མ་ཏི། 22
22
གཉེན་ག་མཛར་ཅུམ་ག་དཔེ་གཏམ།
1ཉི་ཨོམ་ཆང་རང་ ཡི་ཤུ་གི་ རོག་ཏེ་བ་ཀ་ དཔེ་གཏམ་ཐུར་གསུངས་ཉི་ 2ཞིང་ཁམས་ག་རྒྱལ་སྲིད་ཤོ་ དཔོན་ཐུར་གི་ རོ་ཀ་སྲས་ག་གཉེན་ག་དེན་གེ་ མཛར་ཅུམ་ཆི་ལུ་ཐུར་ བི་ལེ་ག་ཅམ་པ་ད་བུ་ཐུར་གི༌ལ། 3ཉི་མཛར་ཅུམ་ཟ་ལེ་ག་ ར་ཁཱན་ཤི་མིན་བ་ ཨོ་དོ་དག་ཉི་ ཡེག་པེ་ག་དེན་གེ་ དཔོན་གི་ རོ་ཀ་གཡོག་པ་བ་ ཀུན་ཏི་ཝ༌ལ། དག་པ་ཀབ་ཉི་ རོག་ཏེ་བ་ཀི་ ཨོ་ཕེ་མ་ན་ཝ༌ལ།
4ཉི་མཛར་ཅུམ་ཟ་ལེ་ག་ ར་ཁཱན་ཤི་མིན་བ་ ཨོ་དོ་དག་ཉི་ ཡེག་པེ་ག་དེན་གེ་ རོ་ཀི་ཨོམ་ཆང་རང་ རོ་ཀ་བཱརའ་གཡོག་པ་ཚེ་བང་ ཀུན་ཏི་ཝ༌ལ། ལྟོ་ཚུད་པ༌ཅ། ཉི་ཇི་གི་ ཇ་ག་ཏོ་ཀ་དང་ ཝ་ཉམ་ཆོ་ཁཱན་བ་ཤེ་ཉི་ ཧང་རང་ཅོད་ཉི་ཞིང་མ༌ཅ། གཉེན་ག་མཛར་ཅུམ་ ཟ་ལེ་ག་ཨོ་དོ་དག་ཉི་ ཡེག་ཅོ་ན་ཨ་ཉི་ཡེག་ཐཱན་ རོ་ཀི་ རོ་ཀ་གཡོག་པ་བ་ ཀུན་ཏི་ཝ༌ལ། 5དག་པ་ཀབ་ཉི་ ཤི་མིན་བ་ཀི་ མ་ཉཱན་པཱན་ ཐུར་གི་ ཨུང་ག་ལའི་ཨ་ལེ་ག་ དི་ཝ༌ལ། ཉི་ཨོམ་ཐུར་གི་ རོ་ཀ་ཚོང་ཕི་ལེ་ག་ དི་ཝ༌ལ། 6ཉི་བཱརའ་ཤི་མིན་བ་ཀི་ རོ་ཀ་གཡོག་པ་བ་ཙུང་ཉི་ ངི་ནང་ཁུ་ཝ་ཨ་ཝ་ཅོད་ཐཱན་ ཤེ་ཝ༌ལ།
7དཔོན་གནམ་མེད་ས་མེད་ རོ་ཙིག་པ་ཨ་དེན་གེ་ རོ་ཀི་ རོ་ཀ་དམག་མི་བ་ཀུན་ཏི་ཉི་ རོག་ཏེ་བ་ཀི་ དཔོན་ག་གཡོག་པ་བ་ ཤེ་ཁཱན་བ་ཤེ་ཝ༌ལ། ཉི་རོག་ཏེ་བ་ཀ་ཁྲོམ་ཆེན་ མི་ག་གོག་ཉི་གེ་མ༌ལ། 8ཉི་དཔོན་གི་ རོ་ཀ་གཡོག་པ་བ་ཀ་ ཡེག་པ་ལ་ གཉེན་ག་མཛར་ཅུམ་ ཟ་ལེ་ག་རེན་པ། དག་པ་ཀབ་ཉི་ ཇི་གི་ར་ཁཱན་ཤི་མིན་བ་ ཨོ་ཕེ་མ་རུང་ཁཱན་ སོ་ངོ་བ་གི་ཝ་ཆོན། 9ཨོ་ཉི་ཨ་དེན་གེ་ ན་ཧ་བ་ ཨོམ་ཆང་རང་ དིན་ཐཱན་ ལམ་ཟུར་ཀ་ཆོ་ཝ་ག་ཐོང་ཁཱན་ སོ་ངོ་ཐམས་ཅན་རང་ གཉེན་ག་མཛར་ཅུམ་ ཟ་ལེ་ག་རའི་དག༌ཉི། 10ཉི་གཡོག་པ་བ་དིན་ཐཱན་ ལེག་པུ་གི་ནེ་བུ་ མ་ལེག་པ་གི་ནེ་བུ་ རོག་ཏེ་བ་ཀི་ཐོང་ཁཱན་ ཐམས་ཅན་རང་ རིག་ཉི་ཕ་ཝ༌ལ། ཉི་གཉེན་ཕི་ས་ག་ཕའི་ ཤི་མིན་བ་ཀི་ཕུང་མ་རི་ཝ༌ལ།
11དག་པ་ཀབ་ཉི་ དཔོན་ ཤི་མིན་བ་ རུ་མེ་ག་ཨུན་ཐཱན་ གོད་པ་ཀབ་ཉི་ སོ་ངོ་ཐུར་གི་ གཉེན་ག་ཁ་མུང་ མ་ཡེ་ཝ་ག་ཐོང་མ༌ལ། 12ཉི་དཔོན་གི་ རོ་ཀ་ཇི་མ་ལ་ ལྟོ་ཚང་ ནཱན་གཉེན་ག་ཁ་མུང་ མ་ཡེ་ཝ་ག་ ཧང་ཏེན་ཨ་ཉི་ ནང་ཀ་ནུ་ཕེ་རེ་བ་ཡ་དག༌ཉི། ཨོ་ཉ་སོ་ངོ་གི་ ཧང་རང་མ་ཡེག་པ༌ལ། 13ཉི་དཔོན་གི་ རོ་ཀ་ཕྱག་ཞུ་ཁཱན་བ་ཀ་ ཡེག་པ་ལ་ ཨོ་ཐ་སོ་ངོ་ག་ བི་དང་ག་དང་ཐིག་ཐཱན་ ཕིས་ཀ་མེར་བུ་ནང་ཀ་ཏཱན་ ཐུབ་གེམ་ཀུན་ཏི། ཉི་རོག་ ཨོ་ཉ་ནང་ཀ་ གེབ་ཉི་ཤ་ཟེང་ཉི་ཆོ་ལེ་དག༌ཉི།
14ཧང་ཡ་དག་ནེ་ལ་ མང་པུ་ཐུར་ར་ཝ༌ཅ། དག་པ་ཀབ་ཉི་ ཉུང་པུ་ཐུར་ཤ་ སི་ཝ་ཅ་དག་ཉི་ གསུངས་མ༌ལ༎
ཁྲལ་ཏ་པེ་ཁེ་ཝ་ཀོར་གེ།
15ཉི་ཕ་རི་སི་པ་བ་ ཕིས་ཀ་དིན་ཐཱན་ ཡི་ཤུ་གི་གསུངས་མེ་ག་ ངཱད་པེ་བི་ཉི་ ཙུང་མེ་ག་གནས་སྐབས་ཙ་མ༌ལ། 16ཉི་རོག་ཏེ་བ་ཀི་ རོག་ཏེ་བ་ཀ་ སློ་མ་བ་དང་ ཧེ་རོད་ག་ཕྱག་ཞུ་ཁཱན་བ་ རོ་ཀ་སྐུན་མདུན་ག་ ཀུན་ཏིན་ཐཱན་ ཨོ་ཐེན་ཞུ་ལེ་བི་ཝ༌ལ། སློབ་དཔོན་ ཨ་ཤི་སེན་ཅ་ ནཱན་ཁེ་པ་ སོ་ངོ་དྲང་པུ༌ཅ། ཉི་ནཱན་གི་ ཉེ་རིང་མ་ཆི་ལཱན་ སོ་ངོ་གི་ཧང་ཡེག་ཏུ་མེ་དག་ཉི་ མ་མི་ལཱན་ དཀོན་མཆོག་ག་ ཐུགས་དང་ཏུ་ཉི་ དེན་པ་ཁེ་པ་ ཡེན་གནང་ཅ་གི་ལ་ཨ་ཉི་བུ་ ཨ་ཤི་སེན༌ཅ། 17ཉི་ཨོམ་ ཨ་ཧ་གསུངས་ཉི་གནང་ཤོ་ ན་ག་ཐུགས་བསམ་དང་ཏུ་ཉི་ཨ་ནེ་ལ་ ཨ་ཤི་དཔོན་ཀའི་སར་ག་ ཁྲལ་ཏ་པེ་ཆོག་པེ་སྨོ་ མ་ཆོག་པ་ཡ་དག༌ཉི།
18དག་པ་ཀབ་ཉི་ རོག་ཏེ་བ་ཀི་ རོ་ཀ་མགུ་སྐོར་ ཕི་ལེ་མིག་པ་ཕི་ཉི་ ཇི་མ་ག་ རོ་ཀི་མཁྱེན་ཉི་ གསུངས་མ་ལ་ ནའི་འུ་དྲ་པ་བ་ ཧང་ཨ་ཉི་ ན་ཤི་ ཇ་ག་མགུ་སྐོར་ཕི་ལེ་ མིག་པ་ཕིན་ཅ་ཡ། 19ན་ཤི་ཁྲལ་ཏབ་ཁཱན་ ཏི་རུ་ཁེ་པ་ ཇ་ག་གེན་ཤོ་དག་ཉི་ གསུངས་མ༌ལ། ཉི་རོག་ཏེ་བ་ཀི་ ཐ་ལ་ཐུར་གེན་མ༌ལ། 20ཉི་ཡི་ཤུ་གི་ རོག་ཏེ་བ་ཀ་ ཨོ་ཐ་ཐ་ལ་ག་ ཨི་བི་ག་པར་དང་ མིང་ལ་ཡ་དག་ཉི་ ཇི་མ༌ལ།
21དཔོན་ཀའི་སར་ག་ པར་དང་མིང་ལ་དག་ཉི་ ཞུ་ཝ༌ལ།
ཉི་ལ་ ཀའི་སར་ག་གི་ཁཱན་བ་ ཀའི་སར་ག་བི། ཉི་དཀོན་མཆོག་ག་གི་ཁཱན་བ་ དཀོན་མཆོག་ག་ཕུལ་ཤོ་དག་ཉི་ ཡི་ཤུ་གི་ རོག་ཏེ་བ་ཀ་གསུངས་མ༌ལ།
22ཨུ་ཐུ་ད་བུ་ ན་ཐ་ལ་ཀབ་ཉི་ རོག་ཏེ་བ་ གནམ་མེད་ས་མེད་ ཡིད་ཆི་ཝ༌ལ། ཉི་རོག་ཏེ་བ་ཀི་ རོག་ཐུབ་ཐ་ཉི་ དི་ཝ༌ལ༎
གསོན་པོ་ཨ་ཉི་སྐུ་བཞེངས་པ་ཀོར་གེ།
23ཤི་དེན་གེ་ གསོན་པོ་ཨ་ཉི་ ཝུ་ལུ་མཱན་ཅ་དག་ཉི་ཡེག་ཁཱན་ ས་དུ་ཀི་པ་བ་ ཨོ་ཉ་ནོང་ཀ་རང་ ཡི་ཤུ་ག་སྐུན་མདུན་ག་ཤེག་ཉི་ དྲི་ཝ་ཞུ་ཝ་ལ་ 24སློབ་དཔོན་ མོ་ས་གི་གསུངས་མ་ཅ་ ཝག་ཙ་མ་ལེ་གོ་མ་ ཕེ་ཝག་ཙ་ཤི་ནེ་ལ་ རོ་ཀ་བོ་ཉིང་གི་ རོ་ཀ་མེ་ཝག་ཙ་ཀབ་ཉི་ གཉེན་ཕིན་ཐཱན་ རོ་ཀ་ཨ་ཏ་ག་མིང་ག་ ཝག་ཙ་སིང་མེ་ཁེ་ལེ་དག༌ཉི། 25ཉི་ཨོམ་ ཨ་ཧ་པོང་ཀ་ བོ་ཉིང་ཟུམ་ཆོ་ཝ༌ལ། ཉི་ཨ་ཏ་ཆི་ལུ་ཁེན་གི་ གཉེན་ཕི་ཉི་ ཝག་ཙ་མ་ལེ་གོ་མ་རང་ཤི་ཝ༌ལ། ཨོ་ཉི་ཨ་དེན་གེ་ རོ་ཀ་ཕརའ་ཁེ་ཆོ་ཁཱན་ བོ་ཉིང་གི་ རོ་ཀ་མེ་ཝག་ཙ་ཀབ་ཉི་ གཉེན་ཕི་ཝ༌ལ། 26ཨུ་ཉུ་པུརུས་ཀིན་ཨ་ཉི་རང་ རོ་ཀ་བོ་ཉིང་བུ་ ཝག་ཙ་མ་ཝ་ཨ་ཉི་རང་ཤི་ཝ༌ལ། ཉི་རོ་ཀ་ཕརའ་ཁེ་ཆོ་ཁཱན་གི་ ཨོ་ཉ་མེ་ཝག་ཙ་ཀབ་ཉི་ གཉེན་ཕི་ཝ༌ལ། ཨོ་ཐེན་ཨ་ཉི་ རོག་ཏེ་བོ་ཉིང་ཟུམ་གི་རང་ ཨོ་ཉ་མེ་ཝག་ཙ་ཀབ་ཉི་ གཉེན་ཕི་ཝ༌ལ། 27ཉི་ཇུ་ཀ་དག་པ་ཀབ་ཉི་ ཨོ་ཉ་མེ་ཝག་ཙ་བུ་ཤི་ཝ༌ལ། 28ཉི་ཨོམ་ རོག་ཏེ་ཟུམ་གི་རང་ རོག་ཀབ་ཉི་གཉེན་ཕི་ཝ་ཨ་དེན་གེ་ ཤི་ཝ་གེ་ གསོན་པོ་ཨ་ཉི་ཝུ་ལེ་གང་ཀ་ རོག་ཏེ་བོ་ཉིང་ཟུམ་ག་པོང་ཀེ་ རོག་ཤོ་ ཨི་བི་ག་མེ་ཝག་ཙ་ཨ་ཉི་ ཆོ་ལེ་ཡ་དག༌ཉི།
29ཡི་ཤུ་གི་ལན་གནང་ཉི་ གསུངས་མ་ལ་ ན་ཧ་བ་ངཱད༌ལ། ཧང་ཡ་དག་ནེ་ལ་ ན་ཤི་གསུང་རབ་ ཧ་མ་གོ་ཝ༌ལ། ཉི་དཀོན་མཆོག་ག་ སྟོབས་དབང་ག་ཀོར་གེ་བུ་ ཧ་མ་གོ་ཝ༌ལ། 30ཧང་ཡ་དག་ནེ་ལ་ ཤི་ཝ་གེ་ གསོན་པོ་ཨ་ཉི་ཝུ་ལེ་གང་ཀ་ གཉེན་ཕི་ལེ་དག་ཉི་མཱན༌ཅ། ཉི་གཉེན་ཕི་ལེ་ག་ ཆོག་པུ་བུ་མ་ཆོག་པ། དག་པ་ཀབ་ཉི་ རོག་ཏེ་བ་ ཞིང་ཁམས་ག་ ཞིང་ཁམས་ག་འཐེན་པ་བ་ད་བུ་ཨ་ཉི་ གཉེན་མ་ཕི་ལཱན་ཆོ༌ལེ།
31ཉི་ཤི་ཝ་གེ་ གསོན་པོ་ཨ་ཉི་ཝུ་ཝ་ཀོར་གེ་ དཀོན་མཆོག་གི་ གསུངས་ཁཱན་ཁེ་པ་ ན་ཤི་མ་ལྷག་ཅི་སྨོ།
32ཇང་ཤོ་ ཨ་བཱརའ་ཧམ་ག་ དཀོན་མཆོག་གི༌ལ། ཨི་སག་ག་ དཀོན་མཆོག་གི༌ལ། ཉི་ཡ་ཀུབ་ག་ དཀོན་མཆོག་གི་ལ་#22:32 ཤོན་དི་ཝ་ག་དཔེ་ཆ་ 3:6 དག་ཉི་
གསུངས་མ༌ཅ། རོག་ཤོ་ ཤི་ཁཱན་བ་ཀ་ དཀོན་མཆོག་མང་གི་ཝ་ གསོན་པོ་བ་ཀ་ དཀོན་མཆོག་གི་ལ་དག་ཉི་ གསུངས་མ༌ལ།
33སོ་ངོ་བ་ཀི་ ཨོ་ཐ་རོ་ཀི་ཡེ་ཁཱན་ཁེ་པ་ ན་ཐ་ལ་ཀབ་ཉི་ རོག་ཏེ་བ་ གནམ་མེད་ས་མེད་ ཡིད་ཆི་ཝ༌ལ༎
བཀའ་ཁྲིམས་ཁག་ཆི་ལུ་རང་།
34དག་པ་ཀབ་ཉི་ ཡི་ཤུ་གི་ ས་དུ་ཀི་པ་བ་ ནོ་ཝང་ཆོག་པེ་མ་ཝ་ ཅོད་པ་ཐོང་མ་ཀབ་ཉི་ ཕ་རི་སི་པ་བ་ ཏབ་ཐུར་ཛོ་མ༌ལ། 35རོག་ཏེ་བ་ཀ་པོང་ཀེ་ བཀའ་ཁྲིམས་ག་ མཁས་ཏྲ་ཆོ་ཁཱན་ཐུར་གི་ ཡི་ཤུ་གེ་ཅོན་ལམ་ཉི་ དྲི་ཝ་ཐུར་ཇི་མ༌ལ། 36སློབ་དཔོན་ བཀའ་ཁྲིམས་ནང་ཀ་ བཀའ་རྒྱ་ཁག་ཆི་ལུ་རང་ ཧང་གི་ལ་ཡ་དག༌ཉི།
37རོ་ཀི་ རོ་ཀ་གསུངས་མ་ལ་ ནཱན་གི་ ན་ག་གཙོ་བོ་དཀོན་མཆོག་ཁེ་པ་ ཐིང་ལོམ་ནང་ཀེ་ཨ་ཉི་རང་ སྲོག་དང་སེམས་ ཐམས་ཅན་གི་ཨ་ཉི་ ཕང་པེ་ཁེ༌ལེ།#22:37 ཁྲིམས་ལུགས་ག་དཔེ 6:5 38ཉི་ཨུ་ཐུ་ཤོ་ གོ་དང་ཐམས་ཅན་གེ་ ཁག་ཆི་ལུ་ཆོ་ཁཱན་ བཀའ་རྒྱ་གི༌ལ། 39ཉི་ཨོ་ཉ་ཚིང་ཚིང་རང་ ཐམས་ཅན་གེ་ ཁག་ཆི་ལུ་ཆོ་ཁཱན་ བཀའ་རྒྱ་ཤོ་ ཨུ་ཐུ་གི༌ལ། ནཱན་གི་ ནཱན་ནཱན་ཏེན་ཕང་པ་པུརུས་ཀིན་ཨ་ཉི་ ན་ག་ནོག་མིན་བུ་ཕང་པེ་ཁེ༌ལེ།#22:39 ལེ་ཝི་ག་དཔེ་ཆ་ 19:18 40བཱརའ་བཀའ་ཁྲིམས་དང་ ལུང་བསྟན་པ་བ་ཀི་ འབྲི་ཁཱན་བ་ ཐམས་ཅན་རང་ ཨོ་ཐ་བཀའ་རྒྱ་ཉིག་ཙིང་ག་ ཏེན་ཅ་གི་ལ་དག༌ཉི༎
ཁིརིས་ཤོ་ ཨི་བི་ག་སྲས་གི་ལ་ཡ།
41ཕ་རི་སི་པ་བ་ ཏབ་ཐུར་ཛོ་མེ་གང་ཀ་ རོ་ཀི་རོག་ཏེ་བ་ཀ་ དྲི་ཝ་ཐུར་ཇིམ་ཉི་ 42ན་ཤི་ཁིརིས་ག་ཀོར་གེ་ ཧང་མིན་ཅ་ཡ། ན་ཤི་ཨ་ནེ་ལ་ རོག་ཨི་བི་ག་ སྲས་གི་ལ་ཡ་དག་ཉི་ གསུངས་མ༌ལ།
རོག་ཏེ་བ་ཀི་ ཞུ་ཝ་ལ་ རོག་ཤོ་ ད་ཝུད་ག་སྲས་གི་ལ་དག༌ཉི།
43རོག་ད་ཝུད་ག་ སྲས་གི་ནེ་ལ་ ད་ཝུད་དམ་པའི་ཐུགས་ཉིད་གི་ ཕུང་མེ་གང་ཀ་ རོ་ཀི་ཁིརིས་ག་ གཙོ་བོ་དག་ ཧང་ཨ་ཉི་ཞུན་ཅ་ཡ། ད་ཝུད་གི་ཨོ་ཐེན་ ཞུ་ཝ་ཅ་
44གཙོ་བོ་གི་ ཇ་ག་གཙོ་བོ་ག་ གསུངས་མ༌ཅ། ཇི་གི་ ན་ག་དགྲ་བྱང་ཕིཤི་བ་ ན་ག་བི་ཕརའ་ཁ་ མ་ཙུག་པ་སག་པུ་ ནཱན་ཇ་ག་ལ་ཉོང་ལོ་ཀ་ ལང་ཤོ་#22:44 མགུར་མ་ག་དཔེ་ཆ་ 110:1 དག༌ཉི།
45ཉི་ཨོམ་ ད་ཝུད་གི་ ཁིརིས་ག་གཙོ་བོ་ཨ་ཉི་ ཞུ་ནེ་ལ་ ཁིརིས་ཤོ་ ཧང་ཏེན་ཨ་ཉི་ ད་ཝུད་ག་སྲས་ གི་ཝ་ཨོ་ཕེ་ཡ་དག་ཉི་ གསུངས་མ༌ལ།
46ཐུར་གི་རང་ རོ་ཀ་དྲི་ཝ་ག་ལན་ཨ་ཉི་ ཆཱས་ཁམ་ཐུར་བུ་ མཇལ་བེ་མར་བ༌ལ། ཉི་ཨོ་ཉ་ནོང་ཀེ་ག་ཏཱན་ སོ་ངོ་ཐུར་གི་རང་ རོ་ཀ་དྲི་ཝ་ཇི་མེ་ག་ ཕོ་མ་ཐོང་མ༌ལ༎
Currently Selected:
མ་ཏི། 22: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
