས་ཀ་ཤོན་ཐཱན་ ཕག་པ་བ་ཀ་ནང་ཀ་ནུ་ཕ༌ལ། ཉི་ཕག་པ་ཆུ་ཐུར་ ཐམས་ཅན་རང་ ག་གེ་དོང་ཝུར་ཉི་དི་ལ་ཀབ་ཉི་ བཱརག་ཀེ་དོང་ཕུད་ཁེ་ཉི་ མཚོ་ནང་ཀ་ཐི་མ༌ལ།

33ཉི་ཕག་པ་དི་པ་བ་ ཇུག་ཉི་རང་ཁྲོམ་ཆེན་ག་དིན་ཐཱན་ ཧང་ཇུང་མ་གི་ལ་སྨོ་ ཉི་དོན་གི་ནོད་ཁཱན་ སོ་ངོ་ཉིག་ཙིང་ག་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ ཐམས་ཅན་རང་ ཡེག་པ༌ལ། 34ཁྲོམ་ཆེན་ག་ སོ་ངོ་ཐམས་ཅན་རང་ ཡི་ཤུ་མཇལ་བེ་དེན་གེ་ ཁྲོམ་ཆེན་གེ་ ཕིས་ཀ་དི་ཝ༌ལ། ཉི་རོག་ཏེ་བ་ཀི་ རོག་མཇལ་དེན་གེ་ རོག་ཨོ་ཉ་ས་ཆ་ཐུབ་ཐཱན་ཐཱན་ བྱོན་ཤོ་དག་ཉི་ ཞུ་ཝ༌ལ༎

Currently Selected:

མ་ཏི། 8: TNTB

Highlight

Copy