Zãn 18

Yiezu ɓaàrɔ́ bòo

Mat 26.47-56; Mar 14.43-50; Lik 22.47-53

1Ɛ́ hɔ́ lɛ ɛ́ Yiezu khɛ́ hɔ́pe sí vɔ́, ápe àá mí kɛ̀ránzɛ̀ɓɛ̀ ɛ́ khie lɔ́ yán ɛ́ van cánkɛ́a lè Sederɔn ńɲindáanú ɛ́ van lɔ́. Ɛ̀ hɔ̀ kɔnlɔ́ dɔ̀ ɛ́ hṹn wi yán ɛ́ ɓɛ́ van lɔ́ zɔn hũn. 2À Zudaasi lɛ ti-e mii dé ɓɛ́ nìnbirìe núnú hũn, ɛ́ ɓiɛ̀ hṹn dũ yán, iè hɔ̀ lɛ ɛ́ Yiezu àá mí kɛ̀ránzɛ̀ɓɛ̀ ɛ́ hṹn wóò wé ɛ̀ ɓɛ̀ páaní vɛ kóo ɓánlɔ̀n yán. 3Á Zudaasi ɛ́ khie fɔ́ ɓɛ́ sɛ̃̀nɛ̀dɔ́síɓɛ́ dɔ̀ àá ɓɛ́ Dɔfĩn Zũ-hìeriè dɔ̀ lɛ ɛ́ ɓɛ́ khɛ̃́ndàariè hándíe àá ɓɛ́ Farizĩɛɓɛ ɛ́ te tɔrɛ, ɛ́ dàa van hɔ̀ kɔnlɔ́ sɔ hũn. Ɓɛ̀ hàarí ɲíikɛa hɔ̀ dũń ɛ́ zɛ̃nkɛanin, ɛ̀ ɓɛ̀ lò dàa pɛ̃̀ntĩ́hĩ́ àá mí hĩɛ̀ tĩ̀ɛ.

4Kɛ́ Yiezu den hṹn dũ hɔ bòo lɛ ɛ́ mii wí-è ǹ míkùi. Á khɛ̃̀nɛ van lúwiniɛ ɓà ǹ, à zɔn ɓɛ̀ dìenin nɛ làa: «A wie ɛ́ mí ɛ́ cɛ̀?» 5Ɛ́ ɓɛ́ zɔn kɔ̃́niɛ ɔ̀ nɛ làa: «À iè Nazarɛɛte Yiezu.» Ɛ́ Yiezu zɔn khɛ́ lɛ́ ɓà ǹ nɛ làa: «Hɔ̀ iè ǹpe.» À Zudaasi lɛ ti-e mii dé ɓɛ́ nìnbirìe núnú hũn ɛ́ wi yán àá ɓɛ́. 6Ɛ́ hɔ́ lɛ ɛ́ Yiezu nɛ hɔ iè mípe, ɛ́ ɓɛ́ dìɛkɛa van lɔ́ àá máahṹ, ɛ́ van lɔ́ kùenkɛa síɛ lè sṹsùnù. 7Ɛ́ Yiezu bĩniɛ zɔn ɓɛ̀ dìenin nɛ làa: «À iè wie ɛ́ mí ɛ́ cɛ̀?» Ɛ́ ɓɛ́ zɔn nɛ iè Nazarɛɛte Yiezu. 8Ɛ́ Yiezu zɔn kɔ̃́niɛ ɓɛ̀ nɛ làa: «Ń bie hɔ̀ lɛ́ miɛ ǹ nɛ hɔ iè ǹpe. Kɛ́ hɔ́ ɓen iè ǹpe ɛ́ mí ɛ́ cɛ̀, ɛ̀ mì fùansí ɓɛ́lɛ kɛ́ ǹ nɛ ɓɛ lan.» 9Hɔ̀ ɛ́ wɔ́ kɛ̀amu, ɛ́ lé bienù lɛ á hṹn bie ɛ́ dàa ɲunù ɛ́ tú. À den hṹn bie nɛ làa: «Ɓɛ̀pe lɛ ɛ́ kɔ́ lɛ́ mi ǹ, ɛ́ hɛ̀rí nìnbí-cóoní ɛ́ ń yí fùansí à vĩ́ wɛ̀.»

10Hɔ́rɔsí ɛ̀ Simɔn Piɛre ɛ́ hṹn dàa khɛ̃́n-tɔ́nú. Á zɔn vua lè à yòó cɛ̃́nɛ à khɛ̃́ndàarɔ wì-bɛhɔ́ tɔntɛ́ ǹ, ɛ́ ɓúo piè ńdóonín ɲɛkɛ̃hṹ ɛ́ khie síɛniɛ. À tɔntɛ́ sɔ hàarí yèrè Malikiise. 11Ɛ́ Yiezu zɔn bie lɛ́ á Piɛre nɛ làa: «Yòó dé kɔ́ khɛ̃́n-tɔ́nú mí lóohɔ́ hũn. Kɔ́ ɛ́ lieníkɛ ɛ̀ kɔ̀ nɛ niǹ lɔ̀n ɛ́ yí mii be kɛ̀a bòo lɛ ɛ́ kìe Yàá dàa nɛ hɔ fɔ́ɓán ɛ̀ hɔ̀ wé?»

12Ɛ́ ɓɛ́ sɛ̃̀nɛ̀dɔ́síɓɛ́ àá ɓɛ́ hándí, àá ɓɛ́ Zuifuɓɛ Dɔfĩn zũhìeriè ɛ́ khie ɓaa Yiezu ɛ́ can níhĩ́. 13Ɛ̀ ɓɛ̀ dàa ɔ̀ ɛ́ dàa van Haanɛ yíe vɔ́. À Aanɛ sɔ ɛ́ hàarí iè ɔ̀ Kayiifu ɓà he-bɛ́rɔ. Àpe Kayiifu sɔ ɛ́ temu hàarí iè Dɔfĩn khɛ̃́ndàarɔ wì-bɛhɔ́ pehɔ̀ lóo ǹ. 14Ɛ́ hɔ́ iè ɔ̀pe Kayiifu ɛ́ temu hàarí bie lè bérɛ́ bienù ɛ́ lɛ́ ɓɛ́ Zuifuɓɛ nɛ hɔ bòo ɛ́ tṹ ɛ̀ nìnbí-cóoní ɛ̀ hí ɓɛ́ cɛ̃̀mɛ̀nɛ́ nìɛ yènsénín.

Piɛre ɛ́ pɛ̃́ nɛ mí yí dũ Yiezu wɛ̀

Mat 26.69-70; Mar 14.66-68; Lik 22.55-57

15Simɔn Piɛre ɛ̀ khíi páa Yiezu kɛ̀ránzuú wìɓuiɛ̀ dɔ̀ ɛ́ hàarí bɔ̀ Yiezu máahṹ. Á khɛ̃́ndàarɔ wì-bɛhɔ́ mu ɛ́ dũ a kɛ̀ránzuú sɔ. Á kɛ̀ránzuú sɔ ɛ́ páaníɛ van zɔn piè dànkɔ̀ hũn àá Yiezu. 16Kɛ́ á Piɛre ɛ́ pe dɛ̃̀ hɔ̀ yíe, lè zĩínù ɲunù. Á kɛ̀ránzuú lɛ á khɛ̃́ndàarɔ wì-bɛhɔ́ ɛ́ dũ ɛ́ van lɔ́ bie àá ɔ́ hṹnu lɛ te le zĩínù ɲunù ɛ́ hìenin, à fɔ́ á Piɛre ɛ̀ dàa yòó zɔn lè dànkɔ̀ hũn. 17Ápe hṹnu sɔ lɛ ɛ́ lè zĩínù ɲunù ɛ̀ hìenin ɛ́ zɔn Piɛre dìenin nɛ làa: «Kɔ̀pe sũǹ yí-e pe nùún sɔ kɛ̀ránzuú dɔ̀ hɛ̀?» Ɛ́ Piɛre zɔn kɔ̃́niɛ ɔ̀ nɛ làa: «Ńɓùé, niǹ bòo mí peɓɛ̀ hũn wɛ̀.» 18Tìɛní ɛ́ hàarí wi. Ɛ́ ɓɛ́ tɔntɛ́riè àá ɓɛ́ zũhìeriè ɛ́ hṹn zĩiniɛ hɔ̀ dṹn ɛ́ dɛ̃̀ ɛ́ wɛni. Ɛ́ Piɛre ɓiɛ̀ van dɛ̃̀ ɛ́ wɛni àá ɓɛ́.

Aanɛ ɛ́ Yiezu ɛ̀ dìekɛnin

Mat 26.59-66; Mar 14.55-64; Lik 22.66-71

19Á khɛ̃́ndàarɔ wì-bɛhɔ́#18.19 Hɛ̀rí kɛ́ hɔ́ lɛ á Kayiifu ɛ́ hàarí wɔ́ á khɛ̃́ndàarɔ wì-bɛhɔ́ à Aanɛ khṹu hũn, kɛ́ ɓɛ́ Zuifuɓɛ den pɛ́wi hàarí wóò vi-e Aanɛ nɛ khɛ̃́ndàarɔ wì-bɛhɔ́. ɛ́ zɔn Yiezu ɛ̀ dìekɛnin piè kɛ̀ránzɛ̀ɓɛ̀ bòo hũn, àá hɔ́ bòo lɛ á dàa wóò kɛ̀rán àá ɓɛ́ nìnbirìe bòo hũn. 20Ɛ́ Yiezu zɔn kɔ̃́niɛ ɔ̀ nɛ làa: «Ń hṹn wóò khɛ́ àá ɓɛ́ nìnbirìe ɓɛ́kùi ńpiemu hũn, ń hṹn wóò kɛ̀rán ɓɛ́ nìnbirìe ɓɛ̀ Zuifuɓɛ ńkóoɓánlɔ̀n zĩhĩ́ɛ hũn àá lépe Dɔfĩn zũ-bɛhɔ́ dànkɔ̀ hũn fúu, lɛ iè pe vuò lɛ ɛ́ ɓɛ́pe Zuifuɓɛ ɓɛ́kùi ɛ́ wóò vɛ kóo ɓánlɔ̀n hũn. Ń yí tànkɔ̀ní bòo dɔ̀ ɛ̀ bie wɛ̀. 21Ɛ́ hɔ́ iè ńɓùo ɛ́ kɔ́ dàa wɔ́ ńpe ɛ́ kɔ́ dìekɛnin? Dìe ɓɛpe lɛ ɛ́ ɲɛ́ hɔ́ bòo lɛ ɛ́ ń bie ǹ. Ɓɛ̀pe ɛ́ dũ hɔ bòo lɛ ɛ́ ń bie àá ɓɛ́.» 22Ɛ́ hɔ́ lɛ ɛ́ Yiezu ɛ́ bie kɛ̀amu, ɛ́ ɓɛ́ zũhìeriè lɛ hṹn wi yán ádɔ̀ ɛ́ yòó laa piè kekére à ɛ́ nɛ: «Ńɓúò ɛ́ kɔ́ dàa ɛ́ bie kɛ̀amu ɛ̀ lɛ́ ápe khɛ̃́ndàarɔ wì-bɛhɔ́ ǹ?» 23Ɛ́ Yiezu zɔn bie lɛ́ à ǹ nɛ: «Kɛ́ ń khɛ́ ben-koohɔ́, ɛ̀ kɔ̀ zɛ̃́ní bòo lɛ ɛ́ ń dàa khɛ́ khɔn. Kɛ́ ń ɓen yí khɛ́ khe, ɛ̀ ńɓùo temu lɛ́ ɛ́ kɔ́ dàa lú mi ǹ?» 24Ɛ́ Haanɛ nɛ ɓɛ dàá ɔ́ ɛ̀ dàá vɛ a khɛ̃́ndàarɔ wì-bɛhɔ́ Kayiifu viì kɛ́ piè níhĩ́ ɛ́ pɛ́wi can.

Piɛre ɛ́ sĩ̀n pɛ̃́ ɛ́ nɛ mí yí dũ Yiezu wɛ̀

Mat 26.71-75; Mar 14.69-72; Lik 22.58-62

25Hɔ́rɔsí ɛ̀ Simɔn Piɛre ɛ́ dɛ̃̀ ɛ́ hɔ̀ dṹn ɛ̀ wɛni. Ɛ́ ɓɛ́ khie ɔ̀ dìenin nɛ làa: «Kɔ̀pe sũǹ yí-e pe nùún mu kɛ̀ránzuú dɔ̀?» À sĩ̀n zɔn pɛ̃́ à nɛ làa: «Ńɓùé dɛ́, niǹ bòo mí ɓɛ́ hũn wɛ̀.» 26Á khɛ̃́ndàarɔ wì-bɛhɔ́ tɔntɛ́ dɔ̀ lɛ iè ɔ̀ nùún lɛ á Piɛre hṹn ɓuo ɲɛkɛ̃hṹ ɓà nìnbírɔ dɔ̀, ɛ́ zɔn bie lɛ́ à ǹ nɛ làa: «Nin wìe yí mi kɔ àá ɔ́pe nùún sɔ hɔ̀ kɔnlɔ́ hũn wɛ̀?» 27Ɛ́ Piɛre sĩ̀n zɔn pɛ̃́. Ɛ́ mí laà hũn, á kɔ̀bíɛ ɛ́ zɔn wũama.

Ɓɛ̀ dàa Yiezu ɛ́ dàa van kuvɛrɛnɛɛre Pilaate viì

Mat 27.1-2; 27.11-31; Mar 15.1-20; Lik 23.1-5; 23.13-25

28Ɛ́ yɛǹbín dùdù, ɛ́ ɓɛ́ zɔn lɔ́ á Kayiifu yíe àá Yiezu, ɛ́ khie van ɔ̀ Rɔmu kuvɛrɛnɛɛre dànkɔ̀ hũn. Kɛ́ ɓɛ́ Zuifuɓɛ hándíe ɛ́ pe yí vɛ zɔ hɔ̀ dànkɔ̀ hũn wɛ̀, bòo lɛ ɛ́ wé, ɛ̀ ɓɛ̀ bí zɔ fĩiní ɓɛ́te, ɛ̀ ɓɛ̀ dàa bí dàń lé Nyiewɛlɔn sɛ́rí ɛ̀ dí wɛ̀. 29Á kuvɛrɛnɛɛre Pilaate ɛ́ ɓen lɔ́ peɓɛ̀ viì hɔ̀ yíe hũn à ɓɛ̀ dìenin nɛ làa: «Hɔ̀ iè bɔ̀koohɔ́ hɔ́sɔ ɛ́ mí nɛ ape nùún sɔ lɛ ɛ́ wɔ́?» 30Ɛ́ ɓɛ́ zɔn kɔ̃́niɛ ɔ̀ nɛ làa: «Kɛ́ á hṹn yí wé bɔ̀koohɔ́ dɔ̀, nɛ kè yí dàá ɔ́ ɓen lɛ́ kɔ ǹ wɛ̀.» 31Ɛ́ Pilaate zɔn bie lɛ́ ɓà ǹ nɛ làa: «Ɛ́ mí fí-e ɛ̀ vɛ lè lìe mìte ǹ mì làndɛ́ wṹn lɔ̀n.» Ɛ́ ɓɛ́ Zuifuɓɛ zɔn nɛ làa: «Ɲunù ɛ́ yí lɛ́ kiè ǹ nɛ ke lè nìnbírɔ lìe ɛ̀ ɓé wɛ̀.» 32Hɔ̀ wɔ́ kɛ̀amu, bòo lɛ ɛ́ wé ɛ̀ Yiezu bienù lɛ á hṹn bie ɛ́ dàa zɛ̃́niɛ bòo lɛ á dàa ɓén hí, ɛ̀ dàá ɲunù tí.#18.32 Zuifuɓɛ hṹn ɓen ɓɛ ɛ̀ ɓé nìnbírɔ lɛ ɛ́ wɔ́ bɔ̀koohɔ́ ɛ̀ ɓɛ̀ wóò taa ɔ taarɔ́. Kɛ́ ɓɛ́ Rɔmu siè ɛ́ pe temu wóò ɓáa ɓàasɔ lè ɓáalén dãànù lɔ̀n.

33Ɛ́ Pilaate yòó zɔn lè dànkɔ̀ hũn, à vɔn Yiezu ɛ́ zɔn dìekɛnin nɛ làa: «Hãà, kɔ́ iè Zuifuɓɛ bɛ́zuú?» 34Ɛ́ Yiezu zɔn kɔ̃́niɛ ɔ̀ nɛ làa: «Hɔ̀pe sí ɛ́ kɔ́ ɛ́ bie iè kɔ̀ kùrú bòo lɛ ɛ́ kɔ́ ɛ́ lieníkɛ yée kɛ́ ɓɛ́ iè ɓɛ̀dɔ̀ bòo lɛ ɛ́ ɓɛ́ bie lɛ́ kɔ ǹ niǹ bòo hũn?» 35Ɛ́ Pilaate zɔn nɛ: «Bòo ɛ́ ńpe ɛ́ iè Zuifu? Mì cɛ̃̀mɛ̀nɛ́ nìɛ àá ɓɛ́ khɛ̃́ndàariè hándíe ɛ́ te kɔ dàa ɛ́ ɓɛrɛ lɛ́ mi ǹ. Hɔ̀ iè ńɓùo ɛ́ kɔ́ wɔ́?» 36Ɛ́ Yiezu zɔn kɔ̃́niɛ ɔ̀ nɛ làa: «Niǹ bɛ́záanú bòo yí sĩ̀ lèpe dímíɲɛ́ sɔ lɛ ǹ wɛ̀. Kɛ́ niǹ bɛ́záanú ɛ́ hṹn wi lepe dímíɲɛ́ sɔ lɛ hũn, nɛ niǹ tɔntɛ́riè ɛ́ hṹn ɓén tɛ́ hɔ́ hĩɛ̀ niǹ ɲunù lɔ̀n, bòo lɛ ɛ́ wé ɛ̀ ɓɛ̀ bí ɓaà mi ɛ̀ dé ɓɛ́ Zuifuɓɛ hándíe núnú hũn wɛ̀. Kɛ́ ńɓùé, niǹ bɛ́záanú bòo ɛ́ yí sĩ̀ lèpe sṹsùnù sɔ lɛ ǹ wɛ̀.» 37Ɛ́ Pilaate zɔn ɔ̀ dìenin nɛ làa: «Ɛ́ kɔ́ wo iè bɛ́zuú?» Ɛ́ Yiezu zɔn nɛ: «Kɔ́ bie hɔ̀, ń iè bɛ́zuú. Ń tɔn ɛ́ ɓɛrɛ lè dímíɲɛ́ hũn, ɛ́ nin ɓen khɛ́ hɔ́ bɔ̀berà bòo ɛ̀ lɛ́ ɓɛ́ nìnbirìe ǹ. Ɛ́ nìnbírɔ lɛ wi bɔ̀berà wṹn lɔ̀n ɛ́ wóò tɛ́ mí ɲɛkɛ̃̀a à ɲí hɔ́ bòo lɛ ɛ́ nín bie.» 38Ɛ́ Pilaate ɛ́ zɔn ɔ̀ dìenin nɛ làa: «Bɔ̀berà iè ńɓúò?»

Ɛ́ hɔ́ lɛ á bie hɔ̀pe sí vɔ́, á sĩ̀n hĩ́nà van lɔ́ ɓɛ́ Zuifuɓɛ viì ɛ́ lɔ́ bie ɛ̀ lɛ́ ɓà ǹ nɛ làa: «Ń yí loo bɔ̀koohɔ́ lɛ ápe nùún sɔ lɛ ɛ́ wɔ́ wɛ̀. 39Kɛ́ hɔ́ lɛ ɛ́ mí Nyiewɛlɔn sɛ́rí ɛ́ wóo ɓen dɛ̃un, ɛ̀ ǹ wóò leń ɓɛ́ kɛ̀sí nìɛ nìnbí-cóoní dɔ̀, ɛ̀ fùansínin lɛ́ miɛ ǹ, ɛ́ mí biè wɛ nɛ n fùansí-e pe Zuifuɓɛ bɛ́zuú ǹ ɛ̀ lɛ́ miɛ ǹ?» 40Ɛ́ ɓɛ́ zɔn wũamɛkɛ kɛ́ ɓɛ́ ɛ́ bie nɛ: «Ńɓùé, àpe lɛ bòo mí wɛ̀! À Barabaasi iè pe ɛ́ kɔ́ fùansínin ɛ̀ lɛ́ kiè ǹ!» Hɔ́rɔsí à Barabaasi ɛ́ lò den hàarí iè kɛ̃̀mí-bíɛ.

Currently Selected:

Zãn 18: bwj

Highlight

Copy