Matiye 15

Yiezu àá ɓɛ́ nìkĩ́ɛ làndɛ́ bòo

Mar 7.1-23

1Ɛ́ Farizĩɛɓɛ dɔ̀ àá ɓɛ́ Moyiize làndɛ́ kɛ̀ránliè dɔ̀ ɛ́ van ɛ́ lɔ́ Zerizalɛɛmu ɛ́ ɓɛrɛ yú Yiezu ɛ̀ ɓɛ̀ ɛ́ ɔ̀ dìenin nɛ làa: 2«Hɔ̀ kɛ wiɛ ɛ́ kɔ́ kɛ̀ránzɛ̀ɓɛ̀ ɛ́ dàa yáà mɛ̀ndɛ̃ kìe nìkĩ́ɛ làndɛ́? Ɓɛ̀ yáà tiɛ ɓɛ́ níhí vé ɛ̀ dàá dí kɛ̀a bòo lɛ ɛ́ ɓɛ́ nìkĩ́ɛ làndɛ́ dàa nɛ ke wóo wé wɛ̀.» 3Ɛ́ Yiezu zɔn kɔ̃́niɛ ɓɛ̀ nɛ làa: «Ɛ̀ mìpe lò, mí wiɛ dàa wóò fùansí Dɔfĩn ɲunù tɛmu ǹ, ɛ̀ mì khíi wé mí làndɛ́ ɛ̀ mì mɛ̀ndɛ̃? 4Dɔfĩn ɛ́ bie nɛ: “Ɓàaní mì yàá àá mì nín ǹ” iè “kɛ́ nìnbírɔ dánkɛniɛ ɓá yàá tàá ɓá nín à fɔ́ɓán à ɓé.” 5Kɛ́ mípe ɛ́ den wóò bie nɛ nìnbírɔ kɛ́ á bie ɛ́ lɛ́ ɓá yàá ǹ tàá ɓá nín ǹ nɛ hɔ bòo lɛ ɛ́ mí hṹn mii dàá sĩiní-ɛ, ɛ́ iè hɛ̃mù bòo lɛ ɛ́ mí nɛ mii lɛ́ Dɔfĩn, 6ɛ̀ ɓàasɔ ɛ́ wo bĩníɛ yí sãawi à sĩiní ɓá yàá wɛ̀. Ɛ́ sí iè mìpe ɛ́ wóò fùansí Dɔfĩn bòo lɛ ɛ́ hɔ́ khɛ́ ǹ kɛ̀amu, ɛ̀ mì wé mí kùrú làndɛ́ ɛ̀ mì bè máahṹ. 7Mí hɛ̀ iè nìhĩ́dériè! Dɔfĩn bɔ̀háanírɔ Ezayi ɛ́ bòo hàarí bɔn, lè yìi lɛ á dàa hàarí bie hɔ̀pe biehĩ́ sɔ lɛ mì bòo hũn: À hàarí bie nɛ hɔ Dɔfĩn ɛ́ nɛ làa:

8 “Ɓɛ̀pe nìɛ sɔ lɛ iè bìe ɛ́ nìn ɓàanínin àá ɓɛ́ ɲɛ-bienù mí dòonún,

Kɛ́ peɓɛ̀ tĩɛ̀ ɛ́ viì ni cɛ̃̀un àá mi.

9 Peɓɛ̀ bòo lɛ ɛ́ ɓɛ́ wóò dàá ɓàaní mi ǹ ɛ́ ɲún mí,

Ɛ̀ peɓɛ̀ bòo lɛ ɛ́ ɓɛ́ wóò kɛ̀rán àá ɓɛ́ nìnbirìe,

Ɛ́ iè ɓɛ̀ nìnbirìe bòo lɛ ɛ́ ɓɛ́ wóò bie.”»

10Ɛ́ Yiezu ɛ́ khie vɔn ɓɛ̀ nìzã̀amáa à bie lɛ́ ɓɛ́pe ɓɛ́kùi ǹ nɛ làa: «Mì tɛ́ mí ɲɛkɛ̃̀a ɛ̀ mì ɲí hɔ́ bòo lɛ ɛ́ nín bie lɛ́ miɛ ǹ ɲún. 11Hɔ̀ yí hɔ́ bòo lɛ ɛ́ wóò zɔ àá ɔ́ nìnbírɔ ɲunù ɛ́ ti-e wóò liení, kɛ́ hɔ́ iè hɔ̀ lɛ ɛ́ wóò zɔ lé àá piè ɲunù ɛ́ ti-e wóò liení.»

12Ɛ́ Yiezu kɛ̀ránzɛ̀ɓɛ̀ ɛ́ ɓen lúwiniɛ ɔ̀ ǹ ɛ̀ ɓɛ̀ bie lɛ́ à ǹ nɛ làa: «Kɔ́ dũ kɛ́ kɔ́ bòo lɛ ɛ́ kɔ́ khɛ́ ɛ́ zɔn ɓɛ̀ Farizĩɛɓɛ ǹ?» 13Ɛ́ Yiezu zɔn kɔ̃́niɛ nɛ lɛ: «Vɛ̃̀hṹ yée vɛ̃̀hṹ lɛ ɛ́ kìe Yàá lɛ wi hɔ hóohũn ɛ́ yí teń yí fɛ́ ɛ́ ɓɛ́ ɓén bùín ɛ́ lé yán. 14Mì fùansí ɓà ǹ. Ɓɛ̀ iè muaɓɛ̀ lɛ ɛ́ dú muaɓɛ̀ híɛhɔ́! Kɛ́ mui ɛ́ dú ɓá ńkɔnù mui híɛhɔ́, ɛ́ ɓɛ́pe ɓɛ́ ɲuunáa ɛ́ vɛ́ kuén zɔ kṹn.» 15Ɛ́ Piɛre zɔn bie lɛ́ à ǹ nɛ làa: «Munkɛ le wĩ̀ sɔ ɲún ɛ̀ lɛ́ kie ǹ.» 16Ɛ́ Yiezu zɔn nɛ làa: «Mìpe lò ɓiɛ̀ pɛ́wi bɔ̀dũmunù ɛ́ mí? 17Mí yí dũ kɛ́ hɔ́ bòo lɛ ɛ́ wóò zɔ àá nìnbírɔ ɲunù míkùi ɛ́ wóò vɛ síɛ piè vùkì hũn ɛ̀ dàá khíi vɛ lé àá yíe? 18Kɛ́ hɔ́ bòo lɛ ɛ́ wóò zɔ lé àá nìnbírɔ ɲunù, ɛ́ wóò zɔ lé àá piè tĩì hũn, ɛ́ sí iè bòo lɛ ɛ́ ti-e wóò liení. 19Iè hɔ̀ lɛ ɛ́ hɔ́ bòo lɛ ɛ́ wóò zɔ lé àá ɔ́ nìnbírɔ tĩì hũn ɛ́ iè hɔ̀ nùn-koohɛ̃ lɛ temu wóò lɛ́ à dàá wé hɔ́ bɔ̀koohɛ̃ kɛ̀a hɔ nìɓénlɔ́ àá ńféɓán àá ńdaaníkɛkũǹ àá kɛ̃̀míhĩ́ àá nìnbirìe ɲihĩ́ɛ ɓúukɛrɔ́ àá nìtòokɛà. 20Sí iè hɔ̀pe bòo lɛ ɛ́ wóò liení-ɛ nìnbírɔ. Kɛ́ ńdí kɛ́ kɔ́ níhĩ́ ɛ́ yí tiɛ kɛ̀a bòo lɛ ɛ́ mí làndɛ́ dàa khɛ́ hɔ́, ɛ́ yí dɛ̀ yá lɛ́ ɛ́ nìnbírɔ ɛ́ le wɛ̀.»

À hũnú dɔ̀ lɛ ɛ́ yí Zuifu ńdɛsĩ̀nlɔ́ bòo

Mar 7.24-30

21Ɛ́ Yiezu ɛ́ zɔn lɔ́ lé viì sɔ hũn, ɛ́ khie van Tiire àá Sidɔn lóoniɛ̀ pɛ̃̀hɛ̃ hũn. 22Ɛ́ Kanan hṹnu dɔ̀ lɛ ɛ́ lé hɔ́pe pɛ̃hɛ̃ sɔ hũn ɛ́ ɓɛrɛ ɓen yú Yiezu à zɔn bérɛ́ ɛ́ nɛ#15.22 Hɔ̀ lɛ ɛ́ ɓɛ́ nɛ Kanan hṹnu iè bòo lɛ ɛ́ zɛ̃́ní kɛ́ ápe hṹnu sɔ ɛ́ hàarí yí Zuifuɓɛ hṹnu wɛ̀. làa: «Ɲunsɔ, Daviide Zuú, mi niǹ miinɛ̀! Niǹ hãá ɛ́ ńɲíkĩ́rɔ dɔ̀ ɛ́ wi nin ɛ́ ɔ̀ lɔ̀n ɛ̀ biení cɛ̃̀un.» 23Kɛ́ Yiezu ɛ́ dú mí ɲunù à kɛ́ á. Ɛ́ piè kɛ̀ránzɛ̀ɓɛ̀ ɛ́ ɓɛrɛ lúwiniɛ ɔ̀ ǹ ɛ̀ ɓɛ̀ zɔn bie lɛ́ à ǹ nɛ làa: «Lɛ́ nɛ a lan, à dɛ̃̀ ɛ́ bénkɛ ke máahṹ fúu.» 24Ɛ́ Yiezu ɛ́ zɔn nɛ làa: «Dɔfĩn ɛ́ tɔrɛ mi ɛ́ ń ɓɛrɛ ɓɛ̀ Yizarayɛɛle nìɛ lɛ ɛ́ kɛ kɛ̀a ɓɛ pirìe lɛ vṹnun ɓɛ́ dòonún bòo hũn.» 25Á hṹnu sɔ ɛ́ ɓɛrɛ síɛ mí nunkɛ́yìe lɔ̀n Yiezu híɛhɔ́ à nɛ làa: «Ɲunsɔ, sĩiní mi.» 26Ɛ́ Yiezu ɛ́ zɔn nɛ làa: «Hɔ̀ yí te mí yìe ɛ̀ ɓɛ̀ mìí ɓɛ́ zĩncãahɛ̃ díe ɛ̀ khíi kóosí lɛ́ ɓɛ́ bɔn-zàani ǹ wɛ̀.» 27Á hṹnu zɔn nɛ: «Ɲunsɔ, hɔ̀pe wo bɔn, kɛ́ ɓɛ́ bɔhĩ́ ɛ́ wóò khui hɔ díe wàrànɓɛ̀ lɛ ɛ́ kùenkɛ síɛ kɛ́ ɓàasiè ɛ́ dí ɛ̀ ɓiɛ̀ dí.» 28Ɛ́ Yiezu ɛ́ zɔn bie lɛ́ à ǹ nɛ làa: «Hṹnu, kɔ̀ ńdɛsĩ̀nlɔ́ ɛ́ hɛ̀ ɓàń! Nɛ kɔ bòo lɛ ɛ́ kɔ́ ɛ́ cɛ̀ ɛ̀ ɲunù tí.» Ɛ́ mí laà hũn, ɛ́ piè hãá ɛ́ yòó wan.

Yiezu ɛ́ dɔriè bìkuì ɛ̀ wiɛní

29Ɛ́ Yiezu zɔn lɔ́ yán ɛ́ khie van hɔ̀ Kalile ɲun-bɛhɔ́ ɲunù. Á van yòó lé ɓúkìe dɔ̀ ɛ́ yòó kɛsí yán. 30Ɛ́ ɓɛ́ nìzã̀amáa ɛ́ van ɓɛrɛ piè viì àá ɓɛ́ lóohĩ́ àá ɓɛ́ muaɓɛ̀ àá ɓɛ́ mùamúaɓɛ́ àá ɓɛ́ bikiè àá ɓɛ́ dɔriè bìɓuà bìkuì dɔ̀ ɛ́ ɓɛrɛ bɔ̀sí piè híɛhɔ́, á wiɛníkɛa ɓɛ̀ ɓɛ́kùi. 31Ɛ́ hɔ́ lɛ ɛ́ ɓɛ́ nìzã̀amáa ɛ́ mɔn kɛ́ bikiè ɛ́ bie, ɛ̀ ɓɛ́ lóohĩ́ ɛ́ wan, ɛ̀ ɓɛ̀ mùamúaɓɛ̀ ɛ́ vɛ, ɛ̀ ɓɛ̀ muaɓɛ̀ ɛ́ yìe loo hɔ bòo, ɛ́ hɔ́ hɛ̀ yòokɛa peɓɛ̀ lɔ̀n. Ɛ́ ɓɛ́ wo khie ɛ́ ɓɛ̀ Yizarayɛɛle nìɛ Dɔfĩn ɛ̀ ɓàanínin.

Bòo lɛ ɛ́ Yiezu dàá bĩniɛ díiniɛ ɓɛ̀ nìnbí-dũmu

Mar 8.1-10

32Ɛ́ Yiezu ɛ́ vɔn mí kɛ̀ránzɛ̀ɓɛ̀ à bie lɛ́ ɓà ǹ ɛ́ nɛ làa: «Ɓɛ̀pe nìzã̀amáa lɛ ɛ́ miinɛ̀ ɓaa mi; iè hɔ̀ lɛ ɛ́ lɛ iè wihĩ́ bɔ̀nbɔ̀ tĩ kɛ́ ɓɛ́ wi àá mi kɛ́ ɓɛ́ yí dàa bòo lɛ ɛ́ dí wɛ̀. Ń yí wɛ nin fùansí ɓà ǹ ɛ̀ ɓɛ̀ lan ɓɔ kɛ́ ɓɛ́ yí dí bòo dɔ̀ wɛ̀. Ɛ́ wɔ́ khɔn ɛ́ ɓɛ́ lé kùenkɛ le wṹn lɔ̀n.» 33Ɛ́ piè kɛ̀ránzɛ̀ɓɛ̀ ɛ́ zɔn bie lɛ́ à ǹ ɛ́ nɛ làa: «Ɛ́ hɔ́ wo iè yí ɛ́ ké vɛ yí hɔ́ díe hũn lèpe viì sɔ lɛ ɛ́ bòo dɔ̀ ɛ́ mí hũn, ɛ̀ ɓɛ̀pe miikɛ nìzã̀amáa lɛ ɓɛ́kùi ɛ̀ dàá yí dí?» 34Ɛ́ Yiezu ɛ́ zɔn ɛ́ ɓɛ̀ dìenin nɛ làa: «Hɔ̀ iè búrú yɛ ɛ́ mí dàa? Ɛ́ ɓɛ́ zɔn nɛ hɔ iè hùuɲu àá ciè bìcíni dɔ̀.» 35À nɛ ɓɛ nìzã̀amáa ɛ̀ síɛ kansí lé sṹsùnù. 36À khie fɔ́ hɔ́ búrú hùuɲu sɔ àá ɓɛ́ ciè, à yòó dɔ́ hɔ́ Dɔfĩn bɛrikɛ à ɓùenkɛa hɔ̀ ɛ́ khie lɛ́ mí kɛ̀ránzɛ̀ɓɛ̀ ǹ ɛ́ ɓɛ́ khie sankɛa ɛ́ lɛ́ ɓɛ́ nìzã̀amáa ǹ ɓɛ́kùi. 37Ɛ́ ɓɛ́pe ɓɛ́kùi ɛ́ dú tù. Ɛ̀ ɓɛ̀ kɛ̀ránzɛ̀ɓɛ̀ ɛ́ khuie hɔ̀ bɔ̀ɲúuhɛ̃ lɛ kɛ́ ɛ́ tíiníkɛa sìkíe hùuɲu. 38Ɓɛ̀ nìnbirìe lɛ hàarí dú hɔ́ díe sɔ, ɛ́ ɓɛ́ báa ɛ́ hàarí iè muasíe naa (4 000), kɛ́ ɓɛ́ hã́a àá ɓɛ́ zĩncãahɛ̃ bòo mí yán wɛ̀.

39Ɛ́ Yiezu wo nɛ ɓɛ nìnbirìe lan ɓɔ, à yòó zɔn lè ɲumu wiè à cɔ́ van Makadan pɛ̃̀hɛ̃ hũn.

Currently Selected:

Matiye 15: bwj

Highlight

Copy