མ་ཏི། 15

ཙང་མ་དང་མ་ཙང་མ།

1ཡ་རུ་ཤ་ལེམ་གེ་ཨུ་ཁཱན་ ཕ་རི་སི་པ་བ་དང་ བཀའ་ཁྲིམས་ག་ སློབ་དཔོན་བ་ཀི་ ཡི་ཤུ་ག་ཞུ་ཝ་ལ་ 2ཨ་ཧ་དང་པོ་ག་ ཕ་མ་གང་ཀེ་རང་ཨ་ཉི་ཨུ་ཁཱན་ ལུགས་སྲོལ་ཁེ་པ་ ན་ག་སློ་མ་བ་ཀི་ ཧང་ཨ་ཉི་ ཆ་གནས་ཐ་ལུ་མཱན་ཅ་ཡ། ཧང་ཡ་དག་ནེ་ལ་ རོག་ཏེ་བ་ཀི་ མ་ཟ་ལེ་གོ་མ་ ག་དང་ཟིག་པུ་མ་ལ་དག༌ཉི།

3ཡི་ཤུ་གི་ལན་གནང་ཉི་ ན་ཧ་ལུགས་སྲོལ་ག་ཡོར་ཀེ་ ན་ཤི་ཧང་ཨ་ཉི་ དཀོན་མཆོག་ག་བཀའ་རྒྱ་ག་ ཆ་གནས་ཐ་ལུ་མཱན་ཅ་ཡ་དག་ཉི་ གསུངས་མ༌ལ། 4ཧང་ཡ་དག་ནེ་ལ་ དཀོན་མཆོག་གི་ བཀའ་གནང་མ་ཅ་ ཨ་པ་དང་ཨ་མ་ག་ ཆ་གནས་ཐའི། ཉི་ཨི་བི་གི་ ཨ་པ་དང་ཨ་མ་ག་ཀོར་གེ་ ཆཱས་ངན་པ་ཡེག་པ་ཐུར་ ཨོ་ཉ་སོ་ངོ་ཁེ་པ་ ཤེ་ལེ་གི་ལ་དག༌ཉི། 5དག་པ་ཀབ་ཉི་ ན་ཤི་ཡེག་ལ་ ཨ་མ་དང་ཨ་པ་ག་ མ་པ་ཏ་ ཇི་གི་ ན་ཆིང་ག་རུམ་པ་ཨོ་ཕེ། དག་པ་ཀབ་ཉི་ དཀོན་མཆོག་ག་ཏཱན་ སྙན་དར་ཕི་ཉི་ཆུ་མ་དག་ཉི་ ཡེག་ནེ་ལ་ དྲིག་པེ་དག༌ཉི། 6ཨོ་ཐེན་ཨ་ཉི་ ན་ཤི་ཡེག་ལ་ རོག་ཏེ་བ་ཀི་ ཕ་མ་ག་ ཆ་གནས་ཐ་ལེ་མ་ཁེ་ལ་དག༌ཉི། ན་ཧ་ལུགས་སྲོལ་ག་ཡོར་ཀེ་ ན་ཤི་དཀོན་མཆོག་ག་ བཀའ་རྒྱ་ག་ ཆ་གནས་ཐ་ལུ་མ༌ལ། 7ནའི་ཤོ་ འུ་དྲ་པ་བ་གི༌ལ། ཡ་ཤའི་ཡ་གི་ ཨོ་ཐེན་ཨ་ཉི་ཕྲིག་ཀིན་ ན་ཧ་ཀོར་གེ་ ལུང་བསྟན་མ༌ཅ།

8ཨོ་ཐ་སོ་ངོ་བ་ཀི་ རོག་ཏེ་བ་ཀ་ ནོ་ཝང་ལེབ་ཅི་གི་ཨ་ཉི་ ཇ་ག་ཆ་གནས་ཐཱན༌ཅ། དག་པ་ཀབ་ཉི་ རོག་ཏེ་བ་ཀ་ སེམས་གི་ནེ་ལ་ གནམ་མེད་ས་མེད་ ལམ་རིང་མུ་ག༌ཅ། 9རོག་ཏེ་བ་ཀི་ ཇ་ག་དེ་ཝ་ཏོང་པ་ གསོལ་ཝ་ཏབ༌ཅ། ཉི་རོག་ཏེ་བ་ཀི་ ཡེ་ཁཱན་ཁེ་པ་ སོ་ངོ་གི་ཙམ་ཁཱན་བ་གི་ལ་#15:9 ཡ་ཤའི་ཡ་ག་དཔེ་ཆ་ 29:13 དག༌ཉི།

10ཉི་ཡི་ཤུ་གི་ སོ་ངོ་བ་རཱན་ཐཱན་ གསུངས་མ་ལ་ ཇི་གི་ཡེག་ཁཱན་ཁེ་པ་ ཧ་གོ་ལེ་ག་མིག་པ་ཕི། 11སོ་ངོ་ག་ནོ་ཝང་གེ་ ཕོ་ལང་ནང་ཀ་དི་ཁཱན་གི་ རོག་མ་ཙང་མ་ཅོད་པུ་མཱན༌ཅ། དག་པ་ཀབ་ཉི་ ནོ་ཝང་ནང་ཀེ་ ཕིས་ཀ་ཤོ་ཁཱན་གི་ རོག་མ་ཙང་མ་ཅོད་ཅ་གི་ལ་དག༌ཉི།

12ཨོ་ཉ་ཚི་ངེ་ རོ་ཀ་སློ་མ་བ་ཨུན་ཐཱན་ ཞུ་ཝ་ལ་ ནཱན་གི་གསུངས་ཁཱན་ཁེ་པ་ ན་ཐ་ལ་ཀབ་ཉི་ ཕ་རི་སི་པ་བ་ རོ་ཙིག་པ་ག་ ནཱན་གི་མཁྱེན་མ་སྨོ་དག༌ཉི།

13རོ་ཀི་ལན་གནང་མ་ལ་ ཞིང་ཁམས་ག་བཞུགས་ཁཱན་ ཇ་ག་ཡབ་གི་ མ་ཆེ་ཁཱན་ཤིང་ ཐམས་ཅན་རང་ ཝུས་ཉི་གེ༌མེ། 14རོག་ཏེ་བ་ཀ་ཀོར་གེ་ སྡུག་བསྔལ་མ་ཨའི། ཧང་ཡ་དག་ནེ་ལ་ རོག་ཏེ་བ་ཤོ་ མིང་ཀ་ན་བ་རིག་ཁཱན་ མིང་ཀ་ན་བ་གི༌ལ། ཉི་མིང་ཀ་ན་གི་ མིང་ཀ་ན་ག་ ལམ་རིག་ནེ་ལ་ རོག་ཉིག་ཙིང་རང་ ཧོང་ཅི་ནང་ཀ་ རོ་ཁེ་ཇོང་མེ་དག༌ཉི།

15དག་པ་ཀབ་ཉི་ པ་ཏྲུས་གི་ཞུ་ཝ་ལ་ ཨ་ཧ་ཏཱན་དཔེ་གཏམ་ག་ དེན་ཐ་ཁྲེ་ཉི་གནང་ཤོ་དག༌ཉི།

16ཡི་ཤུ་གི་གསུངས་མ་ལ་ ན་ཤི་བུ་ ཧ་གོ་ལུ་མ་ལ་སྨོ། 17ན་ཤི་ཟ་ཁཱན་ ཐམས་ཅན་རང་ ཕོ་ལང་ནང་ཀ་དིན་ཐཱན་ ལུས་པུ་གེ་ཕིས་ཀ་ཤོ་ཉི་དིན༌ཅ། 18དག་པ་ཀབ་ཉི་ ཆཱས་ངན་པ་ཁེ་པ་ སེམས་ངན་པ་ནང་ཀེ་ ཤོན་ཅ་གི༌ལ། ཉི་ཨོ་ཉེ་གི་ སོ་ངོ་མ་ཙང་མ་ཅོད༌ཅ། 19ཧང་ཡ་དག་ནེ་ལ་ སོ་ངོ་ག་སེམས་ནང་ཀེ་ ངན་པ་མི་ཉི་ སོ་ངོ་ཤེ་ལེ་ག་དང་ གཉེན་གྲོགས་གེ་ཕིས་ཀ་ ལུས་འབྲེལ་ཨ་ལེ་ག་ ཉི་ལུས་འབྲེལ་མ་ཙང་མ་ མ་འདྲ་ཝ་བ་ཨ་ལེ་ག་དང་ དྲོ་ཝཱན་ཨ་ལེ་ག་ ཉི་སོ་ད་ཕི་ལེ་ག་དང་ བཱརའ་ག་ཀོར་གེ་ མ་ལེག་པ་ཡེག་པེ་ག་ རིག་ཅ་གི༌ལ། 20ཨོ་ཐ་བ་ཀི་ སོ་ངོ་མ་ཙང་མ་ཅོད༌ཅ། དག་པ་ཀབ་ཉི་ ག་དང་མ་ཟིག་པཱན་ ཟ་ལ་ཀབ་ཉི་ སོ་ངོ་མ་ཙང་མ་ ཅོད་པུ་མཱན་ཅ་དག༌ཉི༎

མེ་ཝག་ཙ་ཐུར་ག་དད་པ།

21ཉི་ཡི་ཤུ་ ཨོ་ཉ་གེ་བྱོན་ཉི་ ཏྲུ་རོས་དང་སི་དོན་ག་ ཆ་འོག་ག་ཏཱན་བྱོན་མ༌ལ། 22ཉི་ཉ་ག་ཆོ་ཁཱན་ ཀ་ནཱན་ག་མེ་ཝག་ཙ་ཐུར་ རོ་ཀ་སྐུན་མདུན་ག་ཨུན་ཐཱན་ ཞུ་ཝ་ལ་ གཙོ་བོ་ ད་ཝུད་ག་རྒྱུད་པ་ ཇ་ག་ཐུང་ཀ་ སྙིང་རྗེ་ཨ་ཉི་གནང༌ཤོ། ཧང་ཡ་དག་ནེ་ལ་ ཇ་ག་ཟ་མིན་ཁེ་པ་ དོན་གི་ནོད་ཉི་ ཀ་ལུ་ཨ་ཉི་རང་ མར་བ་ཅ་དག༌ཉི།

23དག་པ་ཀབ་ཉི་ ཡི་ཤུ་གི་ ཨོ་ཉ་མེ་ཝག་ཙ་ག་ ལན་ཧང་རང་མ་གནང་མ༌ལ། ཉི་རོ་ཀ་ སློ་མ་བ་ཨུན་ཐཱན་ ཞུ་ཝ་ལ་ ཨོ་ཐ་མེ་ཝག་ཙ་ ཨ་ཧ་ཚིང་ཚིང་ཨུ་ཉི་ གནམ་མེད་ས་མེད་ ཤ་དར་ཕི་ན། དཱན་དི་ཨ་ཉི་ གསུངས་ཤོ་དག༌ཉི།

24ཉི་རོ་ཀི་ ཨོ་ཉ་མེ་ཝག་ཙ་ག་ གསུངས་མ་ལ་ ཇང་ཤོ་ ཨིས་རེལ་ག་ ཤི་ཤ་གེམ་ཁཱན་བ་ཀ་དེན་གེ་ཤ་ ཀུན་ཏི་ཝ་གི་ལ་དག༌ཉི།

25ལག་ཏང་ ཨོ་ཉ་མེ་ཝག་ཙ་གི་ རོ་ཀ་ཞབས་ཀ་ ཕྱག་འཚལ་ཐཱན་ཞུ་ཝ་ལ་ གཙོ་བོ་ ཇ་ག་སྐྱིད་སྡུག་གཟིགས་ཉི་ གནང་ཤོ་དག༌ཉི།

26ཉི་ཡི་ཤུ་གི་ རོ་ཀ་གསུངས་མ་ལ་ ཝག་ཙ་བ་ཀ་ལྟོ་རུན་ཐཱན་ ཁུ་བ་ཀ་ བི་ལེ་ག་མ་ན་ལ་དག༌ཉི།

27རོ་ཀི་ཞུ་ཝ་ལ་ གསུངས་དེན་ གཙོ་བོ། དག་པ་ཀབ་ཉི་ ཁུ་བ་ཀི་ རོག་ཏེ་བ་ཀ་ སྦྱིན་བདག་བ་ཀ་ དོང་ཏཱན་ཐུང་ཀེ་ཞུད་ཁེ་ཁཱན་ ཆེད་པ་བུ་ཟཱན་ཅ་དག༌ཉི།

28ཉི་གེ་ ཡི་ཤུ་གི་ རོ་ཀ་གསུངས་མ་ལ་ ཨ་མ་ ན་ག་དད་པ་ཆི་ལུ༌ལ། ནཱན་གི་ཞུ་ཝ་དང་ཏུ་ཉི་ ཇུང་མེ་དག༌ཉི། ཉི་ཨོ་ཉ་ཐྲེ་ཀེ་རང་ རོ་ཀ་ཟ་མིན་དྲག་པ་གི་ཝ༌ལ༎

ཡི་ཤུ་གི་ སོ་ངོ་ 4000 ག་ལྟོ་གནང་མ༌ལ།

29ཡི་ཤུ་ ཨོ་ཉ་གེ་བྱོན་ཉི་ ག་ལིལ་ག་མཚོ་ནབ་ཀེ་ཨ་ཉི་ ཕུ་ཐུང་ཀ་བྱོན་ཐཱན་ བཞུགས་པ༌ལ། 30ཉི་སོ་ངོ་བ་ཀི་ དང་མེ་མར་ཁཱན་དང་ མིང་ཀ་ན་བ་ བི་ག་དང་ སང་ཁཱན་བ་དང་ ནོ་ཝང་ཆོག་པེ་མ་སེ་ཁཱན་ ཡོང་བ་བ་ ཉི་བཱརའ་ན་ཚ་ཁེ་ཉི་མར་ཁཱན་ མང་པུ་ཐུར་ཕ་ཉི་ རོ་ཀ་ཞབས་ར་ག་ཐ་ཝ༌ལ། ཉི་རོ་ཀི་ ཐམས་ཅན་རང་ དྲག་ཉི་གནང་མ༌ལ།

31ཡོང་བ་བ་ཀི་ ནོ་ཝང་ཆོག་པེ་སེ་ཝ་རི་ཉི་ བི་ག་དང་སང་ཁཱན་བ་དྲག་ཉི་ ཉི་དང་མེ་མར་ཁཱན་བ་ དང་མེ་རེ་བ་རི་ཉི་ ཉི་མིང་ཀ་ན་བ་ཀི་ ཐོང་མ་ཀབ་ཉི་ སོ་ངོ་མང་པུ་ཨ་ཉི་ཛོམ་ཁཱན་ ཐམས་ཅན་རང་ ཡིད་ཆི་ཝ༌ལ། ཉི་རོག་ཏེ་བ་ཀི་ ཨིས་རེལ་ག་ དཀོན་མཆོག་ག་ བསྟོད་པ་ཕུལ་བ༌ལ།

32ཉི་ཡི་ཤུ་གི་ རོ་ཀ་སློ་མ་བ་རཱན་ཐཱན་ གསུངས་མ་ལ་ ཨོ་ཐ་སོ་ངོ་བ་ཀ་གོད་ཉི་ ཇང་གནམ་མེད་ས་མེད་ ཕང་པེ་ཨུ་ན། ཧང་ཡ་དག་ནེ་ལ་ རོག་ཏེ་བ་ ཇང་ཀབ་ཉི་ཆོ་ཉི་ ནོང་སམ་དི་ཝ། ཉི་ཨོམ་ རོག་ཏེ་བ་ཟ་ལེ་ག་ ཧང་རང་མ་ཝ་རི་ཝ༌ལ། ཇི་གི་ རོག་ཏེ་བ་ ཀུན་ཏི་ལེ་ག་ ཇ་ག་སེམས་མཱན༌ཅ། ཧང་ཡ་དག་ནེ་ལ་ རོག་ཏེ་བ་ བི་ནང་ཁུ་ཝ་ཨ་དེན་གེ་ ལམ་བར་ཀ་ཡེ་ལེ་ལེ་ཨ་ཉི་ ཐང་ཇོང་དུ་དག༌ཉི།

33སློ་མ་བ་ཀི་ཞུ་ཝ་ལ་ ཨོ་ཐ་སོ་ངོ་བ་ ཐམས་ཅན་རང་ ལང་པེ་ག་ལྟོ་ཤོ་ ཨོ་ཐ་ས་ཏོང་པ་ནང་ཀེ་ ཨ་ཤི་ ཨོ་གེ་ཉོང་པེ་ཡ་དག༌ཉི།

34ཡི་ཤུ་གི་ རོག་ཏེ་བ་ཀ་ཇི་མ་ལ་ ན་ཧ་ཀེབ་ཏང་ ཧབ་ཏུར་ཅ་ཡ་དག༌ཉི། ཀེབ་ཏང་ཟུམ་དང་ ང་ཟེ་མུ་ཉིག་ཙིང་སམ་ཕང་ཅ་དག་ཉི་ རོག་ཏེ་བ་ཀི་ ཞུ་ཝ༌ལ།

35ཉི་ཡི་ཤུ་གི་ སོ་ངོ་བ་ ས་ག་ལང་ཤོ་དག་ཉི་ བཀའ་གནང་མ༌ལ། 36ཡི་ཤུ་གི་ ཀེབ་ཏང་ཟུམ་དང་ ང་ཉིག་ཙིང་སམ་ཕང་ཆོ་ཁཱན་ཁེ་པ་ རོ་ཀ་ཕྱག་ཀ་བསྣམས་ཐཱན་ དཀོན་མཆོག་ག་ བཀའ་དྲིན་བསམ་མ༌ལ། ཉི་ཨོ་ཉ་ཀེབ་ཏང་ཟུམ་དང་ ང་ཉིག་ཙིང་སམ་ཕང་ཆོ་ཁཱན་ཁེ་པ་བིརིང་ཐཱན་ སོ་ངོ་བ་ཀ་བོང་ཉི་བི་ལེ་དེན་གེ་ རོ་ཀི་ རོ་ཀ་སློ་མ་བ་ཀ་གནང་མ༌ལ།

37རོག་ཏེ་བ་ ཐམས་ཅན་རང་ ཕོ་ལང་ཁ་ཝ་ཨ་ཉི་ ཟ་ཝ༌ལ། ཉི་ལཱན་ཇུ་ལུས་ཁཱན་བ་ དུས་ཉི་གོད་པ་ཀབ་ཉི་ ཤོ་མ་ཟུམ་ཕུང་མ་ཤོ་ཝ༌ལ། 38ཉི་ཨོ་ཉ་ཟ་ཁཱན་བ་ མེ་ཝག་ཙ་བ་དང་ ཝག་ཙ་བ་མ་ཙི་ལཱན་ ཕེ་ཝག་ཙ་ཙང་པུ་རང་ 4000 ཆོ་ཝ༌ལ། 39ཉི་གེ་ ཨོ་ཉ་སོ་ངོ་བ་ཀུན་ཏིན་ཐཱན་ རོག་ཨོ་ཉ་གེ་ གྲུ་ནང་ཀ་ནུབ་ཉི་ ས་ཆ་ མ་ག་དཱན་དག་ས་ག་ཏཱན་ བྱོན་མ༌ལ༎

Currently Selected:

མ་ཏི། 15: TNTB

Highlight

Copy